’E te mana o te Atua ma te hanahana rahi

Fātata e toru matahiti i muri mai i te ’Ōrama mātāmua, i te pō nō te 21 nō Tetepa 1823, tē pure ra Iosepha Semita nō te fāri’i i te fa’a’orera’a hara ’e nō te ’ite i tōna vaira’a i mua i te Atua.¹ ’Ua fā mai ra te hō’ē ta’ata i pīha’i iho i tōna ro’i, ’ua pi’i mai ra ia Iosepha i tōna i’oa i te nā-ō-ra’a ē : « e ve’a ’oia nō ’ō mai i te Atua ra… ’e ’o Moroni tōna i’oa ». ’Ua fa’ata’a mai ’oia ē « e ’ohipa tā te Atua e hōro’a nā [Iosepha] ’ia rave »,² ’e i muri iho ’ua parau ’oia iāna nō ni’a i te taera’a mai te Buka a Moromona. ’Ohipa ta’a ’ē mau, ’o te Buka a Moromona te hō’ē o te mau tumu parau mātāmua tā Moroni i fa’ahiti.

’O te Buka a Moromona te tahi fa’ahou ’ite nō Iesu Mesia, ’e te mauiha’a rahi nō te fa’afāriura’a i te mau mahana hope’a nei. Tā tātou fā i te fa’a’itera’a i te ’evanelia, ’o te tītau-manihini-ra’a ïa i te tā’āto’ara’a ’ia haere mai ia Iesu Mesia,³ ’ia fāri’i i te mau ha’amaita’ira’a nō te ’evanelia i fa’aho’ihia mai ’e ’ia fa’a’oroma’i ē tae noa atu i te hope’a ma te fa’aro’o i te Fa’aora.⁴ Te tauturura’a i te ta’ata ’ia ’ite i te tauira’a rahi o te ’ā’au⁵ ’e ’ia ru’uru’u ia rātou i te Fa’aora maoti te mau fafaura’a mo’a ’e te mau ’ōroa mo’a, ’o te mau tumu niu ïa nō te porora’a ’evanelia.

Nā te fa’a’itera’a ’o Moroni i te parau nō te Buka a Moromona ia Iosepha Semita i ’ōmua ai te ’ohipa nō te fa’aorara’a ’e te fa’ateiteira’a nō te ta’ata i teie pae o te pāruru i te tau tu’ura’a nō te ’īra’a o te mau tau.

I roto i tāna arata’ira’a ia Iosepha i muri iho, ’ua fa’ahiti mai ra ’o Moroni i te parau i roto i te buka a Malaki i roto i te Faufa’a Tahito, ma te taui ri’i i te tahi vāhi o te mau parau i roto i te bibilia a te Ari’i Iakobo :

« Inaha, e heheu atu vau i te Autahu’ara’a ia ’outou nā roto i te rima o te peropheta ra ’o Eliaha, hou te taera’a mai te mahana rahi ’e te ri’ari’a o te Fatu ra.

« ’E e tu’u ho’i ’oia i roto i te ’ā’au o te mau tamari’i i te mau fafaura’a i fa’aauhia i tō rātou metua, ’e e fāriu ho’i te ’ā’au o te tamari’i i tō rātou mau metua. ’Āhiri ’aita rā, e ha’amouhia te fenua i tōna taera’a mai. »⁶

Tā tātou fā i te patura’a i te mau hiero, ’o te fa’afāna’ora’a ïa i te mau vāhi mo’a ’ia ti’a i te mau fafaura’a mo’a ’e te mau ’ōro’a mo’a tei tītauhia nō te fa’aorara’a ’e te fa’ateiteira’a o te ’utuāfare ta’ata nei, ’ia fa’aterehia, nō te feiā ora ’e te feiā pohe. I te arata’ira’a a Moroni ia Iosepha Semita nō ni’a i te ti’ara’a faufa’a rahi o Eliaha ’e te ha’amanara’a autahu’ara’a, ’ua tūra’i-atu-ā-hia te ’ohipa nō te fa’aorara’a ’e te fa’ateiteira’a i teie pae o te pāruru ’e ’ua ’ōmua i tō tātou nei tau tu’ura’a i te ’ohipa nō te feiā pohe i te tahi atu pae o te pāruru.

