Na iVakavuvuli Tawamudu ni Loloma

Na ivakavuvuli tawamudu ni loloma sa matanataki ni bulataki na ivakaro cecere e rua: Lomana na Kalou ena lomamu taucoko, kei na yalomu taucoko, kei na nomu nanuma taucoko, kei na nomu kaukauwa kecega ka lomana na wekamu me vakataki iko.¹

Au nanuma na imatai ni vula i batabata e Utah, waicevata kecega ena veiyasana. Niu lako mai na Dravuisiga mai Sonoran, na imatai ni vica na siga au marautaka tiko, ia ni oti e vica na siga, au kila ni dodonu meu yadra totolo meu sivia laivi na waicevata mai na icurucuru ni motoka.

Dua na mataka, ena loma ni dua na cava ucacevata, au buno, niu sivi ucacevata tiko, kau raica na wekaqu ena tai ni sala kadua ni dolava nona qaraji. E qase cake vei au ko koya, au mani nanuma kevaka e rawa niu oti totolo meu vukei koya. Au vosa yani ena domolevu ka tarogi koya, “Baraca ko na gadreva na veivuke?”

E matadredre ka kaya, “Vinaka vakalevu, Elder Montoya.” A qai dreta mai e dua na iuvu ni ucacevata mai nona qaraji, yavalata kena idini, ena vica na miniti sa oti na ucacevata mai mata ni nona vale. Qai takosova mai na gaunisala kei na nona misini ka tarogi au, “Elder, o gadreva beka na veivuke?”

Ena matadredredre au kaya, “Io, vinaka vakalevu.”

Keirau tuvakarau me keirau veivukei baleta ni keirau veilomani, sa yaco me noqu leqa na nona leqa na wekaqu kei na noqu sa yaco me nona. Veitalia na vosa cava e vosataka na wekaqu se vanua cava e lako mai kina, keirau veilomani baleta ni keirau veitacini, keirau luvena e dua ga na Tama.

Ni kacivaki na veiqaravi, a kaya o Peresitedi Nelson, ”Ia oqo, eda na vakayacora e dua na iwalewale vou, ka vakatabui vakalevu cake, ena nodra kauwaitaki ka qaravi o ira na tani.² Vei au, na vakatabui e kena ibalebale ni ka ni tamata yadudua vakalevu cake, titobu cake, ka tauvata vakalevu cake kei na Nona ivakarau na iVakabula: “dou veilomani,”³ yadudua.

E sega ni sa rauta na nomu vakatikitiki mo kakua ni vakasugusugu vei ira na tani; e sega ni sa rauta mo raica e dua e gadreva tu na veivuke e tolo ni sala ka qai vakatikitiki ka lako sara. Me da taura na veimadigi kecega mo vukea na wekamu, kevaka sara mada ga drau na sota walega vakadua ena bula oqo.

Na cava na vuna e sa imatai kina ni ivakaro levu duadua na lomana na Kalou?

Au nanuma e baleta o cei o Koya ki vei keda. O keda na Luvena, e dau raica vakararaba o Koya na noda tiko vinaka, eda sa vakararavi Vua, ka taqomaki keda na Nona loloma. Na Nona ituvatuva e oka kina na galala ni digidigi; o koya, e rawa ni da caka cala.

E vakatara talega o Koya me da vakatovolei ka temaki. Ia kevaka eda cakava tiko eso na cala se rawai tiko ena veitemaki, e vakarautaki ena ituvatuva e dua na iVakabula me rawa ni da vueti ka lesu ki na iserau ni Kalou.

Na kalouca ni noda bula e rawa ni vakavuna na vakatitiqa me baleta na kena yaco na yalayala eso sa vakayacori vei keda. Yalovinaka vakabauta na Tamada. E dau rokova o Koya na Nona yalayala, ka rawa ni da vulica na veika e vinakata o Koya me vakavulica vei keda.

Na cakava sara mada ga na ka dodonu, na ituvaki ni noda bula e rawa ni veisau mai na vinaka ki na ca, mai na marau ki na rarawa. E dau sauma na Kalou na noda masu me vaka na Nona loloma tawayalani, kei na Nona gauna ga.

• Sa maca mai na wai ena uciwai dau gunu kina o Ilaija.⁴

• Sa ramusu na dakaititi sitila dina nei Nifai.⁵

• A vakalolomataki ka vakasavi mai koronivuli e dua na gonetagane.

• A mate ni oti ga e vica na siga nona sucu e dua na gone a waraki tu mai vakabalavu.

Dau veisau na ituvaki.

Ni veisau na keda ituvaki mai na vinaka kei na lomadonu ki na ca kei na lomacala, eda se rawa tikoga ni marau baleta na marau e sega ni vakatau ena noda ituvaki ia na ivakarau ni noda raica na noda ituvaki. Me vaka a kaya o Peresitedi Russell M. Nelson: “Na reki eda vakila e vakatau vakalailai sara ena ituvaki ni noda dui bula ia sa baleta vakatabakidua na veika e vakanamata kina na noda bula.”⁶

E rawa ni da waraka me veisau vakataki koya na noda ituvaki, se e rawa ni da vaqara ka kauta mai na ituvaki vovou ki vei keda.

• A taubale ki Sarifaci ko Ilaija, ka solia kina vua e dua na yada na kakana kei na wai.⁷

• A cakava o Nifai e dua na dakaititi ena kau ka vakasasa manumanu me kania.⁸

• A dabe ka volavola toka na cauravou lailai e yasa ni katubaleka, ia nikua sa dua o koya na qasenivuli ena itabavuli ni lalai.

