Na Kena iSau o Jisu

E ka dokai dina meu vosa ena soqoni ni koniferedi oqo. Nikua au na vosa vei kemuni me vaka e dua na itokani. Ena Kosipeli o Joni, a vakavulica na iVakabula ni da Nona itokani kevaka eda cavaka na veika e kerea o Koya vei keda.¹

Na noda lomana vakayadua kei na loloma e cokotivata ni iVakabula kei na noda veiyalayalati kei Koya, ena tauri keda vata. E vakavulica o Peresitedi Eyring: “Au via wasea vei kemuni na nona lomani iko na Turaga kei na nona niutaki iko. Ka vakalevu sara, na noqu via wasea na Nona vakanuinui levu vei iko.”²

Noqu a kacivi meu Vakaitutu Raraba ena Vitusagavuli mai vei Peresitedi Russell M. Nelson, e luvuci na yaloqu. E veivakadrukai. Keirau wawa ena nuiqawaqawa o au kei Julie na watiqu, ena soqoni ni yakavi ni Vakarauwai ni koniferedi raraba. Na noqu tokoni e vakayalomalumalumutaki au. Au wilika vakamalua na kabakaba ki na noqu idabedabe meu kakua niu lutu ena imatai ni noqu itavi.

Ena itinitini ni soqoni oya, edua na ka a yaco koya e lauti au sara vakalevu. Era duri ena dua na laini na lewe ni kuoramu yadua ka qai kidavaki au. Era vakaraitaka yadua na nodra loloma kei na veitokoni. Ena dua na veimoko yalo savu eratou tukuna, “Kakua ni leqa—o iko o taukei ike.”

Ena noda veiwekani kei na iVakabula, e raica na uto o Koya ka “sega ni dau vakalomavinakataka na tamata.”³ Vakasamataka na Nona digitaki ira na Nona iApositolo. E sega ni raica na ituvaki se na iyau. E sureti keda me da muri Koya, kau vakabauta ni vakadeitaki keda o Koya ni da Nona.

Na itukutuku oqo e vakatabakidua vei ira na itabagone ni Lotu. Au raica vei kemuni na veika e raica o Peresitedi Nelson vei iko. E tukuna o koya “e dua dina na ka e tiko vei ira na itabagone ni tabagauna oqo. E rairai ni niutaki kemuni vakalevu na Tamada Vakalomalagi me vakauti kemuni mai ena gauna oqo. O ni sucu vata mai na qaqa!”⁴

Au vakavinavinakataka na veika au vulica mai vei ira na itabagone. Au vakavinavinakata na veika eratou vakavulica vei au na luvequ, na veika e ra vakavulica vei au na daukaulotu, kei na veika e ra vakavulica vei au na vugoqu.

Sega ni dua na gauna dede sa oti, au a cakacaka voli ena iteitei kei na vugoqu o Nash. E yabaki ono okoya ka yalo vakalou. E vugoqu taleitaki duadua ka yacana o Nash, au vakabauta niu nona momo taleitaki e vosa tiko nikua ena koniferedi raraba.

E vukei au meu walia e dua na leqa ena neirau cakacaka, au tukuna vua, “Nash, e dua na vakasama vinaka qori. E lako mai vei na vuku tiko vei iko? E raici au mai ena lomatarotaro kei na rairai ni matana me vaka e tukuna mai, “Momo Ryan, o sega ni kila tu vakacava na isau ni taro oqo?”

E kurea na tabana, dredre, qai tukuna ena yalodei, “Jisu.”

Vakananuma vei au o Nash ena siga oya e dua na vuli rawarawa ka titobu. Na isau ni taro rawarawa kei na leqa lelevu duadua e dua tu ga. Na isau ni taro o Jisu Karisito. Na iwali kece e kune Vua.

Ena Kosipeli o Joni, tukuna na iVakabula vei ira nona tisaipeli ni na vakarautaka o Koya e dua na vanua vei ira. A veilecayaki o Tomasi ka kaya vua na iVakabula:

“Kemuni na Turaga, keitou sa sega ni kila se ko ni sa lako ki vei; ia keitou na kila rawa vakaevei na sala?

“Sa kaya vua ko Jisu, Oi au na sala, kei na vu-ni-dina, kei na vu-ni-bula, sa sega ni torovi Tamaqu walega e dua na tamata, ena vukuqu ga.”⁵

Vakavulica na iVakabula ni sai Koya na sala, kei na vu ni dina, kei na vu ni bula. Sai koya na isau ki na taro ni sala me da lako kina vua na Tamada Vakalomalagi. Na kunei ni noqu vakadinadina ni Nona itavi vakalou ena noda bula e dua na ka au vulica niu se cauravou.

