Mukuikui luhn sie E Wihklac

Tamuhlwel ac tahmtahel wiuck, oasr mwe lutlut na toasr se nga lotwelah ke nga tuh sramsram inse ke Ohtopa 2022 ah. Mwe lutlut sac pa: fin tiac wo sramsram lom uh, na kuh in tiac utuhkot nuh sum kom in wi sramsram ke toeni tohkoh an. Kom kuh in liye lah kuneyucki nga in sramsram ke toeni se met ke litutacng se inge. Ma se kom tiac kuh in liye uh pa, nga tu ke sruhnguhl nuh ke mwe sruhf wi lak se ma fihsracsr in ikacklah. Fin sramsram se inge tiac fahlah wo, ngac tiac liye kowos ke toeni ekahsr fahsruh uh.

Nguhnnguhn luhn on kahto soko sin choir kahto se inge, oruh nga inge lotwelah kuhtuh lesin ma, ke kahsruh luhn Leum, nga kena akacsruhi kac nuh suwos misenge. Pwacnwacng sramsram se inge e ma keik na yohk.

Ma se ma nga puhlakihn upackihn emet ke ma sikyak nuh sihk ingena pa misac luhn muhtwacn sacohklacna kiyuhk, Pat. El pa muhtwacn se ma wo emet nga etuh uh—sie muhtwacn kiac wowo ac ninac wowo, wacngihn ma oacna nwacsnwacsiyacl, kuhlwacng lal, ac el sesseslah ke nguhn. El tuh oruh sramsram se ke sie pacl ah ac sifac kac uh pa “Ahkfalyelah Sripen Oasr lom.” Ke liye luhk uh el ahkfalyelah ma kunacl ke oasr lal uh wo liki na ma oacna sie mwet kuh in finsrak nuh kac muh kuh in oraclah. El tuhlihk muhtwacn na pwacye nuhtin God, sie mwe srihkasrak luhn muhtwacn ke Kraist. Nga pa mukul se ma luhki emet in sislah yac 60 ke moul luhk uh in weluhl. Fin nga suwohs na, kalmacn sil se lasr ah pa nga kuh in weluhl ne tok ma pahtpaht.

Sie pac ma nga lotwelah ke ma sikyak nuh sihk muhtwacwacack ke ao 48 tukun puhkpuhki luhn muhtwacn kiyuhk ah. Ke pacl se ingacn, utucklac nga nuh lohm ono ah ac kauli nga ke sripen mas na upac se. Ke lusen wik ohnkohsr ke nga kauli ah, wik ahkosr emet ah nga muhta ke acn luhn mwet kweok ah ac nga oacyacpac mutullac tiac etweyuc pacl ekahsr.

Nga tiac esam ma nuhkwewa ma sikyak nuh sihk lun lohm ono sac ke puhluhn pacl se inge. Ma se nga tiac muhlkuhnlah ke fahsr luhk lihkihnihm in lohm ono ah, som nuh ke sie acn apkuhran nuh ke yen wacngihn sahflahiyac. Nga e koflah na in sruhmuhn kwewa ma sikyak nuh sihk ke acn se inge, tuhsruhk nga kuh na in fahk kuhtuh ip ke ma nga eis pa sap na kuh soko ahkkweyeyuc nga in silahklahk fohlohkoh nuh ke kuhlwacnsap luhk, in kihsackuhnlah yohk, in lohacng yohk nuh sin Mwet Lahngo, ac in luhlahlfongi yohk ke kahs Lal.

Acnan nga puhla muh nga eis fwackyuhk se luhk sifacna oacna ke tuh ituhkyang nuh sin mwet Sap Singucul luo ke yac 200 somlah ah.

Kom ac fah fahkwack ke inek … [ac] suhpwaclihk kahs luhk nuh fin facluh nohfohn. …

… Litutacng nuh ke litutacng; ac lwen nuh ke lwen lwelah puhsra in sensen lom in fahsr nuh met; ac ke fong tuhkuh lwelah tuh mwet fin facluh uh in tiacna mutul, ke srihpen sramsram lom. …

Tuyak[,]… Sruhkwack sahkseng lom,[ac] fahsr Tukuk.¹

Tahmtahel ac tamuhlwel sacohk wiyuck, tukun ma se sikyak inge, nga srihke kuhiyuck in sruhkwack sahksin luhk ke oaru, in lihksreni konwacack lah ngwac sokwack fuhkah in sruhkwack nuh lucng puhsren mwet sap kwewana in fucsrfucsr ac mwe sensen ke litutacng, ke lwen uh, ac ke fong uh.