’Ei pū’ohura’a, ’ua ha’amau te mau ha’api’ira’a a Moroni i te ’āva’e Tetepa 1823 nō ni’a i te Buka a Moromona ’e te misiōni a Eliaha, i te ha’api’ira’a tumu niu nō te ’ohipa nō te fa’aorara’a ’e te fa’ateiteira’a i nā pae e piti o te pāruru.

Teie mau ha’api’ira’a tā Iosepha Semita i ’apo mai mai roto mai ia Moroni, ’ua fa’auru ïa i te mau tuha’a ato’a nō tāna tāvinira’a. ’Ei hi’ora’a, i te hō’ē ’āmuira’a hanahana i fa’atupuhia i te hiero nō Kirtland, i te 6 nō ’Ēperēra 1837, ’ua fa’a’ite te peropheta : « I muri a’e i te mau mea ato’a tei parauhia, te ’ohipa rahi roa a’e ’e tei hau atu i te faufa’a ’o te porora’a ïa i te ’Evanelia ».⁷

Fātata e hitu matahiti ti’a i muri mai, i te 7 nō ’Ēperēra 1844, ’ua hōro’a Iosepha Semita i te hō’ē a’ora’a tei parauhia nei te a’ora’a nō ni’a ia King Follett. ’Ua nā ’ō ’oia : « Te hōpoi’a rahi roa a’e i roto i teie ao tā te Atua i tu’u mai i ni’a iho ia tātou ’o te mā’imira’a ïa i tō tātou feiā tei pohe. »⁸

E aha, ’o te porora’a i te ’evanelia te ’ohipa ’e te hōpoi’a rahi roa a’e a te Atua ia tātou nei, ’e i muri iho ’o te ’imira’a i tō tātou feiā pohe te mea rahi roa a’e ? Tē ti’aturi nei au ē, i teie nā parau e piti, tē tūra’i nei te peropheta Iosepha Semita i te parau mau niu ē, e ti’a i te mau fafaura’a tei fāri’ihia nā roto i te ha’amanara’a ’e te mau ’ōro’a a te autahu’ara’a, ’ia ru’uru’u ia tātou i te Fatu Iesu Mesia, ’o te mau tumu rahi ho’i nō te ’ohipa nō te fa’aorara’a ’e te fa’ateiteira’a i nā pae e piti o te pāruru.

E auturuturu te ’ohipa misiōnare ’e te ’ohipa hiero ’e te ’ā’amu ’utuāfare, e mau tuha’a tū’ati’ati ho’i nō te hō’ē ’ohipa rahi e rōtahi nei i ni’a i te mau fafaura’a ’e te mau ’ōro’a e noa’a ai ia tātou te mana nō te huru Atua i roto i tō tātou orara’a, nō te ho’i i mua i te aro o te Metua i te ao ra, i te hope’a. ’E nō reira, teie nā parau huru pāto’ito’i e piti i te ha’amatara’a, tē tūra’i nei ïa i te parau tumu rahi nō teie ’ohipa nō te mau mahana hope’a nei.

’Ua parau te Fa’aora :

« ’A rave mai i tā’u zugo i ni’a ia ’outou, ’e ’ia ha’api’ihia ’outou e au, tē marū nei ho’i au ’e te ha’eha’a o te ’ā’au : ’e e noa’a ho’i te ora i tō ’outou vārua.

« Tē marū nei ho’i tā’u zugo ’e tē māmā nei tā’u hōpoi’a ».⁹

Tē rave nei tātou i te zugo a te Fa’aora i ni’a ia tātou ’ia ha’api’i tātou, ’ia fāri’i ti’amā tātou ’e ’ia fa’atura tātou i te mau fafaura’a mo’a ’e te mau ’ōro’a mo’a. ’Ua tā’amu-pāpū-hia tātou i te Fa’aora ’e i ni’a iāna ’a ha’apa’o maita’i ai ’e ’a ha’amana’o ai ’e ’a fa’aitoito roa nei tātou i te ora mai te au i te mau tītaura’a tā tātou i fāri’i. ’E ’o te reira tā’amura’a iāna te puna nō te pūai pae vārua i te mau tau ato’a nō tō tātou orara’a.

