JST, Luk 3:4–11. Komperem long Luk 3:4–6
Kraes bae i kam olsem we oli talem long profesi, blong tekem fasin blong sevem man i kam long Isrel mo long Ol Jentael. Long taem we evri wok blong God i kamtru, bambae Hem i kam bakegen blong jajem wol.
4 Olsem we oli bin raetemdaon long buk blong profet Aesea; mo hemia nao ol toktok we oli stap talem: “Voes blong wan i stap singaot long draeples i talem se: ‘Yufala i mekem rere rod blong Lod, mo mekem ol rod blong hem i stret.’”
5 From luk, mo luk gud, bambae hem i kam, olsem we oli raetemdaon long buk blong ol profet, blong hem i tekemaot ol sin blong wol, mo blong tekem fasin blong sevem man i go long olgeta nesen we oli no gat respek long God, blong karem i kam wanples olgeta we oli lus, we oli blong yad blong sipsip blong Isrel;
6 Yes, olgeta ia we oli stap long ol ples olbaot mo oli gat hadtaem; mo tu, yufala i mekem rod i rere, mo mekem i posibol blong oli prijim gospel long Ol Jentael;
7 Mo blong hem i stap wan laet long olgeta evriwan we oli sidaon long tudak, i go go finisim olgeta ples blong wol; blong mekem laef bakegen long ded blong olgeta we oli ded i hapen, mo blong go antap long heven blong stap long raet han blong Papa,
8 Kasem taem we evri wok blong God i kamtru, taem we loa mo testemoni bae i sil, mo ol ki blong kingdom, bambae oli givimbak bakegen i go long Papa;
9 Blong putum jastis long evriwan; blong hem i kamdaon blong jajem evriwan, mo blong hem i winim tingting blong evriwan we i no folem fasin blong God long saed blong ol wok blong olgeta we i no folem fasin blong God, we oli bin mekem; mo evri samting ia bae i hapen long dei ia we bae hem i kam;
10 From se hem i wan dei blong paoa; yes, evri flat ples bambae oli kam antap, mo evri bigfala hil mo hil bambae oli kamdaon; wanem i kruked bambae i kam stret, mo ol raf rod bambae oli kam smut;
11 Mo evri man we i laef bae i luk fasin blong God blong sevem man.
JST, Luk 3:19–20. Komperem long Luk 3:10–13
Olgeta pua, bae oli lukaot long olgeta wetem ol samting we oli putum i stap. Olgeta man blong tekem takis, oli no save karem moa bitim wanem we loa i stap talem.
19 From yu, Teofilas, yu save gud se folem fasin blong Ol Man Jiu, mo folem kastom blong loa blong olgeta blong stap kasem mane insaed long bigfala basket, se aot long ol samting we ol man oli gat fulap we oli givim, nao bambae olgeta we oli kasem mane ia oli mas givim i gobak bakegen long ol puaman;
20 Mo folem semfala fasin ia nao, ol man blong tekem takis oli mekem, nao Jon i talem long olgeta: “Yufala i no mas tekem takis we i bitim mak blong loa.”