Ko te Pukapuka a Aperahama

1. I roto i te whenua o nga Karari, i te kainga o toku papa, i kite ahau, a Aperahama e tika ana kia whiwhi ahau ki tetahi atu wahi hei nohoanga moku;

2. Na, i te mohiotanga tera ano he haringa nui, me te rangimarie, me te okiokinga moku, ka rapu ahau i nga manaakitanga o nga matua, me te tikanga e ahei ai ahau kia whakaritea hei hoatu ano i aua mea; i te mea ko ahau tonu e aru ana i te tika, me te hiahia ano hoki ko ahau tetahi hei whiwhi ki te matauranga nui, me tetahi ano hoki he nui ake te aru i te tika, a kia whiwhi ki te matauranga nui, a kia meinga he matua mo nga iwi maha, he piriniha mo te rangimarie, me te hiahia ano kia whiwhi ki nga tohutohu, me te pupuri i nga whakahaunga a te Atua, no reira i meinga ai ahau hei kai whakakapi tika, hei Tohunga Nui, e pupuri ana i te mana o nga matua.

3. He mea tuku mai tera ki a au i nga matua, i heke mai i nga matua, no te timatanga o nga wa, ae, no te timatanga ra ano, i mua atu o te hanganga o te whenua tae mai ki naianei, ae ra, te mana o te matamua, i runga i te tangata tuatahi, ko ia nei a Arama, to tatou matua tuatahi, ma roto mai i nga matua tae iho ki a au.

4. A i rapu ahau i toku ake whakaritenga ki te Tohungatanga, e rite ana ki ta te Atua whakaritenga i nga matua mo te taha ki o ratou uri.

5. I te mea kua tahuri ke atu oku matua i te tika, i nga whakahaunga tapu ano hoki, i homai ai e te Ariki, e to ratou Atua ki a ratou, me te koropiko atu ki nga atua o te iwi karakia whakapakoko, no reira ratou i kore rawa ai i whakarongo ki toku reo;

6. No te mea kua anga ke o ratou ngakau ki te mahi kino, a kua whakatahuritia atu ki te atua o Erekana, te atua o Ripana, me te atua o Mamakara, me te atua o Koraha, me te atua o Parao, te kingi o Ihipa;

7. No reira i anga atu ai o ratou ngakau ki te whakahere a nga iwi karakia whakapakoko, tapae atu ana i a ratou tamariki ki o ratou whakapakoko reo kore, no ka kore e whakarongo ki toku reo, engari ka rapu ki te whakamate i a au, he mea ma nga ringaringa o te tohunga o Erekana. Ko te tohunga o Erekana, ko ia ano hoki te tohunga o Parao.

8. A i tenei wa ko te ritenga a te tohunga o Parao, te kingi o Ihipa, hei tapae atu ki runga i te aata, i hanga nei e ratou i te whenua o Karari, hei patunga tapu ki enei atua rereke, i nga tane, i nga wahine me nga tamariki.

9. Nawai a, ka mahia e te tohunga he whakahere ki te atua o Parao, ki te atua ano hoki o Hakarire, i runga i te ritenga a nga Ihipiana. Na ko te atua o Hakarire ko te ra.

10. Tera ano hoki te whakahere-whakapai i tapaea ai he tamaiti e te tohunga o Parao, ki runga ki te aata e tu ana i te taha o te puke, i huaina nei ko te Puke o Potiwhara, i te timatanga o te mania o Orihema.

11. Na, i tetahi wa, na tenei tohunga ano i tapae atu e toru nga wahine puhi ki runga ki te aata, he tamahine ratou no Onita, he uri rangatira i heke tika mai i nga hope o Hama. I tapaea atu enei wahine puhi hei whakahere, he mea na to ratou poke-kore; no te mea kahore ratou i koropiko ki nga atua rakau, kohatu ranei, no reira ratou i patua i runga i tenei aata, a i meatia i runga i te ritenga o nga Ihipiana.

12. Nawai a, ka tutu mai nga tohunga ki a au, he mea kia whakamatea ano hoki ahau, kia pera i ta ratou meatanga ki aua wahine puhi i runga i te aata; a kia whai matauranga ai koutou ki tenei aata, me whakaatu e ahau ki a koutou te whakaahua i te timatanga o tenei tuhituhinga.

13. I hangaia tera kia rite ki te hanga o te peti, pera i o nga Karari, e tu ana i mua o nga atua o Erekana, o Ripana, o Mamakara, o Koraha, me tetahi atua e rite ana ki to Parao kingi o Ihipa.

14. A kia mohio ai koutou ki tenei atua, kua hoatu e ahau te ahua o ratou i roto i nga whakaahua i te timatanga, a e rite ana te whakaahua, ki te mea e karangatia ana e nga Karari, ko Rariino, tona tikanga ko ngo tohu onamata mo te tuhituhi.

