Meda dau Muri Karisito

Ena noqu vulica vakataki au na ivolanikalou, au kurabuitaka na veisau i Saula na kai Tasisi, ka kilai e muri me o Paula, me vaka e vakamacalataki ena iVolatabu.

E vakaitavi o Paula ena kena vakacacani na Lotu kei ira na muri Karisito. Ia ena vuku ni kaukauwa mai lomalagi kei na Veisorovaki i Jisu Karisito, e veisau vakataucoko, ka yaco me dua na italai qaqa ni Kalou. E vakadadamuria o koya na bula i Jisu Karisito.

Ena dua na ivakavuvuli i Paula vei ira na kai Koronica, e sureti ira mera vakadadamuri koya baleta ni o koya e muri Karisito (raica na 1 Koronica 11:1). Oqo edua na veisureti dina ka yaga mai na gauna i Paula me yacova mai nikua: meda muri Karisito.

Au tekivu vakananuma se cava nai balebale ni noda muri Karisito. E bibi cake, noqu a vakataroga, se “Na sala cava meu na vakatotomuri koya kina?”

Meda muri Karisito e kenai balebale meda tovolea me veisautaka na noda ivalavala, ivakarau kei na bula me yaco me vaka na nona bula na iVakabula. O ya meda rawata na ivalavala dodonu. O ya meda tisaipeli dina i Jisu Karisito.

Au vulica eso na tiki ni bula ni iVakabula, kau kunea kina, me tiki ni noqu vosa ni kua, e va na nona itovo au dau tovolea meu vakatotomuria kau via wasea vata kei kemuni.

Na imatai ni itovo ni bula ni iVakabula sai koya na yalo malumalumu. O Jisu Karisito e yalomalumalumu vakalevu sara ena bula taumada. Ena Bose mai Lomalagi, e kila ka vakatara na loma ni Kalou me gumatua ena ituvatuva ni veivakabulai me baleta na kawatamata. A kaya Koya, “I Tamaqu, me yaco na lomamuni, ka me nomuni tikoga na vakarokoroko ka sega ni mudu” (Mosese 4:2).

Eda kila ni vakatavulica o Jisu Karisito na yalomalumalumu ka vaka yalomalumalumutaki Koya me vakarokorokotaka kina na Tamana.

Meda bula ena yalo e malumalumu baleta ni na kauta mai na vakacegu (raica na Vunau kei na Veiyalayalati 19:23). Ena liu na yalomalumalumu tarava na vakalagilagi, ka na kauta mai na yalovinaka ni Kalou vei keda: “Io, mo dou qai vakamalumalumutaki kemudou vakai kemudou, ka vakaisulutaki ena yalomalumalumu: ni sa vorati ira na viavialevu na Kalou, ka solia na i solisoli ni loloma vei ira sa yalomalumalumu” (1 Pita 5:5). Na yalomalumalumu e kauta mai na isau ni taro malumu. Ka ivurevure ni itovo ni bula dodonu.

E vakavulica oqo o Elder Dale G. Renlund:

“O ira yadua era lako vata kaya kei na Kalou ena yalomalumalumu era dau nanuma na veika sa vakayacora vei ira na Tamada Vakalomalagi kei Jisu Karisito.”

“Eda caka dodonu vata kei na Kalou ena noda lako vata kei Koya ena yalomalumalumu” (Caka Dodonu, Vinakata na Yalololoma, ka Lako vata kaya na Kalou ena Yalomalumalumu,” Liaona, Nove. 2020, 111, 109).

Na ikarua ni itovo ni bula ni iVakabula sai koya na yaloqaqa. Niu nanumi Jisu Karisito ni se qai yabaki 12, ni dabe maliwai ira tiko na vunilawa ena valetabu ni Kalou ka vakavulica vei ira na veika vakalou, au raica ni sa tiko rawa vei Koya, taudonu ena nona gauna ni Nona bula, na Nona kila vakavinaka na yaloqaqa, ka duatani duadua. Dina ni vuqa era namaka na gonetagane oqo me vakavulici mai vei ira na vunilawa, ia o Koya a vakavulici ira tiko “ni dabe ena kedra maliwa na vunilawa, ka ra vakarorogo tiko vua, ka vakatarogi koya” (iVakadewa nei Josefa Simici, Luke 2:46ena Luke 2:46, vakamacala e botona c]).

