’Āmuira’a rahi
Te hiero ’e tō ’outou niu pae vārua
’Āmuira’a rahi nō ’Ātopa 2021

Te hiero ’e tō ’outou niu pae vārua

Nā te peresideni Russell M. Nelson

Peresideni nō Te ’Ēkālesia a Iesu Mesia i te Feiā Mo’a i te mau Mahana Hope’a nei

I te mau taime ato’a, ’ia tupu mai te ’āhuehuera’a i roto i tō ’outou orara’a, te vāhi pāpū roa a’e nō te vai pae vārua ’o te orara’a ïa i roto i tā ’outou mau fafaura’a nō te hiero !

E au mau taea’e ’e mau tuahine here, tē ’oa’oa nei au ’ia tae mai i rotopū ia ’outou i teie po’ipo’i nō te fa’a’ite atu i te mau mana’o o tō’u ’ā’au.

Mai tā ’outou i ’ite, tē ravehia nei te mau fa’a’āpīra’a rarahi i ni’a i te hiero tu’iro’o nō Roto Miti. Teie ’ōpuara’a fifi tei roto te ha’apa’arira’a mau i tōna niu tumu, ’o tei tāvini maita’i hau atu i te hō’ē tenetere te maoro. E tītauhia rā i teie hiero ti’a maoro atu ā. I te hope’a nō te ’āva’e Mē ’ua hi’opo’a atu vau i te terera’a o teie ’ohipa rahi. ’Ua feruri au ē, e au ’outou ’ia ’ite i te mea tā tā’u vahine Wendy ’e vau i ’ite. Tē mana’o nei au ē, e ta’a ia ’outou nō te aha te hīmene ra « ’Āuē te pa’ari »1 i riro ’ei aura’a ’āpī nō’u.

Video nō roto mai i te vāhi o te fa’a’āpīra’a o te hiero nō Roto Miti : « Tē hi’o nei mātou i te niu tumu o te hiero nō Roto Miti. Te ti’a nei au i te hō’ē vāhi i raro a’e i te vāhi tei reira te piha o te ’Ō. ’Ia hi’o ana’e au i te ’aravihi o te hāmanira’a o teie fare, e māere au i te mau mea tā te mau pionie i rave. E māere rahi tō’u ’ia feruri ana’e au ē, ’ua hāmani rātou i teie hiero nehenehe ma te fa’a’ohipa noa i te mau mauha’a ’e te mau rāve’a e vai ra i tō rātou tau, ’ua hau i te hō’ē tenetere i teienei.

« Terā rā, e rave rahi matahiti i muri mai, ’ia hi’opo’a māite ana’e tātou i te niu, e nehenehe tātou e ’ite i te paura’a o te fenua, te mau fifi i roto i te patura’a tumu ’e te ta’a-’ē-ra’a o te vai pa’arira’a o te patura’a.

« I teie nei tē ’ite nei au i te ’ohipa tā te mau ’aivāna’a ’aravihi nō tō tātou nei ’anotau e nehenehe e rave nō te ha’apa’ari i teie niu mātāmua, e māere rahi mau tō’u. E mea māere mau tā rātou ’ohipa i rave !

« E mea ti’a i te niu o te hō’ē fare, hō’ē fare iho ā rā mai teie te rahi, ’ia nava’i pāpū te pa’ari nō te fa’aruru i te mau ’āueuera’a fenua, te tutae ’āuri, te mau mata’i pūai, ’e te mau tupura’a e’ita e nehenehe e ’ape i ni’a i te mau fare patu ato’a. Te ’ohipa fifi nō te ha’apa’arira’a e ravehia nei i teie taime, e ha’apa’ari te reira i teie hiero mo’a ’e te niu ’o tē nehenehe ’e ’o tē ti’a ’ia fa’aruru i te mau tāmatara’a o te tau.

