Tokante Di Ta Outéntiko

E ta un parti di naturalesa humano pa kier mustra nos [parti] mihó. E ta e motibu ku hopi di nos ta traha doro riba e eksterior di nos hogarnan i pakiko e rumannan yòn di e Saserdosio Aaróniko ta sigurá ku kada kabei ta na su lugá, porsiakaso ku nan lo por topa e persona speshal ei. No tin nada malu den lombra nos sapatonan usa nos mihó holónan, òf asta skonde e tayonan sushi promé ku e maestronan orientadó ta yega. Sin embargo, ora nos ta hiba esei na e ekstremo, e deseo pa impreshoná e por kambia di ta útil pa ta engañoso.

E profetanan di Señor semper a atvertí kontra esnan kende “ta honra [Señor] ku boko so, pero su kurason ta leu fo’i [djE].”¹

E Salbador tabata komprensivo i yen kompashon ku pekadornan kende nan kurason tabata humilde i sinsero. Pero El a rabia den hustisia ku e hipókritanan manera e dòktornan di lei, Fariseonan, i Saduseonan—esnan kende a purba di parse rekto pa asina gana e alabansa, influensha, i rikesa di e mundu, tur miéntras oprimiendo e hendenan nan tabata mester bendishoná. E Salbador a kompará nan na “grafnan blanchá blanku, bunita di pafó, ma ku paden ta yen di wesu di hende morto i kos putrí.”²

Den nos tempu, Señor tin palabranan mesun fuerte pa poseedornan di saserdosio kende ta purba di skonde nan pikánan, òf di gratifiká nan orguyo, òf nan ambishonnan vano. Ora nan ta hasi esei, El a bisa, e shelunan ta retirá nan mes; e Spiritu di Señor ta aflihí; i ora e retirá, Amèn na e saserdosio òf e outoridat di e hòmber ei.³

Dikon esaki ta pasa? Dikon nos ta purba tin biaha pa parse aktivo, próspero, i dediká di pafó kaminda paden—manera e Reveladó a bisa di e Efesionan—nos a laga [nos] promé amor?⁴

Den algun [di e] kasonan, por ta nos a simplemente pèrdè nos enfoke riba e esensia di e evangelio, kibokando e “forma di deboshon na Dios” pa e “poder di esaki.”⁵ Esaki ta spesífikamente peligroso ora nos ta dirigí nos ekspreshonnan di pafó di disípulado pa impreshoná otronan pa ganashi personal òf influensha. E ta e ora ei ku nos ta tuma e rísiko di drenta den e teritorio di fariseo, i e ta tempu a yega pa eksaminá nos kurasonnan pa tuma medidanan pa korigí nos kurso inmediatamente.

E tentashon aki pa parse mihó ku nos ta no solamente ta wòrdu hañá den nos bidanan personal pero por wòrdu hañá den nos asignashonnan di Iglesia tambe.

Pa ehèmpel, mi sa di un estaka unda e lidernan a pone algun metanan ambisioso pa e aña. Miéntras ku e metanan tur a mustra digno, nan a enfoká òf riba deklarashonnan impreshonante i haltu òf riba numbernan i porsentahenan.

Despues ku e metanan a wòrdu palabrá i tur a bai di akuerdo ku nan, algu a kuminsá di preokupá e presidente di estaka. El a pensa tokante e miembronan di su estaka—manera e mama yòn ku mucha chikitu ku a kaba di bira biuda. El a pensa tokante e miembronan kende tabata luchando ku dudanan òf soledat òf kondishonnan intenso di salú sin tin seguro. El a pensa tokante e miembronan kende tabata enfrentando matrimonionan kibrá, adikshonnan, desempleo, i malesa mental. I mas ku el a pensa tokante nan, mas el a puntra su mes un pregunta humiante: nos metanan lo bai hasi un diferensha den e bidanan di e miembronan ei?

El a kuminsá puntra su mes kon nan metanan di estaka tabata por ta diferente si nan a puntra promé, “Kiko ta nos ministerio?”

Asina ta ku e presidente di estaka aki a bai bèk serka su konseheronan, i huntu nan a kambia nan enfoke. Nan a determiná ku nan no lo permití “esun ku hamber, … esun ku nesesidat, … esun sunú, … esun malu, i esun aflihí pasa banda di [nan], sin nan wòrdu notá.”⁶

Nan a pone metanan nobo, rekonosiendo ku éksito ku e metanan nobo aki no semper por wòrdu midí, por lo ménos no di hòmber—pasobra kon unu ta midi testimonio personal, amor di Dios, òf kompashon pa otronan?

