’Ua fa’a’ore-mau-hia ānei tā’u mau hara ?

E rave rahi matahiti i ma’iri a’enei, ’ua haere atu māua te tuahine Nattress e fa’aea i Idaho, i reira ’ua patu māua i te hō’ē taiete ’āpī. E mau mahana ’e e mau pō roa mau i te ’ohipa i taua taime ra. ’Aua’e rā, e ’ere tō māua vāhi fa’aeara’a i te mea ātea roa i te vāhi ’ohipara’a. I te hepetoma ato’a, e haere mai Shawna ’e tā māua nā tamāhine e toru—tei raro mai tō rātou matahiti i te ono—i te piha tōro’a i reira mātou e tāmā’a ai i te avatea.

I te hō’ē o taua mau mahana ra, i muri a’e i tā mātou tāmā’ara’a ’utuāfare, ’ua ’ite a’era vau ’ua vaiiho mai tā māua tamāhine e pae matahiti te pa’ari, ’o Michelle, i te hō’ē parau poro’i, tei pāpa’ihia i ni’a i te hō’ē ’api parau iti ’e ’ua tāpirihia i ni’a i tā’u niuniu nō te piha tōro’a.

Tē nā ’ō ra te reira, « Pāpā, ’ia ha’amana’o ’oe i te here iā’u. Ma te here, Michelle ». ’Ua riro te reira ’ei fa’aha’amana’ora’a pūai nō te hō’ē metua tāne ’āpī i te mau mea faufa’a roa a’e.

Te mau taea’e ’e te mau tuahine, tē fa’a’ite pāpū nei au ē, tē ha’amana’o tāmau noa nei te Metua i te ao ra ia tātou ’e tē here maita’i mau nei ’oia ia tātou. Teie tā’u uira’a : Tē ha’amana’o ra ānei tātou iāna ? ’E ’ua here ānei tātou iāna ?

E rave rahi matahiti i ma’iri aʼenei, e ta’ata fa’atere au nō te ’Ēkālesia i te fenua iho. Hō’ē o tā mātou feiā ’āpī tamāroa, ’o Danny, e mea fa’ahiahia roa ’oia i roto i te mau mea ato’a. E ta’ata ha’apa’o roa ’oia, te marū ’e te maita’i ’e e ta’ata māfatu maita’i. Terā rā, i te roa’ara’a tāna parau tū’ite nō te ha’api’ira’a tuarua, ’ua ha’amata ’oia i te ’āmuimui i te hō’ē naho’a ta’ata fifi. ’Ua tomo atu ’oia i roto i te rā’au taero, te methamphetamine iho ā rā, ’e ’ua rave atu i te ’ē’a pahe’e ’o te hia’ai māha ’ore ’e ’o te ha’amoura’a. ’Aita i maoro, ’ua taui roa tōna hōho’a ta’ata. Mea fifi roa ’ia ’ite maita’i atu iāna. Te tauira’a pāpū maita’i tei roto ïa i tōna nā mata—’ua muhimuhi roa te māramarama o tōna nā mata. E rave rahi taime tō’u torora’a i te rima iāna, ’aita rā i faufa’ahia. ʼAita ʼoia i ’ana’anatae.

E mea fifi roa ’ia hi’o i teie taure’are’a fa’ahiahia mau ’ia māuiui ’e ’ia ora i te hō’ē orara’a e ’ere i tōna ! E mea ’aravihi mau ’oia nō te mau mea rahi atu ā.

’E i te hō’ē mahana, ’ua ha’amata tānā temeio.

’Ua haere mai ’oia i te hō’ē purera’a ’ōro’a i reira tōna taea’e teina i te fa’a’itera’a i tōna ’itera’a pāpū, hou ’oia ’a reva atu ai i te misiōni. I roto i taua purera’a ra, ’ua putapū Danny i te hō’ē mea ’o tāna i ’ore nā i fāri’i e mea maoro i teie nei. ’Ua ’ite ’oia i te here o te Fatu. I te hope’a, ’ua roa’a iāna te tīa’ira’a.

Noa atu tē vai ra tōna hina’aro ’ia taui, e mea fifi roa te reira nō Danny. Tōna mau hia’ai māha ’ore ’e te mana’o fa’ahapa e nā muri noa ra iāna, e au ra ’ua hau atu i tei ’ore e ti’a iāna ’ia fa’a’oroma’i.