’Aita mātou e tārani nei i tā mātou mau tauto’ora’a nō te hōro’a i teie hiero fa’aturahia, ’o te riro noa nei ā ’ei mea fa’aturahia, i te hō’ē niu e nehenehe e fa’aruru i te mau pūai o te nātura ē tae roa atu i te mileniuma. Mai te reira ato’a te huru, ’ua tae ato’a i te taime ’ia rave tātou tāta’itahi i te mau rāve’a fa’ahiahia—penei a’e e mau rāve’a ’aita ā tātou i rave a’e nei—nō te ha’apa’ari i tō tātou iho niu pae vārua. E tau ’aita i ’itehia a’enei, e rāve’a ïa ’aita i ’itehia a’enei.

E au mau taeaʼe ʼe mau tuahine here, e mau mahana hopeʼa teie. Mai te mea e hina’aro ’outou ’e ’o vau nei e pāto’i i te mau ’ino ’e te mau ha’afifira’a e tae mai, e mea ti’a ’ia vai tō tātou tāta’itahi hō’ē niu pa’ari pae vārua tei patuhia i ni’a i te papa o tō tātou Fa’aora, ’o Iesu Mesia.2

Nō reira, tē ani nei au ia ’outou tāta’itahi, e nāhea i te ha’apa’ari o tō ’outou niu ? ’E e aha te mau ha’apa’arira’a e tītauhia nō tō ’outou ’itera’a pāpū ’e tō ’outou hāro’aro’ara’a i te ’evanelia ?

’O te hiero te pū nō te ha’apa’ari i tō tātou fa’aro’o ’e tō tātou pūai pae vārua, nō te mea ’o te Fa’aora ’e tāna ha’api’ira’a tumu te māfatu mau o te hiero. Te mau mea ato’a e ha’api’ihia i roto i te hiero, nā roto i te arata’ira’a ’e nā roto i te Vārua, e fa’arahi te reira i tō tātou hāro’aro’ara’a ia Iesu Mesia. E tā’ati tāna mau ’ōro’a faufa’a rahi ia tātou i ni’a iāna nā roto i te mau fafaura’a mo’a o te autahu’ara’a. I muri iho, ’a ha’apa’o ai tātou i tā tātou mau fafaura’a, e hōro’a mai ’oia ia tātou i tōna mana fa’aora ’e te pūai.3 ’E ’auē ïa ē, e hina’aro rahi mau tātou i tōna mana i te mau mahana i muri nei.

’Ua fafauhia mai ia tātou ē, « mai te mea rā ’ua vai ineine noa [tātou] e ’ore [tātou] e mata’u ».4 ’Ua riro teie ha’apāpūra’a ’ei hopoi’a hōhonu i teie mahana. ’Ua parau te Fatu ē, noa atu te mau tāmatara’a ’aita i itehia a’enei i teie mahana, te feiā e patu i tō rātou niu i ni’a ia Iesu Mesia ’e ’ua ha’api’i mai i te tāipu mai i roto i tōna mana, ’aita ïa e tītauhia ’ia topa i roto i te mau ha’ape’ape’ara’a ta’a ’ē o teie tau.

Nō tahito mai ā te mau ’ōro’a ’e te mau fafaura’a. ’Ua ani te Fatu ia Adamu ’e ia Eva ’ia pure, ’ia rave i te mau fafaura’a ’e ’ia pūpū i te tusia.5 ’Oia mau, « i te mau taime ato’a e nūna’a tō te Fatu i ni’a i te fenua nei ’o tē ha’apa’o i tāna parau, ’ua fa’auehia rātou ’ia patu i te hiero ».6 ’Ua ’ī te mau buka pāpa’ira’a mo’a i te mau fa’ahorora’a i ni’a i te mau ha’api’ira’a nō te hiero, te mau ahu, te reo, ’e tē vai atu ra.7 Te mau mea ato’a tā tātou e ti’aturi ’e te mau fafaura’a ato’a tā te Atua i rave i tāna nūna’a nō te fafaura’a, e ’āmuihia mai te reira i roto i te hiero. I te mau pu’e tau ato’a, ’ua ha’apāpū te hiero i te parau mau tao’a rahi ē, te feiā e rave i te mau fafaura’a ’e te Atua, ’e e ha’apa’o i te reira, e mau tamari’i ïa nō te fafaura’a.

