LSS, Luke 17:21 (fakafehoanaki mo e Luke 17:20–21)
(Kuo ʻosi hoko mai ʻa e puleʻanga ʻo e ʻOtuá.)
21 Pea ʻe ʻikai te nau pehē, Vakai mai ki heni! pe, Vakai atu ki hena! He vakai, kuo hoko mai ʻa e puleʻanga ʻo e ʻOtuá kiate kimoutolu.
LSS, Luke 17:36–40 (fakafehoanaki mo e Luke 17:37)
(Ko e fakamatalaʻi ʻe Sīsū ha talanoa fakatātā ʻoku kau ki hono tānaki ʻo e kau māʻoniʻoní.)
36 Pea naʻa nau tali kiate ia ʻo pehē ange, ʻE ʻEiki te nau ʻave ia ki fē?
37 Pea folofola ia kiate kinautolu, ʻIlonga ʻa e potu ʻoku ʻi ai ʻa e sinó; pe, ʻi hono ʻai ʻe tahá, ʻilonga ʻa e potu ʻoku fakataha ki ai ʻa e kau māʻoniʻoní, ʻe kātoa foki ki ai mo e fanga ʻīkalé; pe, ʻe kātoa fakataha ki ai ʻa hono toé.
38 Naʻá ne folofola ʻaki ʻeni, ʻo ʻuhinga ki hono tānaki ʻo ʻene kau māʻoniʻoní; pea mo e ʻalu hifo ʻa e kau ʻāngeló ʻo tānaki hono toengá kiate kinautolu; ko e toko taha mei hono mohengá, ko e toko taha kehe mei he momosiʻanga uité; pea mo e toko taha kehe mei he ngoué, ki ha potu pē ʻokú ne loto ki aí.
39 He ko e moʻoni kuo pau ke ʻai ʻa e ngaahi langi foʻou, pea mo ha māmani foʻou, ʻa ia ʻe nofo ai ʻa e kau māʻoniʻoní.
40 Pea ʻe ʻikai ke ʻi ai ha meʻa taʻemaʻa; he kuo fakaʻau ʻo motuʻa ʻa e māmaní, ʻo hangē ko ha kofu, pea tupulekina lahi ʻene angahalá, ko ia kuo mole atu ia, pea fakamāʻoniʻoniʻi hono tuʻunga vaʻé, pea fakamaʻa mei he angahala kotoa pē.