Na Valetabu kei na Nomu Yavu Vakayalo

Kemuni na taciqu kei na ganequ lomani, au vakavinavinaka niu tiko kei kemuni ena mataka nikua meu wasea yani na lomaqu.

O ni sa kila, ni sa caka tiko na cakacaka levu ni kena vakavinakataki na Valetabu vakairogorogo e Salt Lake. Na cakacaka levu oqo e oka kina na vakaukauwataki ni kena yavu taumada, ka sa veiqaravi tu mai ena senitiuri taucoko oqo. Ia na valetabu oqo me tudei tiko vakabalavu. Ena Me sa oti, au a laki vakadikeva na toso ni cakacaka levu oqo. Au nanuma ni na marautaka na veika keirau raica kei Wenday, na watiqu. Au vakabauta ni na raica na sere “Na Yavu Tudei”¹ sa vakaibalebale vou vei au.

Vidio mai na vanua ni cakacaka ena Valetabu e Salt Lake: “Eda raica tiko na yavu taumada ni Valetabu e Salt Lake. Au tucake to oqo ena dua na vanua e ra a Rumu ni Were tu e liu. Niu vakadikeva na mataitaki ni vale taucoko oqo, au qoroya na veika era sa rawata na painia. Au sa qoroqoro ga niu raica ni ra a tara na valetabu totoka oqo ena iyaya ni cakacaka kei na iwalewale a tu vei ira ena sivia e dua na senitiuri sa oti.

“Oqo ni mai oti e drau na yabaki, ia, kevaka meda dikeva vakavoleka na yavu, eda na raica na mawe ni sisi ni qele, lalaqa ni vatutuvai taumada, ka sa duidui na yavudei ni simedevatu.

“Ia oqo niu sa vakadinata na idinia nikua, droini, kei na nodra taravale na kenadau mera na vakaukauwataka na yavu taumada o ya, au sa kurabui ga. E vakasakiti na nodra cakacaka!

“Na yavu ni dua na vale, vakabibi na kena ka levu vakaoqo, me na kaukauwa ka tudei me rawa ni taqeya na uneune, sisi ni qele, cagi kaukauwa, kei na veituvaki tawatarovi ena vorata na veivale taucoko. Na cakacaka levu ni kena vakaukauwataki tiko oqo ena vaqaqacotaka na valetabu vakalou oqo ena yavu me tu rawata na veigauna.”

Eda saga vakataucoko me soli kina valetabu vakaturaga oqo, a mai levu toka na kena malumalumu, na yavu ena tu rawata na veiravuti ni bula oqo ki na Mileniumi. Ena kena vakaoqo, sa kena gauna meda sa dui tekivuna na ivakarau sa cecere—na ivakarau eda sega mada ni taura e liu—meda vakaukauwataka na noda dui yavu vakayalo . Na veigauna vou oqo sa kaciva tiko na ivakarau vovou.

Kemuni na taciqu kei na ganequ lomani, oqo na iotioti ni gauna. Kevaka me daru na turawata na ka rarawa ni mataka kei na oca, sa ka bibi me sa tiko na noda dui yavu vakayalo tudei sa taracake tu ena vatu ni noda Dauveivueti, o Jisu Karisito.²

Au tarogi kemuni yadua, “Sa vakacava beka na tudei ni nomu yavu? Kei na vakaukauwataki cava ni nomu ivakadinadina kei na kila vinaka na kosipeli sa gadrevi tiko?”

Na valetabu sai usutu tiko ni vakaukauwataki ni noda vakabauta kei na qaqaco vakayalo baleta na iVakabula kei na Nona ivunau sa uto tiko ni valetabu. Na veivakavulici kece e valetabu, mai na ivakasala kei na Yalo, e vakalevutaka na noda kilai Jisu Karisito vinaka. Na Nona cakacaka vakalotu bibi sa vauci keda Vua ena veiyalayalati tabu ni matabete. Ia, ni da maroroya na noda veiyalayalati, sa solia vei keda na Nona kaukauwa veivakabulai, veivaqaqacotaki.³ Io, eda sa gadreva sara na Nona kaukauwa ena veisiga ni mataka.

Sa yalataki vei keda “kevaka [eda] sa vakarau vakavinaka tu [eda] na sega sara ni rere.”⁴ Na ivakadei oqo sa bibi ka yaga ena gauna oqo. Sa kaya na Turaga se cava ga na veibolebole vou nikua, o ira sa tara nodra yavu vei Jisu Karisito, ka vulica me rawata na Nona kaukauwa, ena sega ni rawai ena veika rarawa duatani nikua.