Nō reira, i roto i te fare o te Fatu, e nehenehe tātou e rave ato’a i te reira mau fafaura’a ’e te Atua tā Aberahama, Isaaka ’e Iakoba i rave. ’E e nehenehe tātou e fāri’i i taua ato’a mau ha’amaita’ira’a ra !

Hōho’a
Mau hiero nō Kirtland ’e Nauvoo

’Ua riro te mau hiero ’ei tuha’a nō teie tau tu’ura’a mai te mau mahana mātāmua mai ia.8 ’Ua hōro’a mai ’o Elia i te mau tāviri nō te mana nō te tā’atira’a ia Iosepha Semita i roto i te hiero nō Kirtland. ’Ua fa’aho’ihia mai te ’īra’a o te autahu’ara’a i roto i te hiero nō Nauvoo.9

Tae roa atu i tōna tāparahi-pohe-ra’a-hia, ’ua fāri’i tāmau noa o Iosepha Semita i te mau heheura’a tei ha’apāpū i te fa’aho’ira’a mai o te mau ’ōro’a hiero ’e te tā’atira’a.10 ’Ua ’ite rā ’oia ē, e tītauhia te tahi ha’amaita’ira’a. I muri a’e i te fa’aterera’a i te ’ōro’a hiero o Brigham Young i te ’āva’e Mē 1842, ’ua parau o Iosepha ia Brigham, « e ’ere i te mea tano maita’i, ’ua rave rā tātou i te mea tei mara’a ia tātou ’ia au i tō tātou huru tupura’a, ’e tē fa’aitoito atu nei au ia ’outou ’ia ha’apa’o i te reira ’e ’ia fa’anaho maita’i i te reira mau ’ōro’a ».11

I muri a’e i te pohera’a te peropheta, nā te peresideni Young i arata’i i te fa’aotira’a o te hiero nō Nauvoo12 ’e i muri a’e, ’ua patu i te mau hiero i roto i tufa’a fenua nō Utaha. I roto i te ha’amo’ara’a o te mau tahua raro o te hiero nō Saint-Georges, ’ua parau pāpū o Brigham Young i te rūra’a o te mau ’ohipa mono nō te hiero i te nā ’ō ra’a ē, « ’Ia feruri ana’e au i teie tumu parau, tē hina’aro nei au ’ia fa’aara te mau reo o nā patiri e hitu i te ta’ata ».13

Mai taua taime ra, ’ua ha’amaita’i-tāmau-hia te mau ’ōro’a hiero. ’Ua fa’ata’a te peresideni Harold B. Lee nō te aha te mau fa’anahora’a, te mau ture, ’e te mau ’ōro’a hiero ato’a, i tāmau noa ai te taui i roto i te ’Ēkālesia a te Fa’aora i fa’aho’i-fa’ahou-hia mai. ’Ua parau te peresideni Lee ē : « E mea hanahana te mau parau tumu o te ’evanelia a Iesu Mesia. ’Aore e ta’ata e taui i te mau parau tumu ’e [te ha’api’ira’a tumu] a te ’Ēkālesia, ’o te Fatu ana’e nā roto i te heheura’a. E taui rā te mau ravera’a ’a tae mai ai te arata’ira’a fa’auruhia i te feiā e fa’atere nei i te hō’ē taime ».14

’A feruri nā nāhea te fa’aterera’a i te ’ōro’a mo’a i te tauira’a i te roara’a o te mau matahiti. I mūta’a ra, e pūpūhia te pape o te ’ōro’a mo’a i te ’āmuira’a i roto i te hō’ē fa’ari’i rahi. E inu te mau ta’ata ato’a i roto. I teie nei, tē fa’a’ohipa nei tātou i te mau hāpaina fa’aru’e nā te ta’ata hō’ē. ’Ua taui te fa’anahora’a, ’āre’a rā te mau fafaura’a, ’ua vai noa ïa.

