LSS, Mātiu 3:24–26 (fakafehoanaki mo e Mātiu 2:23)
(ʻOku fakamatalaʻi ʻa e kei siʻi mo e kei talavou ʻa e ʻEikí.)
24 Pea naʻe hoko ʻo pehē naʻe tupu hake ʻa Sīsū mo hono ngaahi tokouá, pea fakaʻau ia ʻo mālohi, pea tatali ki he ʻEikí ki he taimi ʻe kamata ai ʻene ngāué.
25 Pea naʻá ne tauhi ki heʻene Tamaí, pea naʻá ne lea ʻo ʻikai hangē ko e kakai kehé, pea naʻe ʻikai faʻa akoʻi ia; he naʻe ʻikai fie maʻu ha tangata ke ne akoʻi ia.
26 Pea naʻe hili ʻa e ngaahi taʻu lahi, pea hokosia ʻa e houa ʻo ʻene ngāue ke faí.
LSS, Mātiu 3:43–46 (fakafehoanaki mo e Mātiu 3:15–17)
(Naʻe papitaiso ʻa Sīsū ʻe Sione ʻi he fakauku.)
43 Pea naʻe folofola ʻa Sīsū, ʻo pehē ange kiate ia, Tuku ke u papitaiso ʻiate koe, he ʻoku taau mo kitautolu ke fakahoko ʻa e māʻoniʻoni kotoa pē. Pea naʻá ne tuku ke fai ia.
44 Pea ʻalu hifo ʻa Sione ki he vaí ʻo ne papitaiso ia.
45 Pea kuo hili hono papitaiso ʻo Sīsuú, naʻe ʻalu hake leva ia mei he vaí, pea naʻe mamata ʻa Sione, pea ʻiloange, naʻe fakaava mai ʻa e ngaahi langí kiate ia, peá ne mamata ki he Laumālie ʻo e ʻOtuá ʻoku maliu hifo ʻo hangē ko e lupe ʻo tuʻu ʻia Sīsū.
46 Pea ʻiloange, naʻá ne fanongo ki ha leʻo mei he langí, ʻoku pehē, Ko hoku ʻAlo ʻofaʻanga ʻeni, ʻa ia ʻoku ou fiemālie lahi ai. Fanongo kiate ia.