Oi Kemuni na Kalou, Mo ni Nanuma na Nodra Vakararawataki na Nomuni Yalododonu

Na yavu ni veivakabulai ni Tamada Vakalomalagi e oka kina e dua na ituvatuva vakayago eda na lako curuma kece na luveni Kalou na veivakatovolei kei na dredre ni bula.¹ Lima na yabaki sa oti, a kunei vei au na kenisa. Au sa vakila oti ka se vakila tikoga na mosi mai na veisele, na iwali ni tarova na tete ni kenisa, kei na vakayagataki ni wainimate. Au lako curuma na dredre ni lomaqu ena gauni ni mosi, ena bogi e sega ni rawa na moce. Na itukutuku vakafika ni vuniwai e vola ni rairai au a mate ka biuta na bula oqo ena dua na gauna sara eliu kau a sega ni namaka, biuta tu mai e dua taucoko na matavuvale taleitaki.

Se evei ga na vanua o vakaitikotiko kina, na vakararawataki vakayago se vakayalo mai na veimataqali bolebole kei na luluqa ena bula qo e sa yaco tiko se ena qai yaco ena dua na siga me tiki ni nomu bula.

Na vakararawataki vakayago e rawa ni yaco mai na tubu ni yabaki ni bula, na mate sega ni namaki, kei na vakacalaka yaco vakasauri; via kana, sega ni vakavale, se na veivakalolomataki kei na ivalu.

Na vakararawataki vakayalo e dau tubu cake mai ena nuiqawaqawa, lauqa; na veretaki nei watimu, tubutubu, se e dua na iliuliu niutaki; vakacakacaka se veisau ni nanamaki vakailavo; lewa tawadodonu mai vei ira na tani; na digidigi ni itokani, gone, se lewe ni vuvale; veivakalolomataki ena kena veimataqali; sega ni rawati na tatadra ni vakamau se vakaluveni, tauvimate se na mate ni dua na wekada voleka; se eso tale na vuna.

Me rawa vakacava mo vosota na veivakararawataki duidui eso na kena ituvaki ni yaco mai vei keda?

Eda vakavinavinaka, ni inuinui e kune ena kosipeli i Jisu Karisito, ka e rawa talega ni tiki ni nomu bula na inuinui. Nikua au wasea e va na ivakavuvuli ni nuinui au taura mai ena volanikalou, vakavuvuli ni parofita, vuqa na veisiko vakadauniveiqaravi kei na tauvimate veibolei ena noqu bula. Na ivakavuvuli oqo e sega walega ni vakaibalebale raraba ia e vakilai vakatitobu talega.

iMatai, na noda vakararawataki e sega ni kena ibalebale ni sega ni taleitaki iko na Kalou. Rua na udolu na yabaki sa oti, a raica e dua na mataboko na tisaipeli nei Jisu ena valetabu ka kaya, “Vakavuvuli, ko cei sa ivalavala ca, a tamata oqo se tamana kei tinana, sa sucu mataboko kina ko koya?”

E rairai era raica cala beka o ira na Nona tisaipeli, me vaka e vuqa na tamata nikua, era raica ni vuqa na dredre kei na veivakarawarawataki ni bula e sau ni valavalaca. Sauma lesu na iVakabula, “Sa sega ni valavala ca ko koya oqo, se tamana kei tinana, me vakatakilai ga na cakacaka ni Kalou ena vukuna.”²

E kune reki na Kalou ena nona rawata vei keda na tawamate rawa kei na bula tawamudu.³ Me rawa vakacava na ibolebole se vakarawarawataki—vakabibi na vakararawataki e vakavuna na valavala tawa dodonu ni dua tale⁴—e yaco sara me tosoya tiko na cakacaka ni Kalou?