I te hō’ē avatea ta’a ’ē, ’a tāpū noa ai au i te aihere, ’ua tāpe’a Danny i tōna pere’o’o ma te mana’o-’ore-hia. Tē aro nei ’oia ma te pūai. ’Ua tūpohe au i te mātini tāpū aihere, ’e ’ua pārahi ’āmui māua i te vāhi marumaru i mua te taupe’e. I reira tōna fa’a’itera’a mai i te mau mana’o o tōna ’ā’au. ’Ua hina’aro mau ’oia e ho’i mai. Terā rā, te fa’aru’era’a i tōna mau hia’ai māha ’ore ’e tōna huru orara’a e mea fifi roa ïa. Hau atu i te reira, ’ua fa’ahapa ’ino roa ’oia iāna iho, te ha’amā rahi i te topara’a mai teie te huru. ’Ua ui mai ’oia, « E fa’a’ore-mau-hia ānei tā’u mau hara ? Tē vai mau ra ānei te hō’ē rāve’a nō te ho’i mai ? »

I muri a’e i te nini’ira’a i tōna ’ā’au ’e teie mau ha’ape’ape’ara’a, ’ua tai’o ’āmui māua te Alama pene 36 :

« ’Oia ïa, ’ua ha’amana’o ihora vau i tā’u ato’a ra mau hara ’e mau ’ohipa ’ī’ino…

« ’Oia ïa, ’e iā’u ho’i i mana’o ai nō te haere atu i mua i te aro o tō’u ra Atua, ’ua ha’amāuiui-rahi-hia tō’u vārua i te ri’ari’a fāito ’ore » (’īrava 13–14).

I muri a’e i teie mau ’īrava, nā ’ō a’era Danny, « terā mau te mana’o i roto iā’u ! »

’Ua tai’o fa’ahou māua :

« ’E ’ua ahoaho roa vau i te ha’amana’ora’a i tā’u ra mau hara e rave rahi, inaha, ’ua ha’amana’o vau i te fa’aro’ora’a i tō’u metua tāne i te tohura’a atu i te mau ta’ata nō ni’a i te taera’a mai o te hō’ē ta’ata, ’o Iesu Mesia, te Tamaiti a te Atua, ’ei tāra’ehara nō tō te ao nei…

« ’Auē ho’i te ’oa’oa ’e te māramarama fa’ahiahia tā’u i ’ite » (’īrava 17, 20).

’A tai’o ai māua i teie mau ’īrava, ’ua ha’amata te roimata i te tahe. Te ’oa’oa o Alama ’o te ’oa’oa ïa tāna e ’imi noa ra !

’Ua ’āparau māua nō ni’a i te ’ino rahi mau o Alama. Terā rā, i te taime ’a tātarahapa ai ’oia, ’aita ’oia i hi’o fa’ahou i muri. ’Ua riro mai ’oia ’ei pipi ha’apa’o maita’i nā Iesu Mesia. ’Ua riro mai ’oia ’ei peropheta. ’Ua ’ara’ara te mata o Danny. « Hō’ē peropheta ? » ’ua parau ’oia.

Pāhono noa atu ra vau, « ’Ē, hō’ē peropheta. ’Aore e fa’ahepora’a i ni’a ia ’oe ! »

’Ua ’āparau māua ē, noa atu ’aita tāna mau hara i tae i te fāito mai tā Alama, nō te mau ta’ata ato’a te parau fafau nō te fa’a’orera’a hara tā’āto’a ’e te maita’i roa—i roto ’e nā roto i te tāra’ehara mure ’ore a Iesu Mesia.

’Ua māramarama Danny i teienei. ’Ua ’ite ’oia i te mea e ti’a iāna ’ia rave : E ti’a iāna ’ia ha’amata i tōna tere nā roto i te ti’aturira’a i te Fatu ’e te fa’a’orera’a iāna iho !

E ’ere te tauira’a rahi o te ’ā’au ’o Danny i te hō’ē ’ohipa iti e temeio ra. I te roara’a o te tau, ’ua taui tōna hōho’a ta’ata ’e ’ua ho’i-fa’ahou-mai te ’ana’ana o tōna mata. ’Ua ti’a-mā mai ’oia nō te hiero ! I te hope’a ’ua ho’i fa’ahou mai ’oia !