15. A i a ratou e hapai ake ana i o ratou ringaringa ki runga i a au, kia tapae ai ratou i a au, me te tango ano i toku ora, nana, ka ara ake toku reo ki toku Ariki, ki toku Atua, a ka aro mai te Ariki me te whakarongo, me tana whakaki i a au ki tetahi kitenga o te Kaha Rawa, a ko te anahera o tona aroaro tu ana i toku taha; hohoro tonu te wewete i oku hereherenga;

16. A ka puaki mai tona reo ki a au; E Aperahama, e Aperahama, nana ko Ihowa toku ingoa; kua rongo ahau i a koe; a kua heke mai ki te whakaputa i a koe, me te tango atu i a koe i te whare o tou matua, i ou hoa katoa hoki, ki roto ki tetahi whenua tauhou, kahore nei ano koe i mohio noa.

17. Ko te take o tenei, no te mea kua tahuri ke atu o ratou ngakau i a au, ki te koropiko ki te atua o Erekana, ki te atua o Ripana, ki te atua o Mamakara, ki te atua o Koraha, me te atua o Parao, kingi o Ihipa: no reira ahau i haere ai ki raro nei ki te toro i a ratou, me te whakangaro i a ia kua ara ake tona ringa ki a koe, e Aperahama, e taku tama, hei whakamate i a koe.

18. Nana, ka arahina koe e ahau, ma toku ake ringa, a ka tango ahau i a koe, kia meatia toku ingoa ki runga i a koe, ae ra, te Tohungatanga o tou papa, a kei runga i a koe toku kaha.

19. He pera ano i te mea i a Noa, a ka pera hoki ki a koe; a ma roto i ou mahi e mohiotia ai toku ingoa i runga i te whenua mo ake tonu atu, no te mea, ko ahau tou Atua.

20. Nana, ko te Puke o Potiwhara i roto i te whenua o Uru o nga Karari. A i pakaru iho i te Atua te aata o Erekana, o nga atua o te whenua, a whakangaromia iho aua mea, me te patu i te tohunga kia mate ia; a he nui ano te uhunga i roto i Karari, i roto ano hoki i nga tangata nunui o Parao, a ko te tikanga o Parao, he kingi no roto i nga momo kingi.

21. Na, ko tenei kingi o Ihipa he uri whakaheke mai no nga hope o Hama, a kei roto i a ia nga toto o nga Kanaana, he uri tupu.

22. No roto i tenei tatai i puta ai nga Ihipiana katoa, a penei i tohungia ai nga toto o nga Kanaana i roto i te whenua.

23. Ko te whenua o Ihipa he mea kite i te tuatahi e tetahi wahine, he tamahine ia na Hama, he tamahine na Ihipata, i roto i te reo Karari ko Ihipa, tona whakamaoritanga ko te mea kua rahuitia.

24. I te wa i kitea ai tenei whenua e tenei wahine, i raro tera i te wai, a i muri iho ka whakanohoia e ia ana tama ki reira; no reira i puta mai i a Hama taua iwi i mau ai te kanga i runga i te whenua.

25. A ko te kawanatanga tuatahi o Ihipa, na Parao i whakatu, na te tama matamua o Ihipata, te tamahine a Hama, he mea whakarite ki te ahua o te kawanatanga o Hama, i te matua ki te tama.

26. I te mea he tangata tika a Parao i whakatu nei i tona kingitanga, me te whakarite whakawa i tona iwi, i runga i te matauranga me te pono i ona ra katoa, me te rapu i runga i te ngakau iti kia rite te whakahaere ki ta nga matua i nga whakatupuranga tuatahi, i nga ra i kingi tuatahi ai i runga i ta nga matua whakahaere, pera i te kingitanga o Arama, me to Noa ano hoki tona papa, nana nei ia i manaaki ki nga manaakitanga o te whenua, ki nga manaakitanga o te matauranga, heoi kanga iho ia mo te taha ki te Tohungatanga.

27. Na te whakapapa o Parao i kore ai ia e tika kia whiwhi ki te Tohungatanga, he ahakoa ra i mea nga Parao kei a ratou te Tohungatanga o Noa, ma roto mai i a Hama, no reira toku papa i arahina ketia ai e a ratou karakia whakapakoko;

28. Otira, a muri ake nei ka timata ahau te whakataki i nga whakapapa, me hoki whakamuri atu i a au ki te timatanga ra ano o te hanganga, no te mea kua taka ki roto i oku ringaringa nga tuhituhinga, a kei a au e pupuri ana i tenei wa.

29. A i muri iho i te meatanga i te tohunga o Erekana kia mate, ka tutuki ai nga mea i korerotia mai ai ki a au mo te taha ki te whenua o Karari, tera e pa he mate kai ki runga ki te whenua.

30. No reira i pa ai te mate kai puta noa i te whenua o Karari, na ka pa te hinapouri ki toku papa he mea na te mate kai, a ka ripeneta ia mo te kino i meatia e ia ki a au, ara, kia whakamatea au.

31. Otira ko nga tuhituhinga a nga matua, ae ra, a nga tupuna mo te whakahekenga iho o te Tohungatanga, i tohungia ai e te Ariki, e toku Atua i roto i oku ake ringaringa; no reira te matauranga o te timatanga o te hanganga, o nga ao me nga whetu, i whakamohiotia ki nga matua, he mea pupuri naku taea noatia tenei ra; a ka mea ahau ki te tuhituhi i etahi o enei mea ki runga i enei pukapuka, hei painga mo oku uri tera e puta mai i muri i a au.