ក.យ.ស., លូកា ៣:៤–១១ (ចូរប្រៀបធៀបនឹងគម្ពីរលូកា ៣:៤–៦)
(ព្រះគ្រីស្ទទ្រង់នឹងយាងមកបំពេញពាក្យព្យាករណ៍ លោះបាបទាំងឡាយ នាំសេចក្ដីសង្គ្រោះមក ហើយធ្វើជាពន្លឺ ហើយទ្រង់នឹងយាងមកនៅថ្ងៃនៃព្រះចេស្ដា និងនៅពេលពេញកំណត់)។
៤ដូចជាមានសេចក្ដីចែងទុកមកក្នុងគម្ពីរនៃព្យាការីអេសាយ ហើយនេះគឺជាពាក្យទាំងឡាយ ដែលថា « សំឡេងមនុស្សម្នាក់ដែលកំពុងតែស្រែកនៅទីរហោស្ថានថា ចូររៀបចំផ្លូវទទួលព្រះអម្ចាស់ ហើយចូរតម្រង់ផ្លូវតូចថ្វាយទ្រង់ចុះ »។
៥ត្បិតមើលចុះ ហើយមើលន៏ ទ្រង់នឹងយាងមក ដូចជាមានសេចក្ដីចែងទុកមកក្នុងគម្ពីរនៃពួកព្យាការី ដើម្បីនឹងលោះបាបទាំងឡាយនៃមនុស្សលោក ហើយដើម្បីនាំឲ្យមានសេចក្ដីសង្គ្រោះដល់ពួកសាសន៍ដែលឥតសាសនា ដើម្បីប្រមូលអស់អ្នកណាដែលបានបាត់បង់ ដែលជាអ្នកនៅក្នុងក្រោលចៀមនៃពួកអ៊ីស្រាអែល
៦មែនហើយ គឺជាពួកអ្នកដែលត្រូវខ្ចាត់ខ្ចាយ និងត្រូវរងទុក្ខ ហើយព្រមទាំងដើម្បីរៀបចំផ្លូវ ហើយធ្វើឲ្យអាចមានផ្លូវក្នុងការផ្សាយដំណឹងល្អដល់ពួកសាសន៍ដទៃ
៧ហើយដើម្បីធ្វើជាពន្លឺដល់អស់អ្នកណាដែលអង្គុយក្នុងសេចក្ដីងងឹត គឺទៅដល់ចុងផែនដីបំផុត ដើម្បីនាំឲ្យមានដំណើររស់ពីស្លាប់ឡើងវិញ ហើយដើម្បីយាងឡើងទៅស្ថានខ្ពស់ ដើម្បីទៅគង់នៅខាងស្ដាំព្រះហស្តនៃព្រះវរបិតា
៨ដរាបដល់ពេលពេញកំណត់ ហើយក្រឹត្យវិន័យ និងទីបន្ទាល់នឹងត្រូវបានបិទត្រាទុក ហើយកូនសោទាំងឡាយនៃនគរនឹងត្រូវបានថ្វាយដល់ព្រះវរបិតាវិញ
៩ដើម្បីអនុវត្តសេចក្ដីយុត្តិធម៌ដល់មនុស្សទាំងអស់ ដើម្បីយាងចុះមកជំនុំជំរះលើមនុស្សទាំងអស់ ហើយដើម្បីបញ្ជាក់ដល់អស់ទាំងមនុស្សទមិឡល្មើសពីអំពើដ៏ឥតសុចរិតទាំងឡាយរបស់ពួកគេ ដែលពួកគេបានប្រព្រឹត្ត និងការណ៍ទាំងអស់នៅថ្ងៃដែលទ្រង់នឹងយាងមក
១០ត្បិតជាថ្ងៃនៃព្រះចេស្ដា មែនហើយ គ្រប់ទាំងច្រកភ្នំនឹងបានលុបឲ្យពេញ ហើយគ្រប់ទាំងភ្នំធំតូចនឹងត្រូវបន្ទាបទៅ ផ្លូវក្ងិចក្ងក់នឹងទៅជាត្រង់ ហើយផ្លូវរដិបរដុបនឹងបានរាបស្មើទៅវិញ
១១ហើយអស់ទាំងសាច់ឈាមនឹងបានឃើញសេចក្ដីសង្គ្រោះរបស់ព្រះ។