Na cakacaka vakalotu kei na veiyalayalati ni valetabu sa ka mai liu. Na Turaga a vakasalataki Atama kei Ivi me rau masu, veiyalayalati, ka vakacabo isoro.⁵ E dina, “ena gauna era tiko kina e vuravura na tamata vata kei na Turaga era na muria na Nona vosa, era sa vakaroti mera tara na valetabu.”⁶ Na ivolanikalou taucoko sa sinai tu ena itukutuku ni ivakavuvuli ni valetabu, isulusulu, ivosavosa, kei na vuqa.⁷ Na veika kece eda vakabauta kei na yalayala yadua ni Kalou vei ira na Luvena veiyalayalati sa umanaki vata ena valetabu. Ena veitabagauna yadua na valetabu sa yavutaki tu ena dina talei vei ira sa veiyalayalati kei na Kalou ka maroroya era sa luve ni veiyalayalati.

Dina, ena vale ni Turaga, sa rawa meda cakava na veiyalayalati oqo kei na Kalou a cakava o Eparaama, Aisake, kei Jekope. Ka sa rawa meda na vakalougatataki vakakina!

iVakatakilakila

Na Valetabu e Nauvoo kei Kirtland

Na valetabu sa mai tiki tiko ni itabagauna oqo mai na gauna sara e liu.⁸ A solia o Ilaija na idola ni lewa ni veivauci kivei Josefa Simici ena Valetabu e Kirtland. Na taucoko ni matabete a vakalesuimai ena Valetabu e Nauvoo.⁹

Me yacova nona mate, a ciqoma tikoga o Josefa Simici na ivakatakila me vakuri tiko na vakalesuimai ni edaumeni kei na cakacaka vakalotu ni veivauci.¹⁰ A kila kina, ni sa gadrevi tikoga na vakasavasavataki. Ni cakava oti na edaumeni vei Brigham Young ena Me ni 1842, a kaya o Josefa vei Brigham, “Oqo se bera ni tuvai donu, ia daru sa cakava vinaka sara ena ituvaki vakaoqo daru sa mai vakatikori kina kau vakabauta ko na ciqoma oqo e ligamu ka tuvanaka ena ivakarau vei ira na soqoni vakaoqo.”¹¹

Ni sa mai mate na Parofita, sa mai liutaka o Peresitedi Young na kena vakacavari na Valetabu e Nauvoo¹² ni oti sa qai tara valetabu ena Yasana o Utah. Ena vakatabui ni tabavale e ra ni Valetabu e St. George, a vakaraitaka vakaukauwa o Brigham Young me caka vakatotolo na cakacaka veisosomitaki ni valetabu ka kaya, “Niu vakasamataka na ulutaga oqo, au sa gadreva na domo vitu ni kurukuru me vakayadrati ira na tamata.”¹³

Mai na gauna o ya oqo, na cakacaka vakalotu ni valetabu sa savasava tikoga mai. A vakamacalataka o Harold B. Lee na vuna sa veisau tiko kina na ivakarau, lawa, kei na vakayacori na cakacaka vakalotu ni valetabu ena loma ni Lotu vakalesuimai ni iVakabula. E kaya o Peresitedi Lee: “Na ivakavuvuli ni kosipeli i Jisu Karisito sa ka vakalou. Ena sega ni dua me veisautaka na ivakavuvuli kei na [ivunau] ni Lotu vakavo ga na Turaga ena ivakatakila. Ia na iwalewale e veisau mai na nodra veidusimaki vakayalo na veiliutaki ena kena gauna.”¹⁴

Raica mada na qaravi ni sakaramede sa veisautaki ena veiyabaki. Ena gauna e liu, na wai ni sakaramede a soli vei ira na ivavakoso ena dua ga na beseni. Era a gunu kece mai kina. Nikua sa vakayagataki tiko na bilo lalai biu laivi. Sa veisau na kena ivakarau, ia na veiyalayalati e tudei tikoga.

Vakasamataka na tolu na dina oqo:

1. Na Vakalesuimai e caka tikoga, sega ni soqo, ka tomani tiko me yacova na lesu mai ni Turaga.

2. Nai naki cecere ni vakasoqoni o Isireli¹⁵ me kau mai na kalougata ni valetabu vei ira na luvena yalodina na Kalou.

3. Ni da vakasaqara meda cakava na inaki o ya vagumatua sara, na Turaga ena veivakararamataki sara. Na toso tiko ni Veivakalesuimai e gadreva ga na ivakatakila.

Na Mataveiliutaki Taumada kei na Kuoramu ni iApositolo Le Tinikarua era taroga tikoga na Turaga ke tiko na sala vinaka cake me kau na kalougata ni valetabu vei ira na Luvena yalodina. Eda vakasaqara tikoga na veidusimaki me dodonu ka tudei e vuravura raraba na ivakasala ni valetabu, veiyalayalati, kei na cakacaka vakalotu se cava ga na duidui ni vosa kei na itovo.

Ena veidusimaki ni Turaga ka isau ni noda masu, sa mai vakayacori eso na veisau vou ni kena ivakarau. O Koya Ga sa gadrevi iko mo kila vinaka ena kena matata cecere na nomu cakava na veiyalayalati. O Koya Ga sa gadreva mo sotava vakataucoko na Nona cakacaka tabu vakalotu. E gadreva oKoya mo kila vinaka na nomu madigi, yalayala, kei na ilesilesi. E gadreva oKoya mo rarama vakayalo ka yadrava rawa na veika se bera mada ni o sotava. Sa gadreva o Koya vei keda kece na lewe ni valetabu, ena itikotiko cava ga.