Pero nan tabata sa tambe ku “hopi di e kosnan ku bo por konta, no ta konta. Hopi di e kosnan ku bo no por konta, realmente ta konta.”⁷

Mi ta puntra mi mes ku si nos metanan organisatorio i personal tin biaha ta e ekivalente moderno di un pueblo di Potemkin. Nan ta mustra impreshonante for di un distansha pero falta di atendé e nesesidatnan real di nos próhimo stimá?

Mi kerido amigunan i kompañero poseedornan di saserdosio, si JesuCristu lo tabata sintando meimei di nos i puntra pa kuenta i rason di nos atministrashon, mi no ta sigur ku E lo enfoká hopi riba programanan i statistiknan. Lokual e Salbador lo kier sa ta e kondishon di nos kurason. E lo kier sa kon nos a stimá i atministrá na esnan den nos kargo, kon nos a mustra nos amor pa nos kasa i famia, i kon nos a hasi nan kargo diario mas lihé. I e Salbador lo kier sa kon abo i ami a krese mas serka di djE i na nos Tata Selestial.

E por ta benefisioso pa buska nos mesun kurasonnan. Por ehèmpel, nos por puntra nos mes, dikon nos ta sirbi den e Iglesia di JesuCristu?

Nos por asta puntra, dikon nos ta aki na e reunion aki awe?

Mi ta suponé ku si mi tabata di kontesta e pregunta ei riba un nivel superfisial, mi lo por bisa ku mi ta akinan pasobra Presidente Monson a asigná mi pa papia.

Asina ku realmente mi no tabatin otro opshon.

Ademas di esei, mi kasa, kende mi ta stima masha hopi mes, ta spera di mi pa ta akinan. I kon mi por bisa “no” na dje?

Pero nos tur sa ku tin rasonnan mas mihó pa asistí na nos reunionnan i biba nos bidanan manera disipelnan komprometí di JesuCristu.

Ami ta akinan pasobra mi ta deseá ku henter mi kurason pa sigui mi Maestro, JesuCristu. Mi ta anhelá pa hasi tur loke ku E pidi mi den e gran kousa aki. Mi ta hambrá pa wòrdu edifiká pa e Spiritu Santu i skucha e stèm di Dios ora E ta papia dor di su sirbidónan ordená. Ami ta akinan pa bira un hòmber mihó, pa wòrdu hisa pa e ehèmpelnan inspirá di mi rumannan den Cristu, i pa siña kon pa mas efektivamente atministrá na esnan ku nesesidat.

Den un palabra, ami ta akinan pasobra mi ta stima mi Tata Selestial i Su Yu, JesuCristu.

Mi tin sigur ku esaki ta boso rason tambe. Esaki ta pasobra nos ta dispuesto di hasi sakrifisionan i no djis deklará pa sigui e Salbador. Esaki ta pakiko nos ta karga ku honor Su santu saserdosio.

Sea si bo testimonio ta kresiendo i bon di salú òf bo aktividat den Iglesia ta mas manera un pueblo di Potemkin, e bon notisia ta ku bo por edifiká riba kualkier forsa ku bo tin. Aki den e Iglesia di JesuCristu bo por madurá spiritualmente i bini mas serka di e Salbador dor di apliká prinsipionan di evangelio dia pa dia.

Ku pasenshi i persistensia, asta e aktu mas chikitu di disípulado òf e chispa mas chikitin di kreensha por bira un fogata yen di lus di un bida konsagrá. Di hecho, esei ta kon e mayoria di fogatanan ta kuminsá—komo un chispa simpel.

Asina ku si bo ta sinti chikitu i debil, por fabor simplemente bini na Cristu, kende ta hasi kosnan debil fuerte.⁸ Esun mas debil entre nos, dor di e grasia di Dios, por bira spiritualmente fuerte, pasobra Dios “no ta hasi distinshon di persona.”⁹ E ta nos “Dios ku [nos] por konfia, ku ta atené na e kombenio i [na] mizèrikòrdia ku esnan ku ta stim’E i ta kumpli ku su mandamentunan.”¹⁰

E ta mi konvikshon ku si Dios por ekstendé Su man i sostené un pober refugiado Aleman for di un famia modesto den un pais kibrá dor di guera mitar di e mundu leu for di e sede prinsipal di Iglesia, e ora ei E tambe por ekstendé Su man na abo.