E rave rahi ’āva’e i muri mai, ’ua ani au ia Danny e hina’aro ānei ’oia e fa’atae i te hō’ē anira’a nō te rave i te hō’ē misiōni rave tāmau. ’Ua riro tāna pāhonora’a ’ei mea māere ’e te fa’ahiahia.

Nā ’ō mai ra ’oia, « ’ua hina’aro vau e tāvini i te hō’ē misiōni, terā rā ’ua ’ite ’oe nō hea mai au ’e te mau ’ohipa tā’u i rave ! ’Ua mana’o vau ē, ’ua hurihia vau i rāpae ».

Pāhono atu ra vau, « ’ua tano paha ’oe. Terā rā, ’aita e mea e ’ōpani ra ’ia fa’atae i te hō’ē anira’a. Mai te mea e hape ’oe, ’ua ’ite ïa ’oe ē, ’ua fa’a’ite ’oe i te hina’aro mau ’ia tāvini i te Fatu ». ’Ua ’ana’ana a’era tōna nā mata. ’Ua ’oa’oa roa ’oia i taua mana’o ra. Nōna, e fa’anahora’a roa roa ïa, e fana’ora’a rā te reira ’o tāna i ineine i te rave.

Tau hepetoma i muri mai ’e i tōna māere rahi, ’ua tupu mai te tahi atu temeio. ’Ua fāri’i Danny i te hō’ē pi’ira’a nō te rave i te hō’ē misiōni rave tamau.

Tau ’āva’e i muri a’e i te taera’a Danny i roto i te ’āua misiōni, ’ua fāri’i au i te hō’ē niuniu. ’Ua parau noa mai tōna peresideni, « E aha te ’ohipa i tupu i teie taure’are’a ? ’O te misiōnare fa’ahiahia roa a’e tā’u i ’ore i ’ite a’enei ! » ’Ia ’ite mai ’outou, ’ua fāri’i teie peresideni i te hō’ē Alama tamaiti nō teie tau ’āpī.

Piti matahiti i muri mai, ’ua ho’i mai Danny i te fare ma te hanahana, i muri a’e i te tāvinira’a i te Fatu ma tōna ’ā’au ato’a, tōna mana, tōna vārua ’e tōna pūai.

I muri a’e i tāna parau fa’a’ite misiōnare i roto i te purera’a ’ōro’a, ’ua ho’i au i te fare, nō te fa’aro’o noa i te pātoto i ni’a i te ’ōpani. ’O Danny e ti’a nei ma te roimata tahe. Nā ’ō mai ra ’oia : « Nehenehe ānei tāua e paraparau hō’ē minuti ? » ’Ua haere atu māua i rāpae i mua i taua ā taupe’e ra.

Nā ’ō mai ra ’oia : « Peresideni, ’ia mana’o ’oe, ’ua fa’a’ore-mau-hia ānei tā’u mau hara ?

I teienei ’ua ’āpe’e ato’a tō’u papemata i tōna. I mua iā’u tē ti’a ra te hō’ē pipi ha’apa’o maita’i nā Iesu Mesia tei hōro’a i te mau mea ato’a nō te ha’api’i ’e nō te fa’a’ite pāpū nō te Fa’aora. ’Ua riro ’oia ’ei fa’ahōho’ara’a nō te mana nō te fa’aorara’a ’e te ha’apūaira’a o te tāra’ehara a te Fa’aora.

Nā ’ō atu ra vau, « Danny ! ’Ua hi’o ānei ’oe i roto i te hi’o ? ’Ua hi’o ānei ’oe i tō ’oe mata ? ’Ua ’ī te reira i te māramarama ’e tē ’ana’ana nei te Vārua o te Fatu i roto ia ’oe. ’Oia mau roa, ’ua fa’a’orehia tā ’oe mau hara ! E mea fa’ahiahia mau ’oe ! I teienei, te ’ohipa tā ’oe e rave ’o te haerera’a ïa i mua ’e tō ’oe orara’a. ’Eiaha e hi’o i muri ! ’A tīa’i ma te fa’aro’o i te ’ōro’a i muri nei.

