Kōn Bōro Kuk ilo En̄jake Jej Bōk Kajoor ippān Anij
Ilo ad kobaik en̄jake ko ad ippān doon, jenaaj bōk kajoor eo an Anij n̄an kōm̧m̧an bwe kijejeto ko ad ren likio.
Jinen Gordon ekar ba n̄an e eļan̄n̄e enaaj kadedeikļo̧k jerbal ko an, enaaj kōmat kijen pie. Men eo enno̧ tata ippān. Kijen wōt. Gordon ekar etal bwe en tin kadedeikļo̧k jerbal ko an, im jinen ekar jino kōmate pie eo. Leddik eo jein erūtto etan Kathy ekar deļon̄tok n̄an laan m̧weo ippān tok juon m̧ōttan. Ekar lo pie eo im kar kajjitōk eļan̄n̄e e im eo m̧ōttan remaron̄ edjon̄ jidik.
“Jaab,” Gordon ekar ba, “kijō pie ņe. Mama ekar kōmate n̄an n̄a, ikar jerbal bwe en wōr kijō.”
Kathy ekar kōjememe n̄an ļaddik eo jatin edik. Ļaddik eo jatu ekar lukkuun ļōmņak wōt kōn e im ejjab jouj. Elmen an nej kōmaate aolep pie eo?
Awa ko tokālik ke Kathy ekar kōpelļo̧k kōjem in wa eo waan bwen likūt ļo̧k eo m̧ōttan, ioon jea eo ekar wōr ruo napkōn em̧ōj limi, ruo jipuun bo̧o̧k rej pād ioon, im ruo m̧ōttan pie ioon pileej ko. Kathy ekar kwaļo̧k bwebwenato in ilo iien mej eo an Gordon n̄an kwaļo̧k wāween kar kōņaan oktak im kwaļo̧k jouj n̄an ro me ejjab aikuj bwe en kar jouj n̄an er.
Ilo 1842, Rikwojarjar ro rekar lukkuun kate er jerbal n̄an kalōk Nauvoo Tampeļ. Ālkin an Doulul eo an Kōrā ro kar ejaak ilo M̧aaj, Rikanaan Josep ekkā an itok n̄an kweilo̧k ko aer n̄an kōpooj er n̄an bujen in bōro kuk ekwojarjar me renaaj kar kōm̧m̧ane ilo tampeļ ejjab to jān iien eo.
Ilo Juun 9 eo, Rikanaan eo “ekar ba ej etal im tin kwaļo̧k kōn tūriam̧o[.] Ļōmņak n̄e Jisōs Kraist im enjeļ [ro] ren kar ekajet kōj kōn men dikdik ko, ta eo jenaaj kar erom̧? Jej aikuj lukkuun tūriam̧o im jab inepata kōn men ko reddik” Būreejtōn Smith ekar wōnm̧aanļo̧k wōt im ba, “Ekaburom̧ōj eō bwe ejjeļo̧k iiaia im m̧ōttāik doon—eļan̄n̄e juon membōr ej metak aolep rej en̄jake—kōn bōro kuk ilo en̄jake jej bōk kajoor ippān Anij.” 1
Jentōj in ekadu ekar lukkuun un̄ūr eō. Kōn Bōro Kuk ilo En̄jake Jej Bōk Kajoor ippān Anij. Laļ in ejjab ta eo ij kōņaan bwe en āinwōt. Elōn̄ men ko rellōn̄ ij kōņaan kōm̧man oktak kaki im kōkm̧anm̧aniļo̧k. Im ilo m̧ool, eļap an lōn̄ menin jum̧ae ko n̄an ta eo ij kōjatdikdik kake, im jet iien ij en̄jake an ejjeļo̧k aō kajoor. Raan kein, ij kajjitōkin eō make kajjitōk ko n̄an kappukot uwaak: Ewi wāween an em̧m̧anļo̧k aō meļeļe kōn armej ro ipeļaakū? Ewi wāween aō ejaake “bōro kuk ilo en̄jake” n̄e aolep im oktak jān doon? Kajoor rōt jān Anij imaron̄ tōpare eļan̄n̄e edik aō bōro kuk ippān ro jet? Jān jetōb eo aō ej jan̄nuwaad n̄an bōk uwaak, ewōr jilu aō elmakot. Bolen renaaj bar jipan̄ eok.
