JST, Luk 21:24–26. Komperem long Luk 21:25–26
Jisas i tokbaot samfala saen blong taem we bae Hem i kam.
24 Nao Jisas i talem ol samting ia long olgeta long saed blong taem we God i prapa spolem gud Jerusalem. Mo afta, ol disaepol blong hem oli askem hem, oli talem se: “Masta. ?Yu talem long mifala long saed blong taem we bae yu kambak?”
25 Mo hem i ansa long olgeta, i talem se: “Long jeneresen long taem we Ol Jentael oli kasem gospel, bambae i gat ol saen long san, mo long mun, mo long ol sta; mo long wol, bambae i gat trabol blong ol nesen wetem ol samting we oli fasfas, olsem bigfala noes blong solwota mo ol wef we i brok long rif. Wol ia tu bae i trabol, wetem ol wota blong bigfala solwota we oli dip tumas;
26 Mo hat blong ol man oli nomo strong from oli fraet, mo from oli stap wet from ol samting we bae i kam long wol. From se ol paoa blong heven bambae oli seksek.”
JST, Luk 21:32. Komperem long Luk 21:32
Evri samting bambae i hapen long taem we Ol Jentael oli kasem gospel.
32 I tru, mi talem long yufala, jeneresen ia, jeneresen blong taem we Ol Jentael oli akseptem gospel, bambae i no save lus kasem taem evri samting i hapen.