Na Vale ni Bula Vakaivakarau

Ena noqu bula vakacakacaka kei na veiqaravi ena Lotu, au sa vakayacora vakaudolu na gauna na veika oqo—ia, e sega ga ni matadratou na 15 na turaga era dabe tiko qo e dakuqu. Au vakila na nomuni masu kei na nodra talega.

Kemuni na taciqu kei na ganque, o au na kai Toga ena Ceva ni Pasifika ia au a susugi ena Vualiku kei Amerika. Sa vica na drau se udolu beka na daukaulotu gone ni Toga era sa sega tu ni rawa ni lesu ki na nodra vanua lomani ena vuku ni matetaka ni sa sogo tu na curu yani ki na kena iyalayala. Eso na daukaulotu cauravou ni Toga era sa kaulotu tu me tolu na yabaki kei ira na goneyalewa sa sivia na rua na yabaki! Era wawa toka vakamalua ena vosota kei na vakabauta vata era kilai kina na neimami. Ia, ni kakua ni taqaya kevaka eso vei ira era veiqaravi tiko ena nomuni tabanalevu kei na iteki era sa vakataki au mai na kedra irairai—qase ka matua. Eda sa vakavinavinaka ena vukudra na daukaulotu e veivanua kecega ena nodra veiqaravi yalodina, se vakacava na kena balavu se lekaleka mai na kena era a namaka ena vuku ni matetaka.

Ena dua na Sigatabu niu se dikoni, au a tiko voli ena varada kei na terea wai niu veisoliyaka na sakaramede, a qai curu mai e dua na marama. Ena yalo ni veiqaravi, au a lako yani ka dodoka vua na terea. A deguvacu, matadredre, ka taura e dua na bilo wai. A sa berata mai na madrai. Ni oti vakalailai na gauna oqo, noqu dauveituberi vakavuvale, o Ned Brimley, a vakavulica vei au ni vuqa na tiki kei na veivakalougatataki ni kosipeli e dau soli vei keda vakaivakarau ena kena veitaravi

Ena macawa oya, erau a lako mai vale o Ned kei na nona itokani kei na dua na lesoni guiguilecavi dredre. A vakananuma lesu vei keitou ni a vakaivakarau na nona bulia na vuravura na Kalou. A qarauna vinaka sara na Turaga nona vakamacalataka vei Mosese na ituvatuva vakaivakarau a bulia kina na vuravura. iMatai, a tekivu ena Nona wasea na rarama mai na butobuto, oti, na wai mai na vanua mamaca. A vakuria ena kau bula kei na manumanu ni bera ni qai vakacadrava mai ki na vuravura tauyavu vou na Nona ibulibuli cecere duadua: na tamata, tekivu mai vei Atama kei Ivi.

“A sa bulia na tamata na Kalou mei tovo vata kei koya, e nai tovo ni Kalou sa buli koya ko koya; na tagane kei na yalewa sa buli rau ko koya.

“A sa vakaraica na Kalou na ka kecega sa bulia ko koya, ka raica, sa ka vinaka sara” (Nai Vakatekivu 1:27, 31).

Sa marautaka na Turaga. Ka sa vakacegu ena ikavitu ni siga.

Na ivakarau veitaravi a buli kina na vuravura e sega walega ni solia e dua na irairai ni cava e bibi duadua vua na Kalou ia, sa vakakina na vuna kei na vukui cei e bulia kina ko Koya na vuravura.

A qai cokota na nona lesoni veivakauqeti o Ned Brimley ena dua na iyatuvosa rawarawa wale: “Vai, Na vale ni Kalou e vakaivakarau. O koya e namaka iko me vakaivakarau na nomu bulataka na nomu bula. Ena kena veitaravi dodonu. E vinakata o Koya mo laki kaulotu mada ni se bera ni o vakamau.” Ena ka oqo, era vakavuvuli tiko kina na iliuliu ni Lotu ena gauna oqo ni “namaka na Turaga na cauravou taucoko e rawa vua, me vakavakarau me veiqaravi. … Na goneyalewa … e gadreva me veiqaravi me vakarau talega” (iVoladusidusi Raraba: Veiqaravi ena Lotu i Jisu Karisito ni Yalododonu Edaidai, 24.0, ChurchofJesusChrist.org). A tomana o Baraca Brimley: “E vinakata na Kalou mo vakamau mada ni se bera ni o vakaluveni. Ka vinakata o Koya mo vakatorocaketaka tikoga nomu taledi ena nomu vuli.” Kevaka o digia mo bulataka nomu bula ena taudaku ni kena veitaravi oqori, o na raica ni dredre na bula ka yakusurasura.