Na gauna au veiqaravi kina vakadaukaulotu e Argentina, o Peresitedi Howard W. Hunter a sureti keda meda cakava e dua na ka bibi me vakavinakataka na noqu bula. Tukuna o koya, “Sa dodonu me da kilai Karisito vakavinaka cake mai na noda kilai koya; ka dau nanumi Koya vakawasoma cake mai na noda dau nanumi Koya; sa dodonu me da qaravi Koya vagumatua cake mai na noda qaravi Koya.”⁶

Na gauna oya, au dau vakasamataka vakalevu na sala meu vinakacake kina vaka daukaulotu. Sa ikoya oqo na isau ni noqu taro—meu kila na Karisito, vakananumi Koya, ka qaravi Koya. O ira na daukaulotu e veiyasai vuravura era yalovata ena inakinaki: mera “sureti ira na tani mera lako mai vei Karisito ena nodra vukei ira me ra ciqoma na kosipeli vakalesui mai, ena nodra vakabauti Jisu Karisito kei na Nona Veisorovaki, veivutuni, papitaiso, ciqoma na isolisoli ni Yalo Tabu, ka vosota me yacova na ivakataotioti.”⁷ Vei kemuni noqu itokani o ni vakarorogo tiko vei ira na daukaulotu, au via kuria na noqu veisureti mo ni lako mai vei Karisito. Eda na sasagavata me da kilai Koya, nanumi Koya, ka qaravi Koya.

Na noqu kaulotu a dua dina na gauna tabu ni noqu bula. Ena noqu otioti ni veitalanoa kei koya niu se daukaulotu, tukuna vei au o Peresitedi Pincock baleta na veisau ena yaco ena veiliutaki ni daukaulotu, baleta ni rau sa volekata tale tikoga vakaveiwatini na icavacava ni nodrau veiqaravi. E bibi ruarua na yaloi keirau ni sa na biu toka e dua na ka keirau sa mai lomana sara vakalevu. E rawa ni raica o koya niu yavalati ena vakanananu niu sa sega ni dua e daukaulotu e veigauna. A dua na tamata vakabauta o koya ka vakavulici au ena loloma me vaka a cakava tu mai ena rua na yabaki sa oti. A qai dusia na itaba nei Jisu Karisito ena dela ni nona desi ka kaya, “Elder Olsen, ena sega ni dua na leqa baleta oqo na Nona cakacaka.” Au nuidei niu kila ni na vukei au na iVakabula, sega walega ni gauna eda veiqaravi kina ena kaulotu, ia ena veigauna kevaka eda na vakatara me Vukei keda o Koya.

Ia e veivakavulici o koya vei keimami mai na loma ni utona ena vosa vaka Sipeni rawarawa duadua. Ni dau tukuna o koya, “Jesucristo vive,” Au kila ni dina ka bula dina tiko o Koya. Ni tukuna o koya, “Elderes y hermanas, les amo,” au kila ni lomani keimami o koya ka vinakata me da muria ena veigauna na iVakabula.

Keirau kalougataka kei na noqu lewe ni vale ni keirau veiqaravi vaka liuliu ni kaulotu kei ira na daukaulotu vakasakiti e Uruguay. Au rawa ni tukuna ni e so vei ira na daukaulotu vakasakiti duadua e vuravura, kau kila ni oqo na nodra vakanananu na vei liuliu ni daukaulotu me baleta na nodra vanua. Era vakavulica o ira na itisaipeli oqo e veisiga na muria tiko na iVakabula.

Ena gauna ni veivakatarogi, gole mai ena noqu valenivolavola e dua na daukaulotu goneyalewa. O koya e dua na daukaulotu vakasakiti, taleitaki ni veiterenitaki, ka liuliu yalodina. Era rai cake vua na nona itokani daukaulotu ka taleitaki koya na tamata. E dau muria na ivakaro, yalomalumalumu, ka deivaki. Na veirau veisiko ni bera oqo keirau a vakatabakidua ena vanua e veiqaravi kina kei o ira e vakavulica tiko. Ia na veisiko oqo a duidui sara. Noqu tarogi koya se vakacava tiko na nona bula, au siqema ni vaka e dua tiko na leqa. Tukuna o koya,“Peresitedi Olsen, au sega ni kila kevaka au rawa ni cakava qo. Au sega ni kila kevaka ena rauta na noqu vinaka. Au sega ni kila kevaka au rawa ni vaka e dua na daukaulotu e gadreva na Turaga vei au.”

