E Saserdosio --Un don Sagrado

Un di mi memorianan di mas bibu ta asistiendo reunion di Saserdosio komo un diákono resien ordená i kantando e himno durante di apertura “Venid los que teneis de Dios el Sacerdocio.”¹ Awe nochi, na tur esnan reuní aki den e Sentro di Konferensha i klaro, rònt mundu mi ta ripití e spiritu di e himno speshal ei i ta bisa boso; Bini boso tur yunan di Dios ku a risibí e Saserdosio, laga nos konsiderá nos yamamentunan, laga nos reflekshoná riba nos responsabilidatnan; laga nos determiná nos debernan i laga nos sigui JesuCristu, nos Señor. Miéntras ku nos por diferenshá den edat, den kustumber, den nashonalidat, nos ta uní komo unu den nos yamamentunan di Saserdosio.

Pa kada un di nos, e restourashon di E Saserdosio Aaróniko na Oliverio Cowdery i Jose Smith dor di Huan Boutista, ta masha importante. Meskos, e restourashon di e Saserdosio Melkisedek na Jose i Oliverio dor di Pedro,Hakobo, i Huan ta un evento pa apresiá.

Laga nos tuma nos yamamentunan masha na serio, e responsabilidatnan, i e debernan ku ta bin ku e saserdosio ku nos ta poseé.

Mi a sinti un gran responsabilidat ora mi a wòrdu yamá pa ta e sekretario di e quorum di e diákononan. Mi a prepará konsientemente e registro ku mi tabata tene, pasó mi tabata ker a hasi mi mihó esfuerso. Mi tabatin hopi orguyo den mi trabou. Hasiendo tur loke mi tabata por, mas bon posibel, esei tabata mi meta den kada yamamentu ku mi tabatin.

Mi ta spera ku kada hóben ku a wòrdu ordená den e Saserdosio Aaróniko a wòrdu konsientisá spiritualmente di [kon] sagrado su yamamentu ordená ta, i tambe e oportunidat pa magnifiká e yamamentu aki. Mi a haña un oportunidat komo diákono ora e obispu a puntra pa mi hiba e santa sena pa un persona ku ta biba riba su mes, kasi un kilometer i mei for di nos kapia. E djadumingu speshal ei, ora mi a bati na porta di Hermano Wright i a tende un stèm frágil bisa, ”Bin paden.” Mi a drenta no solamente den su humilde kas, pero tambe den kamber yená ku e spiritu di Señor. Mi a aserká Hermano Wright su banda di kama i koutelosamente a pone un pida di e pan na su lepnan. Despues mi a lanta e kùp di awa, pa asina e por a bebe. Ora mi tabata bayendo, mi a mira lágrimanan den su wowonan ora el a bisa, Dios bendishoná bo, mi yu.” I Dios a bendishoná mi--ku un apresio pa e emblemanan sagrado di e santa sena i pa e saserdosio ku mi tabata poseé.

Ningun diákono, maestro òf presbítero di nos bario hamas por lubidá e bishitanan memorabel ku nos a hasi na Clarkston, Utah, na e graf di Martin Harris, un di e Tres Testigunan di e Buki di Mormon. Ora nos a rondoná e kolumna di granit ku ta marka su graf, i ora un di e lidernan di e quorum a lesa pa nos e palabranan penetrante di ”E Testimonio e Tres Testigunan,” ku por wòrdu hañá na kuminsamentu di e Buki di Mormon, nos a desaroyá un amor pa e registro sagrado i pa e bèrdatnan ku tin eiden.

Durante e añanan ei nos ophetivo tabata pa ta manera e yunan di Mosia. Di nan a wòrdu bisá:

“Nan a fortalesé den e konosementu di e bèrdat; pasó nan tabata hòmbernan di entendimentu profundo i nan a skrudiñá e skrituranan diligentemente, pa nan por konosé e palabra di Dios.

“Pero esaki no ta tur kos; nan a dediká nan mes na hopi orashon i ayuno; p’esei nan tabatin e spiritu di profesia, i e spiritu di revelashon, i ora nan tabata siña, nan tabata siña ku poder i outoridat di Dios.”²

Mi no por pensa di un meta mas digno pa un hóben ku esun deskribí manera e yunan balente i hustu di Mosia tabata.

Yegando mi 18 aña, i preparando pa drenta e servisio militar obligatorio, rekerí pa tur hóben durante Segunda Guera Mundial, mi a wòrdu rekomendá pa risibí e Saserdosio di Melkisedek, pero promé mi mester a yama mi presidente di estaka Paul  C. Child, pa un entrevista. E tabata un ku tabata stima i konosé e skrituranan, i tabata su intenshon ku tur demas persona mester igualmente stima i komprondé nan. Despues di a skucha di algun amigu di su entrevistanan hopi detayá profundo, mi a deseá un eksposishon mínimo di mi konosementu di skritura, p’esei, ora m’a yam’é mi a sugerí pa nos topa e siguiente djadumingu na un tempu ku mi tabata sa ku tabata nèt un ora promé ku e ora di reunion Sakramental.

Su kontesta: “O, Hermano Monson, esei lo no duna nos sufisiente tempu pa nos eksaminá e skrituranan.” Despues el a sugerí un orario tres ora promé ku e reunion sakramental, i el a instruí mi pa bin ku mi skrituranan personalmente marká i ku referenshanan.

