Mo Vakataucokotaki mai Vua

Na Tamada Vakalomalagi kei na noda iVakabula, o Jisu Karisito, e tu vei rau na kaukauwa me vakabulai keda ka veisautaki keda. E rawa ni rau vukei keda meda yaco me vakataki Rau.

Ena vica na yabaki sa oti, e dua vei iratou na makubui keirau, o Eroni, e a tekivu me sotava eso na leqa ni bula. E dau yaco vua na wawale, dau drakusi na yagona, ka sega ni rairai bulabula. Ni oti nona dikevi vakavuniwai, e a kilai ni tauvimate tiko na nona dra, oqo na mate ka sa sega ni rawa kina ki na uto ni nona sui me solia mai na dra bulabula kei na wainimate me dau cevata kina na dra. Kevaka e sega ni qaravi se kunei e dua na kena iwali, na nona dra ena sega ni rawa ni cevata vakavinaka se valuta na mate veitauvi, na lutu, mavoa se tauvimate mada ga ena vakavu leqa sara ki na nona bula.

Ena dua na gauna, e a soli tiko vua na dra kei na wainimate ni cevata ni dra me bula tiko kina. Era vakamacalataka na vuniwai ni iwali duadua ga ni mate oya sai koya me vakaisosomitaki na wai ni uto ni nona sui, kei na madigi vinaka duadua me rawati kina sai koya me dua na tacina me na soli dra vua. Kevaka ena dua vei iratou na tacina ena isa donu, na macala ni soli dra ena rawa ni veivakabulai. Eratou a vakadikevi na tacina gone e va, ka dua, o Maxwell e a isa donu.

Ke isa donu mada ga o koya ka soli dra, na vakaisosomitaki ni wai ni uto ni sui edau rawa ni yaco kina eso tale na dredre. Na cakacaka oqo ena gadrevi kina me vakarusai na dra nei Eroni ena loma ni nona sui ka tauvimate tiko ena kemocerapi kei na katakata ni bera ni ciqomi na wai mai na uto ni sui nei tacina o Maxwell. Ia ena vuku ni sa mai vakamalumalumutaki tu na sotia ni yagoi Eroni, e gadrevi me na vakatikitikitaki e valenibula me vica na macawa vakakina e vale me vica na vula ka na tiko na ivakarau me muri, vakatatabu, kei na wainimate me gunuvi.

Na ka e nuitaki me na yaco mai na soli dra oya sai koya me na kakua ni biliga tani na yagoi Eroni na dra mai vei Maxwell me na laki buli kina vakamalua ena yago i Eroni na dra bulabula ka gadreva tiko. Na soli ni dra ka na lako vinaka ena vakavuna eso na veiveisau dina ki na ituvaki ni yago. E kurabuitaki, ni vakamacalataka edua na vuniwai ni kevaka e basu lawa o Eroni ka kunei na nona dra ena vanua a caka kina, ena rawa vei iratou na ovisa me vesuki tacina o Maxwell. Oqo e baleta ni dra nei Eroni a tauri mai na dra a solia o Maxwell ka tiko kina na nona DNA, ka na vaka tu oqo ena vo taucoko ni nona bula.

Na nona vakabulai o Eroni ena dra nei tacina sa vakavurea e vuqa na vakanananu baleta na dra ni veisorovaki i Jisu Karisito kei na vakayaco ka ni nona Veisorovaki vei keda. Au gadreva meu vakanamata nikua ki na veisau tudei ka kauta mai na bula ka yaco ni da vakatara na Turaga me caka mana ena noda bula.¹

A sega ni tu vei Eroni na kaukauwa me valuta kina na mate. Na yagona a sega ni rawa ni bulia na dra bulabula e gadreva me bula tiko kina. Se mani vakacava na ka a cakava o koya, a sega ni rawa ni vakabula na uto ni nona sui. Me vaka ni sega ni rawa ni vakabulai koya vakai koya o Eroni, e vaka talega kina vei keda. Se mani vakacava na noda rawa ka, vuli, vuku, se kaukauwa, eda sega ni rawa ni vakasavasavataki keda mai na noda ivalavala ca, veisautaka na yagoda me tawamate rawa, se vakacerecerei keda. E rawa duadua ga vua na iVakabula o Jisu Karisito kei na Nona Veisorovaki tawayalani. “Ia sa sega sara edua tale na sala se na yaca sa soli e rukui lomalagi me ra vakabulai kina na tamata ki na matanitu ni Kalou.”² Na Nona dra ga ni veisorovaki ena savai keda ka vakasavasavataki keda.³

Dina ga ni sega ni rawa ni vakabulai koya o Eroni, me rawa ni cakacaka na veisele vakavuniwai, ea gadrevi vua me lomasoli me cakava na ka eratou kerea na vuniwai, na veika dredre, veibolei me na mana kina na soli ni dra. Dina ga ni da sega ni rawa ni vakabulai keda, ia ni da soli keda ki na lewa ni Turaga ka maroroya na noda veiyalayalati, ena tadola na sala ki na noda vakabulai.⁴ Me vaka na cakacaka veivakurabuitaki ni veisautaki na DNA ni dra nei Eroni, sa rawa talega me veisau na lomada,⁵ ka ucui Koya ena keda irairai,⁶ ka yaco meda tamata vou vei Karisito.⁷