Tukuna na Turaga vei ira Nona tamata ni veiyalayalati, “Ia, raica, au sa vakasavasavataki iko, au sa digitaki iko ena lovo bukawaqa ni veivakararawataki.” ⁵ Na cava ga e vakavuna na nomu vakararawataki, na Tamada Vakalomalagi dauloloma e rawa ni muataki keda me vakasavasavataka na yaloda.⁶ Na yalo e vakasavasavataki e rawa ni colata vata na icolacola ena yalo dina ni vakatulewa vakavuku.⁷ O ira na yalo e vakasavasavataki era sa “lako mai ena veivakarawarawataki levu” era vakarautaki ira me ra sa tiko ena loma ni itikotiko vakaturaga, “ia ena tavoya kecega na Kalou na wai ni mata mai na matadra.”⁸

iKarua, Na Kalou na Tamada Vakalomalagi e cecere na nona kila vakavoleka na nomu vakararawataki. Ena lomadonu ni dredre, eda na rawa ni nanuma cala ni yawa mai vei keda na Kalou ka sega ni kila na mosi eda lakocuruma. Na Parofita o Josefa Simici e vakaraitaka na veika oqo ena dua na gauna dredre ni nona bula. Nona tiko vakavesu e Liberty Jail, e udolu na Yalododonu era vakasavi mai na nodra dui vale, sa qai tagica na Kalou o Josefa me vukei koya kakasaqara me kila ena masu: “Oi kemuni na Kalou, ko ni sa tiko ivei? E vei na vale ni vakaruru sa ubia na nomuni ivunivuni?” E qai tinia ena kerekere oqo: “Oi Kemuni na Kalou, mo ni nanuma na nodra vakararawataki na nomuni yalododonu.”⁹

Na veika e sauma mai kina na Turaga e vakadeitaki Josefa kei ira kece era vakaleqai:

“Ia na luvequ, me vakacegu na yalomu; raica sa lekaleka walega na gauna ni nomu rarawa kei na vutugu;

“Ia, kevaka ko sa vosota rawa, ena laveti iko cake na Kalou.”¹⁰

E vuqa vei ira na Yalododonu era wasea vei au na nodra vakila na loloma ni Kalou ena gauna ni dredre. Au nanuma vinaka na veika au lako curuma ena dua na gauna noqu valuta tiko na kenisa sebera ni ratou kila na vuniwai na cava e vakavuna tiko na mosi kaukauwa. Au dabe tikivi watiqu, meu vakarau masulaka na keirau vakasigalevu. Au sega ni tarova rawa na noqu tagi, “Tamaqu Vakalomalagi, kerekere vukei au. Au sa tauvimate vakalevu.” E na 20-30 ni sekodi tarava, au viribaiti ena Nona loloma. E sega ni dua na ivakamacala e soli me baleta na noqu tauvimate, sega ni dua na ivakatakilakila se cava na vuna, ka sega ni dua na vakacegu mai na mosi. Au vakila saraga na Nona loloma dina, qai rauti au vinaka.

Au vakadinadinataka ni Tamada Vakalomalagi, o koya e kila madaga ni lutu e dua na manumanu vuka, ka kila vinaka tu na noda rarawa.¹¹

Katolu, O Jisu Karisito e solia na Nona kaukauwa me vukei iko mo vakaqaqacotaka ka vosota vakavinaka na veivakararawataki. Na kaukauwa qo e vakatara me yaco baleta na Nona Veisorovaki.¹² Au leqataka ni vuqa vei ira na lewe ni Lotu era nanuma kevaka me ra vakaukautaki ira vakalailai era na lako curuma rawa vakataki ira. E dua na gaunisala dredre me da bulataka. Na gauna e sega ni dede ni kaukauwa, e sega ni vakatautauvata taki kei na kaukauwa sega ni vakaiyalayala ni Vakabula e drodrovi iko me vaqaqacotaka na yalomu.¹³

Na Vola i Momani e vakavulica ni o Jisu Karisito “colata kina” na nodra mosi, tauvimate, kei na veimalumalumu me rawa kina ni vukei keda.¹⁴ E rawa vakacava mo ciqoma na kaukauwa e solia o Jisu Karisito me vukei iko ka vaqaqacotaki iko ena gauna ni veivakararawataki? Na idola mo semati iko kina vua na iVakabula sa ikoya na nomu maroroya na veiyalayalata o cakava vatakei Koya. Era dau cakava na veiyalayalati oqo na lewenilotu ni ra sa ciqoma na cakacaka vakalotu ni matabete.¹⁵