Ora ku mi a yega su kas riba djadumingu, mi a wòrdu saludá kalurosamente, i e ora ei e entrevista a kuminsá. Presidente Child a bisa,”Hermano Monson bo tin Saserdosio Aaróniko. Bo a haña angelnan ministrá bo?” Mi a kontestá ku mi no a haña. Ora el a puntra ku si mi sa ku mi tin derechi riba esei, atrobe mi a kontestá ku mi no tabata sa.

El a instruí, “Hermano Monson, ripití for di memoria e sekshon 13 di Doktrina i Kombenio. ”

Mi a kuminsá,”’Riba bosonan mi konsiervonan, den e nòmber di e Mesias mi ta konferí e Saserdosio di Aaron, ku tin e yabinan di e ministerio di angelnan—”’

”Stòp,” presidente Child a indiká. Despues, ku un bos kalmu, un tono kariñoso, el a konsehá, ”Hermano Monson, nunka lubidá ku komo un poseedor di Saserdosio Aaróniko bo tin derechi riba e ministerio di angelnan.”

Tabata kasi manera un angel tabata den e kamber e dia ei. Nunka mi a lubidá e entrevista. Te ainda mi ta sinti e spiritu di e okashon solemne ei ora huntu nos a lesa e buki di e responsabilidatnan, e debernan, i e bendishonnan di e Saserdosio Aaróniko i e Saserdosio di Melkisedek--bendishonnan ku ta bin no solamente na nos pero tambe na nos famia i na otronan ku nos lo bai tin e privilegio pa sirbi.

Mi a wòrdu ordená un elder, i riba e dia di mi salida pa servisio den marina, un miembro di e obispado di mi bario a uni ku mi famia i amigunan na e stashon di trein pa tuma despedida. Djis promé ku mi mester a subi trein, el a pone den mi man un edishon chikitu titulá Manual pa Misionero. Mi a hari i a komentá ku mi no tabata bayendo riba mishon.

El a kontestá, ” Bai ku n’e tòg, e lo por ta di [bon] uso.”

I asina tabata. Mi tabatin mester di un opheto firkant pa pone na e fondo di mi tas di marinero, pa asina mi pañanan lo keda mas firme i asina nan machiká ménos. E Manual pa Misionero tabata nèt loke mi tabatin mester, i el a sirbi hopi bon den mi tas di marinero pa 12 siman.

Un anochi promé ku nos fakansi di Pasku di nasementu, nos pensamentu tabata riba nos hogar. E barakanan tabata ketu, pero e silensio a wòrdu kibrá dor mi amigu den e kama banda di mi--un mucha Mormon, Leland Merrill--ku a kuminsá keha di doló. Mi a puntra di e rason, i e di ku e ta sinti realmente malu. E no ker a bai na e sentro médiko, pasó e tabata sa ku hasiendo esaki lo prevení pa e por bai kas e dia siguiente.

E tabata parse di ta bira pió, segun e oranan ta pasa. Finalmente, sabiendo ku mi ta un elder, el a puntra mi pa dun’é un bendishon di saserdosio..

Nunka ántes m’a yega di duna un bendishon di Saserdosio, nunka mi no a risibí bendishon, i nunka mi no tabata testigu di un bendishon ku a wòrdu duná. Ora mi tabata hasi orashon den silensio pa ayudo, mi a kòrda riba e Manual pa Misionero den e bòm di mi tas di marinero. Lihé mi a hasi e tas bashí, i a saka e buki den e lus di anochi. Ei m’a lesa kon un hende ta bendishoná e enfermo. Ku masha marinero kurioso mirando, mi a kontinuá ku e bendishon. Promé ku mi por a pone tur kos bèk den e tas, Leland Merrill tabata drumi manera un mucha. El a lanta e dia siguiente mainta sintiendo su mes bon. E gratitut ku kada unu di nos a sinti pa e poder di e saserdosio tabata inmenso.

E añanan a duna i mas oportunidat pa duna bendishon na esnan den nesesidat ku mi por konta. Kada oportunidat a yena mi ku gratitut profundo ku Dios a konfia mi e don sagrado aki. Mi ta respetá e saserdosio. Mi a mira su poder kada biaha atrobe. Mi a mira su poder kada bia atrobe. Mi a mira su forsa. Mi a maraviá na e milagernan ku el a produsí.

Hermanos, kada unu di nos ta wòrdu konfia ku un di e donnan mas presioso hamas otorgá na humanidat. Si nos honrá nos saserdosio i biba nos bidanan pa semper nos ta digno, e bendishonnan di e saserdosio lo brota for di nos. Mi ta gusta e palabranan ku nos ta haña den Doktrina i Kombenio, sekshon 21 versíkulo 45, ku ta bisa nos kiko nos mester hasi pa ta digno: ”Laga bo entraña ...ta yen di karidat pa tur hòmber, i pa e famia di fe, i laga virtut ta yena bo sentimentunan insesante; e ora ei bo konfiansa ta fortalesé den e presensha di Dios; i e doktrina di e saserdosio lo destilá riba bo alma manera serena for di shelu.

Komo poseedornan di e saserdosio di Dios, nos ta komprometé den e obra di e Señor JesuCristu. Nos a kontestá Su yamada; nos ta riba Su Asignashon. Laga nos siña di Dje. Laga nos sigui Su pasonan. Laga nos biba segun Su instrukshonnan. Hasiendo esaki nos lo ta prepará pa kualke servisio ku E ta yama nos pa hasi. Esaki ta Su obra. Esaki ta Su Iglesia. Di bèrdat e ta nos kapitan, e Rei di gloria, si e Yu di Dios. Mi ta testifiká ku E ta biba i ta duna mi testimonio den Su nòmber, e nòmber di JesuCristu, amèn.