Yalomu Taucoko

Mai vei Sister Michelle D. Craig

Matai ni Daunivakasala ena Mataveiliutaki Raraba ni Goneyalewa

E dodonu me da muri Jisu ena yalo mamarau kei na yalo dina ena noda sala yadudua vaka tisaipeli.

Eso na gauna, dau vukei keda ni da kila na veika meda dau namaka.

Ni sa voleka tiko me cava na Nona veiqaravi, tukuna o Jisu vei ira na Nona iApositolo ni na lako mai na gauna dredre. Ia a qai tukuna talega o Koya, “Raica mo kakua ni yavalati.”¹ Dina ni biubiu o Koya, ia e sega ni dau biuta ira duadua o Koya. ² E vakatala mai na Nona Yalotabu me vukea me ra nanuma, tudei, ka kune vakacegu. E vakayacora na iVakabula na Nona iyalayala vei ira na Nona tisaipeli, ia me da rai tiko ga Vua me rawa ni da vakila ka marautaka tiko na Nona iserau.

Na tisaipeli i Karisito era dau lako curuma na gauna dredre.

Dua noqu itokani voleka a vakauta mai e dua na itukutuku mai na Nebraska Advertiser, e dua na niusiveva mai na Ra e loma kei Amerika, tikinisiga ena 9 ni Julai, 1857. E volai: “Mataka caca nikua e dua na ilawalawa ni lotu Momani era takoso ena nodra igolegole ki Salt Lake. O ira na marama (era sega soti ni rairai kaukauwa) era dreta toka e ligadra na qiqi lelevu me vaka na kaukauwa ni dua na manumanu levu, a lutu e dua na marama ena soso loaloa ka vakavuna me vakabera vakalailai na nodra toso, o ira na gone lalai ka daramaka voli na vinivo mai na vanua tani ka rairai maqusa me vakataka na tinadra.”³

Au mai vakananuma tiko vakalevu na veika me baleta na marama a lutu ena soso. Na cava e dreta duadua tiko kina? E sega na watina na tina oqo? Na cava e solia tiko na kaukauwa, na qaqa, kei na vosota me tutaka tiko na ilakolako dredre ena soso, dreta taucoko tu na nona iyaya ena qiqi ena loma ni vanua dravuisiga sega tu ni kilai—ka vuqa na gauna e vakalialiai mai vei ira na tamata?⁴

Vosa o Peresitedi Joseph F. Smith ena kaukauwa e tiko vei ira na marama painia, ka kaya: “E rawa beka mo cakitaki e dua vei ira na marama oqo mai na nodra saumaki ki na Lotu i Jisu Karisito ni Yalododonu Edaidai? E rawa beka mo matabuto taka na nodra vakasama ni nona inakinaki na Parofita o Josefa Simici? E rawa beka mo matabokotaki ira mai na yavu ni nakinaki vakalou i Jisu Karisito, na Luve ni Kalou? E sega vakadua ni o rawa mo cakava. Baleta na cava? Baleta era sa kila vakaidina. E sa vakaraitaka vei ira na Kalou, era sa kila vakamatata, ka e sega ni dua na kaukauwa e vuravura me na kauti ira tani mai na veika era kila ni dina.”⁵

Kemuni na taciqu kei na ganequ, me vakataki ira na turaga kei na marama oqo sa ikoya na kaci ni gauna oqo—o ira na tisaipeli era sasaga titobu me ra kunea na kaukauwa mera dreta tiko ni kacivi me ra taubaletaka na lekutu, na tisaipeli era kila deivaki na veika e sa vakaraitaka vei ira na Kalou, marautaka na nodra muri Jisu kei na yaloda taucoko ena noda ilakolako vakayadua vakatisaipeli. Me da tisaipeli i Jisu Karisito, eda vakabauta ka rawa ni tubu ena tolu na dina bibi oqo:

iMatai, eda rawa ni maroroya na noda veiyalayalati, kevaka madaga e sega ni rawarawa.

