PJS, Mateo 4:1, 5–6, 8–9 (idilig iti Mateo 4:1, 5–6, 8–9; agpada ti nabaliwan iti Lucas 4:2, 5–11)
(Ni Jesus inturong ti Espiritu, saan a ni Satanas.)
1 Kalpasanna inturong ti Espiritu ni Jesus, iti langalang, tapno makitipon iti Dios.
5 Kalpasanna naipan ni Jesus iti nasantuan a siudad, ket impatugaw ti Espiritu iti alimpatok ti templo.
6 Kalpasanna immasideg ti sairo kenkuana ket kinunana, No sika ti Anak ti Dios, tumaPPuakka manipud ditoy agingga iti baba, ta adda naisurat, Isu ibilinnanto kadagiti anghelna ti maipapan kenka ket sakruyendakanto kadagiti imada amangan la ket ta maitibkol ta sakam iti bato.
8 Ket manen, innala ti Espiritu ni Jesus, ket impanna iti nalaus ti kangatona a bantay, ket impakitana kenkuana amin dagiti pagarian iti lubong ken ti dayagda.
9 Ket immasideg manen kenkuana ti sairo, ket kinunana, Itedkonto amin kenka dagitoy a banag, no agrukbab ken agdayawka kaniak.
PJS, Mateo 4:11 (idilig iti Mateo 4:11)
(Nangibaon ni Jesus kadagiti anghel a mangisuro ken Juan a Mammuniag.)
11 Ket ita naammuan ni Jesus a naibalud ni Juan, ket nangibaon kadagiti anghel, ket, imutektekan, dimtengda ket nagserbida kenkuana.
PJS, Mateo 4:18 (idilig iti Mateo 4:19)
(Sinarita dagiti propeta iti Daan a Tulag ni Jesus.)
18 Ket kinunana kadakuada, Siak ti insurat dagiti propeta; umaykayo sumurot kaniak, ket pagbalinenkayo a mangngalap kadagiti tao.
PJS, Mateo 4:22 (kitaen ti Mateo 4:23)
(Nagagas ni Jesus kadagiti tao a namati iti naganna.)
22 Ket napan ni Jesus iti intero a Galilea a mangisuro kadagiti sinagogada, ken nangikasaba iti ebanghelio ti pagarian; ken nangpaimbag kadagiti amin a kita ti sakit, ken amin a kita ti an-annayen kadagiti tao a namati iti naganna.