Ekar Wōr Mōn̄ā

Mokta jen mo̧ ko ilo iaļen ito-itak itok jen ajeded in nan̄inmej in kiiō, iaar ro̧o̧l n̄an kapijuknen ālkin juon ijjitōn̄ eo, kōn wōt jekjek in jikejuuļ, iaar maron̄ in joļo̧k juon Jabōt. Ikōtaan flight ko ekar wōr aō iien em̧m̧an n̄an kobaļo̧k ilo kweilo̧k in kwojkwoj eo ijo, ijo iaar barāinwōt maron̄ in kwaļo̧k jidik naan in kam̧ool. Ālkin kweilo̧k eo, juon tikōn eaar jibadōktok eō im kar kajjitōk eļan̄n̄e ijeļā kajjien Būreejtōn Nelson im eļan̄n̄e em̧ōj aō kar idik pein. Ikar uwaak ke ijeļā kajjien, bwe em̧ōj aō idik pein, im bwe, āinwōt juon membōr in Bisoprik eo ej Tōl, ewōr aō iien em̧m̧an n̄an kweilo̧k ippān Būreejtōn Nelson im rikakpilōklōk ro an ruo alen ilo juon wiik.

Innām tikōn in edik eaar jijet ilo jia eo, kotak pein ilo mejatoto, im ļamōj, “En̄in ej raan eo em̧m̧antata ilo mour e aō!” Ro jeiū im jatū, iban kotak peiū ilo mejatoto im lam̧ōj, ak ij lukkuun m̧ōņōņō kōn juon rikanaan emour im kōn tōl ko jej būki jān rikanaan ro, rilolo ro, im ribōk revelesōn ro, eļaptata ilo iien kein repen.

Jen jinoin iien, Irooj eaar leļo̧k tōl n̄an jipan̄ armej ro An pojak ilo jetōb im kanniōk ņae jorrāān ko im apan̄ me E ejeļā renaaj itok āinwōt m̧ōttan en̄jake ko an mour in. Jorrāān kein emaron̄ in an juon make ak aolep ilo jekjek in, bōtaab tōl an Irooj enaaj letok kōjparok im jipan̄ eo kōn jon̄an eo me jej ron̄jake im jerbale kapilōk eo An. Juon waanjon̄ak em̧m̧an ej letok juon bwebwenato jān bok in Jenesis, ijo jej ekkatak kōn Josep ilo Ijipt im ukook eo an ekwbwilōn̄lōn̄ kōn ettōn̄ eo an Pero.

“Im Josep ear ba n̄an Pero, … Anij ear kwaļo̧k n̄an Pero men eo E nan̄in kōm̧m̧ane. …

“Lo, ej itok jiljilimjuon iiō n̄e enaaj kanooj lōn̄ kkan ilo aolepen āneen Ijipt:

“Im enaaj waļo̧k ālikier jiljilimjuon iiō in n̄ūta; im renaaj meļo̧kļo̧k ke ear lōn̄ m̧ōn̄ā ilo Ijipt.” ¹

Pero eaar ron̄jake Josep, eaar uwaak ta eo Anij eaar kwaļo̧k n̄an e ilo juon ettōņak im m̧ōkaj an keppopo n̄an ta eo enij itok. Jeje ko rekwojajrar rej je:

“Im ilo iiō ko jiljilimjuon im elōn̄ m̧ōn̄ā ie laļ ear jebar im lōn̄.

“Im ear aini aolepen ekkan in iiō ko jiljilimjuon. …

“Im Josep ear āin grain āinwōt bok in parijet, … ekanooj lōn̄, n̄an iien eo ej joļo̧k an bwini.” ²

Ke iiō ko jiljilimjuon rekar obrak kōn m̧ōn̄ā raar eļļāļo̧k, kar jiron̄ kōj bwe “jiljilimjuon iiō in n̄ūta re jino itok, ke Josep ear ba: Im n̄ūta ear pād ilo āne ko otemjej; a ilo aolepen āneen Ijipt e kar wōr m̧ōn̄ā.” ³

Rainin jej jeraam̧m̧an bwe jen tōl jān rikanaan ro remeļeļe aikuj ko n̄an kōj n̄an pojak ņae jorrāān ko “renaaj itok” ⁴ im eo ebarāinwōt kile jon̄an ko ak mo ko me jemaron̄ in iooni ilo kajjieon̄ ļoor kapilōk eo aer.

Ewōr juon meļeļe ealikkar me rej tōprak in COVID-19, barāinwōt jorrāān ko rej make waļo̧k, ejjeļo̧k kalijekļo̧k im ejjeļo̧k jon̄an, iaioo̧, ak peļaakin kabun̄ ko ilo aolep laļ. Jerbal ko em̧ōj aer jako im kōļļā ko em̧ōj aer dikļo̧k āinwōt an iien eo em̧m̧an n̄an jerbal m̧ōj an ļantotot jān joļok jān jerbal im maron̄ eo n̄an jerbal emōj kar an jelete jān ājmour im apan̄ ko kōn jim̧we an kien.