Tē ani nei au ia ’outou ’ia feruri i te mau ha’amaita’ira’a i parauhia i te mau pipi ha’apa’o fafaura’a a Iesu Mesia. ’Ei hi’ora’a ’ua « ’ite atu ra [Nephi] i te ’ēkālesia a te ’Ārenio a te Atua [i te mau mahana hope’a], e mea iti roa ho’i tōna mau melo… te feiā mo’a o te Atua, i ni’a ato’a rātou i te ao ato’a nei ; ’e e mea iti roa tō rātou mau mana i ni’a i te fenua nei. »¹⁰

’Ua ’ite ato’a ’oia « i te mana o te ’Ārenio a te Atua i te poura’a mai i ni’a iho i te feiā mo’a o te ’ēkālesia a te ’Ārenio ra, ’e i ni’a iho ho’i i te feiā i fafau atu i te Fatu… ’e ’ua fa’a’ahuhia rātou i te parauti’a ’e te mana o te Atua ma te hanahana rahi. »¹¹

Teie parau « ’ua fa’a’ahuhia rātou i te parauti’a ’e te mana o te Atua ma te hanahana rahi », e ’ere noa ïa i te mana’o au ’e te hi’ora’a nō te hō’ē parau nehenehene nō te pāpa’ira’a mo’a. ’Aita, e mea ’ōhie rā ’ia hi’o i te fa’a’itera’a nō te reira i roto i te orara’a o te mau pipi e rave rahi a te Fatu i te mau mahana hope’a nei.

I tā’u mau tonora’a ’ei melo nō te Tino ’Ahuru Ma Piti, ’ua rātere au i te ao nei. ’E ’ua ha’amaita’ihia vau i te fārereira’a ’e i te ’apora’a i te tahi mau ha’api’ira’a rahi mau mai roto mai ia ’outou. Tē parau pāpū nei au ē ’ua fa’a’ahu-mau-hia te pupu ta’ata nō te fafaura’a a te Fatu i te parauti’a ’e te mana o te Atua ma te hanahana rahi. ’Ua ’ite au i te fa’aro’o, te itoito, te hi’ora’a ātea, te onoono ’e te ’oa’oa tei hau atu i te ’aravihi tāhuti nei—tā te Atua noa e nehenehe e hōro’a mai.

’Ua ’ite au i te parauti’a ’e te mana o te Atua ma te hanahana rahi tei fāri’ihia nā roto i te ha’apa’o-maita’i-noa-ra’a i te mau fafaura’a ’e te mau ’ōro’a i roto i te orara’a o te hō’ē taure’are’a nō te ’Ēkālesia tei huma-mero-hia i te hō’ē pae, i roto i te hō’ē ’ati pere’o’o. E rave rahi ’āva’e rohirohi mo’emo’e te maoro nō te ora mai ’e nō te fa’atano i ni’a i te orara’a ’āpī e’ita e nehenehe e ha’uti rahi roa, ’ua fārerei a’era māua ’e ’ua paraparau vau i teie vairua ’aueue ’ore I roto i tā māua ’āparaura’a ’ua ui atu vau : « E aha tā teie ’ohipa i ha’api’i ia ’oe ? » I reira ra tāna pāhonora’a : « ’Aita e ’oto. ’Aita e riri. E maita’i ana’e. »

’Ua ’ite au i te parauti’a ’e te mana o te Atua ma te hanahana rahi tei fāri’ihia nā roto i te ha’apa’o-maita’i-noa-ra’a i te mau fafaura’a ’e te mau ’ōro’a i roto i te orara’a o te mau melo tei bāpetizo-’āpī-hia ’e tei ha’amau-’āpī-hia i roto i te ’Ēkālesia. E hia’ai rahi tō teie mau melo fa’afāriu ’ia ha’api’i ’e ’ia tāvini, ’e ’ua ineine rātou terā rā, pinepine ato’a rātou i te pāpū ’ore nāhea i te tu’u i te hiti i te mau peu tahito, te mau peu pūai, ’ua ’oa’oa rā rātou ’ua hō’ē « ’oire ’e te feiā mo’a, ’e nō te fēti’i o te Atua. »¹²