’A feruri na i teie nā parau mau e toru :

  1. E ’ohipa tau maoro te Fa’aho’i-fa’ahou-ra’a mai, e ’ere i te hō’ē ’ohipa i tupu na, ’e e tāmau noa te reira ē ho’i noa mai te Fatu.

  2. Te fā hope’a o te ha’aputuputura’a o ’Īsera’ela15 ’o tē hōpoira’a ïa i te mau ha’amaita’ira’a o te hiero i te mau tamari’i ha’apa’o a te Atua.

  3. ’Ia ’imi ana’e tātou e nāhea ’ia fa’aoti i te reira fā ma te maita’i atu ā, e heheu mai te Fatu i te mau ’itera’a hau atu. E hina’aro te fa’aho’i-fa’ahou-ra’a tāmau i te heheura’a tāmau.

’Ua ani pinepine te peresidenira’a mātāmua ’e te pupu tino ’Ahuru Ma Piti ’āpōsetolo i te Fatu, ’aita ānei e vai ra te mau rāve’a maita’i nō te hōpoi i te mau ha’amaita’ira’a o te hiero i tāna mau tamari’i ha’apa’o. Tē ’imi tāmau nei mātou i te mau arata’ira’a nō ni’a i te rave-ti’a-ra’a ’e te pāpū i te ha’api’ira’a, te mau fafaura’a ’e te mau ’ōro’a, noa atu te ta’a-’ē-ra’a o te reo ’e te hīro’a tumu.

I raro a’e i te fa’aterera’a a te Fatu, ’e ’ei pāhonora’a i tā mātou mau pure, ’aita i maoro a’enei ’ua ravehia te tahi mau fa’atanora’a. ’O ’oia ’o tē hina’aro nei ’ia māramarama ’outou ma te pāpū maita’i e aha mau tā ’outou e rave ra i te mau fafaura’a i ravehia. ’O ’oia ’o tē hina’aro nei ’ia fa’a’ohipa hope roa ’outou i tāna mau ’ōro’a mo’a. ’Ua hina’aro ’oia ’ia māramarama ’outou i tō ’outou mau ha’amaita’ira’a, tā ’outou mau parau fafau ’e tā ’outou mau hōpoi’a. ’Ua hina’arooia ’ia fāri’i ’outou i te mau ’itera’a pae vārua ’e te mau arara’a ’aita ’outou i fāri’i a’e nei. Terā tāna e hina’aro nei nō te mau ta’ata haere hiero ato’a, noa atu te vāhi tā rātou e ora ra.

Te mau fa’atanora’a ’āpī i roto i te mau ’ohipa o te hiero, ’e te tahi atu a muri a’e, tē fa’a’ite pāpū mai nei te reira ē, tē fa’atere pāpū nei te Fatu i tāna ’Ēkālesia. Tē hōro’a nei ’oia ia tātou tāta’itahi i te rāve’a ’ia ha’apa’ari maita’i atu ā i tō tātou niu pae vārua, nā roto i te fa’atumura’a i tō tātou orara’a i ni’a iāna ’e i ni’a i te mau ’ōro’a ’e te mau fafaura’a o tōna hiero. ’Ia ta’ita’i ana’e mai ’outou i tā ’outou parau fa’ati’a nō te hiero, te ’ā’au ha’eha’a ’e te vārua ha’apa’o maita’i i te fare ha’api’ira’a a te Fatu, e ha’api’i ’oia ia ’outou.

Mai te mea e’ita ’outou e nehenehe e haere i te hiero nō te hō’ē pu’e tau, nō te ātea ānei, nō te mau fifi i te pae ea ānei, ’aore rā te tahi atu mau fifi, tē ani atu nei au ia ’outou ’ia fa’ata’a i te hō’ē taime tāmau nō te fa’ahiti i roto i tō ’outou vārua i te mau fafaura’a tā ’outou i rave.