N̄an aolep ro kar jelet er, kōmij meļeļe im n̄ūrbōktak kōn jekjek eo ami, barāinwōt juon tōmak epen bwe raan ko rem̧m̧an repād im̧aan. Em̧ōj ami jeraam̧m̧an kōn bisop im branch būreejtōn ro me rej pukōtļo̧k membōr ro an jarlepju ko aer kōn aikuj ko ilo kanniōk im ro ewōr ippāer kein jerbal ko im menin jipan̄ ko me remaron̄ jipan̄ eok bar kalōk mour ko am̧ im likūt eo ilo iaļen un̄n̄are peid make ilo am mour kaki pedped ko an keppopo.

Ilo mejatotoin rainin, kōn ajeded in nan̄inmej eo me em̧ōj an kakkure aolep jeraam̧m̧an ko im barāinwōt kajjojo mour, eban jejjet ippān juon Rilo̧mo̧o̧r eo ejouj n̄an kowaan m̧ool eo me elōn̄ rej apan̄ kake im kajjitōk ippāer n̄an jino ejake juon joko in jāān n̄an ilju im jekļaj. Ijoke, ejjab meļeļein bwe jemaron̄ kōjekdo̧o̧n pedped ko an keppopo—pedped kein wōt rej aikuj in jerbal “ilo ļoļātāt im koņ” ⁵ bwe ilo ilju im jekļaj jen maron̄ ba, āinwōt kar Josep ilo Ijipt, “Ekar wōr m̧ōn̄ā.” ⁶

Irooj ejjab kōņaan bwe jen kōm̧m̧an eļapļo̧k jen ad maron̄ kōm̧m̧an, ak Ej kōņaan bwe jen kōm̧m̧ane ta eo jemaron̄e, n̄e jemaron̄ kōm̧m̧ane. Āinwōt an Būreejtōn Nelson kar kakeememej kōj ilo kweilo̧k eo eļap ļo̧k, “Irooj ej iakwe kijejeto.” ⁷

Ritōl ro an Kabun̄ ekkā aer kar rōjan̄ Armej ro Rekwojarjar “n̄an keppopo n̄an iien apan̄ ilo mour bwe en wōr jidik m̧ōn̄ā im dān im jidik jāān ilo akkoun ko.” ⁸ Ilo ejja iien eo wōt, kar bar rōjan̄ kōj n̄an “māletlet” im “jab etal n̄an maatin” ⁹ ilo kijejeto ko ad n̄an kajutak juon im̧ōn kakkoņkoņ im jikin kakkoņ jāān. Juon kein jipan̄ etan Personal Finances for Self Reliance, kar prin ilo 2017 im kiiō ej pād ilo website eo an Kabun̄ in ilo 36 kajin ko, jino kōn ennaan eo an Būreejtōnji eo Kein Kajuon, eo ej kwaļo̧k:

“Irooj ekar kean̄ ‘ej n̄an ņa an ro rekwōjarjar aō’ [Katak im Bujen Ko 104:15]. Revelesōn in ej juon kallim̧ur jān Irooj bwe E enaaj letok kōjeraam̧m̧an ko ilo kanniōk im kōpeļļo̧k kōjām eo kōn un̄n̄are peid make. …

“… Bōki im mour kōn katak kein enaaj em̧m̧anļo̧k an jipan̄ kōj bōk kōjeraam̧m̧an ko an kanniōk ko em̧ōj an kar Irooj kalim̧m̧ur kaki.

“Kōmij karuwaineneik eok n̄an lukkuun ekkatak im mour kake pedped kein im kwaļo̧k n̄an ro uwaan baam̧le eo am̧. Ilo am̧ kōm̧m̧an āindein, baam̧le eo am̧ enaaj jeraam̧m̧an … [kōnke] kwoj juon nejin Jemedwōj Ilan̄. E ej iakwe eok im ejamin kowaane eok. E ejeļā kajjiem im ej pojak in lewaj n̄an eok kōjeraam̧m̧an ko an jetōb im kanniōk kōņ un̄n̄are peid make.” ¹⁰

Kein katak kein ekoba jebta ko kar litok n̄an kōm̧m̧an im mour kake juon bajet, kōjparok baam̧le eo am̧ ņae apan̄, kōjparok jāān, kakkoņ n̄an jeklaj, im ebar lōn̄ im ewōr n̄an aolep ilo website eo an Kabun̄ in ak jen ritōl ro am̧ ijo jokwe ie.