Keirau veiqaravi vaka daukaulotu ena itikotiko ni kaulotu na Mbuji-Mayi Mission ena Democratic Republic e Congo mai na yabaki 2016 ki na 2019. E dau vakayagataki na gaunisala me sala ni veilakoyaki mai na dua na i wasewase ki na dua tale ena itikotiko ni kaulotu. E dua na ivakarau e dau yaco ena i wase ni vanua o ya, ni ra dau vakaiyaragitaki ira ena i sele na tamata ca me ra vakataotaka na veitosoyaki ni tamata.

E lewe lima na daukaulotu eratou a coko ena tiko yavavala oqo ni ratou a tokitaki tiko ki na dua tale na i wasewase. Keirau a sa sotava oti na mataqali ivakarau vakaoqo, ka keirau tekivu loma taqaya ena vuku ni neimami bula kei na neimami taqomaki, ka dau lomalomarua na lako ena veigaunisala oqo me sikovi ira na daukaulotu ka vakayaco koniferedi ni iwasewase. Keirau sega ni kila na dede ni gauna ena yaco tiko kina na ivakarau oqo. Au vola e dua na ripote, ka vakauta ki na Mataveiliutaki ni wasewase, kau vakaraitaki kina na neitou rere ni veilakoyaki baleta ni gaunisala e sala duaduaga ni veitaratara kei ira na neimami daukaulotu.

E sauma lesu o Elder Kevin Hamilton, ea neimami Peresitedi ni wasewase na Africa Southeast Area, ka vola mai oqo: “Sa noqu ivakasala mo cakava na kena vinaka duadua o rawata. Mo yalomatua ka dau masu tikoga. Kakua ni biuti iko se o ira na nomuni daukaulotu ena vanua mera vakamavoataki kina, ia ena gauna vata oqori toso ki liu ena vakabauta. ‘Ni sa sega ni solia mai vei keda na Kalou na yalo ni rere; a yalo ni kaukauwa ga, kei na yalololoma, kei na yalomatua’ (2 Timoci 1:7).”

Na veivakayaloqaqataki oqo a vakaukauwataki keirau sara vakalevu ka vakatara me tomani tale na veilakoyaki ka veiqaravi ena yaloqaqa me yacova ni cava na neirau ilesilesi, baleta ni keirau a vakarorogo ki na veidusimaki mai vua na Tamada mai Lomalagi mai na ivolanikalou.

Ena ivolanikalou ni noda gauna, eda wilika kina na vosa veiuqeti ni Parofita o Josefa Simici ka vakananuma tiko kina na veivakayaloqaqataki ni Turaga vei keda: “Oi kemudou na wekaqu, meda kakua beka ni tomana tiko na inaki cecere vakaoqo? Me toso ki liu ka kakua ni suka ki muri. Ni yaloqaqa, kemudou na wekaqu; ka toso tikoga ki liu, ki liu ki na qaqa!” (Vunau kei na Veiyalayalati 128:22).

Me tiko vei keda na yaloqaqa meda vakayacora na ka dodonu, ena gauna mada ga e sega ni taleitaki kina—na yaloqaqa me taqomaka na noda vakabauta ka cakacaka ena vakabauta. Me tiko vei keda na yaloqaqa meda veivutuni e veisiga, na yaloqaqa meda ciqoma na loma ni Kalou ka muria na Nona i vunau kece. Me tiko vei keda na yaloqaqa meda bula dodonu ka cakava na veika e namaki vei keda ena noda itavi kei na itutu eso.