Ni bolei na nomu vakabauta, nomu vuvale, se na nomu veigauna mai muri—ni o lomatarotarotaka na vuna e dredre sivia kina na bula ni o cakava kece tiko na nomu igu mo bulataka na kosipeli—nanuma ni na Turaga e tukuna me da dau namaka na gauna dredre. Na dredre e tiki ni yavu ka sega ni kena ibalebale ni da sa guilecavi; era tiki ni balebale ni da Nona.⁶ O Koya li, “e daurarawa na lomana, ka sa dau kilaka rarawa”⁷

Au vulica tiko ni Tamada Vakalomalagi e via kila na veika me baleta na noqu tubu ena sala ni tisaipeli i Jisu Karisito mai na Nona leqataka na noqu vakalomavinakataki. Au na sega beka ni taleitaka me va tu ga ya—ia e vadina ga ya!

Na bula vakarawarawataki e sega ni solia edua na kaukauwa. Na kaukauwa eda gadreva me da tutaka na revurevu ni gauna oqo sa ikoya na kaukauwa ni Turaga kei na Nona kaukauwa e drodrovi keda mai na veiyalayalati vatakei Koya.⁸ Me da ravi ena noda vakabauta ni da sotava na cagi kaukauwa—ka sasagataka e veisiga me da cakava na veika eda yalataka kei na iVakabula ni da na cakava, kevaka ka bibi duadua ni da oca, lomaleqa, ka nuiqawaqawa taka eso na taro se leqa—eda na ciqoma vakamalua na Nona rarama, Nona kaukauwa, Nona loloma, Yalona, Nona vakacegu.

Na iusutu ni taubaletaki na sala ni veiyalayalati oya me da torova yani na iVakabula. Sa oKoya na isutu, ka sega ni mataqali toso e sega kina na cala. E sega ni da veitaucici, ka me da kakua ni vakatauvatanitaka na noda itosotoso vei ira tale eso. Gauna madaga eda tacaqe kina, e tu vakarau o Koya.

iKarua, Eda rawa ni Cakacaka ena Vakabauta.

Ni da tisaipeli i Jisu Karisito, eda kila na vakabauti Koya e gadreva na cakacaka—vakabibi ena gauna dredre.⁹

Ena vuqa na yabaki sa oti, rau navuca na noqu itubutubu me biu e dua nai ubi ni fuloa vou ena loma ni vale. Na bogi ni bera ni yaco mai na iubi vou, a tarogi ratou na ganequ o tinaqu me vagalalataki na iyaya ka kau laivi na iubi ena rumu me rawa ni biu yani na ka vou. Na taciqu yalewa yabaki vitu ena gauna oya, o Emily, sa moce tu. Na gauna e moce tu kina, e ratou vagalalataka vakamalua na iyaya ni rumu, vakavo ga na loga ka qai dresuka laivi mai na iubi ni fuloa. Me vaka era dau kilai kina na ganeda, ratou nanuma sara me lawakitaki koya. E ratou kauta laivi na nona iyaya kece mai na nona kovate kei na lalaga, ka laiva tu me lala. Ratou qai vola e dua na ivola qai vakabira ena lalaga: “Kivei Emily, keitou sa toki. Keitou na qai volavola yani ena vica na siga me qai tukuna yani na vanua keitou tiko kina. Loloma, nomu vuvale.”

Na mataka tarava ni yadra o Emily sa sega ni mai vakatalau, ratou lei vaqarai koya na ganequ—a tu duadua ka rarawa tu ena daku ni sogo ni katuba. Railesuva o Emily na veika a lako curuma qo: “Dua na ka noqu rarawa. Na cava beka ke a yaco kevaka meu a dolava ga na katuba? Na cava beka au na rogoca? Na cava beka au na boica? Au sa na kila kina niu sega ni tiko duadua. Au na kila kina niu lomani dina. Sega ni bau takosova noqu vakasama meu cakava e dua na ka me baleta na noqu ituvaki. Au sa soro ga kau dabe tagitagi tu ena loma ni kovate i sulu. Kevaka meu a dolava ga na katuba.”¹⁰

E nanuma vakaoya na taciqu baleta na ka e raica, ia e sega ni kena ituvaki dina. Me vakataki Emily, e rawa me da dau bikai sobu ena rarawa se mosi se yalolailai se nuiqawaqawa, se galili, se cudru, ni sega ni dau takoso ena noda vakasama me da cakava e dua na ka, me da dolava kina na katuba, ka cakacaka ena vakabauti Jisu Karisito.

