1. Na, ka mea te Ariki: Tena tatou ka heke ki raro. A heke iho ana ratou i te timatanga, a ko ratou, ara nga Atua, ka hanga, ka whakaahua i nga rangi me te whenua.

2. Na, ko te whenua, i muri iho i tona whakaahuatanga, kahore he mea, he titohea hoki no te mea kahore ano he mea i whakaahuatia, ko te whenua anake; a mau ana te pouritanga i runga i te mata o te hohonu, a ko te Wairua o nga Atua e whakapaho ana i runga i te kare o nga wai.

3. Na, ka mea ratou, (nga Atua): Kia marama; a ka marama.

4. A ka kite ratou (nga Atua) i te marama, no te mea, he kanapa; a ka wehewehe ratou i te marama, ara, meatia ana kia wehe i te pouritanga.

5. Na, huaina ana e nga Atua te marama he Awatea, a ko te pouritanga i hua e ratou he Po. Nawai a, mai i te ahiahi taea noatia te ata i huaina e ratou he po; a mai i te ata ki te ahiahi, i huaina e ratou he awatea; a koia nei te tuatahi, ara te timatanga o tera i karangatia e ratou he awatea, he po.

6. A, ka mea ano nga Atua: Meinga kia whai takiwa i waenganui i nga wai, hei wehe mai i nga wai i nga wai.

7. Na ka whakaritea e nga Atua te takiwa, kia wehea nga wai i raro o te takiwa i nga wai i runga atu o te takiwa; a ka oti, rite tonu ki ta ratou i mea ai,

8. A, huaina ana e nga Atua te takiwa, he Rangi. Nawai a, mai o te ahiahi ki te ata i karangatia e ratou he po; nawai a, mai o te ata ki te ahiahi i huaina e ratou he awatea; a ko te tuarua tenei o ta ratou huanga he po, he awatea.

9. A, ka whakahau ano nga Atua, ka mea: Meinga nga wai i raro o te rangi kia huihui ki te wahi kotahi, kia puta ake ai te whenua maroke; a ka oti rite tonu ki ta ratou i whakahau ai;

10. A, ka karangatia e nga Atua, te whenua maroke He whenua; a ko te huihuinga o nga wai, i karangatia e ratou ko nga wai maha; a ka kite nga Atua e rangona ana ratou.

11. A, ka mea nga Atua: Tena tatou e whakarite i te whenua hei whakaputa ake i te tarutaru; me nga mahuri whai kakano; me nga rakau hua e whai hua ana, e rite ana ki a ia, ko ona purapura kei roto i a ia e whakaputa ake ana i tona ake ahua ki runga i te whenua, a ka oti, rite tonu ki ta ratou i whakahau ai.

12. A ka hanga e nga Atua te whenua hei whakaputa ake i te tarutaru i roto ano i ona purapura, me te mahuri hei whakaputa ake i nga mahuri i roto i ona ake purapura, e whai purapura nei e rite ana ki a ia; a kia whakaputaina ake e te whenua nga rakau i roto ano i ona purapura, e whai hua ana, e ahei ana ano ona purapura ki te whakaputa ake kia rite anake ki a ia ake, i runga i tona ahua; a ka kite nga Atua e rangona ana ratou.

13. Nawai a, ka tatauria e ratou nga ra; mai o te ahiahi ki te ata i huaina e ratou he po; nawai a, mai o te ata ki te ahiahi i huaina e ratou he awatea; a ko te tuatoru tenei.

14. A ka hangaia e nga Atua nga marama i roto i te takiwa o te rangi, a meinga ana era hei wehe i te awatea i te po; a hangaia ana ratou hei tohu, hei wa, hei ra, hei tau;

15. A, hangaia ana e ratou hei marama i roto i te takiwa o te rangi, hei whakamarama i te whenua, a ka oti.

16. A hanga ana e nga Atua nga maramatanga e rua, ko te mea nui hei tohutohu i te awatea, ko te marama tuaiti hei tohutohu i te po; i te taha o te marama tuaiti i whakaritea e ratou nga whetu;

17. A whakanohoia ana era e nga Atua i roto i te takiwa o nga rangi, hei whakamarama i runga i te whenua, hei tohutohu i te awatea, i te po, a kia wehe ai te marama i te pouritanga.