E vakavulica talega vei keitou o Baraca Brimley ena Nona isoro ni veivakaduavatataki, sa vukei keda na iVakabula me da vakalesuya mai na ivakarau ki na noda bula sa mai yakusurasura tu ena noda se nodra digidigi cala eso tale.

Mai na gauna oya lako yani, au sa dau taleitaka vakalevu na “ivakarau veitaravi.” Au sa tara cake e dua na itovo tudei ni vaqara iwalewale vakaveitaravi ena bula vakakina ena kosipeli.

A vakavuvulitaka o Elder David A. Bednar na ivakavuvuli oqo: “Ena gauna eda vulica, kila, ka bulataka kina na kosipeli i Jisu Karisito, ena veivakararamataki tiko na ituvatuva oqo. Taura mada na ivakaraitaki oqo, na lesoni kece eda vulica baleta na veika vakayalo, me vakaliuci mai na ituvatuva ni veika lelevu sa yaco, ni vakalesui mai na taucoko ni kosipeli ni iVakabula ena iotioti ni gauna oqo.

E tuva o Elder Bednar na iMatai ni Raivotu kei na nona rairai taumada o Moronai vei Josefa Simici, sai koya na nona vakavulici taumada, na parofita gonetagane, ena ivakarau kei na itovonibula ni Kalou, tarava mai na nodrau itavi na iVola i Momani kei Ilaija ena vakasokumuni kei Isireli ena tai ruarua ni ilati ena iotioti ni itabagauna oqo.

A tinia o Elder Bednar: “Na kena veitaravi vakauqeti oqo e dusia na veika vakayalo bibi duadua vua na Kalou” (“Ena Gole na Yalodra na Gone,” Liaona, Nov. 2011).

E dua na ka au sa dikeva rawa oya ni kena “ivakarau veitaravi” sai koya e dua na sala rawarawa, tudei, ka mana me vakavulici keda kina na Turaga, ni da Luvena, ena ivakavuvuli bibi eso.

Eda lako mai ki vuravura me da vulica ka rawata na veika eda na sega beka ni rawata kevaka e sega. Na noda tubu e noda ka vakatamata yadua ka bibi sara ena ituvatuva nei Tamada Vakalomalagi. Na noda tubu vakayago vakakina vakayalo e tekivu vakaitagede qai toso vakamalua ni da rawata na kilaka vakaveitaravi.

E dua na ivunau laulau ni vakabauta a cakava o Alama—ni vakayagataka na vakasama ni dua na sore ni itei, ka, kevaka e susugi ka qaravi vinaka, ena kadre mai na dua na kau lailai ki na dua na vunikau taucoko matua ka vuataka mai na vuana kana vinaka (raica na Alama 32:28–43). Na lesoni sai koya ni na tubu nomu vakabauta ni o solia kina na vanua ka susuga na sorenikau—se na vosa ni Kalou—e yalomu. Ena tubu me levu cake nomu vakabauta ni “sa tekivu me tubu cake mai e lomaseremuni” (tikina e 28). Ni “buroro, ka kadre, ka tekivu me tubu” (tikina e 30) e rairai ka veidusimaki talega. E veitaravi talega.

Na Turaga e vakavulici keda yadudua me vaka na levu ni ka eda rawa ni vulica kei na ivakarau ni noda vuli. Na noda tubu e vakatau vakatabakidua ena noda tuvakarau, noda dau lomatarotaro, itagede ni vakabauta, kei na kilaka.

A vakavulici vei Nifai na veika ena qai vulica o Josefa Simici mai Katiladi, sivia ni 2,300 na yabaki i muri: “Ia raica, sa kaya vakaoqo na Turaga na Kalou: Au na solia vei ira na luve ni tamata na vosa ena vosa, na ivunau ena ivunau, vakalailai eke ka vakalailai e kea; ia sa kalougata ko ira era sa vakarorogo ki na noqu ivunau, ka vakatudaliga ki na noqu ivakasala, ni ra na vulica na yalomatua.”9

Ni da na vuli ena “vosa ena vosa, na vunau ena vunau, vakalailai eke ka vakalailai mai kea,” e veitaravi talega.