Oqo e dua na daukaulotu vakasakiti. Vakasakiti ena veika kece. Na tatadra ni dua na peresitedi ni kaulotu. E sega ni dua na gauna meu leqataka kina na nona itovo ni cakacaka ni dua na daukaulotu.

Noqu vakarorogo vua, a dredre meu kila na cava meu tukuna. Au sa masu lo: “Tamaqu Vakalomalagi, oqo e dua na daukaulotu vakasakiti dina. O koya e nomu. E digidigi donu ena veika kece. Au sega ni via vakacala e dua na ka. Kerekere, vukei au ena cava meu tukuna.”

A qai lako mai vei au na vosa. Au tukuna, “Hermana, vosota sara ni oqo na veika o lako curuma tiko. Au via taroga e dua na taro. Kevaka e dua nomu itokani o vakavulica tiko e vakaoqo na nona vakanananu, na cava o na tukuna vei koya?”

E a rai cake mai ka matadredredre. Ena yalo ni dua na daukaulotu vakasakiti kei na kila deivaki, tukuna o koya, “Peresitedi, e rawarawa sara oqori. Au na tukuna vua ni kilai koya vakaidina na iVakabula. Au na tukuna vua ni bula tiko o Koya. E lomani iko o Koya. O iko sa rauta vinaka saraga, ka e rawa mo na walia oqo!”

Ena dua na dredre lailai e kaya okoya, “Kevaka oya na noqu isau vei noqu itokani, sa ikoya oqo na isau ni noqu taro.

Ni dau lako mai na lomatarotaro se vakatitiqa, eda na nanuma ni na iwali e sa rui dredre se eda na veilecayaki ena isau ni taro. Me da nanuma tiko na vunica, na tama ni veilasu kece, e vu ni veisei.⁸

Na iVakabula e iVakavuvuli ni veika e rawa.

A kaya talega o Peresitedi Nelson:

Sa vuku sara o vunimeca. Ena vuku ni milenia sa cakava tiko o koya me rairai butobuto na vinaka kei na butobuto me rairai vinaka. Na nona itukutuku e dau rogolevu, kaukauwa, ka dokadoka.

“Ia, na itukutuku mai vei na Tamada Vakalomalagi sa duidui ka veilauti sara. E rawarawa, malua, ka matata sara ka veilaveti na nona vosa mai e veivakurabuitaki ka da sega ni lomatarotaki Koya.”⁹

Eda vakavinavinaka ni lomani keda vakalevu na Kalou ni solia na Luvena Duabau. Sai Koya na isau.

A kaya o Peresitedi Nelson:

“Na kosipeli i Jisu Karisito e sa gadrevi vakalevu cake sara nikua mai na veigauna sa oti yani. …

“…Oqo e vakadeitaka na bibi ni nona ivakaro na Turaga vei iratou na nona tisaipeli me ratou “lako yani ki vuravura taucoko ka vunautaka na itukutuku vinaka ki vei ira na tamata kecega .’”¹⁰

Vei ira era digitaka me ra veiqaravi, au rawa ni vakadeitaka na veivakalougataki ena lako mai kevaka o rogoca na domo ni parofita. Na veiqaravi e sega ni baleti iko; e baleta tiko na iVakabula. O na kacivi ena dua na vanua, ia e bibi sara o ira na tamata o kacivi mo veiqaravi kina. E na soli vei iko eso na itavi bibi kei na veivakalougatataki mo vukei ira nomu itokani vou ni o Jisu sa isau ni taro.

Oqo na Lotu i Jisu Karisito ni Yalododonu Edaidai, ka oqo na vanua e da taukei kina. Na veika kece e vakauqeti keda kina ena loloma o Peresitedi Nelson ena vakavolekati keda vua na iVakabula.

Vei kemuni na itabagone vakasakiti—oka kina na vugoqu o Nash—ena nomu bula taucoko, se mani vakacava na dredre se na veilecayaki ni ibolebole, mo nanuma tikoga na isau ni taro rawarawa o Jisu.

Noqu dau rogoci ira eda tokona me parofita, daurairai, dauvakatakila ena vuqa na soqoni, au via tomana talega ka kaya, keimami lomani kemuni, vakavinavinakataki kemuni ka keimami gadrevi kemuni. Oqo na vanua o ni taukei kina.

Au lomana na noqu iVakabula. Au vakadinadinataka na Yacana, o Jisu Karisito. Au vakadinadinataka ni iVakabula sa vakatekivuna ena sauma talega na noda vakabauta”¹¹ ka e iVakavuvuli ni veika rawarawa o Koya. Na kena isau o Jisu. Ena yacai Jisu Karisito, emeni.