ປຈສ, ພຣະນິມິດ 12:1–17. ປຽບທຽບໃສ່ກັບ ພຣະນິມິດ 12:1–17
ໂຢຮັນອະທິບາຍເຄື່ອງໝາຍກ່ຽວກັບແມ່ຍິງ, ເດັກນ້ອຍ, ຄ້ອນເຫລັກ, ພະຍານາກ, ແລະ ມີຄາເອນ. ສົງຄາມທີ່ໄດ້ເລີ່ມຕົ້ນຢູ່ສະຫວັນ ຍັງດຳເນີນຕໍ່ໄປຢູ່ເທິງແຜ່ນດິນໂລກ. ໃຫ້ສັງເກດເບິ່ງການປ່ຽນລຳດັບຂໍ້ພຣະຄຳພີ ໃນ ປຈສ.
1 ແລະ ມີເຄື່ອງໝາຍສຳຄັນອັນໃຫຍ່ປະກົດຂຶ້ນໃນສະຫວັນ, ໃນຄວາມເປັນເໝືອນດັ່ງສິ່ງທັງຫລາຍຢູ່ເທິງແຜ່ນດິນໂລກ; ຄືຍິງຜູ້ໜຶ່ງມີດວງອາທິດປົກຄຸມຕົວເໝືອນນຸ່ງເສື້ອຜ້າ, ແລະ ມີດວງເດືອນຢູ່ໃຕ້ຕີນ, ແລະ ຢູ່ເທິງຫົວຂອງນາງ ມີມົງກຸດພ້ອມດ້ວຍດາວສິບສອງດວງ.
2 ແລະ ຍິງຜູ້ນັ້ນຖືພາ, ຮ້ອງຄາງ, ເພາະເຈັບທ້ອງ, ແລະ ເຈັບປວດຢູ່ ກຳລັງຈະເກີດລູກ.
3 ແລະ ນາງໄດ້ຄອດລູກເປັນຜູ້ຊາຍ, ຜູ້ຈະຕ້ອງປົກຄອງປະຊາຊາດທັງປວງດ້ວຍຄ້ອນເຫລັກ; ແລະ ລູກຂອງນາງໄດ້ຖືກຍົກຂຶ້ນເມືອເຖິງພຣະເຈົ້າ ແລະ ເຖິງພຣະທີ່ນັ່ງຂອງພຣະອົງ.
4 ແລະ ມີເຄື່ອງໝາຍສຳຄັນອີກຢ່າງໜຶ່ງປະກົດຂຶ້ນໃນສະຫວັນ; ແລະ ຈົ່ງເບິ່ງ, ມີພະຍານາກໃຫຍ່ສີແດງໂຕໜຶ່ງ, ມີເຈັດຫົວ ແລະ ສິບເຂົາ, ແລະ ມີມົງກຸດເຈັດອັນຢູ່ເທິງຫົວຂອງມັນ. ແລະ ຫາງຂອງພະຍານາກໄດ້ຟາດດວງດາວໜຶ່ງສ່ວນສາມຈາກຟ້າສະຫວັນ ລົງໃສ່ແຜ່ນດິນໂລກ. ແລະ ພະຍານາກໄດ້ຢືນຢູ່ຕໍ່ໜ້ານາງຜູ້ກຳລັງຈະຄອດລູກ, ຕຽມພ້ອມທີ່ຈະກິນລູກຂອງນາງ ເມື່ອເກີດແລ້ວ.
5 ແລະ ຍິງຄົນນັ້ນໄດ້ປົບໜີເຂົ້າໄປໃນຖິ່ນແຫ້ງແລ້ງກັນດານ, ໄປຫາບ່ອນທີ່ພຣະເຈົ້າໄດ້ຕຽມໄວ້ສຳລັບນາງ, ເພື່ອວ່າເຂົາເຈົ້າຈະໄດ້ຮັບການລ້ຽງດູຢູ່ທີ່ນັ້ນ ເປັນເວລາໜຶ່ງພັນສອງຮ້ອຍຫົກສິບປີ.
6 ແລະ ມີສົງຄາມໃນສະຫວັນ; ມີຄາເອນ ແລະ ເຫລົ່າທູດຂອງລາວໄດ້ຕໍ່ສູ້ກັບພະຍານາກ; ແລະ ພະຍານາກ ແລະ ບໍລິວານຂອງມັນໄດ້ຕໍ່ສູ້ກັບມີຄາເອນ;
7 ແລະ ພະຍານາກບໍ່ສາມາດເອົາຊະນະມີຄາເອນ, ຫລື ເດັກນ້ອຍ, ຫລື ແມ່ຍິງ ຊຶ່ງເປັນສາດສະໜາຈັກຂອງພຣະເຈົ້າ, ຜູ້ໄດ້ຖືກປົດປ່ອຍຈາກຄວາມເຈັບປວດຂອງນາງ, ແລະ ໄດ້ຖືກພາມາຫາອານາຈັກຂອງພຣະເຈົ້າຂອງພວກເຮົາ ແລະ ຂອງພຣະຄຣິດຂອງພຣະອົງ.
8 ທັງບໍ່ມີບ່ອນຢູ່ໃນສະຫວັນສຳລັບພະຍານາກໃຫຍ່, ຜູ້ຖືກຊັດຖິ້ມລົງເສຍ; ງູແຕ່ດຶກດຳບັນທີ່ຖືກເອີ້ນວ່າ ມານຮ້າຍ, ແລະ ຖືກເອີ້ນອີກວ່າ ຊາຕານ, ຊຶ່ງຫລອກລວງມະນຸດທັງໂລກ; ມັນຖືກຊັດລົງເທິງແຜ່ນດິນໂລກ; ແລະ ບໍລິວານຂອງມັນກໍຖືກຊັດລົງຖິ້ມໄປພ້ອມກັບມັນ.