Ma se ingacn kol nuh ke ma pwacye ahktolu ma tuhkuh ke mahlwem ekahsr ah ke [mwet luhk] misac, mas, ac kweok luhlahp. Ma se ingacn pa mwe ahkpwacye ma ahksasucyeyuck ac srui wacngihn sahflahiyac ke pruhe fokoko luhn Alu se inge—pruhe lowos—ma nga eis woiyac uh. Nga ac fah srui ma pahtpaht ke pruhe luhn tausin mwet suc, oacna katinmas yohk srihpac sac,² tiac tui in suk kahsruh lucng me nuh sihk. Nga tuh eis mwe insewowo luhn pristut ac liye klahs luhk ke High School lalo keik, oacpacna kuhtuh sin ward ke Alu uh. Ac sahp inek an ke pwepuh in pruhe ke tempuhl nuhkwewa luhn Alu uh.

Nga sruhi yohk ke ma inge kwewa, nga weluhl G. K. Chesterton, suc tuh fahk lah kuloh uh pa fuhlwact emet ke nuhnak uh; ac … sruhi pa engan ma double iyucki ke wolacna.³ Ke “engan luhk sifacna doouble iyucki ke wolacna,” nga kuloh nuh suwos kwewa ac kuloh nuh sin Pahpah Lucng, suc lohng pruhe lowos ac ahkinsewowoye moul luhk.

Tamuhlwel ac tahmtahel, nga fahkwack lah God El lohng nohfohn pruhe lasr ac topuk kais sie fahsr fal nuh ke innek ma El akiyac nuh ke suwohs lasr. Nga akihlen lah ke pacna pacl se ma puhkantwen mwet pruhe ngan kwelac, oasr luhpan mwet oacna luhpan mwet ma pruhe keik ah—wiyucyang pacna—pruhe kacn muhtwacn kiyuhk in kwelac. Nga fahkwack lah kwewana pruhe ingacn lohngyuhk ac topukyucklac sin Pahpah Lucng suc luhngse kuht, finne pruhe kacl Pat ah tiac topukyucklac oacna siyuck luhk. Ke srihpac etweyuck sin God muhkwena pa oruh pruhe uh toplac sienna liki na ma kuht finsraki uh—tuhsruhk pruhe inge lohngyuck, ac elos e topukyucklac fal nuh ke luhngse ac pacl Lal sifacna.

Fin kuht “siyuck ke pwacye,”⁴ wacngihn ma sruok nuh ke ngac, oyac, kuh meac kuht enenuh in pruhe kac. In oacna ma an in fwackyuhk uh, kuht enenuh in “pruhe pacl nuhkwewa.”⁵ Kuht in pruhe, Amulek el tuh fahk, “[kaclos] suc raunikowoslac,”⁶ ke luhlahlfongi se lah “pre lun sie mwet suwohs arulana kalem ku kac.”⁷ Pruhe lasr uh enenuh in oasr puhsrwac ke pacl kuht muhkwena pruhe uh.⁸ Fin tiac kuh in orek, na pruhe ingacn enenuh in fwacklac mihs ke insiyacsr.⁹ Kuht on tuh pruhe lasr in pa mukuikui luhn sie e wihklac,¹⁰ pruhe pacl nuhkwewa, oacna nuh sel Mwet Lahngo sifacna, nuh sin God Pahpah Ma Pahtpaht ke inen Wen Sacohk Nahtuhl,

Kawuck sacohk luhk, pruhe lasr uh pa ao in engan se emet lasr,¹² ke kena yohk lasr,¹³ ke ohiyac fihsrwacsr emet ac wo emet luhn alu.¹⁴ Kuht enenuh in sifacna pruhe, pruhe pac yurun sucu lasr, ac pruhe pac ke un mwet alu nuhkwewa.¹⁵ Kuht in orekmakihn pruhe uh in mwe kohsrkohsr se nuh ke mwe sruhf,¹⁶ ac fin oasr kuhtwena pacl kuht puhla in tiac pruhe, kuht kuh in etuh na pwacye lah tahfuh luo uh el tiac tuhkuh sin God me, suc kena tuh sramsram nuh sin tuhlihk Nahtuhl pacl nuhkwewa. Pwacyena lah, kuhtuh ma upac ma tulokihn kuht in tiac pruhe uh tuhkuh sin setuhn me.¹⁷ Ac, ke kuht tiac etuh lah fuhkah kuh meac kuht e pruhe kac uh, kuht enenuh in muhtwacwacack, ac tahfwelah na, ne ke na Nguhn Muhtahl kol kuht nuh ke pruhe se kuht enenuh in fahk uh.¹⁸ Sahp ohiyac se inge pa kuht enenuh in ngihsre ke kuht pruhe kacn mwet lokoalok lasr ac elos suc oruh koluk nuh sesr.¹⁹