18. A ka titiro atu nga Atua ki aua mea i whakahaua e ratou, a ngohengohe ra ano ratou.

19. Nawai a, mai o te ahiahi ki te ata, koia ra te po; a nawai a, mai o te ata ki te ahiahi, koia ra te awatea; a koia ra te tuawha.

20. A, ka mea nga Atua: Tena tatou ka mea i nga wai kia whakaputaina ake tona tini o nga mea ngokingoki whai ora; me nga manu, kia rere i runga ake o te whenua, i roto i te takiwa o te rangi.

21. Na, ka whakarite nga Atua i nga wai kia ahei ai te whakaputa mai i nga tohora nunui, me nga mea ora katoa e korikori ana, kia whakaputaina mai e nga wai kia rite ki a ratou ano; me nga manu whai parirau i o ratou ake ahua. A ka kite nga Atua e ngohengohe ana ratou, me ta ratou tauira e pai ana.

22. A, ka mea nga Atua: Ka manaaki tatou i a ratou, me te mea ano i a ratou kia tini, kia hua, me te whakaki ano i nga wai i roto i nga moana, ara nga wai nunui; me te mea ano i nga manu kia tini ki runga i te whenua.

23. Nawai a, mai o te ahiahi ki te ata i huaina e ratou he po; a nawai a, mai o te ata ki te ahiahi i huaina e ratou he awatea; a ko te wa tuarima tera.

24. A, ka whakarite nga Atua i te whenua kia whakaputaina ake nga mea ora i o ratou ake ahua, nga kararehe, me nga mea ngokingoki, me nga kirehe o te whenua i roto i o ratou ake ahua, a ka oti, rite tonu ki ta ratou i mea ai.

25. A ka hanga nga Atua i te whenua kia whakaputaina mai nga kirehe i roto i o ratou ake ahua, me nga kararehe i roto i o ratou ake ahua, me nga mea katoa e ngokingoki ana i runga i te whenua i roto i o ratou ake ahua; a ka kite nga Atua kua ngohengohe ratou.

26. Na, ka runanga nga Atua i waenganui i a ratou ano, a ka mea: Tena tatou ka haere atu ki raro a ka hanga i te tangata i roto i to tatou ahua, hei to tatou te ahua; a kia hoatu e tatou ko ratou hei rangatira mo nga ika o te moana, mo nga manu o te rangi, mo nga kararehe, mo te whenua katoa me nga mea ngokingoki katoa e ngokingoki ana i runga i te whenua.

27. No reira i heke iho ai nga Atua ki te hanga i te tangata, i roto i to ratou ake ahua, i roto i te ahua o nga Atua e hanga ai ratou i a ia, e hanga ai raua e ratou, he tane, he wahine.

28. A ka mea nga Atua: Tatou ka manaaki i a raua. A ka mea nga Atua: Ka meinga raua e tatou kia tini, kia hua, kia whakakapi ano i te whenua, kia mate ano hoki ona tara i a raua, a kia whai mana i runga i nga ika o te moana, i nga manu o te rangi, i nga mea ora katoa e haereere ana i runga i te whenua.

29. Na, ka mea nga Atua: Nana, ka hoatu e tatou ki a raua nga mahuri katoa e whai purapura ana tera e puta ake ki runga i te mata katoa o te whenua, me nga rakau katoa he hua nei ona; ae ra, nga hua o nga rakau whai purapura, ka hoatu ki a raua; a koia ra hei kai ma raua.

30. A ki nga kararehe katoa o te whenua, ki nga manu katoa o te rangi, ki nga mea ngokingoki i runga i te whenua, nana, me hoatu e tatou ki a ratou he oranga; a me hoatu ano hoki e tatou ki a ratou nga mahuri hou katoa hei kai, a ka pera te hanganga i enei mea katoa.

31. Na, ka mea nga Atua: Ka meatia katoatia nga mea kua korerotia e tatou, a ka hanga i a ratou; a nana, ka ngohengohe rawa ratou. Nawai a, mai o te ahiahi ki te ata i huaina e ratou he po; a nawai a, mai o te ata ki te ahiahi, i huaina e ratou he awatea; a karangatia ana e ratou ko te wa tuaono.