Na veisau nikua ni ituvatuva e valetabu, kei na kena e muri mai, sa ivakadinadina tikoga ni Turaga sa dusimaka gumatua tiko na Nona Lotu. Sa vakarautaka tiko na madigi vei keda yadua me qaqacotaka noda yavu vakayalo vagumatua sara me usututaki noda bula ki Vua kei na cakacaka vakalotu veiyalayalati ni Nona valetabu. Ni o kauta mai na nomu ivolatara ni valetabu, ena yalomalumalumu, ka vakananuma na vale ni Turaga mo vuli, o Koya ena vakavulici iko.

Ke yaco me yawa, me bolei na tiko bulabula, se ivakatao tale eso mo tiko e valetabu ena kena gauna, au sureti iko mo tuva e dua na gauna tudei mo vakananuma tiko na veiyalayalati o sa cakava.

Ke se bera nomu taleitaka na gole i valetabu, gole vakawasoma kina—kua ni lailai. Laiva vua na Turaga, ena Yalona, me vakavulici me uqeti iko e kea. Au yalataka ni toso na gauna, na valetabu ena vanua ni nomu taqomaki, vakacegu, kei na ivakatakila.

Ke rawa meu na vosa mada vakayadudua vei ira na itabagone qase, au sa vakamasuti iko mo vakasaqara e dua na itokani mo drau na laki vauci e valetabu. O na taroga beka se na duidui cava ena cakava ki na nomu bula. Au yalataka ni na yaco taucoko kina na kena duidui. Ni ko vakamau e valetabu ka lesu vakawasoma kina, o na vaqaqacotaki ka dusimaki ena nomu lewa.

Ke rawa meu na vosa mada ki na veiwatini yadua era se bera tiko ni vauci e valetabu, au sa kerea mo ni kalawa yani mo ni ciqoma na cakacaka vakalotu cecere ni veisautaki ni bula.¹⁶ Ena dua beka na veisau? Vakavo ga ke drau via torocake tawamudu ka bula tawamudu vata. Na gagadre ni duavata tawamudu ena sega ni vakayacora. E sega tale ni dua na soqo se veidinadinati ena cakava rawa.¹⁷

Kevaka e rawa meu na vosa ki na tagane se yalewa yadua e gadreva me vakamau ka se bera ni kunea e dua na itokani yalewa se tagane tawamudu, au sa kerea mo kua ni waraka mo vakamau mo qai laki vakaedaumeni ena vale ni Turaga. Tekivu nikua mo vulica ka kila na ibalebale mo vakaiyaragi ena kaukauwa ni matabete.

Kei kemuni yadua sa veiyalayalati oti e valetabu, au sa kerea mo ni vakasaqara—ena masumasu ka vakawasoma—mo ni kila vinaka na veiyalayalati ni valetabu kei na cakacaka vakalotu.¹⁸ Ena tadola na katuba vakayalo. O na vulica na sala mo curuma na ilati tadrua i lomalagi kei vuravura, kei na sala mo kerea na agilosi ni Kalou me qaravi iko, kei na sala vinaka mo dusimaki mai lomalagi. Ni ko sasaga gumatua mo cakava ena qaqacotaka ka vakaukauwataka na nomu yavu vakayalo.

Kemuni na taciqu kei na ganequ lomani, ni cava na vakavinakataki ni Valetabu e Salt Lake, sa na sega ni tiko e dua na vanua veitaqomaki mai na uneune e Salt Lake Valley ia e loma ga ni valetabu.

Vakakina, ni yaco na veimataqali ue ena nomu bula, na vanua taqomaki ga vakayalo mo tiko kina o ya e loma ni nomu veiyalayalati ni valetabu!

Yalovinaka ni vakabauti au niu tukuna ke tara kaukauwa nomu yavu vakayalo vei Jisu Karisito, sa sega ni gadrevi mo rere. Ni ko dina tiko ena nomu veiyalayalati o cakava e valetabu, o na qaqaco ena Nona kaukauwa. Ia, ni yaco na uneune vakayalo, sa na rawa mo tu kaukauwa baleta na nomu yavu vakayalo e kaukauwa ka tawayavalati rawa.

Au lomani kemuni, taciqu kei na ganequ lomani. Na dina oqo au sa kila: na Kalou, na Tamada Vakalomalagi, e gadrevi iko mo digitaka mo lako mai Vua. Na Nona ituvatuva tawamudu ni torocake e sega ni dredre, ka rokova nomu digidigi. Sa nomu digidigi ga mo tamata vakacava—kei cei ko drau na tiko vata—ena vuravura e tarava!

E bula na Kalou! Sai Jisu na Karisito! Oqo na Nona Lotu sa vakalesuimai me vukea mo vakayacora vakaoti na nomu icavacava vakalou. Au sa vakadinadinataka ena yaca tabu i Jisu Karisito, emeni.