• Erau sa taracake na veiwatini e dua na vakabauta cecere vua na iVakabula ko Jisu Karisito ka vakabauta na ituvatuva ni veivakabulai. Na nodrau lomana na gone erau a waraka mai vakabalavu ka qai mate vakasauri e cecere cake mai na nodrau yaluma.

Niu rogoca na taro “Tamaqu Vakalomalagi, o tiko dina e keri? O ni dau rogoca beka ka sauma nodra masu na gone [yadua]?,”⁹ au vinakata meu sauma, “E dau vaka tu kina, e vaka tiko kina, ka na dau tu ga e veigauna o Koya ena vukumu kei na vukuqu. O au na Luvena tagane, o Koya na Tamaqu, kau sa vulica tiko meu tama vinaka me vakataki Koya.

O au kei na watiqu keirau dau tovolea me keirau tu e yasadra na luvei keirau ena veigauna cava ga, ena ituvaki cava ga, ena sala cava ga. Na gone yadua e dui tu na kedra yaga; na kedra talei vua na Kalou e cecere sara, ka veitalia na bolebole, ivalavala ca, kei na malumalumu cava ga e tu vei ira, e lomani ira na Kalou, ka vakakina o keda.

Niu ciqoma na kaci oqo meu Vakaitutu Raraba, ena iotioti ni siga ni bera neirau gole ki Salt Lake, era a tiko kece ena neitou itikotiko na gone ena dua na lotu vakamatavuvale, keirau a vakaraitaka kina na neirau iloloma kei na vakavinavinaka. Ni oti na lesoni, au a solia vei ira yadua na luvei keirau e dua na veivakalougatataki vakamatabete. Era a luluvu kece. Ni oti na veivakalougatataki, a cavuta na luvei keirau tagane qase duadua na vosa ni vakavinavinaka ena vukudra yadudua me baleta na loloma cecere keirau dau solia vei ira mai na siga era a sucu kina me yacova mai na siga oya.

Vakalougatataki ira na luvemu se ra yabaki 5 se 50. Dau tu vata kei ira, dau tu ena vukudra. E dina ni itavi lewai vakalou na vakarautaki ni ka me baleti ira, me da kakua ni guilecava me da wasea na veigauna ni reki kei ira na luveda.

Na loloma nei Tamada Vakalomalagi ena vukuda yadua na Luvena e ka dina. Sa dau tu o Koya ena vukuda yadudua. Au sega ni kila se cakava vakacava, ia e dau cakava. O koya kei na Nona Ulumatua erau duabau ena nodrau cakacaka kei na lagilagi ni Tamana, “me vakavuna na tawamate rawa kei na bula tawamudu ni tamata.”¹⁰ Erau sa tala mai na Yalo Tabu me tuberi keda, me vakasalataki keda, ka vakacegui keda kevaka e gadrevi.

A vakarota na Luvena Daulomani me bulia na vuravura totoka oqo. A vakaroti Atama kei Ivi ka solia vei rau nodrau galala ni digidigi. Sa dau talai ira tiko mai na italai ena veiyabaki me rawa ni da ciqoma kina na Nona loloma kei na Nona ivakaro.

A tiko voli o Koya ena Veikau Tabu ka sauma tiko na taro yalodina ni cauravou ko Josefa ka kacivi koya ena yacana. A kaya na Tamada Vakalomalagi, “Sai Koya Oqo na Noqu Gone ni Toko. Mo Rogoci Koya!¹¹

Au vakabauta ni ivakaraitaki ni loloma cecere ni Kalou vei keda a yaco mai Kecisemani, ka a masu kina na Luvena na Kalou bula, “I Tamaqu, kevaka e rawarawa, me lako tani mada vei au na bilo oqo: ia me kakua ga ni vaka na noqu lewa, me vaka ga na nomuni lewa.”¹³

Au sa raica rawa ni iwase lailai au rawa ni ciqoma ni Veisorovaki i Jisu Karisito sa vakalevutaka cake na noqu lomana na Tamada kei na Luvena, sa vakalailaitaka noqu gagadre meu ivalavala ca ka talaidredre, ka vakalevutaka cake noqu lomasoli meu vinaka cake ka caka vinaka cake.

A lako ki Kecisemani ko Jisu ka sega ni rere ka sega ni vakatitiqa, e vakabauta na Tamana, ka kila ni na sikaraka vakataki koya ga na ikeli ni waini. A vosota na mosi kecega kei na veivakacacani. A beitaki, vakalewai, ka vakamatei ena kauveilatai. Ena nona gauna ni mosi kei na vakararawataki ena kauveilatai, e vakanamata ko Jisu ena nodrau lomaleqa na tinana kei na Nona tisaipeli daulomani. A solia na Nona bula.

Ena ikatolu ni siga a vakaturi cake kina mai na mate. Sa lala na ibulubulu; sa tu ko Koya ena yasai Tamana imatau. Erau nuitaka ni da na digitaka me da rokova na noda veiyalayalati ka lesu yani ki na Nodrau iserau. Na ikarua ni itagede e sega ni iotioti ni noda itagede; e sega ni noda na itikotiko vakavuravura oqo, ia eda kabula tawamudu ka da tiko vakawawa ga eke.

Oi kemuni na Karisito, na Luve ni Kalou bula. E bula tiko o Koya, ena vuku ni sa bula tiko o Koya, eda na bula kece tale ka tawamudu. Vakavinavinakataka na Nona veisorovaki, eda rawa ni bula vata tale kei Rau. Ena yaca i Jisu Karisito, emeni.