Vakasamataka na iyatuvosa qo eda sa rogoca vakalevu ena noda bula: “Me liu na ka e dau liu” se “Vagunuvi koya mada ena sucu ni se bera na lewena.” Vakacava na “Taubale mada i liu ni se bera ni da cici”? Na ivosavosa yadua qo e vakamacalataka eso na ka e dau veitaravi mai.

Dau yavala na cakamana me vaka na ivakarau veitaravi. Dau yaco na cakamana ni da cakacakataka na vakabauta. Dau liu mada na vakabauta qai tarava mai na cakamana.

Era lesi talega na cauravou ki na itutu ena Matabete i Eroni e dau ia na kena veitabaki vakaveitaravi, me vaka na nona yabaki ni bula o koya e tabaki: dikoni, ivakavuvuli, qai bete.

Na cakacaka vakalotu ni veivakabulai kei na bula vakacerecerei e rawati ena iwalewale vakaveitaravi. Eda na papitaiso ni se bera ni da ciqoma na isolisoli ni Yalo Tabu. Sa vakakina na veitaravi ni cakacaka vakalotu ni valetabu. Sa dina sara, me vaka a vakavuvulitaka vakayalomatua vei au na noqu itokani o Ned Brimley, na sakaramede e veitaravi—tekivu ena madrai qai tarava mai na wai.

“Ia ni ra sa kana tiko, sa taura na madrai ko Jisu, ia ni sa lotutaka oti, sa dovia, ka solia vei ira na tisaipeli, ka kaya, Taura, kania, oqo na yagoqu.

“Sa qai taura na bilo ko koya, ia ni sa vakavinavinaka oti, sa solia vei ira ka kaya, Dou gunu kece kina;

oqo na noqu dra ni veiyalayalati vou sa liviraki ena vukudra e lewevuqa me bokoci na ivalavala ca.” (Maciu 26:26–28).

I Jerusalemi ka vakakina e Amerika, a tekivutaka na iVakabula na sakaramede ena ivakarau vakaoqo.

“Raica, na noqu vale sa vale vakaivakarau, sa kaya na Turaga na Kalou, ka sega ni vale ni veilecayaki” (Vunau kei na Veiyalayalati132:8).

Na veivutuni e yaco ena kabakaba veitaravi. E tekivu ena vakabauti Jisu Karisito, ke sa dua na tikina lailai madaga. Na vakabauta e gadrevi kina na yalomalumalumu, oqo e yaga sara me tu kina vei keda na “yalo raramusumusu ka bibivoro.” (2 Nifai 2:7).

Io, na imatai ni va na yavu ni ivakavuvuli ni kosipeli era yaco veitaravi mai. “Keimami vakabauta ni sa yavu ni i vakavuvuli ni i tukutuku vinaka na: ai matai, Mo vakabauta na Turaga o Jisu Karisito; ai karua, na Veivutuni; ai katolu, na Papitaiso ena tabadromuci e wai me bokoci kina na ivalavala ca; ai kava, na isolisoli ni Yalo Tabu ena veitabaki ni liga” (Na Yavu ni Vakabauta 1:4).

A vakavuvulitaka vei ira na nona tamata o Tui Penijamini na dina bibi oqo: “Ka mo ni raica me ra vakayacori vakayalomatua ena kena ivakarau dodonu na veika kece oqo, ni sa sega ni kilikili vua na tamata me cici vakatotolo cake mai na kaukauwa sa tu vua. Ka dua tale, sa kilikili me gugumatua, me rawata kina na icocovi; o koya, sa dodonu kina me vakayacori na veika kecega ena kena ivakarau” (Mosaia 4:27)

Me sa vakaivakarau na noda bulataka noda bula ka segata me muri na kena veitaravi sa tuvana vei keda na Turaga. Eda na vakalougatataki ni da vaqara ka muria na ivakarau kei na kena veitaravi ka vakavulica kina na Turaga na ka e bibi duadua Vua. Ena yaca tabu i Jisu Karisito, emeni.