Te hō’ē reo nō te ’oa’oa !

« I teienei, e aha tā tātou e fa’aro’o nei i roto i te ’evanelia tā tātou i fāri’i ? Te hō’ē reo nō te ’oa’oa ! Te hō’ē reo nō te aroha mai te ra’i mai ; ’e te hō’ē reo nō te parau mau nō roto mai i te fenua nei […] te hō’ē reo ’oa’oa nō te feiā e ora nei ’e nō tei pohe ho’i ; te mau parau ’āpī ’oa’oa nō te poupou rahi. »¹

Te mau taea’e ’e te mau tuahine, e’ita paha e nehenehe e fa’aro’o i teie mau parau a te peropheta Iosepha Semita ma te ’ore e tupu te mata ’ata’ata rahi !

Tē haru mau nei te fa’ahitira’a hiamate’oa a Iosepha i te ’īra’a ’e te hanahana ari’i o te ’oa’oa i roto i te fa’anahora’a rahi ’oa’oa a te Atua tō tātou Metua i te ao ra, ’ua parau pāpū mai ho’i ’oia : « Tē vai nei te mau ta’ata ’ia noa’a tō rātou ’oa’oa. »²

I tūō pā’āto’a tātou i tō tātou ’oa’oa³ i roto i te orara’a hou te tāhuti nei i te fa’aro’ora’a tātou i te fa’anahora’a nō te ’oa’oa a te Atua, ’e tē tāmau nei tātou i te tū’o i tō tātou ’oa’oa i’ō nei ’a ora ai tātou mai te au i tāna fa’anahora’a. E aha mau rā te vaira’a nō teie fa’a’itera’a ’oa’oa a te peropheta ? E aha te mea i pātiatia i teie mau mana’o hōhonu o te ’ā’au ?

Nō ha’api’i noa nei te peropheta Iosepha nō ni’a i te bāpetizora’a nō te feiā pohe. E heheura’a hanahana mau ho’i tei fāri’ihia ma te ’oa’oa rahi. I te fa’aro’o-mātāmua-ra’a te mau melo o te ’Ēkālesia ē, e ti’a ia rātou ’ia bāpetizohia nō tō rātou feiā here tei pohe, ’ua ’oa’oa rātou. ’Ua parau ’o Wilford Woodruff : « Te taime vau ’a fa’aro’o ai i te reira, mahuta tō’u vairua [ma] te ’oa’oa. »⁴

E ’ere te bāpetizora’a nō tō tātou feiā here tei pohe te parau mau hō’ē noa tā te Fatu e heheu ’e e fa’aho’i mai. E ’āna’ira’a hope ’ore nō te tahi atu mau hōro’a ’e mau faufa’a fa’ata’ahia, tā te Atua i hia’ai i te hōro’a i ni’a i tāna mau tamaiti ’e mau tamāhine.

Te reira mau hōro’a ’ē atu, ’o te ha’amanara’a, te mau fafaura’a ’e te mau ’ōro’a o te autahu’ara’a ïa, te mau fa’aipoipora’a e vai a muri noa atu, te tā’atira’a o te mau tamari’i i tō rātou nā metua i roto i te ’utuāfare o te Atua, ’e i te hope’a, te ha’amaita’ira’a nō te ho’i i te fare i mua i te aro o te Atua tō tātou Metua i te ao ra ’e tāna Tamaiti, ia Iesu Mesia. ’Ua matara teie mau ha’amaita’ira’a ato’a nā roto i te tāra’ehara a Iesu Mesia.

I te mea ē, ’ua hi’o te Atua i te reira ’ei ha’amaita’ira’a teitei roa a’e ’e te mo’a roa a’e,⁵ i fa’aue ’oia ’ia patuhia te mau fare mo’a i reira ’oia e hōro’a ai i teie mau hōro’a faufa’a rahi i ni’a i tāna mau tamari’i.⁶ E riro te reira mau fare ’ei fare nōna i ni’a i te fenua nei. E riro te reira mau fare ’ei hiero i reira te mea e tā’atihia ’aore rā e tā’amuhia i ni’a i te fenua nei nā roto i tōna i’oa, tāna parau, ’e nā roto i tāna ha’amanara’a, e tā’amuhia i ni’a i te ra’i.⁷

Tātou te mau melo o te ’Ēkālesia i teie mahana, e mea ’ōhie paha nō vetahi o tātou ’ia tāu’a ’ore i teie mau parau mau mure ’ore hanahana. Mai te huru ō tō tātou nātura ta’ata ato’a te reira. I te tahi taime e mea maita’i ’ia hi’o i te reira nā roto i te mata o rātou tei ’apo mātāmua roa i te reira. ’Ua ’apo vau i te reira nā roto i te hō’ē ’ohipa tei tupu a’enei.