Mi kerido rumannan den Cristu, e Dios di Kreashon, kende a inhalá bida den e universo, sigur tin e poder pa inhalá bida den bo. Sigur E por traha di bo e ser Outéntiko i spiritual di lus i bèrdat ku bo ta deseá di ta.

Dios su promesanan ta sigur i sierto. Nos por wòrdu pordoná pa nos pikánan i purifiká di tur maldat.¹¹ I si nos ta kontinuá brasa i biba e berdadero prinsipionan den nos sirkunstanshanan personal i den nos famianan, na final nos lo yega na e punto kaminda “nunka mas …[nos] lo sufri ni hamber ni set, … pasobra e Lamchi meimei dilanti di e trono lo duna [nos[ kuminda i lo hiba [nos] na fuentenan di e awa bibiente; i Dios mes lo seka tur lágrima na [nos] wowo.”¹²

Pero esei no por pasa si nos ta skonde tras di fachadanan personal, dògmátiko, òf organisatorio. Tal disípulado artifisial no solamente ta tene nos for di mira pa nos mes ken nos realmente ta, pero tambe e ta prevení nos for di kambia di bèrdat dor di e milager di e Ekspiashon di e Salbador.

Iglesia no ta un kamber di eksposishon di outonan—un lugá pa ekshibí nos mes pa asina otronan por atmirá nos spiritualidat, kapasidat, òf prosperidat. E ta mas manera un sentro di servisio [òf un garashi], unda outonan ku tin mester di reparashon ta bini pa mantenementu i rehabilitashon.

I nos no ta, nos tur, den nesesidat di reparashon, mantenementu, i rehabilitashon?

Nos ta bini na iglesia no pa skonde nos problemanan pero pa kura nan.

I komo poseedornan di saserdosio, nos tin un responsabilidat adishonal—pa “kuida e karnénan [di] Dios … , boluntariamente i no fòrsá; hasié ku deseo pa sirbi i no pa ganashi [personal]. No aktua komo si fuera boso ta doño di e karnénan, … pero sea un ehèmpel pa nan.”¹³

Kòrda, rumannan, “Dios ta resistí esnan orguyoso, pero E ta duna esnan humilde grasia.”¹⁴

E hòmber mas grandi, mas kapas, ku a lográ mas, kende a yega di kana riba e tera aki tambe tabata esun mas humilde. El a duna algun di Su servisio mas impreshonante den momentunan privá, ku solamente un par di opservadónan, ku El a pidi pa no “konta niun hende” kiko El a hasi.¹⁵ Ora un hende a yam’E “bon,” E tabata lihé pa desviá e elogio, insistiendo ku solamente Dios ta berdaderamente bon.¹⁶ Klaramente e alabansa di e mundu no tabata nifiká nada p’E; Su propósito singular tabata pa sirbi Su Tata i “semper … hasi loke ta agrad’E.”¹⁷ Nos lo hasi bon pa sigui e ehèmpel di nos Maestro.

Rumannan, esaki ta nos yamamentu haltu i santu—pa ta agentenan di JesuCristu, pa stima manera El a stima, a sirbi manera El a sirbi, pa hisa e mannan ku ta kologá, i fortalesé e rudianan debil,¹⁸ pa mira tras e pobernan i esunnan ku nesesidat,¹⁹ i pa kuida e viudanan i huérfanonan.²⁰

Mi ta roga, rumannan, ku manera nos ta sirbi den nos famianan, Quorumnan, barionan, estakanan, komunidatnan, i nashonnan, nos lo resistí e tentashon pa atraé atenshon riba nos mes, i na lugá di esei, trata pa un honor hopi mas grandi: ta bira disipelnan humilde i Outéntiko di nos Señor i Salbador, JesuCristu. Si nos ta hasi esei, nos lo haña nos mes kanando e kaminda ku ta hiba na nos mihó, mas genuino, i mas nobel persona. Di esaki mi ta testifiká den e nòmber di nos Maestro, JesuCristu, amèn.