PJS, Mateo 21:33 (idilig iti Mateo 21:32–33)
(Nasken nga agbabawi ti tao sakbay a mabalinna ti mamati ken ni Cristo.)
33 Ta isu a di mamati ken ni Juan maipanggep kaniak, saannak a mabalin a patien, malaksid no agbabawi nga umuna.
PJS, Mateo 21:47–56 (kitaen ti Mateo 21:45–46)
(Impakdaar ni Jesus nga isu ti kangrunaan a panuli. Naidiaya ti ebanghelio kadagiti Hudio sa kadagiti Gentil. Madadaelto dagiti nadangkes inton agsubli ni Jesus.)
47 Ket idi nangngeg dagiti pangulo a saserdote ken Fariseo ti pangngarigna, impapanda nga agsasao kadakuada.
48 Ket kinunada iti bagbagida, Ipagarup kadi daytoy a tao a kabaelanna a dadaelen ti pagarian nga is-isu? Ket kinagurada.
49 Ngem idi gamdenda a dissuan, nagbutengda kadagiti umariwekwek a tao, gapu ta naammuanda a pinagbalin dagiti umariwekwek a tao a propeta.
50 Ket ita inasitgan dagiti disipulona, ket kinuna ni Jesus kadakuada, masdaawkayo kadi kadagiti balikas ti pangngarig nga insawangko kadakuada?
51 Pudno, kunak kadakayo, siak ti bato, ket didak awaten dagiti nadangkes.
52 Siak ti ulo ti panuli. Matnagto kaniak dagitoy a Hudio, ket madadaeldanto.
53 Ket maalanto kadakuada ti pagarian ti Dios, ket maiteddanto iti pagilian a mangipan kadagiti bunga sadiay; (dagiti Gentil ti kayatna a sawen.)
54 Gapuna, no asino man ti matnag iti daytoy a bato, gilingennanto a kasla pulbos.
55 Ket inton dumteng ngarud ti Apo iti bangkag, dadaelennanto dagidiay nakaay-ay-ay, nadangkes a tattao, ket italeknanto manen ti bangkagna kadagiti sabali a mannalon, uray pay kadagiti maudi nga aldaw, a mangtedto kenkuana kadagiti bunga nga apitenda.
56 Ket naawatanda ti pangngarig nga insawangna kadakuada, a madadaelto met dagiti Gentil, inton bumaba ti Apo manipud iti langit nga agturay iti bangkagna, nga isu ti daga ken ti agindeg sadiay.