ປຈສ, ເອຊາຢາ 29:1–8. ປຽບທຽບໃສ່ກັບ ເອຊາຢາ 29:1–8
ຂ່າວສານທີ່ເຄີຍສັ່ງສອນໃນເຢຣູຊາເລັມ ໂດຍສາດສະດາໃນສະໄໝບູຮານ ຈະຖືກນຳມາສັ່ງສອນໃນຍຸກສຸດທ້າຍ ຈາກພຣະຄຳພີມໍມອນ, ຊຶ່ງຂຶ້ນ “ມາຈາກພື້ນດິນ.”
1 ວິບັດແກ່ອາຣີເອນ, ອາຣີເອນ, ນະຄອນຊຶ່ງດາວິດໄດ້ຕັ້ງຄ້າຍໃສ່! ຈົ່ງເພີ່ມປີເຂົ້າກັບປີ; ຈົ່ງໃຫ້ມີການຖວາຍເຄື່ອງບູຊາ.
2 ເຮົາຍັງຈະໃຫ້ອາຣີເອນທຸກໃຈ, ແລະ ຈະມີການຮ້ອງຄ່ຳຄວນ ແລະ ໂສກເສົ້າ; ເພາະພຣະຜູ້ເປັນເຈົ້າໄດ້ກ່າວດັ່ງນັ້ນແກ່ຂ້າພະເຈົ້າ, ມັນຈະເປັນອາຣີເອນແກ່ເຮົາ;
3 ວ່າເຮົາພຣະຜູ້ເປັນເຈົ້າຈະຕັ້ງຄ້າຍຢູ່ອ້ອມຮອບນະຄອນ, ແລະ ຈະລ້ອມນະຄອນກັບຫໍຮົບ, ແລະ ເຮົາຈະຍົກທັບມາໂຈມຕີນະຄອນ.
4 ແລະ ນະຄອນຈະຖືກຢຽບລົງ, ແລະ ຈະເວົ້າອອກມາຈາກພື້ນດິນ, ແລະ ສຽງຂອງນະຄອນຈະດັງມາຈາກທີ່ຕ່ຳໃນຂີ້ຝຸ່ນດິນ; ແລະ ສຽງຂອງນະຄອນຈະເປັນເໝືອນດັ່ງວິນຍານ, ຂຶ້ນມາຈາກພື້ນດິນ, ແລະ ສຽງຂອງນະຄອນຈະດັງອຸດອິດອອກຈາກຂີ້ຝຸ່ນດິນ.
5 ຍິ່ງໄປກວ່ານັ້ນ ຄົນຕ່າງດ້າວຂອງນະຄອນ ຈະຖືກລົມພັດໄປດັ່ງຂີ້ຝຸ່ນດິນ, ແລະ ກອງທັບອັນໜ້າຢ້ານກົວຂອງພວກເຂົາ ກໍຈະບິນເຈີດໜີດັ່ງເຟືອງ; ແທ້ຈິງແລ້ວ, ຈະເປັນໃນທັນໃດ ຢ່າງບໍ່ຄາດຝັນ.
6 ເພາະຈອມໂຍທາຈະສະເດັດມາຢ້ຽມຢາມພວກເຂົາດ້ວຍສຽງຟ້າຮ້ອງ, ແລະ ດ້ວຍແຜ່ນດິນໄຫວ, ແລະ ດ້ວຍສຽງດັງກ້ອງ, ດ້ວຍລົມພະຍຸ ແລະ ສຽງຝົນຟ້າຄະນອງ, ແລະ ແປວໄຟອັນແກ່ກ້າ.
7 ແລະ ກອງທັບທັງໝົດຂອງປະຊາຊາດຕ່າງໆ ທີ່ພວມໂຈມຕີອາຣີເອນ, ແມ່ນແຕ່ກອງທັບທັງໝົດທີ່ໂຈມຕີນະຄອນ ແລະ ອາວຸດຍຸດທະພັນຂອງນະຄອນ, ແລະ ເຮັດໃຫ້ນະຄອນທຸກໃຈ, ຈະສູນຫາຍໄປດັ່ງຄວາມຝັນໃນຕອນກາງຄືນ.
8 ແທ້ຈິງແລ້ວ, ພວກເຂົາຈະເປັນດັ່ງຄົນກຳລັງຈະຕາຍເພາະຫິວເຂົ້າ ທີ່ຝັນໄປ, ແລະ ຈົ່ງເບິ່ງ, ເຂົາໄດ້ກິນເຂົ້າ, ແຕ່ເມືອເຂົາຕື່ນນອນ ຈິດວິນຍານຂອງເຂົາຫິວໂຫຍ; ຫລື ເປັນດັ່ງຄົນພວມຈະຕາຍຍ້ອນກະຫາຍນ້ຳ ທີ່ໄດ້ຝັນໄປ, ແລະ ຈົ່ງເບິ່ງ, ເຂົາໄດ້ດື່ມນ້ຳ, ແຕ່ເມື່ອເຂົາຕື່ນນອນ, ແລະ ຈົ່ງເບິ່ງ, ເຂົາອ່ອນເພຍ, ແລະ ຈິດວິນຍານຂອງເຂົາຍັງກະຫາຍ. ແທ້ຈິງແລ້ວ, ຈະເປັນເຊັ່ນນັ້ນ ກັບກອງທັບທັງໝົດຂອງປະຊາຊາດຕ່າງໆ ທີ່ມາໂຈມຕີຊີໂອນ.