Mai te mea ’aita ’outou i au atura ’ia haere i te hiero, ’a haere pinepine atu—’eiaha ’ia iti mai. ’A vaiiho i te Fatu, nā roto i tōna Vārua, ’ia ha’api’i ’e ’ia fa’auru ia ’outou i reira. Tē fafau atu nei au ia ’outou, i te roara’a o te tau, e riro mai te hiero ’ei vāhi nō te pārurura’a, nō te tāmāhanahanara’a, ’e nō te heheura’a.

’Āhiri e nehenehe tā’u e paraparau i te feiā ’āpī pa’ari tāta’itahi, e tāparu vau ia ’outou ’ia ’imi i te hō’ē hoa e nehenehe ’outou e tā’atihia iāna i roto i te hiero. E uiui paha ’outou ē, e aha te ta’a-’ē-ra’a tā te reira e fa’atupu i roto i tō ’outou orara’a. Tē fafau atu nei au ia ’outou ē, e ta’a-’ē-ra’a rahi tā te reira e fa’atupu ! Nā roto i te fa’aipoipora’a ia ’outou i roto i te hiero, ’e te ho’i-tāmau-ra’a, e ha’apūaihia ’outou ’e e arata’ihia i roto i tā ’outou mau fa’aotira’a.

’Āhiri tā’u e nehenehe e paraparau i te tāne ’e te vahine tāta’itahi tei fa’aipoipohia ’aita ā i tā’atihia atura i roto i te hiero, tē tāparu nei au ia ’outou ’ia rave i te mau ta’ahira’a e tītauhia nō te fāri’i i te reira ’ōro’a ’o tē fa’ahei ’e ’o tē taui i te orara’a.16 E fa’atupu ānei te reira i te ta’a-’ē-ra’a ? Mai te mea noa e hina’aro ’outou e haere i mua e ’a muri noa atu ’e ’ia vai tāhō’ē e ’a muri noa atu. Te hina’arora’a ’ia vai tāhō’ē e ’a muri noa atu e’ita te reira e tupu. E’ita te tahi atu ’ōro’a ’aore rā fa’aaura’a e fa’atupu i te reira.17

’Āhiri e nehenehe tā’u e paraparau i te tāne ’e te vahine tāta’itahi e hina’aro ra e fa’aipoipo, ’aita rā i ’itehia atura tōna hoa mure ’ore, tē fa’aitoito atu nei au ia ’outou ’eiaha e tīa’i i te fa’aipoipora’a nō te fāri’i i te ’ōro’a i roto i te fare o te Fatu. ’A ha’amata i teienei ’ia ha’api’i mai ’e ’ia fa’a’ohipa i te aura’a nō te parau ’ia ha’anahia i te mana o te autahu’ara’a.

’E ’ia ’outou tāta’itahi tei rave i te mau fafaura’a o te hiero, tē tāparu atu nei au ia ’outou ’ia ’imi—nā roto i te pure ’e ma te tāmau—’ia māramarama i te mau fafaura’a ’e te mau ’ōro’a o te hiero.18 E matara te mau ’ūputa pae vārua. E ha’api’i mai ’outou e nāhea ’ia vāhi i te pāruru i rotopū i te ra’i ’e te fenua, nāhea ’ia ani i te mau melahi a te Atua ’ia tauturu mai ia ’outou, ’e nāhea ’ia fāri’i maita’i a’e i te arata’ira’a a te ra’i. E fa’aitoito ’e e ha’apūai tā ’outou mau tauto’ora’a itoito i tō ’outou niu pae vārua.

E au mau taea’e ’e mau tuahine here, ’ia oti maita’i ana’e te fa’a’āpīra’a o te hiero nō Roto Miti, ’aita e vāhi pāpū a’e e ’itehia i te taime ’āueuera’a fenua i roto i te ’āfa’a nō Roto Miti, maori rā i roto i teie hiero.

