5 From se, taem yumi bin stap folem ol fasin blong wol, ol rabis sin blong tingting blong yumi we oli no folem loa, i mekem se bodi blong yumi i mekem ol wok we i lidim yumi long ded.

6 Be naoia we yumi kam fri long loa ia we i bin stap holemtaet yumi, we yumi ded long fes blong loa, i mekem se yumi mekem wok wetem wan niu spirit, mo i no folem olfala loa we oli bin raetem bifo finis.

7 Mo afta, ?bambae yumi talem wanem? ?Loa ia i wan sin o no? !No, nogat! God i blokem. Bae mi mi no bin save sin be tru long loa ia nomo; bae mi mi no save selfis tingting, sapos loa i no bin talem: “Yufala i no mas wantem samting blong narafala man.”

8 Be sin, i tekem janis blong hem tru long komanmen, i tekem mi i go moa yet blong folem eni kaen nogud fasin. From se taem i no gat loa, sin i ded.

9 From se fastaem, mi mi stap laef we mi no stap brekem loa, be taem komanmen blong Kraes i kam, sin i kam laef, mo mi mi ded.

10 Mo taem mi no bin bilivim komanmen blong Kraes we i bin kam, komanmen ia we i givim laef, mi mi luk se hem i panisim mi blong mi ded.

11 From sin, taem i tekem janis blong hem, i tanem baksaed long komanmen, mo i trikim mi; mo tru long hem, i kilim mi mi ded.

12 Be, mi bin faenem se loa i tabu, mo komanmen i tabu, mo i stret, mo i gud.

13 ?Be wanem we i gud ia nao i mekem mi mi ded? !No, nogat! God i blokem. Be hem i sin, taem hem i kamaot olsem sin tru long samting we i gud, mekem se i mekem mi mi ded; blong mekem se, tru long komanmen, bae sin ia i kam bigwan moa blong mi kasem panis from.

14 From yumi save se komanmen hem i long saed blong spirit; be taem mi bin stap anda long loa, mi bin stap folem fasin blong wol, we oli salem mi long sin.

15 Be naoia, mi mi stap folem Spirit; from se, samting we God i komandem mi blong mekem, mi mekem; mo samting we God i komandem mi blong no letem, mi no stap letem.

16 From se samting we mi save se i no stret blong mekem, bae mi no mekem; from se wanem we hem i sin, mi mi no laekem nating.

17 Be, sapos mi no mekem samting we mi no letem, i olsem se mi agri long loa, se loa hem i gud; mo God i no faenem mi mi rong.

18 Mo naoia, i nomo mi we i mekem sin; be mi lukaot blong mi winim sin ia we i stap insaed long mi.

19 From mi save se, insaed long mi, we i insaed long bodi blong mi, i no gat wan gudfala samting insaed; tingting ia blong wantem mekem wan gudfala samting i stap wetem mi, be mi no naf blong mekem samting we i gud, be tru long Kraes nomo.

20 From se ol gudfala samting we bae mi mekem taem mi stap anda long loa yet, bae mi luk se oli no gud; from hemia, mi no mekem ol samting ia.

21 Be ol nogud samting we mi no bin save mekem taem mi stap anda long loa, mi luk se oli gud; mo mi mekem.

22 Sapos mi mekem, wetem help blong Kraes, wanem we mi no mekem taem mi stap anda long loa, nao bae mi no stap anda long loa; mo bae mi nomo lukluk blong mekem nogud samting, be bae mi winim sin we i stap insaed long mi.

23 Nao, mi luk se anda long loa, se taem mi wantem mekem wan gudfala samting, nao nogud fasin i bin stap wetem mi; from se mi laekem loa blong God folem fasin blong man we i stap insaed long mi.

24 Mo naoia, mi luk wan narafala loa, we i komanmen blong Kraes, we i stap insaed long maen blong mi.

25 Be ol pat blong bodi blong mi oli faet agensem loa insaed long maen blong mi, mo oli mekem mi mi slef long loa blong sin we i stap insaed long bodi blong mi.

26 Mo sapos mi no winim sin we i stap insaed long mi, be wetem bodi blong mi, mi wok blong loa blong sin, !O mi mi wan man we mi no hapi tumas! ?Mo hu nao bae i mekem mi mi fri long bodi blong ded ia?

27 Nao, mi talem tangkyu long God tru long Jisas Kraes, Lod blong yumi, we i mekem hemia long maen blong mi, blong mekem se mi save wok folem loa blong God.