En Wōr am Tūriam̧o
Jekab 2:17 ej kōnono, “Kom̧in ļōmņak kōn ro jeiūm̧i im jātimi āinwōt kom̧ make, im jeļā kōn aolep im wūjlepeļo̧k aolep ami jeraam̧m̧an, bwe ren maron̄ m̧weie āinwōt kom̧.” Jen pinej jenkwan naan in jeraam̧m̧an n̄an tūriam̧o—anemkwōj kōn am̧ tūriam̧o bwe ren m̧weie āinwōt kwe.
Ekkā ad ļōmņak kōn jeram̧m̧an n̄e ej itok n̄an m̧ōn̄ā ak jeen, ak bolen ta eo aolep rej lukkun aikuji ilo jerbal in karejar eo ad ej tūriam̧o.
Būreejtōn eo aō make ilo Doulul eo an Kōrā ekar ba: “Men eo ij … kallim̧ur … eok ej bwe inaaj dāpij etam̧ ilo ineem̧an. … Inaaj lo eok kōn wōn kwe kōn em̧m̧an eo am̧. … Ijamin ba jabdewōt men kōn kwe bwe ejjab em̧m̧an, me eban kōketak eok. Ij kajjitōk ippam̧ n̄an kōm̧m̧ane ejja menin wōt n̄an n̄a kōnke imijak in kajju kaeinepataik eok.”
Josep Smith ekar ba n̄an sister ro ilo Juun raan eo ilo 1842 eo:
“N̄e armej ro rej jouj im iakwe eō, O ewi jon̄an kajoor in eo ej pād ilo ļōmņak eo aō. …
“… N̄e jenaaj epaakeļo̧k Jemedwōj Ilan̄, enaaj ļapļo̧k ad reilo̧k kōn tūriam̧o kōn jetōb ko rem̧ōjņo—[jej en̄jake bwe jekōņaan] n̄ān bōk er ioon aerar im joļo̧k jerawiwiw ko aer ilikid. [Ekōnono in aō ej n̄an] aolep Jukjukin Pād in—eļan̄n̄e kwokōņaan bwe Irooj en tūriam̧o kake eok, kwon tūriam̧o kake ro jet.” 2
Menin kar juon kapilōk eļaptata n̄an Doulul eo an Kōrā ro. Jen jab ekajet doon ak kōtļo̧k bwe naan ko ren kakkure kōj. Jen dāpij etan doon im leļo̧k menin leļo̧k in tūriam̧o ko. 3
Kōm̧m̧an Bwe Loon eo Waam̧ En Aņōōņ kōn Bōro Kuk Ewāppen
Ilo 1936 eo, juon tiim in aņōōņ ejjab lukkuun bun̄bun̄ jān University of Washington rekar keļo̧k n̄an Germany n̄an bōk koņaer ilo Olympic Game ko. Ilo iien eo ekar lukkuun ejjeļo̧k jāān im jeraam̧m̧an an laļ eo an Amedka. Rekar jet ļaddik rijerbal ro me bukwōn eo aer me elōn̄ mining im lumber rekar leļo̧k jidik jipan̄ ikkijeen jāān bwe ren maron̄ keļo̧k n̄an Berlin. Aolep m̧ōttan ko ilo iien jiāe eo rekar pen ņae er, ak juon men ekar waļo̧k ilo iien iako̧j eo. Ilo iien aņōōņ eo, rekar ņa etan “aņōōņ kōn bōro kuk ewāppen.” Ron̄jake kōmeļeļe in me ej pād ilo bok in The Boys in the Boat:
Ewōr juon men eo me jet iien ej waļo̧k me epen n̄an tōpare im pen n̄an kōmeļeļeiki. Rej ņae etan “aņōōņ kōn bōro kuk ewāppen.” Ej waļo̧k wōt n̄e jej aolep aņōōņ ilo bōro kuk ewāppen me ejjab aolep rej jon̄an wōt juon kake.