I te matahiti i ma’iri, nā mua noa atu i te ha’amo’a-fa’ahou-ra’a o te hiero nō Tokyo (Tāpōnē), e rave rahi manihini e ’ere nō tō tātou fa’aro’o tei haere mai e māta’ita’i i te hiero. I roto i te hō’ē pupu, e ti’a fa’atere mana’o maita’i nō te tahi atu fa’aro’o. ’Ua ha’api’i mātou i tō tātou manihini nō ni’a i te fa’anahora’a ’oa’oa a te Metua i te ao ra, nō ni’a i te ti’ara’a o Iesu Mesia i roto i terā fa’anahora’a, ’e nō ni’a i te ha’api’ira’a tumu ē e ti’a i te mau ’utuāfare ’ia tāhō’ēhia ē a muri noa atu nā roto i te ’ōro’a nō te tā’atira’a.

I te hope’a o te māta’ita’ira’a, ’ua ani au i tō tātou hoa ’ia fa’a’ite mai i tōna mana’o. Nō ni’a i te tāhō’ēra’a i te mau ’utuāfare—tei ma’iri, nō teie nei ’e nō ananahi—’ua ui teie ta’ata maita’i ma te mana’o ateate : « ’Ua ta’a mau ānei te mau melo o tō ’outou fa’aro’o i te hōhonu o teie ha’api’ira’a tumu ? » Parau fa’ahou mai nei : « ’O teie noa paha te hō’ē ha’api’ira’a ’o tē nehenehe e tāhō’ē i teie nei ao tei ’āmahamaha roa. »

’Auē ïa mana’o pūai rahi. ’Aita teie ta’ata i putapū noa i te ’aravihi o te mau mea i roto i te hiero, i te ha’api’ira’a tumu fa’ahiahia ato’a ’e te hōhonu ē e tāhō’ēhia te mau ’utuāfare ’e e tā’atihia a muri noa atu i te metua i te ao ra ’e ia Iesu Mesia.⁸

’Eiaha ïa tātou e māere ē, ’ia ’ite mai te ta’ata e ’ere nō tō tātou fa’aro’o i te hanahana ari’i o te mau mea e tupu ra i roto i te hiero. Te mea tei riro ’ei ’ohipa mai terā noa ’e te mātau nō tātou, i te tahi taime e ’itehia tō te reira nehenehe hau a’e ’e te hanahana ari’i e rātou e fa’aro’o i te reira ’e e putapū i te reira nō te taime mātāmua roa.

Noa atu ē e mau hiero i te mātāmua ra, nā roto i te Fa’aho’ira’a i te ’evanelia a Iesu Mesia, e ’ohipa mātāmua roa ’ino te patura’a i te mau hiero, nō te mau peropheta ato’a, mai te peropheta Iosepha Semita ē i teienei. E mea ’ōhie ho’i ’ia māramarama nō te aha.

I tō te peropheta Iosepha ha’api’ira’a i te ta’ata nō ni’a i te bāpetizora’a nō te feiā pohe, ’ua heheu ato’a ’oia i te tahi atu parau mau rahi. ’Ua ha’api’i ’oia : « Tē ha’apāpū atu nei au ia ’outou ē, e mau ha’api’ira’a tumu teie nō ni’a i te feiā i pohe ’e te feiā ato’a e ora nei ’o tē ’ore roa e ti’a ’ia ha’apa’o-’ore-hia, nō ni’a i tō tātou fa’aorara’a. Nō te mea ē ’ua tītauhia tō rātou fa’aorara’a nō tō tātou ato’a fa’aorara’a […] e ’ore e noa’a te maita’i rahi roa ia rātou ’ia ’ore tātou nei, e ’ore ato’a tātou e maita’i roa ’ia ’ore tō tātou feiā i pohe ra. »⁹

Mai tā tātou e ’ite nei, e mea pāpū maita’i te tītaura’a nō te mau hiero ’e te ’ohipa e ravehia nei nō te feiā ora ’e te feiā pohe.

Tē vai ara nei te ’enemi. Tē ha’amata’uta’uhia nei tōna mana nā roto i te mau ’ōro’a ’e te mau fafaura’a e ravehia nei i roto i te mau hiero, ’e fa’aea ’ore ’oia i te tāmata i terā ’ohipa. Nō te aha ? ’Ua ’ite ho’i ’oia i te mana e matara mai mai roto mai i teie ’ohipa mo’a. ’A ha’amo’ahia ai te hiero ’āpī tāta’itahi, ’a parare ato’a ai te mana fa’aora o Iesu Mesia nā te ao ato’a nei, nō te pāto’i i te mau tauto’ora’a a te ’enemi, ’e nō te ’aufau nō tātou ’a haere ai tātou iāna ra. ’A rahi noa ai te mau hiero ’e te mau ta’ata ha’apa’o fafaura’a, ’a paruparu ato’a ei te ’enemi.