’Ua ’ite au i te parauti’a ’e te mana o te Atua ma te hanahana rahi tei fāri’ihia nā roto i te ha’apa’o-maita’i-noa-ra’a i te mau fafaura’a ’e te mau ’ōro’a i roto i te orara’a o te hō’ē ’utuāfare tei aupuru i te hoa fa’aipoipo ’e te metua i te pae hope’a o tōna ma’i. Tē fa’ati’a nei teie nau pipi itoito i te mau taime ’ua huru mo’emo’e ri’i te ’utuāfare—’e te mau taime ’ua ’ite rātou i te rima o te Fatu i te fa’ateiteira’a ’e i te ha’apūaira’a ia rātou. ’Ua fa’a’ite teie ’utuāfare i tō rātou ’ā’au mēhara nō te mau taime fifi i te tāhuti nei i ti’a ai ia rātou ’ia tupu i te rahi ’e ’ia riro rahi atu ā mai tō tātou Metua i te ao ra ’e tō tātou Tāra’ehara, ia Iesu Mesia. ’Ua aupuru ’e ’ua ha’amaita’i te Atua i teie ’utuāfare i te hoara’a o te Vārua Maita’i ’e ’ua fa’ariro i tō rātou fare ’ei vāhi mo’a ’e te ha’apūra’a mai te hiero te huru.

’Ua ’ite au i te parauti’a ’e te mana o te Atua ma te hanahana rahi tei fāri’ihia nā roto i te ha’apa’o-maita’i-noa-ra’a i te mau fafaura’a ’e te mau ’ōro’a i roto i te orara’a o te hō’ē melo nō te ’Ēkālesia tei māuiui roa ’ino i te ta’ara’a i tōna hoa fa’aipoipo. ’Ua ’ū’anahia te ’oto pae vārua ’e pae manava o teie tuahine i te mana’o punura’a nō te ’ōfatira’a tōna hoa fa’aipoipo i te mau fafaura’a ’e nō tōna tūpararīra’a i tō rāua fa’aipoipora’a. E fa’atītī’aifarora’a tāna i hina’aro, ’e te fa’autu’ara’a.

’E ’a tāfifi noa ai teie vahine iti ha’apa’o maita’i i terā mau mea ato’a i ni’a iāna, ’ua tuatāpapa ’e ’ua feruri ’oia i te tāra’ehara a te Fa’aora, ma te mana’o pāpū a’e ’e te pūai, ’aita i nā reira a’enei. Ē ’ua nīni’i mai nei te hāro’aro’a rahi a’e nō te misiōni tāra’ehara a te Mesia i ni’a i tōna vairua—tōna mamae nō tā tātou mau hara, ’e nō tō tātou ato’a māuiui, mau paruparu, te hepohepo ’e te ’ā’au fāfati. ’E ’ua tae mai te fa’aurura’a e ui iāna iho i teie uira’a hōhonu : ’ua oti te ho’o i te ’aufauhia nō teie mau hara, e ani fa’ahou ïa ’oe ’ia tāpiti i te ’aufaura’a ? Puta mai nei te mana’o ē, e ’ere i te tītaura’a ti’a, e ’ere ato’a i te mea tahiti’a (miséricordieux).

’Ua ha’api’i mai teie vahine ē, e ti’a i tōna tā’amura’a i te Fa’aora nā roto i te mau fafaura’a ’e te mau ’ōro’a, ’ia fa’aora i te mau pēpē tei fa’atupuhia e te tahi atu ta’ata, i te fa’a’ohipa-ti’a-’ore-ra’a i tōna ti’amāra’a mōrare, ’e ’ua noa’a tōna ’aravihi nō te fa’a’ore i te hapa ’e nō te fāri’i i te hau, te hāmani maita’i ’e te here.

E noa’a te mau parau fafau ’e te mau ha’amaita’ira’a maoti noa tō tātou Fa’aora Iesu Mesia. Tē ani nei ’oia ia tātou ’ia hi’o iāna,¹³ ’ia haere iāna,¹⁴ ’ia ha’api’ihia e ana,¹⁵ ’e ’ia ru’uru’u ia tātou iāna¹⁶ nā roto i te mau fafaura’a ’e te mau ’ōro’a nō tāna ’evanelia i fa’aho’ihia mai. Tē parau pāpū nei au ’e tē parau fafau nei ho’i ē, i te fa’aturara’a tātou i te mau fafaura’a e fa’a’ahuhia ai tātou i te parauti’a ’e te mana o te Atua ma te hanahana rahi. ’E tē fa’a’ite nei au ē, ’o te Fatu ora Iesu Mesia tō tātou Fa’aora. Tē parau pāpū nei au i teie mau parau mau, i te i’oa mo’a o Iesu Mesia, ’āmene.