Riaņōōņ ro rej aikuj lukkuun kate er make im ejjab iien eo wōt rej dāpij maron̄ ko rem̧ool an kajjojo iaer. Iako̧j ko rejjab wiin jān ro rejjab kōmaat aer. Riaņōōņ ro rem̧m̧an enij em̧m̧an aer ippān doon—juon eo emaron̄ tōl, juon eo emaron̄ dāpdep kadede, juon eo eperan n̄an jelm̧ae, juon eo emaron̄ kōm̧m̧an aeņōm̧m̧an. Ejeļo̧k juon riaņōōņ eaorōkļo̧k jān bar juon, aolep im wōr tokjeer n̄an ļo̧o̧n, ak n̄e rej tin aņōōņ ippān doon, kajjojo rej aikuj kōm̧m̧an okoktak ekkar n̄an aikuj im maron̄ an ro jet—armej eo ekadu pein ij kajjieon̄ buuli, im eo eaitok pein ej kōm̧m̧an jon̄an n̄an eo ekadu pein.
Oktak ko remaron̄ oktak n̄an jet men ko rem̧m̧an ijjeļo̧kin men ko rejjab em̧m̧an. Innem naaj jino en̄jake āinwōt n̄e ļo̧o̧n eo ej make buul m̧aanļo̧k wōt. Innem metak eo enaaj jakoļo̧k kōn lan̄lōn̄. “Aņōōņ kōn bōro kuk ewāppen ” ej āinwōt juon poem em̧man. 4
Ikōtaan men ko repen, tiim in ekar ļe bwe rekar aņōōņ kōn bōro kuk ewāppen im rekar wiin. Gold eo an Olympic eo ekar juon menin kam̧ōņōņō, ak bōro kuk eo me kajjojo riaņōōņ raan eo rekar en̄jake ekar juon tōre ekwojarjar me ekar pād ippāer ilo aolep mour ko aer.
Juļok Aolep Men ko Renana Bwe Ļapļo̧k en Em̧m̧an
Aiboojoj eo an pārabol eo ilo Jekab 5, Irooj eo an jikin kallip eo ekar ekkat wōjke em̧man ilo bwūdej em̧m̧an, im ej etal im bar nana ilo elōn̄ tōre ko im ej bōk leen ko renana. Irooj in jikin kallip eo ekar ba ruwalitōk kōttan: “Ibūromōj [n̄an] joļo̧ke wōjke eo.”
Rijerbal eo ekar ba n̄an Irooj eo ilo jikin kallip eo: “Kwōn oņaake [wōjke eo] bar aetoļo̧k jidik. Irooj ekar ba: Aaet, inaaj likūti wōt bar jidik.” 5
Innem itok kōmeļeļe ko me jemaron̄ mour kake ilo ad kajjieon̄ kūbwūj im kappukot leen ko rem̧m̧an ilo jkin kallip jidikdik eo ad make: “Ej aikuj joļo̧k men eo enana āinwōt an nej em̧m̧an eo eddōk.” 6
Bōro kuk ejjab kajju waļo̧k; ebōk eļap jerbal. Ekaibokbok, jet iien ejakwon, im enaaj waļok jidik ļo̧k jidik n̄e jej juļo̧k aolep men ko renana bwe en Ļapļo̧k Em̧m̧an.
Jejjab make iaad ilo kijejeto ko ad n̄an ejaak bōro kuk. Jekab 5 ej wōnm̧aanļo̧k wōt im ba, “Ro rikarejeran raar ilo̧k im jerbal kōn aolep kajoor ko aer; im Irooj in jikin kallib eo Eaar barāinwōt jerbal ippāer;” 7
Kajjojo iaad jenaaj en̄jake en̄jake ko me rej kōmetak kōj, men ko me rejjab aikuj waļo̧k. Kajjojjo iaad jenaaj barāinwōt, ilo kajjojjo iien ko, jej kōtļo̧k bwe uteij bōro im utiej ren kakkure em̧m̧an ko ilo kōj. Ak Jisōs Kraist ej Ad Rilo̧mo̧o̧r ilo aolep men otemjeļo̧k. Kajoor eo an ej tōpar lukkuun laļ tata im ej pojak iien otemjej n̄an kōj n̄e jej kūr n̄an E. Aolepād jej akweļap kōn tūriam̧o kōn jerawiwi ko im likjab ko ad. Ej letok ilo ejjeļo̧k wōņeen. Im Ej kajjitōk ippād eļan̄n̄e jemaron̄ leļo̧k ejja tūriam̧o in wōt im meļeļe kōn doon.