E sinai ena ivolanikalou na ivakaraitaki ni turaga kei na marama, tisaipeli i Karisito, dina ni sotava tu na dredre, e cakacaka—tucake ena vakabauta ka taubale.¹¹

Vei ira na vukavuka era vakasaqara me ra vakabulai, kaya na Karisito, “Dou lako ka vakaraitaki kemudou vei ira na bete. Ia ni era sa lako tu, era sa vakasavasavataki.”¹²

Era lako vei ira na bete me vaka era sa vakabulai oti, ka ena nodra lako tiko ya, e qai vakakina.

Au via tukuna talega ni kevaka mo vakayacora edua na ivalavala ena loma ni nomu rarawa, kerekere mo sasagataka ga mo vukei—mai vua na itokani, lewe ni vuvale, liuliu ni Lotu, se e dua na kenadau. Oqo e imatai ni kalawa ni nuinui.

iKatolu, E Rawa ni da Yalodina ka Marautaka na Noda Sokalou¹³

Ni yaco na gauna dredre, au dau saga meu nanuma meu digitaka na muri Karisito ni bera noqu lako mai vuravura kei na veibolei ni noqu vakabauta, noqu bula vakayago, kei na noqu vosota tiko e tiki kece ni vu ni noqu tiko eke. Me kua saraga niu nanuma ni na veibolei ena gauna oqo e lomatarotarotaka na loloma ni Kalou vei au se meu vakatara meu sega ni vakabauti Koya. Na ibolebole e sega ni kena ibalebale ni sa karusa na yavu; era tiki tiko ni yavu ka dodonu meu vakasaqara na veivuke mai vua na Kalou. Au na vakataki Koya vakalevu cake niu vosota vakadede ka niutaki, me vakataki Koya, ena gauna ni mosi, au dau masu ena noqu igu kece.¹⁴

O Jisu Karisito e ivakaraitaki vinaka duadua ni loloma nei Tamada ena Yalona taucoko—ka vakayacora na Nona inakinaki, se mani vakacava na kena isau.¹⁵ Au via muria na Nona ivakaraitaki ena noqu na vakayacora na veika vata oya.

Au vakauqeti ena yalona taucoko, bula-taucoko vaka tisaipeli ni yada dravudravua a sa biuta kina e rua na ilavo lailai sara ena ikato ni lavo. Ka sa biuta na nona ka kece ga.¹⁶

Raica o Jisu Karisito na sautu e tiko ena nona bula taucoko ia era na raica tale eso na nona dravudravua. Oqori e yaco talega vei keda. E sega ni raica o Koya na veika e sega vei keda ni da lusi ia e i madigi meda vakayagataka na vakabauta ka tubu.

iTinitini

Kemuni noqu itokani tisaipeli i Jisu Karisito, ena yaloqu taucoko, au digitaka meu tucake kei na Turaga. Au digitaka meu tucake kei ira na Nona italai digitaki—Peresitedi Russell M. Nelson kei na nona iApositolo—era vosa ena Vukuna ka era liutaka na cakacaka vakalotu kei na veiyalayalati koya e semati keda vua na iVakabula.

Niu dau tacaqe, au na dau sasaga cake tale, vakanuinui ena loloma cecere kei na kaukauwa ni veivakameautaki i Jisu Karisito. Au na tudei ena noqu veiyalayalati kei Koya ka cakacakataka na noqu vakatataro ena noqu vulica na vosa ni Kalou, ena vakabauta kei na veivuke mai vua na Yalo Tabu, na nona veidusimaki au vakararavi kina. Au na vakasaqara na Nona Yalotabu e veisiga ena noqu cakava na veika lalai ka rawarawa.

Oqo na noqu sala vaka tisaipeli.

Me yacova na siga me vakabulai kina na mavoa ni bula oqo, au na waraka na Turaga ka vakararavi vei Koya—Nona gauna, Nona vuku, kei na Nona yavu.¹⁷

Au via tucake kei Koya ka veitauriliga kei kemuni me tawamudu. Yaloqu taucoko. Au kila ni kevaka eda lomani Jisu Karisito ena yaloda taucoko, e sauma lesu ena Nona solia na veika kece vei keda¹⁸ Ena yacai Jisu Karisito, emeni.