25 Mo Melkesedek i bin toktok laod mo blesem Ebram.

26 Nao, Melkesedek i bin wan man we i gat fet, we i stap mekem ol stret mo gud samting; mo taem hem i smol pikinini, hem i bin gat respek long God, mo i blokem maot blong ol laeon, mo i kilimdaon bigfala faea we i laet strong.

27 Mo olsem ia nao, from se God i akseptem hem, oli odenem hem i kam wan hae pris folem plan blong kavenan we God i bin mekem wetem Inok;

28 kavenan ia i folem oda blong Pikinini blong God; mo oda ia i bin kam, i no tru long man, mo i no tru long tingting blong man; mo i no tru long papa o mama; mo i no tru long stat blong ol dei o en blong ol yia; be i kam long God.

29 Mo i kam long man tru long koling blong ol man we God i singaotem, folem tingting blong hem, i go long olgeta evriwan we i biliv long nem blong hem.

30 From God i bin mekem tabu promes long Inok mo long laen blong hem, wetem wan promes we hemwan i bin mekem, se evriwan we oli odenem olgeta folem oda mo koling ia, bae i gat paoa, tru long fet, blong brekemdaon ol bigfala hil, blong seraotem ol solwota, blong mekem ol wota oli kam drae, mo tanem rod blong olgeta;

31 Blong stanap agensem mo winim ol ami blong ol nesen, blong seraotem wol, blong brekem evri jen, blong stanap long fes blong God; blong mekem evri samting folem tingting blong God, folem oda blong God, blong i rulum evri ples we prins i rul mo ol paoa; mo olgeta samting, tru long tingting blong Pikinini blong God we i bin stap bifo stat blong wol.

32 Mo ol man we oli bin gat fet ia, we oli save kasem oda ia blong God, God i tekemaot olgeta taem oli stap laef yet, mo i tekem olgeta i go antap long heven.

33 Mo nao, Melkesedek i bin wan pris blong oda ia; from hemia, hem i bin kasem wan ples long Salem, mo oli bin singaotem hem, Prins blong Pis.

34 Mo ol pipol blong hem oli bin mekem ol stret mo gud wok, mo oli bin kasem heven, mo oli bin traem kasem siti blong Inok we God i bin tekemaot bifo, i seperetem siti ia long wol, mo i holemtaet kasem sam taem afta, o kasem en blong wol;

35 Mo God i talem, mo i mekem wan tabu promes long wan promes, se ol heven mo wol bae oli kam tugeta; mo ol pikinini blong God bae oli fesem ol tes olsem we i tru long faea.

36 Mo Melkesedek ia, afta we hem i bin stanemap stret mo gud fasin, ol pipol blong hem oli bin singaotem hem king blong heven, o long narafala toktok, King blong pis.

37 Mo hem bin i toktok laod, mo hem i bin blesem Ebram, we i hae pris, mo i man we i stap lukaot long stoahaos blong God;

38 Mo hem nao, God i bin putum hem blong hem i kasem ol taeting blong yusum blong ol puaman.

39 Taswe, Ebram i bin pem evri taeting we hem i bin gat i go long hem, i givim hem evri rij samting we hem i bin gat, we God i bin givim long hem i moa bitim wanem we hem i nidim.

40 Mo i bin hapen se God i bin blesem Ebram, mo i bin givim long hem ol rij samting, mo ona, mo ol graon; olgeta samting ia blong i blong hem blong taem we i no gat en, folem kavenan we hem i bin mekem, mo folem blesing we Melkesedek i bin blesem hem wetem.