N̄e ļōmņak pedped in keppopo in, jemaron̄ reilikļo̧k n̄an Josep ilo Ijipt kōn im̧we. Jeļā ta eo enaaj waļo̧k eban kar ekkar n̄an n̄an būki ilo iiō in “n̄ūta” ko ijeļo̧kin n̄e eban kar wōr kaarmejete ilo iiō in apan̄ ko. Ijello̧kin amene aolepān m̧weiuk ko Pero emaron̄ kar kwaļo̧ki, kar kokoņ men ko rejjab bwe im ālkin, kae kake ebwe n̄an aikuj ko, barāinwōt, aikuj n̄an ilju im jekļaj. Ejjab bwe n̄an jeļā bwe iien apan̄ ko renaaj itok. Raar aikuj in jerbal im, kōn wōt kijejeto eo aer, “ekar wōr m̧ōn̄ā.” ¹¹

Menin ej tōlļo̧k n̄an juon kajjitōk eaorōk: “Kōn menin, ta?” Juon jikin em̧m̧an n̄an ijjino ej n̄an meļeļe bwe aolep men ko rej ilo jetōb n̄an Irooj, “im jaab ilo jabdewōt iien” Ej letok n̄an kōj “juon kien eo ej kanniōk.” ¹² Innām, aolep men, rej tōļļo̧k n̄an Jisōs Kraist, āinwōt ejm̧aan eo jej aikuj kalōk em̧ool keppopo eo ad ilo kanniōk.

N̄an keppopo ilo kanniōk im un̄are peid make ej meļeļe in “tōmak bwe kōn tūriam̧o, ak bōk kajoor, an Jisōs Kraist im ad make kijejeto, jen maron̄ bōk aolep men ko an jetōb im kanniōk ilo mour in jej aikkuji n̄an kōj make im baam̧le ko ad.” ¹³

Mōttan kakkobaba ko kōn juon pedped in jetōb n̄an keppopo ilo kanniōk ekoba jerbal “ilo ļoļātāt im koņ,” ¹⁴ eo ebōk jidik iien n̄an kakkoņ m̧ōn̄ā im jāān ilo iien, im kein karuo, dāpij men eo “edik im ļam waan,” ¹⁵ eo ej juon jerbal in tōmak me Irooj enaaj kakūrm̧ool ko reddik ad ak kijejeto ko rejjejet.

Ippān juon pedped in jetōb ilo jikin, innām emaron̄ jetjet ad kōjerbal ruo men ko raorōk an m̧aanjabpopo ilo kanniōk—kōjparok jāān ko im joko eo m̧weo.

Pedped ko raorōk n̄an kōjparok jāān ko am ekoba kōļļā juon m̧ōttan jon̄oul im joortak ko, joļo̧k im jab m̧uri n̄an jon̄an eo maron̄e, keppopo im mour ilowaan juon bajet, im kōjparoki n̄an jeklaj.

Pedped ko raorōk n̄an im̧ōn kakkoņkoņ ekoba kakoņ m̧ōn̄ā, kakoņ dān, barāinwōt men ko jet rekkar pedped ioon aikuj ko an kajjojo im baam̧le, kōnke aolep “jikin kakkoņkoņ” ¹⁶ eo em̧antata ej ilo m̧weeo, eo ej erom̧ “jikin kakoņkoņ eo ilo iien aikuj.” ¹⁷

Ilo ad jelm̧ae pedped in katak ko an jetōb im pukot im̧we jān Irooj, jenaaj bōk tōl n̄an jeļā ankilaan Anij n̄an kōj, kajjojo armej im āinwōt baam̧le ko, im ewi wāween eo em̧m̧an n̄an kōjerbale pedped ko raorōk an m̧aanjabpopo ilo ānbwin. Bun̄ten eo aorōk tata iaan aolep ej n̄an jino.

Elder Bednar eaar katakin pedped in ke eaar ba: “Jerbale ej jerbal in tōmak. … Tōmak eo em̧ool ej pedped ilo im ioon Irooj Jisōs Kraist im emakijkij an tōlļo̧k n̄an jerbal.” ¹⁸

Ro jeiū im jatū, ilo juon laļ eo eļap an oktak, jej aikuj m̧anjabpopo n̄an men ko jab jeļā kaki. Men̄e raan ko rem̧m̧an repād im̧aan, jej jeļā bwe iien ko rem̧m̧an im men ko an kanniōk renaaj waļo̧k wōt. Ilo ad pukōt n̄an jino keppopo ilo kanniōk, jemaron̄ ioon apan̄ ko an mour kōn eļapļo̧k in leke, aenōm̧m̧an ilo būruwōd im, āinwōt Josep ilo Ijipt, jenaaj maron̄ in ba men̄e ilo jekjek ko reppen, “Ekar wōr m̧ōn̄ā.” ¹⁹ Ilo etan Jisōs Kraist, amen.