9 ແລະ ຂ້າພະເຈົ້າໄດ້ຍິນສຽງດັງມາຈາກສະຫວັນວ່າ ບັດນີ້ ຄວາມລອດ, ແລະ ພະລັງ, ແລະ ອານາຈັກຂອງພຣະເຈົ້າຂອງພວກເຮົາ, ແລະ ອຳນາດຂອງພຣະຄຣິດຂອງພຣະອົງ ໄດ້ມາເຖິງແລ້ວ;
10 ເພາະວ່າຜູ້ທີ່ກ່າວໂທດພີ່ນ້ອງຂອງພວກເຮົາ ໄດ້ຖືກຊັດຖິ້ມລົງແລ້ວ, ຊຶ່ງໄດ້ກ່າວໂທດພວກເຂົາ ຕໍ່ພຣະພັກຂອງພຣະເຈົ້າ ທັງກາງເວັນ ແລະ ກາງຄືນ.
11 ເພາະພວກເຂົາໄດ້ເອົາຊະນະພະຍານາກແລ້ວ ໂດຍໂລຫິດຂອງພຣະເມສານ້ອຍ, ແລະ ໂດຍຖ້ອຍຄຳຂອງ ປະຈັກພະຍານຂອງພວກເຂົາ; ເພາະພວກເຂົາບໍ່ເສຍດາຍຊີວິດຂອງຕົນເອງ, ແຕ່ໄດ້ຮັກສາປະຈັກພະຍານ ແມ່ນແຕ່ເຖິງແກ່ຄວາມຕາຍ. ສະນັ້ນ, ຈົ່ງປິຕິຍິນດີເຖີດ ສະຫວັນ, ແລະ ພວກທ່ານຜູ້ທີ່ອາໄສຢູ່ໃນນັ້ນ.
12 ແລະ ຫລັງຈາກສິ່ງເຫລົ່ານີ້ ຂ້າພະເຈົ້າໄດ້ຍິນອີກສຽງໜຶ່ງກ່າວວ່າ ວິບັດແກ່ຜູ້ອາໄສຢູ່ເທິງແຜ່ນດິນໂລກ, ແທ້ຈິງແລ້ວ, ແລະ ພວກເຂົາຜູ້ທີ່ອາໄສຢູ່ຕາມເກາະໃນທະເລ! ເພາະມານຮ້າຍກຳລັງລົງມາຫາພວກເຈົ້າ, ດ້ວຍຄວາມຄຽດແຄ້ນອັນໃຫຍ່, ເພາະມັນຮູ້ວ່າ ເວລາຂອງມັນມີໜ້ອຍ.
13 ເພາະເມື່ອພະຍານາກໄດ້ເຫັນວ່າ ມັນໄດ້ຖືກຊັດຖິ້ມລົງມາຍັງແຜ່ນດິນໂລກ, ມັນໄດ້ເລີ່ມຂົ່ມເຫັງຍິງທີ່ໄດ້ເກີດລູກຊາຍນັ້ນ.
14 ສະນັ້ນ, ຍິງຜູ້ນັ້ນຈຶ່ງໄດ້ຮັບປີກສອງອັນຂອງນົກອິນຊີໃຫຍ່, ເພື່ອວ່ານາງຈະໄດ້ບິນໜີເຂົ້າໄປໃນຖິ່ນແຫ້ງແລ້ງກັນດານ, ໄປຫາບ່ອນຂອງນາງ, ບ່ອນທີ່ນາງໄດ້ຮັບການລ້ຽງດູຢູ່ຊົ່ວໄລຍະໜຶ່ງ, ແລະ ຫລາຍໄລຍະ, ແລະ ຕື່ມອີກເຄິ່ງໄລຍະໜຶ່ງ, ຈາກການໂຈມຕີຂອງງູ.
15 ແລະ ພະຍານາກນັ້ນໄດ້ພົ່ນນ້ຳອອກມາຈາກປາກເໝືອນແມ່ນ້ຳ ໄຫລຕາມຍິງນັ້ນ, ເພື່ອມັນຈະເຮັດໃຫ້ນາງຖືກກະແສນ້ຳພັດໄປ.
16 ແລະ ແຜ່ນດິນໄດ້ຊ່ວຍເຫລືອນາງ, ແລະ ແຜ່ນດິນໄດ້ເປີດປາກຂອງມັນ, ແລະ ກືນກິນນ້ຳ ທີ່ພະຍານາກໄດ້ພົ່ນອອກມາຈາກປາກຂອງມັນ.
17 ສະນັ້ນ, ພະຍານາກກໍຄຽດແຄ້ນຢ່າງໃຫຍ່ໃຫ້ຍິງນັ້ນ, ແລະ ໄດ້ອອກໄປຕໍ່ສູ້ກັບຜູ້ທີ່ເຫລືອຢູ່ຂອງເຊື້ອສາຍຂອງນາງ, ຄືຄົນທີ່ຮັກສາພຣະບັນຍັດຂອງພຣະເຈົ້າ, ແລະ ມີປະຈັກພະຍານເຖິງພຣະເຢຊູຄຣິດ.