9 Ka ko ia ia ʻokú ne fakaʻikaiʻi au ʻi he ʻao ʻo e kakaí, ʻe fakaʻikaiʻi ia ʻi he ʻao ʻo e kau ʻāngelo ʻa e ʻOtuá.

10 Pea ko ʻeni naʻe ʻilo ʻe heʻene kau ākongá naʻá ne folofola ʻaki ʻeni, koeʻuhi ko ʻenau lea kovi ʻo kau kiate ia ʻi he ʻao ʻo e kakaí; he naʻa nau manavahē ʻi hono fakahā ia ʻi he ʻao ʻo e kakaí.

11 Pea naʻa nau fealeaʻaki ʻiate kinautolu, ʻo pehē, ʻOkú ne ʻiloʻi hotau lotó, pea ʻoku fakahalaiaʻi ʻa kitautolu ʻi heʻene ngaahi leá, pea ʻe ʻikai fakamolemoleʻi ʻa kitautolu. Ka naʻá ne folofola ange kiate kinautolu, ʻo ne pehē ange kiate kinautolu,

12 Ko ia ia te ne lea ʻaki ha lea kovi ki he Foha ʻo e Tangatá peá ne fakatomalá, ʻe fakamolemoleʻi ia; ka ko ia ia ʻe lea taukae ki he Laumālie Māʻoniʻoní, ʻe ʻikai fakamolemoleʻi ia.

41 He vakai, ʻokú ne haʻu ʻi he ʻuluaki leʻo ʻo e poó, pea te ne toe haʻu ʻi hono ua ʻo e leʻó, pea te ne toe haʻu ʻi hono tolu ʻo e leʻó.

42 Pea ko e moʻoni ʻoku ou pehē kiate kimoutolu, Kuo ʻosi haʻu ia, pea kuo tohi ʻo kau kiate ia; pea ʻo ka toe haʻu ia ʻi hono ua ʻo e leʻó, pe haʻu ʻi hono tolu ʻo e leʻó, ʻoku monūʻia ʻa e kau tamaioʻeiki ko ia ʻo ka haʻu ia, ʻo ʻilo ʻoku nau leʻó;

43 He ko e ʻEiki ʻa e kau tamaioʻeiki ko iá te ne nonoʻo ia, pea fekau ke nau nofo hifo ki he kai, pea haʻu ia ʻo tauhi ʻa kinautolu.

44 Pea ko ʻeni, ko e moʻoni ʻoku ou lea ʻaki ʻa e ngaahi meʻá ni kiate kimoutolu, koeʻuhí ke mou ʻilo ʻeni, ʻoku tatau ʻa e haʻu ʻa e ʻEikí mo ha kaihaʻa ʻi he pō.

45 Pea ʻoku tatau ia mo ha ʻeiki ʻo e fale, ʻo ka ʻikai te ne leʻohi ʻene ngaahi koloá, ʻoku haʻu ʻa e kaihaʻá ʻi he houa ʻoku ʻikai te ne ʻamanaki ki ai, ʻo ʻave ʻene ngaahi koloá, ʻo vahevahe ia mo hono kāingá.

46 Pea naʻa nau fepehēʻaki ʻiate kinautolu pē, Kapau naʻe ʻilo ʻe he ʻeiki ʻo e falé ʻa e houa ʻe haʻu ai ʻa e kaihaʻá, pehē naʻá ne leʻo, pea ʻikai tuku ke hae hifo hono falé pea mole ʻene ngaahi koloá.

47 Pea naʻá ne folofola kiate kinautolu, Ko e moʻoni, ʻoku ou pehē kiate kimoutolu, ke mou mateuteu mo kimoutolu foki; he ʻoku haʻu ʻa e Foha ʻo e Tangatá ʻi ha houa ʻoku ʻikai te mou ʻamanaki ki ai.

48 Pea toki pehē ange ʻe Pita kiate ia, ʻEiki, okú ke lea ʻaki ʻa e fakatātaá ni kiate kimautolu, pe ki he kakaí kotoa pē?

49 Pea naʻe folofola ange ʻa e ʻEikí, ʻOku ou lea kiate kinautolu ʻe fokotuʻu ʻe he ʻEikí ko e kau pule ki hono falé, ke ʻoatu ki heʻene fānaú ʻa honau tufakanga ʻi he meʻakai ʻi hono faʻahitaʻu totonú.

50 Pea naʻa nau pehē ange, Pea ko hai ʻa e tamaioʻeiki tui faivelenga mo anga-fakapotopoto ko iá?

51 Pea naʻe folofola ange ʻa e ʻEikí kiate kinautolu, Ko e tamaioʻeiki ko ia ʻoku leʻó, ke ʻoatu ʻa hono tufakanga ʻi he meʻakai ʻi hono faʻahitaʻu totonú.

52 ʻE monūʻia ʻa e tamaioʻeiki ko ia ʻe ʻilo ʻe heʻene ʻEikí, ʻi heʻene haʻú, ʻokú ne leʻó.

53 Ko e moʻoni ʻoku ou pehē kiate kimoutolu, te ne fakanofo ia ko e pule ki heʻene meʻa kotoa pē.

54 Ka ko e tamaioʻeiki koví ia ʻe ʻilo ʻoku ʻikai te ne leʻó. Pea kapau ʻe ʻilo ʻa e tamaioʻeiki ko iá ʻoku ʻikai te ne leʻo, te ne pehē ʻi hono lotó, ʻOku fakatuotuai ʻe hoku ʻEikí ʻa ʻene haʻú; pea kamata ʻe ia ke ne taaʻi ʻa hono kaungā tamaioʻeikí, mo e kau kaunangá, pea kai, mo inu, pea konā.

55 ʻE haʻu ʻa e ʻEiki ʻa e tamaioʻeiki ko iá ʻi he ʻaho ʻe ʻikai ʻamanaki ki ai, pea ʻi he houa ʻoku ʻikai te ne tokanga ki ai, pea te ne tuʻusi hifo ia ki lalo, pea tuʻutuʻuni ke maʻu hono tufakanga fakataha mo e kau taʻetuí.

56 Pea ko e tamaioʻeiki ko ia naʻá ne ʻiloʻi ʻa e loto ʻo hono ʻEikí, ka naʻe ʻikai teuteu ki he haʻu ʻa hono ʻEikí, pea ʻikai fai ʻo fakatatau ki hono lotó, ʻe taaʻi ia ʻaki ʻa e ngaahi tā lahi.

57 Ka ko ia naʻe ʻikai ʻiloʻi ʻa e loto ʻo hono ʻEikí, peá ne fai ʻa e ngaahi meʻa ʻoku taau mo e tauteá, ʻe taaʻi ia ʻaki ʻa e ngaahi tā siʻi. He ko ia kuo tuku ki ai ʻa e meʻa lahí, ʻe ʻamanaki ʻa e meʻa lahi meiate ia; pea ko ia ia kuo foaki ki ai ʻe he ʻEikí ʻa e meʻa lahí, ʻe ʻamanaki mei ai ʻe he kakaí ʻa e meʻa lahi.