’Oia ato’a, i te mau taime ato’a, ’ia tupu mai te ’āhuehuera’a i roto i tō ’outou orara’a, te vāhi pāpū roa a’e nō te vai pae vārua ’o tē orara’a ïa i roto i tā ’outou mau fafaura’a nō te hiero !

’A ti’aturi mai na iā’u, ’ia parau ana’e au ē, ’ia patu-ana’e-hia tō ’outou niu pae vārua ma te pa’ari mau i ni’a ia Iesu Mesia, ’aita e ti’a ia ’outou ia mata’u. Mai te mea e ha’apa’o maita’i ’outou i tā ’outou mau fafaura’a i rave i roto i te hiero, e ha’apūaihia ’outou nā tōna mana. I muri iho, ’ia tupu ana’e mai te ’āueuera’a fenua pae vārua, e nehenehe ’outou e ti’a ma te pūai nō te mea e mea pa’ari ’e te ’āueue ’ore tō ’outou niu pae vārua.

’Ua here au ia ’outou, e te mau taea’e ’e te mau tuahine here. Teie mau parau mau tā’u i ’ite : Tē hina’aro nei te Atua tō tātou Metua i te ao ra ’ia mā’iti ’outou ’ia ho’i mai i te fare iāna ra. E ere tāna fa’anahora’a nō te haerera’a i mua i te mea ’ohipa rahi, ’e e auraro ’oia i tō ’outou ti’amāra’a. Tei ia ’outou te mā’itira’a ’o vai tā ’outou e riro mai—’e i pīha’i iho ’outou ia vai—i roto i te ao i muri nei !

Tē ora nei te Atua ! ’O Iesu te Mesia ! ’O teie tāna ’Ēkālesia, tei fa’aho’i-fa’ahou-hia mai nō te tauturu ia ’outou ’ia fa’atupu i tō ’outou haere’a hanahana. Tē fa’a’ite pāpū nei au i te reira i te i’oa mo’a ’o Iesu Mesia, ’āmene.

Fa’ata’ara’a

  1. Hi’o « ’Auē te pa’ari », Te mau Hīmene, N°41.

  2. Nō reira, « ’ia hāpono mai te diabolo […] i tōna ra mata’i ’ū’ana […] e ’ere ’oia i te mana i ni’a iho ia [tātou] […] nō te papa pa’i tā [tātou] i ti’a i ni’a ra, ’o te niu mau ïa, ’o te tumu ’ia patuhia i ni’a e te ta’ata, e ’ore e ti’a ’ia ma’iri rātou i raro » (Helamana 5:12ha’apāpūra’a i ’āpitihia atu).

