¶ 1 BEA nae toe hoko ae folofola a Jihova kiate au, o behe,

2 Alu o kalaga ki he teliga o Jelusalema, o behe, Oku behe mai e Jihova; Oku ou manatu‘i koe, koe agalelei nae fai kiate koe i hoo kei jii, moe ofa nae fakaha i hoo fakanofo, i hoo muimui kiate au i he toafa, i he fonua nae ikai tūtū‘i.

3 Nae fakatabu‘i a Isileli kia Jihova, koe uluaki fua o hono tubu: e halaia akinautolu kotoabe oku fakaauha ia; oku behe e Jihova, E hoko ae kovi kiate kinautolu.

4 E fale o Jekobe, bea moe faahiga kotoabe oe fale o Isileli, mou fanogo ki he folofola a Jihova.

¶ 5 Oku behe e Jihova, Koeha ae kovi kuo ilo‘i e hoo mou gaahi tamai iate au, koeuhi kuo nau jiaki au, bea muimui ki he mea noabe, bea kuo nau hoko o vale?

6 Bea nae ikai te nau behe, Koefe a Jihova, aia naa ne omi akimautolu mei he fonua ko Ijibite, aia naa ne tataki akimautolu i he toafa; i he fonua lala bea luoluo, i he fonua momoa, moe malumalu oe mate, i he fonua kuo ikai fonoga ki ai ha tagata, bea oku ikai nofo ai ha tagata?

7 Bea naaku omi akimoutolu ki he fonua mahu, ke kai hono fua, mo hono lelei oia; ka i hoo mou hu ki ai, kuo mou fakakovi‘i hoku fonua bea gaohi hoku tofia koe mea fakalielia.

8 Nae ikai behe e he kau taulaeiki, Koefe a Jihova? bea nae ikai ilo‘i au ekinautolu nae maheniai i he fono: bea nae agatuu kiate au ae kau tauhi foki, bea nae kikite ae kau balofita i he higoa o Beali, bea nau muimui ki he gaahi mea taeaoga.

¶ 9 Koia oku behe mai e Jihova, Teu toe lea kiate kimoutolu, bea teu kole ki hoo mou fānau, bea moe fānau a hoo mou fānau.

10 Koeuhi, ke mou alu ki he gaahi motu o Kitimi, o mamata; bea fekau ki Keta, bea fakakaukau lahi, bea vakai, be oku ai ha mea behe.

11 Oku ai ha kakai kuo fetogi ho nau gaahi otua, aia nae ikai koe otua? ka kuo fetogi a hoku kakai ho nau nāunāu ki he mea taeaoga.

12 Oku behe mai e Jihova, E gaahi lagi mou ofo ki he mea ni, bea mou manavahe fakailifia; bea tetetete lahi aubito,

13 He kuo fai e hoku kakai ae mea kovi e ua: kuo nau liaki au koe matavai moui, bea kuo nau ta kiate kinautolu ae gaahi aiaga vai, koe gaahi aiaga vai mafofoa, aia oku ikai faa mau ai ha vai.

¶ 14 Koe tamaioeiki a Isileli? be koe hako ia oe tamaioeiki? ka koeha kuo fakamalohi ai ia?

15 Nae gugulu kiate ia ae faga laione mui, kuo nau tagi aki ae le‘o lahi, kuo nau fakalala ae fonua: kuo tutu hono gaahi kolo bea oku ikai ha kakai.

16 Bea kuo fakavolu foki ho tumuaki, e he fānau o Nofi mo Tabanesi.

17 Ikai kuo hoko ae mea ni kiate koe iate koe be, i hoo jiaki a Jihova ko ho Otua, i he ene tataki koe i he hala?

18 Bea koeni, koeha aau te ke alu ai i he hala ki Ijibite, ke inu i he gaahi vai o Sihoa? bea koeha te ke alu ai koe i he hala ki Asilia, ke inu i he vai oe vaitafe?

19 E tautea koe e hoo agahala aau, bea e valoki‘i koe e hoo fakaholomui: koia ke ke ilo mo vakai, koe mea kovi mo fakamamahi, a hoo jiaki a Jihova ko ho Otua, bea oku ikai te ke manavahe kiate au, oku behe e he Eiki ko Jihova oe gaahi kau tau.

