JST, Jenesis 9:4–6. Komperem long Jenesis 8:20–22
Afta long Bigfala Wota we i ron, Noa i bin askem Lod blong i no sakem strong tok agensem wol bakegen.
4 Mo Noa i bin bildim wan olta blong wosip long Lod, mo hem i tekem evri animol we oli klin long fes blong Lod, i tekem evri pijin we oli klin long fes blong Lod, mo bonem olgeta olsem ol ofring antap long olta; mo hem i talem tangkyu long Lod mo i bin stap glad insaed long hat blong hem.
5 Mo Lod i bin toktok long Noa, mo Lod i blesem Noa. Mo Noa i smelem wan swit smel mo hem i talem long hemwan long hat blong hem:
6 “Bae mi prea long nem blong Lod, se neva bambae hem i singaotem trabol i kam long wol ia from ol samting we man i mekem, from we tingting blong hat blong man i rabis stat long taem we hem i yangfala; mo tu, bae mi prea se bambae hem i no save spolem bakegen evri samting we i stap laef olsem we hem i bin mekem finis, hemia long enitaem we wol ia i stap.”
JST, Jenesis 9:10–15. Komperem long Jenesis 9:4–9
Man i mas ansa from fasin blong mekem blad blong animol mo man we i ron. God i mekem wetem Noa mo ol boe blong hem semfala kavenan ia we Hem i bin mekem wetem Inok.
10 Be, blad blong evri animol we i laef we mi bin givim yu olsem mit, bae i mas ron long graon, mo hemia i tekemaot laef blong animol ia; mo blad blong hem, bae yufala i no kakae.
11 Mo i tru, bae yufala i no mas mekem blad i ron, be blong yufala i gat mit blong kakae nomo, blong sevem laef blong yufala; mo blad blong evri animol, bae yufala i mas ansa from.
12 Mo huia i mekem blad blong man i ron, bae man i mekem blad blong hem i ron; from se man i no mas mekem blad blong man i ron.
13 From mi givim wan komanmen, se evri brata blong man bae i mas lukaot gud long laef blong man, from se mi mekem man i folem pikja blong mi.
14 Mo mi givim wan komanmen long yufala: “Yufala i mas gat plante pikinini mo kam plante; karem fulap i kam long wol, mo kam plante long wol.”
15 Mo God i bin toktok long Noa, mo long ol boe blong hem, mo talem: “Mo mi, yufala i luk, mi bae mi putum kavenan blong mi wetem yufala; kavenan ia we mi bin mekem wetem papa blong yufala, Inok, long saed blong laen blong yufala we bae i kam afta long yufala.”
JST, Jenesis 9:21–25. Komperem long Jenesis 9:16–17
God i putum renbo i stap long heven olsem wan saen blong mekem man i tingbaot kavenan we Hem i bin mekem wetem Inok mo Noa. Long ol las dei, jeneral asembli blong Jos Ia blong Fasbon bae i joenem ol stret mo gud man long wol.
21 Mo renbo bae i stap insaed long klaod; mo bae mi lukluk long hem, blong mi save tingbaot kavenan we i no gat en, we mi bin mekem long papa blong yu, Inok; blong mekem se, taem bae man i obei long evri komanmen blong mi, Saeon, siti blong Inok we mi tekem i go antap long heven, bae i kam bakegen long wol.
22 Mo hemia i kavenan blong mi we i no gat en, se taem laen blong yu bae i akseptem trutok, mo i lukluk i go antap, nao long taem ia bae Saeon i lukluk i kam daon, mo evri heven bae oli seksek wetem bigfala glad, mo wol bae i seksek wetem glad;
23 Mo jeneral asembli blong Jos ia blong fasbon bae i aot long heven, i kamdaon, mo bae i tekem wol blong hem, mo bae i stap kasem taem en i kam. Mo hemia nao kavenan blong mi we i no gat en, we mi bin mekem wetem papa blong yu Inok.
24 Mo renbo bae i stap long klaod, mo bae mi stanemap kavenan blong mi wetem yu, we mi bin mekem bitwin mi mo yu, long saed blong evri kaen samting we i laef we bambae i stap laef long wol.
25 Mo God i bin talem long Noa: “Hemia i saen blong kavenan we mi bin putum bitwin mi mo yu; long saed blong evri kaen samting we bambae i stap laef long wol.”