Jisōs ekar kajju ba: “Kom̧in juon wōt; im n̄e kom̧ij jab juon wōt kom̧ij jab Aō. .” 8 Bōtaab eļan̄n̄e jej juon wōt—n̄e jemaron̄ jeere jidik pie eo ak kōjerbal taļōn ko bwe ļo̧o̧n eo emaron̄ aņōōņ kōn bōro kuk ewāppen—innem kōj jej An. Im Enaaj jipan̄ joļo̧ke men ko renana iien eo n̄e men ko rem̧m̧an rej jino waļo̧k.
Kallim̧ur ko kar Kanaan Kaki
Jemaron̄ jab pād ilo ijo jekōņaan pād ie, im jejjab kiiō ijo jenaaj pād ie. Ij tōmak ilo oktak ko jej kappukoti ilo kōj make im ilo kurup ko jej pād ie enaaj dik ilo makūtkūt in kōm̧m̧an oktak im niknik kajjieon̄ aolep raan n̄an meļeļe kōn doon. Etke? Kōnke jej kalōk Zaion—juon armej “juon wōt bōro im juon wōt ļōmņak.” 9
Āinwōt kōrā in kalim̧uur, eļļapļo̧k ad kōm̧m̧an oktak. Jeļā in jemaron̄ bōki aolep raan ilo iien ko jej ekkatak ippān ro m̧ōttad, kakikiik ajri ro nejid, ekkōnono ippān eo kwoj jijet turin ilo baj eo, kōpooj juon presentation ippān juon m̧ōttam̧ ilo jikin jerbal. Ewōr ad kajoor n̄an joļok kalijōkļo̧k ko im kalōk bōro kuk.
Doulul eo an Kōrā im Doulul eo an Jiron̄ rejjab bajjōk kūļaaj wōt. Remaron̄ jet en̄jake ko me jeban meļo̧kļo̧ki ijo elōn̄ kōrā ro roktak jān doon rej juon wōt ilowaan juon wōt ļo̧o̧n im aņōōņ m̧ae jej lo aņōōn kōn bōro kuk ewāppen. Ij lewaj kūr in: en m̧ōttanļo̧k kijejeto an aolep me ej kōm̧m̧an oktak ilo laļ in n̄an em̧m̧an eo. Ijjitōn̄ in bujen ko ad ej n̄an jerbal in karejar, n̄an lōn̄aj pe ko me rej ettoto, n̄an likūt ro rej apan̄ ilo likid ak ilo peid im kotake er. Ejjab pen n̄an jeļā ta eo jej aikuj kōm̧m̧ane, ak eiten aolep iien ej jum̧ae kōņaan ko ad make, im jej aikuj kajjieon̄. Kōrā ro ilo Kabūn in ewōr aer maron̄ indeeo n̄an kōm̧m̧an oktak ilo jukjukin pād eo. Ewōr aō tōmak bwe, eļan̄n̄e jenaaj kobaik en̄jake ko ad ippān doon, jenaaj bōk kajoor eo an Anij n̄an kōm̧m̧an bwe kijejeto ko ad ren likio.
N̄e Kabun̄ in ej kakeememej 1978 revelesōn eo kōn priesthood, Būreejtōn Russell M. Nelson ekar leļo̧k juon kōjeraam̧m̧an in kanaan ekajoor: “Ej jar eo aō im kōjeraam̧m̧an eo me ij likūt ioomi aolep ro rej ron̄jake me remaron̄ eļļā ioon jabdewōt eddodo kōn kalijōkļo̧k im etetal jim̧we ippān Anij—im ippān doon—ilo aeņōm̧m̧an im jokņe ewāppen.” 10
Jen erreiļo̧k n̄an kōjeraam̧m̧an in kanaan in im kōjerbal kijejeto ko an kajjojo im aolep n̄an kōļapļo̧k bōro kuk ilo laļ in. Ij likūt aō naan in kam̧ool ilo ettā ilo naan ko an Irooj, jar ko ejjeļo̧k jem̧ļo̧kin: “Bwe er otemjej ren juon, āinwōt Kwe, Jema ilo N̄a, im N̄a ilo Kwe, bwe er barāinwōt ren ilo Kōj.” 11 Ilo etan Jisōs Kraist, amen.