Tē tāmau noa nei te temeio o Danny i teie mahana. ’Ua fa’aipoipohia ’oia i roto i te hiero ’e ’ua ho’i fa’ahou i te ha’api’ira’a, ’e ’ua roa’a tāna parau tu’ite tuatoru tuha’a toru [maitrise]. Tē tāvini tāmau nei ’oia i te Fatu ma te hanahana ’e te ti’a-mā i roto i tōna mau pi’ira’a. Hau atu ā te faufa’a, ’ua riro mai ’oia ’ei tāne fa’aipoipo fa’ahiahia ’e hō’ē metua tāne ha’apa’o maita’i. E pipi ha’apa’o maita’i ’oia nā Iesu Mesia.

’Ua ha’api’i te peresideni Russell M. Nelson, « ’ia ’ore te tāra’ehara mure ’ore a [te Fa’aora], e hope pā’āto’a ïa te ta’ata i te pohe ».¹ ’Aita Danny i mo’e i te Fatu, ’aita ato’a tātou. Tē ti’a nei ’oia i te ’ūputa nō te fa’ateitei ia tātou, nō te ha’apūai ia tātou ’e nō te fa’a’ore i tā tātou mau hara. E ha’amana’o noa ’oia i te here ia tātou !

Hō’ē fa’a’itera’a fa’ahiahia nō te here o te Fa’aora nō te mau tamari’i a te Atua, ’ua pāpa’ihia i roto i te Buka a Moromona : « ’E i muri a’era, ’ia oti a’era tā Iesu paraura’a atu, ’ua hi’o fa’ahou a’era tōna mata i te mau ta’ata, ’e inaha, tē tahe ra tō rātou roimata, ’e tē hi’o māite mai ra rātou iāna mai te mea ra ē, ’ua hina’aro rātou ’ia ani mai iāna ’ia pārahi ri’i mai ā i pīha’i iho ia rātou » (3 Nephi 17:5).

Hō’ē mahana tā’āto’a tō te Fa’aora tāvinira’a i te ta’ata. Terā rā, e ’ohipa hau atu ā tāna e rave—tītauhia iāna ’ia haere e fārerei i te tahi atu mau mamoe tāna ; tītauhia iāna ’ia haere i tōna ra Metua.

Noa atu teie mau tītaura’a, ’ite a’era ’oia ē, tē hina’aro ra te ta’ata ’ia fa’aea ri’i mai ā ’oia. I muri iho, ma te ’ā’au o te Fa’aora tei ’ī i te aroha, ’ua tupu a’era te hō’ē o te mau temeio rahi a’e i roto i te ’ā’amu o te ao nei :

’Ua fa’aea mai ’oia.

’Ua ha’amaita’i ’oia ia rātou.

’Ua aupuru tāta’ihō’ē ’oia i tā rātou mau tamari’i.

’Ua pure ’oia nō rātou ; ’ua ’oto ’oia ’e ’o rātou.

’E ’ua fa’aora ’oia ia rātou. (Hi’o 3 Nephi 17.)

E parau fafau mure ’ore tāna : E fa’aora ’oia ia tātou.

I te feiā tei ātea ’ē i te ’ē’a o te fafaura’a, ’ia ’ite mai ’outou tē vai noa ra te tīa’ira’a, tē vai noa ra te fa’aorara’a ’e tē vai noa te hō’ē ’ē’a nō te ho’i mai.

Tāna parau poro’i mure ’ore nō te tīa’ira’a, ’o te rā’au fa’aora ïa nō te feiā ato’a e ora nei i roto i te hō’ē ao ’ārepurepu. ’Ua parau te Fa’aora, « ’O vau te ’ē’a, te parau mau ’e te ora » (Ioane 14:6).

E te mau taea’e ’e te mau tuahine, e mata na tātou e ha’amana’o i te ’imi iāna, i te here iāna, ’e i te ha’amana’o iāna.

Tē fa’a’ite pāpū nei au ē, tē ora nei te Atua ’e tē here nei ’oia ia tātou. Tē fa’a’ite pāpū fa’ahou nei au ē, o Iesu Mesia te Fa’aora ’e te tāra’ehara o te ao nei. ’O ’Oia te rā’au fa’aora mana hope. ’Ua ’ite au ē, tē ora nei tō’u Tāra’ehara ! I te i’oa o Iesu Mesia, ’āmene.