JST, Jenesis 17:3–12. Komperem Jenesis 17:3–12
Ol pipol oli no bin stap obei long ol odinens blong gospel, mo hemia blong baptaes tu. God i eksplenem long Ebraham wanem i kavenan blong sakomsaes mo yia we ol pikinini oli stap akaontebol.
3 Mo i bin hapen se Ebram i bin bodaon wetem fes blong hem i kasem graon, mo i prea long nem blong Lod.
4 Mo God i bin toktok wetem hem, i talem: “Ol pipol blong mi oli tanem baksaed long ol tijing blong mi, mo oli no bin gohed blong folem ol odinens blong mi, we mi bin givim long ol papa blong olgeta;
5 Mo oli no bin obei long anoenting blong mi, mo fasin blong berem man, o baptaes we mi bin komandem olgeta long hem;
6 Be oli no obei long komanmen, mo oli stap folem fasin blong mekem baptaes blong ol smol pikinini, mo fasin blong saksakem blad.
7 Mo oli talem se blad blong stret mo gud man ia, Ebel, i bin ron from ol sin; mo oli no save olsem wanem nao bae oli ansa from hemia long fes blong mi.
8 Be long saed blong yu, luk, bambae mi mekem kavenan blong mi wetem yu, mo bambae yu yu papa blong plante nesen.
9 Mo kavenan ia we bambae mi mekem, i blong ol pikinini blong yu, bambae oli save olgeta long medel blong evri nesen. Bambae oli nomo singaotem nem blong yu, Ebram, be nem blong yu bae oli singaotem Ebraham; from mi mi mekem yu yu kam wan papa blong plante nesen.
10 Mo bambae mi mekem we yu yu gat plante we plante pikinini, mo bambae mi mekem plante nesen oli kamaot tru long yu, mo bambae ol king oli kamaot tru long yu, mo laen blong yu.
11 Mo bambae mi putum wan kavenan blong sakomsaes wetem yufala, mo bae i stap olsem kavenan blong mi bitwin mi mo yufala, mo laen blong yufala afta long yufala, long jeneresen blong olgeta; blong yufala i save fogud se ol pikinini oli no ansa from ol aksen blong olgeta long fes blong mi kasem taem nomo oli kasem eit yia.
12 Mo yufala i mas wokhad blong obei evri kavenan blong mi we mi bin mekem wetem ol papa blong yufala; mo yufala i mas obei long ol komanmen we mi bin givim long yufala tru long maot blong mi, mo bambae mi stap wan God long yufala mo long laen blong yufala afta long yufala.”
JST, Jenesis 17:23–24. Komperem long Jenesis 17:17–18
Ebraham i stap glad long profesi blong taem ia we bae Aesak i bon long wol mo i stap prea from Ismael.
23 Afta, Ebraham i bin bodaon wetem fes blong hem i kasem graon, mo i bin stap glad, mo i bin talem long hemwan long hat blong hem: “Bae wan pikinini i bon, mo bae i pikinini blong wan man we i gat wan handred yia, mo Sera, we i gat naenti yia, bae i bonem pikinini ia.”
24 Mo Ebraham i talem long God: “!O sapos nomo Ismael i stap wokbaot long stret fasin long fes blong yu!”