  3. Hi’o Te Ha’api’ira’a Tumu ’e te mau Fafaura’a 109:15, 22.

  4. Te Ha’api’ira’a Tumu ’e te mau Fafaura’a 38:30 ; hi’o ato’a Te Ha’api’ira’a Tumu ’e te mau Fafaura’a 10:55.

  5. Hi’o Mose 5:5–6.

  6. Arata’ira’a pāpa’ira’a mo’a, « Hiero ».

  7. ’Ei hi’ora’a, hi’o Exodo 28 ; 29 ; Levitiko 8. ’Ua parauhia te sekene o Mose « te sekene ’ite » (Numera 9:15) ’e te « sekene ’ite » (Exodo 38:21). ’Ua ha’amouhia te hiero o Solomona i te matahiti 578 hou te Mesia, tau matahiti i muri a’e i tō te ’utuāfare o Lehi fa’aru’era’a ia Ierusalema. Fātata e 70 matahiti i muri a’e i fa’a’āpī-fa’ahou-hia ai taua hiero ra e Zorobabela. I muri iho, ’ua tū’ino-fa’ahou-hia e te auahi i te matahiti 37 hou te Mesia. ’Ua fa’arahi Heroda i te hiero i te matahiti 16 hou te Mesia. I muri iho teie hiero, tei ’itehia e Iesu, ’ua ha’amouhia i te matahiti 70 i muri a’e i te Mesia. ’Ua fāri’i ato’a Nephi i te mau ’itera’a mai teie nō ni’a i te hiero nā roto i te haere-pinepine-ra’a « i ni’a i te mou’a » nō te pure (1 Nephi 18:3) e i muri a’e, i te mau fenua America, ’ua patu i te hō’ē hiero « mai te au i te hōho’a o te hiero o Solomona », noa atu e mea iti roa te fa’anehenehera’a (hi’o 2 Nephi 5:16).

  8. Hi’o Te Ha’api’ira’a Tumu ’e te mau Fafaura’a 88:119 ; 124;31.

  9. Hi’o Te Ha’api’ira’a Tumu ’e te mau Fafaura’a 110:13–16 ; 124:28. ’Ua tu’uhia te ’ōfa’i tihi o te hiero nō Nauvoo i te 6 nō ’Ēperēra 1841, tau ’āva’e noa i muri a’e i tō Iosepha Semita fāri’ira’a i te heheura’a ’ia hāmani i te reira. I te hiero nō Nauvoo, ’ua mara’a te mau ’ohipa. ’Ei hi’ora’a, ’ua fa’ata’a mai te Fatu ē, e tītauhia te vāhi bāpetizora’a ’ia nehenehe i te feiā mo’a ’ia bāpetizohia nō te feiā i pohe (hi’o Te Ha’api’ira’a Tumu ’e te mau Fafaura’a 124:29–30).

  10. Hi’o Te Ha’api’ira’a Tumu ’e te mau Fafaura’a 131 ; 132. I roto i Te Ha’api’ira’a Tumu ’e te mau Fafaura’a 128 tē vai ra hō’ē ’episetole nā Iosepha Semita i pāpa’i i te feiā mo’a nō ni’a i te bāpetizora’a nō te feiā i pohe. Tē parau ra ’oia i reira ē, te fa’aorara’a o te feiā pohe « ’ua tītauhia te fa’aorara’a ia rātou ’e e faufa’a rahi te reira nō tō tātou iho fa’aorara’ahia… [nō te mea] e ’ore e noa’a te maita’i roa ia rātou ra ’ia ’ore tātou nei—e ’ore ato’a tātou e maita’i roa ’ia ’ore tō tātou feiā i pohe ra ».(Te Ha’api’ira’a Tumu ’e te mau Fafaura’a 128:15

  11. Joseph Smith, i roto Saints : The Story of the Church of Jesus Christ in the Latter Days, buka 1, The Standard of Truth, 1815–1846 (2018), 454.

  12. ’Ua fa’aoti te ta’ata pāpa’i ’ā’amu o te ’Ēkālesia ’o George A. Smith ē, e 5 634 taea’e ’e tuahine tei fāri’i i tō rātou ’ōro’a hiero i roto i te hiero nō Nauvoo, ’aita i oti roa i te hāmani, i te ’āva’e Tītema 1845 ’e Tēnuare 1846. ’Ua tāmau noa te tā’atira’a i te feiā fa’aipoipohia e tae roa i te 7 nō Fepuare [1846], te tai’o mahana i reira hau atu i te 2 000 ’āpiti tei tāhō’ēhia e te ’autahuara’a nō teie tau ’e a muri noa atu » (Bruce A. Van Orden, « Temple Finished before Exodus », Deseret News, 9 nō Tītema 1995, deseret.com ; hi’o ato’a Richard O. Cowan, « Endowments Bless the Living and Dead », Church News, 27 nō ’Ātete 1988, thechurchnews.com).