Era curu kina veiyalayalati vaka papitaiso na tamata i Alama. Era qai vakarawarawarataki nodra tu vakavesu ka vakatabui vei ira na sokalou vakalewelevu se me ra masu e cake. Ia e ra maroroya vinaka na nodra veiyalayalati ena gaunisala dodonu duadua ena nodra tagicaka lo e yalodra. Na kena isau, era ciqoma na kaukauwa vakalou. “Io, a sa vakaukauwataki ira na Turaga me rawarawa vei ira na nodra icolacola.”¹⁶

Ena gauna oqo e veisureti na iVakabula, “Drau vakararavi tiko mai vei au ena vakasama kece; kakua ni vakatitiqa, ka kakua ni rere.”¹⁷ Ni da maroroya na noda veiyalayalati ni sakaramede me da dau nanumi Koya, e yalataka o Koya ena tiko vata kei keda na Yalona. Na Yalo e vaqaqacotaki keda me da vosota na dredre ka me da cakava na veika eda na sega ni rawa ni cakava vakataki keda. E rawa ni vakabulai keda na Yalo, me vaka e vakavulica o Peresitedi James E Faust, “Eso na veivakabulai oqo ena yaco ena dua tale na vuravura.”¹⁸

Eda vakalougatataki tu ena veiyalayalati ni valetabu kei na cakacaka vakalotu, “na kaukauwa ni bula vakalou e vakaraitaka.”¹⁹ Au sikova e dua na marama e coqa vakaca na luvena yalewa tabagone ka mate sara, qai muri na watina ena kenisa. Au tarogi koya se vosota vakacava e dua na lolosi kei na veivakararawataki vaka oya. Sauma mai o koya ni vaqaqacotaki koya, na nona sokalou vakawasoma na valetabu kei na veivakauqeti ni vuvale e tawamudu. Me vaka sa yalataki, na cakacaka vakalotu ni vale ni Turaga e vakayaragitaki koya ena kaukauwa ni Kalou.²⁰

iKava, digitaka na mamarau ena vei siga. O ira era dau vakararawataki e dau vakila vakawasoma na balavu ni bogi, ka na sega ni basika mai na rarama ni siga. E vinaka me da tagi.²¹ Kevaka o kunea ni o dau rarawa ena bogi, kevaka o digitaka na vakabauta, o na yadra mai na mataka rarama ena yalo mamarau.²²

Me ivakaraitaki, au a sikova e dua na marama tina e laurai vakavuniwai ni kenisa, e mata dredre ena nona dabedabe dina ga ni vakila tu na mosi kei na yali ni drauni uluna. Au sotava e dua na veiwatini mamarau rauta na yabaki matua ka veiqaravi vaka iliuliu ni tabagone dina ga ni sega ni rau vakaluveni rawa. Au dabe vatakei dua na marama—na budratou kei na tinadratou—erau mate ruarua ena loma ni vica na siga; ena loma ni nodratou veitagicaki era dredre ka vakasamataka na veigauna rekitaki.

Era vakaraitaka na Yalododonu vakaleqai oqo na veika e vakatavulica o Peresitedi Russell M. Nelson:

“Na reki eda vakila e vakatau vakalailai sara ena ituvaki ni noda bula ka sa baleta vakatabakidua na veika e vakanamata kina na noda bula.

“Ni vakanamata na noda bula ki na ituvatuva ni veivakabulai ni Kalou… vei Jisu Karisito kei na Nona kosipeli, e rawa ni da reki veitalia na cava e yaco—se sega ni yaco—ena noda bula.”²³

Au vakadindinataka²⁴ ni nanumi na noda vakararawataki na Yalododonu na Tamada Vakalomalagi, e lomani iko, ka kila vakamatailalai na veika e baleti iko. E kila na veika o vakila na iVakabula. “E dina sa colata ko Koya na noda rarawa, ka sa colata na rarawa ni lomada.”²⁵ Au kila—niu lakocuruma e veisiga²⁶—na bulataki ni veiyalayalati e dolava na kaukauwa ni veisorovaki i Jisu Karisito me solia na qaqa kei na marau vei kemuni na vakararawataki.

Vei ira kece era vakararawataki, au masu, “Me vakamamadataka na Kalou na nomuni icolacola ena vuku ni veivakamarautaki ni Luvena.”²⁷ Ena yacai Jisu Karisito, emeni.