I te mau mahana mātāmua o te ’Ēkālesia, e ha’ape’ape’a vetahi ’ia fa’aarahia mai te hō’ē hiero ’āpī, e parau ho’i rātou ē : « ’Ia patu tātou i te hō’ē hiero, [e pātē te oe i hade]. » E parau itoito atu ïa ’o Brigham Young : « ’Ua hina’aro vau [’ia pātē] fa’ahou atu. »¹⁰

I roto i teie nei orara’a, e’ita roa atu tātou e ’ape i te tama’i, e nehenehe rā e noa’a te mana i ni’a atu i te ’enemi. Nō roto mai te reira mana ’e te pūai ia Iesu Mesia ra, ’ia rave ’e ’ia ha’apa’o tātou i te mau fafaura’a o te hiero.

’Ua ha’api’i te peresideni Russell M. Nelson : « Tē vai ra te taime i reira te feiā ’o tei ’ore i ha’apa’o i te Fatu e fa’ata’a-’ē-hia ai i te feiā i ha’apa’o. Tō tātou pārurura’a pāpū a’e, ’ia vai ti’a mā tāmau noa ïa ’ia fāri’ihia i roto i tōna fare mo’a. »¹¹

Teie te tahi atu ā mau ha’amaita’ira’a tā te Atua i parau fafau mai nā roto i tāna peropheta :

Hina’aro ānei ’outou i te semeio ? ’Ua nā ’ō tō tātou peropheta : « Tē parau fafau atu nei au ē, e fa’atae mai te Fatu i te mau semeio ’o tāna i ’ite e mea tītauhia nō ’outou, ’ia fa’atusia rā ’outou nō te tāvini ’e nō te ha’amori i roto i tōna mau hiero. »¹²

Hina’aro ānei ’outou i te mana fa’aora māuiui ’e te ha’apūai o te Fa’aora Iesu Mesia ? Tē parau pāpū mai nei te peresideni Nelson ē « Te mau mea ato’a e ha’api’ihia i roto i te hiero, nā roto i te arata’ira’a ’e nā roto i te Vārua, e fa’arahi te reira i tō tātou hāro’aro’ara’a ia Iesu Mesia […] ’A ha’apa’o ai tātou i tā tātou mau fafaura’a, e hōro’a mai ’oia ia tātou i tōna mana fa’aora ’e te pūai. ’E ’auē ïa ē, e hina’aro rahi mau tātou i tōna mana i te mau mahana i muri nei. »¹³

I te sābati mātāmua o te ’āma’a tāmara, i te tomora’a Iesu Mesia i roto ia Ierusalema ma te hanahana rahi, e ti’a’a rahi pipi nāna tei pi’i ma te ’oa’oa ’e tei « [ha’amaita’i] i te Atua […] nā ’ō a’era, ’Ia ora na te Ari’i i te haere’a mai ma te i’oa o te Fatu ra. »¹⁴

Tano maita’i ïa, i te sābati o te ’āma’a tāmara nō 1836, ’ua ha’amo’ahia te hiero nō Kirtland. I terā mahana, ’ua ’oa’oa ato’a te mau pipi a Iesu Mesia. I roto i terā pure ha’amo’ara’a, ’ua fa’ahiti te peropheta Iosepha Semita i teie mau parau ’ārue :

« E te Fatu te Atua Manahope, ’a fa’aro’o mai na […] ’e ’a pāhono mai ia mātou mai te ra’i mai […] te vāhi tā ’oe e pārahi ra i ni’a i te terōno, ma te hanahana, te tura, te mana, te hinuhinu [’e] te pūai […]

« […] ’A tauturu mai ia mātou nā roto i te mana o tō ’oe Vārua, ’ia ti’a ia mātou ’ia ’āmui i tō mātou reo i tō te mau seraphi māramarama ’e te ’ana’ana rahi e fa’a’ati ra i tō ’oe terōno, ma te mau parau nō te ’āruera’a, ’e te hīmenera’a Hosana i te Atua ’e te ’Ārenio !

« ’E ’ia pi’i pūai mai tō ’oe feiā mo’a nō te ’oa’oa rahi. »¹⁵

Te mau taea’e ’e te mau tuahine, i teie mahana, i te sābati o te ’āma’a tāmara, ’ārue ana’e ’ei pipi nā Iesu Mesia i tō tātou Atua mo’a, ’e ’oa’oa ana’e i tōna maita’i i ni’a ia tātou. « e aha tā tātou e fa’aro’o nei i roto i te ’evanelia tā tātou i fāri’i ? » ’Oia mau, « te hō’ē reo nō te ’oa’oa ! »¹⁶

Te fa’a’ite pāpū nei au ē e rahi noa atu ā ’outou i te ’ite i te ’oa’oa ’a tomo ai i roto i te mau hiero a te Fatu. Tē fa’a’ite pāpū nei au ē, e ’ite mai ïa ’outou i tōna ’oa’oa ia ’outou, i te i’oa o Iesu Mesia, ’āmene.