  13. « I tō ’outou mana’o, e aha tā te mau metua e parau ’āhiri e nehenehe rātou e paraparau mai nā te pohe mai ? E’ita ānei rātou e parau ē : E rave rahi tauatini matahiti tō mātou ta’oto-noa-ra’a i’ō nei, i roto i teie fare tāpe’ara’a, ma te tīa’i ’ia tae mai teie tau tu’ura’a ? E homa, ’āhiri tō rātou e mana, e tae mai ïa te mau haruru pātiri o te ra’i i roto i tō tātou mau tari’a, ’āhiri tātou e ’ite noa a’e i te faufa’a o te ’ohipa e ti’a ia tātou ’ia rave. Tē hi’o mai ra te mau melahi ato’a o te ra’i i teie pupu iti ta’ata ’e tē fa’aitoito nei ia rātou i roto i te fa’aorara’a o te ’utuāfare ta’ata nei. ’Ia feruri ana’e au i teie tumu parau, tē hina’aro nei au i te mau arero o nā pātiri e hitu ’ia fa’aara i te ta’ata » (Discourses of Brigham Young, sel. John A. Widtsoe [1954], 403-4).

  14. Harold B. Lee, « God’s Kingdom—A Kingdom of Order », Ensign, Tēnuare 1971, 10. Hi’o ato’a te fa’ahitira’a parau a te peresideni Wilford Woodruff i te matahiti 1896 ; ’ua parau ’oia :« Tē hina’aro nei au e parau, ’ei peresideni nō Te ’Ēkālesia a Iesu Mesia i te Feiā Mo’a i te mau Mahana Hope’a nei ē, e ti’a ia tātou i teienei ’ia tāmau noa ’e ’ia haere i mua. ’Aita tā tātou ’ohipa i [oti] roa nō ni’a i te heheura’a […] ’Ua arata’i mai te peresideni [Brigham] Young, tei pe’e ia Iosepha Semita, ia tātou i’ō nei. ’Ua fa’anaho ’oia i teie mau hiero ’e ’ua fa’atupu i te mau ’ōpuara’a o tōna pi’ira’a ’e o tōna tōro’a […] ’Aita ’oia i fāri’i i te tā’āto’ara’a o te mau heheura’a nō ni’a i teie ohipa ; ’aita ato’a te peresideni Taylor, ’aita Wilford Woodruff. ’Aita e hope’ara’a tō teie ’ohipa e tae roa atu i tōna maita’i-roa-ra’a » (The Discourses of Wilford Woodruff, mā’itihia e G. Homer Durham [1946], 153-54).

  15. Hi’o 3 Nephi 29:8–9.

  16. Hi’o Te Ha’api’ira’a Tumu ’e te mau Fafaura’a 131:2–4.

  17. Hi’o Te Ha’api’ira’a Tumu ’e te mau Fafaura’a 132:7.

  18. ’Ua pāpa’i John A. Widtsoe : « I te tāne ’aore rā i te vahine e haere ra nā roto i te hiero, ma te mata ’ara’ara, ma te ha’apa’o i te mau tāpa’o ’e te mau fafaura’a, ’e ma te fa’aitoito tāmau ’ia hāro’aro’a i te aura’a tā’āto’a, e parau te Atua i tāna parau, ’e e tae mai te mau heheura’a. ’Ua ’ī te ’ōro’a hiero i te tāpa’o, ’o te ta’ata ma’ama’a ana’e te tāmata i te tātara i te reira ; ’ua ’ī roa ho’i te reira i te mau heheura’a nō te feiā e fa’a’ohipa i tō rātou pūai nō te ’imi ’e nō te ’ite, ’aita roa e parau e nehenehe e fa’ata’a ’aore rā, e ha’amāramarama i te mau mea e vai ra i roto i te ’ohipa hiero. Tē ’ōro’a hiero tei hōro’ahia mai nā roto i te heheura’a, e māramarama-hau-hia a’e te reira nā roto i te heheura’a » (i roto i te Archibald F. Bennett, Saviors on Mount Zion [Sunday School manual, 1950], 168).