O Alama a vakananumi ira na tamata mai Saraemala ena itabatamata mai liu ka ra saumaki. Ni vosa baleti tamana, a vakamacalataka o Alama “me vaka na nona vakabauta sa yaco kina edua na veisau levu e lomana.”⁸ A qai taroga o koya, “Ko ni sa vakila li na veisau levu oqo e lomamuni?”⁹ E sega ni o ira na tamata era a veisautaka na lomadra vakai ira. Na Turaga a vakayacora na veisau oya. A vakamatatataka sara ga o Alama na tikina oqo. E a tukuna, “Raica sa veisautaka sara o koya na lomadra.”¹⁰ Era sa “vakayalomalumalumutaki ira ka vakararavi vua na Kalou dina ka bula … [ka] yalodina tikoga me yacova na ivakataotioti … [ka] ra sa vakabulai kina.”¹¹ Era a lomasoli na tamata mera dolava na lomadra ka cakacakataka na vakabauta, ka qai veisautaka na lomadra na Turaga. Ka dua dina na veisau levu a yaco! Vakananuma mada na duidui ena nodrau bula na turaga e rua oqo ka vakatokai o Alama ni bera kei na oti na veisautaki ni lomadrau.¹²

Eda luve ni Kalou ka tiko noda icavacava lagilagi. E rawa ni da veisautaki me yaco me vakataki Koya ka rawata “na marau sa vuabale.”¹³ O Setani, ena yasana kadua, e vinakata me da rarawa me vakataki koya.¹⁴ E tiko vei keda na kaukauwa me da digitaka se o cei me da muria.¹⁵ Ni da muri Setani, eda solia vei koya na kaukauwa.¹⁶ Ni da muria na Kalou, o Koya e solia vei keda na kaukauwa.

Na iVakabula e vakavulica ni “dodonu me da vinaka sara.”¹⁷ E rawa ni dau veivakayalolailaitaki na veika oqo. Au rawa ni raica na veika au malumalumu kina ka vakamosiyalo niu kila tu na veiyawaki ni vanua au tu kina mai na ituvaki uasivi. E dau yacovi keda beka na vakanananu me da vakataucokotaki keda, ia oqori e sega ni rawa. Na vakamuri ni veivakatutu kece ena veivola kece ni vukei koya vakai koya e vuravura ena sega ni vakayacora rawa. E duabulu ga na sala ka dua ga na yaca ena kauta mai na vakataucokotaki. Eda sa yaco “me uasivi sara ena vukui Jisu na dauveivakaduavatataki ni veiyalayalati vou, ko koya sa vakayacora na veisorovaki e uasivi sara ena liviraki ni nona dra.”¹⁸ Noda vakataucokotaki sa rawa duadua ga ena loloma soliwale ni Kalou.

E rawa beka ni o vakasamataka na kena dredre vua na makubui keirau gone o Adriu me kila ka cakava vakai koya na veika vakavuniwai ka salavata kei na mate ka tiko vua? E sega ni dodonu meda nanuma ni na rawa nida cakava na veika e rawa duadua ga vua na iVakabula me cakava ena iwalewale ni noda vakataucokotaki.

Ni mai vakacavara o Moronai na nona ivola, a vakavulica: “Ia dou lako mai vei Karisito, ka mo dou vakataucokotaki vua, … ka kevaka dou sa vakuwai kemudou mai na veika kecega sa sega ni vakalou, ka lomana na Kalou ena nomudou igu, vakasama, kei na nomudou kaukauwa kecega, sa na qai rauti kemudou nona loloma soli wale, ia na nona loloma soli wale dou sa vakataucokotaki kina ena vukui Karisito.”¹⁹ Sa dua na dina veivakacegui ka mana! Na nona loloma soliwale sa rauti au. Na nona loloma soliwale sa rauti iko. Na Nona loloma soliwale sa rauti ira kecega era “sa oca ka colata na icolacola bibi.”²⁰

Ena veiqaravi vakavuniwai me vaka a caka vei Eroni, e dau sega ni vakadeitaki na kena macala. O Eroni a gadreva edua tale na soli ni dra ni a yaco na leqa ena kena imatai. Ena vakavinavinaka, ni sa veisau na lomada vakayalo, keitou a sega ni lomaleqa kina. Ni da bula me vaka na Nona lewa, “ka vakararavi ki na nona vinaka o koya sa kaukauwa sara me veivakabulai,”²¹ sa vakadeitaki noda savai ena dra ni iVakabula ka qai vakataucokotaki Vua ena 100 na pasede. O Koya e “Kalou dina, ka [ena] sega ni rawa ni lasu.”²²

E matata ni iwalewale ni veisau oqo ena taura na gauna ka na sega ni vakaotivi me yacova ni oti na bula oqo, ia na yalayala e dei tu. Ni vaka me yawa na vakayacori ni yalayala ni Kalou, eda nuitaka tikoga na veiyalayala oqori, ni da kila ni ra na vakayacori dina.²³

Na veisau veivakurabuitaki ena bula nei Eroni sa kauta mai na reki levu ki na neitou matavuvale. Vakasamataka na reki levu mai lomalagi ni yaco na veisau levu ena noda bula.

Na Tamada Vakalomalagi kei na noda iVakabula, o Jisu Karisito, e rau lomani keda ka tuvakarau ena loloma me veisautaki keda ka vakataucokotaki keda. E Rau vinakata me cakava oqo. E uto ni Nodrau cakacaka kei na lagilagi.²⁴ Au vakadinadinataka ni tu vei Rau na kaukauwa me cakava oqo ni da lako mai vei Rau ena vakabauta. Ena yacai Jisu Karisito, emeni.