Na ikatolu ni itovo ni bula ni iVakabula sai koya na veivosoti. Ena Nona gauna ni veiqaravi ena bula vakayago, na iVakabula a tarova na nona vakaviriki ena vatu e dua na marama dautagane. E vakaroti koya me “lako, ka mo kakua ni valavala ca tale” (Joni 8:11). Na ka oqo e vakavuna na nona veivutuni kei na nona vosoti emuri, me vaka e tukuna na ivolanikalou, “a sa vakalagilagia na Kalou na marama oya me tekivu mai na gauna oya, ka vakabauta na yacana.”(iVakadewa i Josefa Simici, Joni 8:11ena John 8:11, ivakamacala e botona c]).

Ena dua na lotu ni Siganisucu ena Tiseba ni 2018, na noda peresitedi lomani o Peresitedi Russell M. Nelson a vosa me baleta e va nai loloma eda ciqoma mai vua na iVakabula. A kaya ni dua nai loloma e solia tu na iVakabula sai koya na noda rawa ni veivosoti:

“Mai na Nona Veisorovaki vakalou, sa rawa ni o vosoti ira na vakamavoataki iko ka ra na rairai sega ni kauwaitaka na nodra vakacacani iko.

“Sa dau rawarawa meda vosota e dua ka qara vakaidina ena yalomalumalumu na nomu veivosoti. Ia na iVakabula ena solia vei iko na kaukauwa mo vosota e dua ka caka ca vei iko ena sala cava ga” (“Four Gifts That Jesus Christ Offers to You” [Lotu ni Siganisucu ni Mataveiliutaki Taumada, 2 ni Tise., 2018], broadcasts.ChurchofJesusChrist.org).

Meda veivosoti vakai keda ena yalodina meda rawata kina na veivosoti mai vei Tamada. Na veivosoti e sereki keda ka vukei keda meda klikili ni vakaivotavota ena sakaramede e vei Sigatabu. Na veivosoti e gadrevi vei keda meda tisaipeli dina i Jisu Karisito.

Na ikava ni itovo ni bula ni iVakabula sai koya na solibula. E tiki ni kosipeli i Jisu Karisito. Na iVakabula e solia na Nona bula ena vukuda me solibula uasivi duadua meda rawa kina ni vueti. Ena nona vakila na mosi ni solibula, a kerea o Koya vei Tamana me kauta tani vua na bilo, ia a vakaotia kece o Koya na cakacaka ni solibula tawamudu. Oqo na Veisorovaki i Jisu Karisito.

O Peresitedi M. Russell Ballard e vakavulica vakaoqo: “Na solibula e sai koya [na] ivakaraitaki ni loloma savasava. Na i vakatagedegede ni noda loloma vua na Turaga, na kosipeli, kei ira na tamata e rawa ni vakarautaki ena veika eda lomasoli me solibula kina ena vukudra” (“The Blessings of Sacrifice,” Ensign, Me 1992, 76).

Eda rawa ni solibulataka na noda gauna me veiqaravi kina, veiqaravi vei ira na tani, ka caka vinaka, vakayacora na cakacaka ni tuva kawa, ka vaqaqacotaka na noda veikacivi ni Lotu.

Eda rawa ni solia na veika vaka i lavo ena noda saumi ikatini, isolisoli ni lolo, kei na isolisoli tale eso me tarai cake kina na matanitu ni Kalou e vuravura. Eda gadreva na solibula meda maroroya kina na veiyalayalati eda sa cakava vata kei na iVakabula.

Sa noqu masu meda muri Jisu Karisito ka torova na veivakalougatataki ni Nona Veisorovaki, me yaco meda yalomalumalumu vakalevu cake, meda yaloqaqa vakalevu, meda veivosoti vakalevu cake ka da solibula vakalevu ena vuku ni Nona matanitu.

Au vakadinadinataka ni bula tiko na Tamada Vakalomalagi ka kilai keda yadua o Koya, sai Jisu na Karisito, ka sa parofita ni Kalou nikua o Peresitedi Russell M. Nelson. Au vakadinadinataka ni Lotu i Jisu Karisito ni Yalododonu Edaidai sa matanitu ni Kalou e vuravura ka sa dina na iVola i Momani. Ena yaca i Jisu Karisito, na noda Dauniveivueti, emeni.