Ke sahflahiyac uh, kuht kuh in ngwet nuh yurun Mwet Lahngo lasr ke srihkasrak Lal, suc pruhe ke inkaiyacn pacl uh. Tuhsruhktuh nga arulacna nuhnkuh yohk kac lah Jisus El tuh puhla muh enenuh Elan pruhe. Yac El tiac suwohs? Meac El enenuh in pruhe kac? Nga tuhfahna etwacack lah El pa pac, wi kuht, luhngse suk muhtahl [Pahpah], luhlahlfongi ke kahs Lal, luhlahlfongi luhngkuhlwacng Lal.²⁰ Pacl na puhs, El sulpac oruh in som liki un mwet in muhkwena met liki El wowoyak nuh inkuhsrao ke pruhe Lal.²¹ Ke kuhtuh pacl uh, El pruhe inmahsrlon mwet puh ma weluhl. Na Elac fah suk kuhsrao in ahollah mwet puhpuhs ma fah afuhnlah pe ohl uh. Kuhtuh pacl uh pruhe uh ahkwolacnaye nuknuk Lal.²² Kuhtuh pacl uh e ahkwolacnaye ngetnget Lal.²³ Kuhtuh pacl uh El tuyak pruhe, kuhtuh pacl El sikuhk muhtuhnte pruhe, ac pacl se El fihliyac muhtahl nuh infohk uh ac pruhe.²⁴

Luke el ahkuhtweyac ke puhtatyang lal Jisus in oruh iwaclah Lal oruh El “kwafeang na” in pre.²⁵ Tuhsruhk el suc suwohs na el kwacfeacng na in pruhe fuhkah? Kuht nuhnkuh muh pruhe nuhkwewa Lal uh ma ke insiyacl nohfohn, tuh ke El ac ahkfahsrsyelah iwaclah Lal ac ke kweok se El puhlakihn ah, El puhlakihn lah enenuh Elan pruhe upac liki met ah, ke toasriyacn puhsrwen nguhsr Lal pwacngwacng srah in kahklah liki mahnol.

Sahyacn na pacl se Kraist El tuh kuhtanglah misac ac mwe sang Lal nuh sihk ke pacl fototo somlah nuh ke wik kuh mahlwem ekahsr ke moul suhkawihl, nga fahkwack na pwacye ke pwacyeiyacn oasr luhn moul ma pahtpaht ac enenuh lasr in oruh in pwacye plwacn lasr nuh kac uh.

Nga fahkwack in loh kac lah ke Kraist Elac tuhkuh, El enenuh in akihlen kuht—tiac oacna inen mempucr ma eflah fin ma sihmlac luhn pacptais tuhsruhk in mwet tuhma lutlut suc insacnweacng na pwacye, oaru na pwacye ke luhlahlfongi, ac liyacacng-wuhlweacng. Ohiyac na elyah se pa inge nuh sesr nuhkwewa, kuht fin tiac lohng ke auli luhlahpt: “Nga tiana etekowos,”²⁶ kuh, oacna ke Joseph Smith el luhngaslah pohloh kahs sac, [Kom] tiacna etweyuc.²⁷

Wo ohiyac, oasr kahsruh yohrohsr nuh ke orekma se—kahsruh na puhkantwen. Kuht enenuh in luhlahlfongi ke lupufacn ac mwenmwen ac olwelah luhn pristut muhtahl. Kuht enenuh in luhlahlfongi ke mwe sang luhn Nguhn Muhtahl, ohiyac luhn sucu ac kawuck wowo, ac kuh ke luhngse pwacye luhn Kraist. Kuht enenuh in luhlahlfongi ke fwackyuck ac mwet pahluh, mwet liyactwen, ac mwet eis fwackyuck ac Prestuhn Russell M. Nelson. Kuht enenuh in luhlahlfongi lah ke pruhe ac kwacfe ac ke suwohs lasr sifacna, kuht arulacna kuh in fanyak nuh ke Finohl Saion, … siti luhn God moul, acn wolacna inkuhsrao, muhtahl liki nuhkwewa.²⁸

Tamuhlwel ac tahmtahel, ke kuht auliyak liki ma koluk lasr ac tuhkuh ke puhlaik nuh ke tron luhn pahkotwen,²⁹ fihliac ye Muhtahl mwe sang lasr ac pruhe ke insiacsr kwewa, kuht fah konwacack pahkomuhta ac nuhnakmuhnahs ke po kuhlwacng luhn Pahpah Ma Pahtpaht ac Wen ahkostwen, suwohswohs wolacna Nahtuhl. Na, weluhl Job ac elos mwet luhlahlfongi oaru nuhkwewa, kuht fah liye facl na “usrnguk”³⁰ [oruh upac kuht] in kahlwem kac. Ke inen Jisus Kraist, amen.