¶ 20 He talu mei mua kuou maumau‘i hoo haamoga, bea motuhi ho gaahi ha‘i; bea naa ke behe, E ikai teu fai kovi; ka kuo ke eveeva i he gaahi mouga maoluga kotoabe, bea i he lolo akau mata kotoabe o fai agahala.

21 Ka naaku to koe, koe vaine lelei, koe tega lelei aubito: bea oku fefe ai hao liliu koe akau kovi, koe vaine kehe kiate au?

22 He oku behe mai e he Eiki ko Jihova, kabau te ke fufulu koe aki ae naita, bea too kiate koe ae koa lahi, ka oku kei iloga a hoo hia i hoku ao.

23 E fefe koa a hoo behe, Oku ikai teu uli, oku ikai teu muimui kia Beali? vakai ki hoo ulugaaga i he telea, ke ke ilo aia kuo ke fai: koe kameli vee vave koe, oku fealuaki i hono gaahi hala;

24 Koe asi hehegi oku maheniai moe toafa, aia oku ne folohifo ae matagi i he ene holi; bea i he ene behe kohai oku faa fakafoki ia? e ikai kumi fakafiu‘i ia e ha taha; ka te nau ilo ia i hono mahina.

25 Taofi ho va‘e mei he tae tobuva‘e, bea mo ho kia mei he fieinu: ka naa ke behe, Oku ikai ha amanaki: oku ikai; he kuou ofa ki he kau muli, bea teu muimui be kiate kinautolu.

26 Hage oku ma ae kaihaa i hono ilo‘i ia, oku behe ae ma ae fale o Isileli; ko kinautolu, mo ho nau gaahi tu‘i, mo ho nau houeiki, mo ho nau kau taulaeiki, mo ho nau kau balofita.

27 Ko kinautolu oku behe ki he akau, Ko eku tamai koe; bea ki he maka, Naa ke faele‘i au: he kuo nau fulitua kiate au, bea oku ikai haga mai ho nau mata: ka i he aho oe nau mamahi te nau lea, o behe mai, Tuu hake, o fakamoui akimoutolu.

28 Ka koefe ho gaahi otua kuo ke gaohi moou? ke tuu hake akinautolu, kabau te nau faa fakamoui koe i he aho oe mamahi: he oku hage ko hono lahi o hoo gaahi kolo, E Juta, oku behe hono toko lahi o ho gaahi otua.

29 Koeha te mou tukuaki‘i ai au? oku behe e Jihova, Kuo agatuu kiate au akimoutolu kotoabe.

30 Kuo taeaoga eku ta‘i hoo mou fānau; he oku ikai te nau boto ai: kuo fakaauha ho mou kau balofita, aki hoo mou heleta amoutolu, o hage koe laione fakaauha.

¶ 31 Ae toutagata, mou tokaga ki he folofola a Jihova. He naaku hoko koe toafa ki Isileli? be koe fonua fakabouli? bea koeha oku behe ai a hoku kakai, Koe houeiki akimautolu; bea e ikai te mau toe ha‘u kiate koe?

32 E faa fakagalo‘i e he tāuboou a ene teuga, be koe taahine taane a ene teuteu? ka kuo fakagalogalo‘i au e hoku kakai i he gaahi aho tae faa laua.

33 Koeha oku ke teuteu ai ho hala ke kumi ae ofa? koia kuo ke akonaki aki ho gaahi hala ki he kau agahala foki.

34 Kuo ilo‘i foki ae toto oe gaahi laumalie tae halaia i he kaba o ho kofu: oku ikai teu ilo ia i he kumi lahi, ka oku fakahaha be ia iate kinautolu ni kotoabe.

35 Ka oku ke behe ekoe, Oku ou tae halaia, bea koia e fakaafe a hono houhau iate au. Vakai, teu fakamāu‘i koe, koeuhi oku ke behe, Nae ikai te ke fai kovi.

36 Koeha oku ke alu fano ai be ke fetogi ho hala? te ke ma foki ki Ijibite, o hage ko hoo ma ki Asilia.

37 Io, te ke alu meiate ia, kuo ai ho nima ki ho ulu: he kuo jiaki e Jihova ho gaahi falalaaga, bea e ikai te ke monuia ai.