1 Pea naʻe hā mai ha meʻa fakaofo lahi ʻi he langí, ʻi he tatau ʻo e ngaahi meʻa ʻi he māmaní; ko ha fefine kuo kofu ʻaki ʻa e laʻaá, pea mo e māhiná ʻi hono lalo vaʻé, pea ʻi hono ʻulú ha kalauni ʻo e fetuʻu ʻe hongofulu mā ua.

2 Pea naʻe feitama ʻa e fefiné, naʻe tangi, pea langā ʻi he mamahi ʻo teuteu ke fāʻele.

3 Peá ne fanauʻi ha tamasiʻi tangata, ʻa ia te ne pule ki he ngaahi puleʻanga kotoa pē ʻaki ha vaʻa ukamea; pea naʻe toʻo hake ʻa ʻene tamasiʻí ki he ʻOtuá mo hono taloní.

4 Pea naʻe hā mai mo ha fakaʻilonga ʻe taha, ʻi he langí; pea vakai, ko ha fuʻu talākoni lahi kulokula, ʻokú ne maʻu ha ʻulu ʻe fitu mo e meʻatui ʻe hongofulu, mo e kalauni ʻe fitu ʻi hono ngaahi ʻulú. Pea naʻe toho ʻe hono ikú hono vahe tolu ʻe taha ʻo e ngaahi fetuʻu ʻo e langí, ʻo ne lī hifo ʻa kinautolu ki he māmaní. Pea naʻe tuʻu ʻa e talākoní ʻi he ʻao ʻo e fefine kuo fāʻelé, mo teuteu ke kai ʻene tamá ʻi he hili hono fāʻeleʻí.

5 Pea naʻe hola ʻa e fefiné ki he feituʻu maomaonganoá, ʻa ia ʻoku ʻi ai hano potu kuo teuteu ʻe he ʻOtuá, koeʻuhí ke nau fafanga ia ʻi ai ʻi ha taʻu ʻe taha afe uangeau mā onongofulu.

6 Pea naʻe fai ʻa e tau ʻi he langí; naʻe tau ʻa Maikeli mo ʻene kau ʻāngeló mo e talākoní; pea naʻe tau ʻa e talākoní mo ʻene kau ʻāngeló mo Maikeli;

7 Pea naʻe ʻikai ikunaʻi ʻe he talākoní ʻa Maikeli, pe ko e tamasiʻí, pe ko e fefiné ʻa ia ko e siasi ʻo e ʻOtuá, ʻa ia kuo fakahaofi mei hono ngaahi mamahí, pea ʻomi ʻa e puleʻanga ʻo e ʻOtuá mo hono Kalaisí.

8 Pea naʻe ʻikai ha potu ʻi he langí moʻó e fuʻu talākoní, ʻa ia naʻe lī ki tuʻá; ʻa e ngata motuʻa ko ia ʻoku ui ko e tēvoló, pea toe ui foki ko Sētane, ʻa ia naʻá ne kākaaʻi ʻa e māmaní kotoa; naʻe lī hifo ia ki tuʻa ki he māmaní; pea naʻe lī hifo fakataha ʻa ʻene kau ʻāngeló mo ia.

9 Pea naʻá ku fanongo ki ha leʻo-lahi ʻoku pehē ʻi he langí, Ko ʻeni kuo hoko mai ʻa e fakamoʻuí, mo e mālohi, mo e puleʻanga ʻo hotau ʻOtuá, pea mo e mālohi ʻo hono Kalaisí;

10 He kuo lī hifo ki lalo ʻa e tokotaha tukuakiʻi ʻo hotau kāingá, ʻa ia ʻokú ne tukuakiʻi ʻa kinautolu ʻi he ʻao ʻo hotau ʻOtuá ʻi he ʻaho mo e pō.

11 He kuo nau ikunaʻi ia ʻi he taʻataʻa ʻo e Lamí, pea ʻi he lea ʻo ʻenau fakamoʻoní; he naʻe ʻikai te nau mamae ki heʻenau moʻuí, ka nau tauhi ʻa e fakamoʻoní ʻo aʻu ki he mate. Ko ia, fiefia ʻe ngaahi langi, mo kimoutolu ʻoku nofo ʻi aí.

12 Pea hili ʻa e ngaahi meʻá ni naʻá ku fanongo ki ha leʻo ʻe taha ʻoku pehē, ʻE malaʻia ʻa e kakai ʻoku nofo ʻi he māmaní, ʻio, pea mo kinautolu ʻoku nofo ʻi he ngaahi motu ʻo e tahí! He ʻoku ʻalu hifo ʻa e tēvoló kiate kimoutolu ʻoku fuʻu ʻita lahi, koeʻuhí he ʻokú ne ʻilo ʻoku fuonounou pē hono taimí.

13 He ʻi he mamata ʻa e talākoní kuo lī hifo ia ki he māmaní, naʻá ne fakatangaʻi ʻa e fefine naʻá ne fanauʻi ʻa e tamasiʻi tangatá.

14 Ko ia naʻe foaki ki he fefiné ʻa e kapakau ʻe ua ʻo e ʻīkale lahi, koeʻuhí ke ne hola ki he feituʻu maomaonganoá, ki hono potu ʻoʻona, ʻa ia ʻoku fafanga ai ia ʻi ha kuonga, mo e kuonga ʻe ua, mo e vaeua ʻo ha kuonga, mei he ʻao ʻo e ngatá.

15 Pea naʻe puʻaki ʻe he ngatá mei hono ngutú ʻa e vai ʻo hangē ha vaitafe ki he fefiné, koeʻuhí ke tupu ai haʻane ʻauhia ʻi he vaí.

16 Pea naʻe tokoniʻi ʻe he fonuá ʻa e fefiné, pea naʻe fakamanga hake ʻe he kelekelé ʻa hono ngutú, ʻo ne folo hifo ʻa e vai ʻa ia naʻe puʻaki mei he ngutu ʻo e talākoní.

17 Ko ia, naʻe ʻita lahi ʻa e talākoní ʻi he fefiné, pea ʻalu atu ke tauʻi ʻa e toenga ʻo hono hakó, ʻa kinautolu ʻoku tauhi ʻa e ngaahi fekau ʻa e ʻOtuá, pea maʻu ʻa e fakamoʻoni ʻo Sīsū Kalaisí.