Tempuhl, Lohm sin Leum Nwacklah Facluh
Ke kom tuhkuh ke nwacsnwacs ac inse pruhe nuh ke lohm muhtahl Sel, kom ac fah nuknukyang ke kuh Lal.
Kuh kom luhngse kahs ke on kahto soko kuht yuck tuhfahna tari ah? Ngac ahkweye, kahsruh, ac oruh tuh kowos in tu kuh, … sruhk ke paho, suwohs, fokoko luhk.1 Leum El ahkkweye mwet luhlahlfongi Lal ke matwac nuh kwewa ke elos tuhkuh nuh ke lohm muhtahl Sel. Ke acn Kinshasa nuh Zollikofen nuh Fukuoka nuh Oakland, mwet fuhsr, ke kuhiyacn nuhnak lalos sifacna, nwacklah acn in pacptais ke tempuhl ah. Ke pacl somlah ah, puhs mwet fiyacyac kuhlwacnsap oruh akwuck muhtahl— tuhsruhktuh wacngihnlac misenge. Misineri suc tuh pahngpahng, misineri kuhlwacnsap ac misineri suc fohlohk liki misin lalos oasr ke sroasrihk nuh kwewa. Fin facluh nohfohn, oasr puhla na kuh se ahkfototoye kuht nuh in lohm sin Leum.
Yac se na tari ac, kawuck sacohk se luhn sucu luhk, el yac 95, muhta ke layen kuhtuhlacp United States, suc tuh lutiyuck sin misineri ke yac 70, fahk nuh sin tuhlihk muhtwacn se nahtuhl, “Nga ke wi kom som nuh ke tempuhl.”
Tuhlihk muhtwacn nahtuhl topuk, Ac, “Ninac, ma se emet, kom enenuh in pacptaislac.”
“Koacl,” el topuk,, “Na nga luhngse pacptaislac.” El pacptaislac. Lwen ekahsr tohkoh, el efahllac utyak nuh ke acn in pacptais ke tempuhl ah. Ac mahlwem se na tari ac, el eis mwe sang muhtahl lal sifacna ac siling. “Lahlmwetmwet ac kuh luhn God yohkwelihk; acn in lihsrlihsr kuh facluh muhtwacwacack in fokwelihk.”2
Kuh kowos oacna motko,lah efuh Leum El sapkihn mwet pahluh Lal ingena in nwacklah facluh ke tempuhl muhtahl Sel?3 Efuh El, ke pacl se inge,sang mwe insewowo yohk nuh sin mwet liyacacng akwuck Lal lah ke srihpen mwe sang muhtahl lalos ke sie tahfuh singucul, lohm siofok sin Leum kuh in muhsahiyucklac?
Olutu, Prestuhn Oaks el sruhkwack sie petsac na kahto ke tempuhl muhsahlah raunweack facluh. Nga ac Kathy tuh sasuc nuh Philippines. Nuhnkuh ke ma usrnguck se inge: Tempuhl Manila ah tuh kihsackihnyucklac ke 1984. Sahp ac yac 26 met liki tempuhl ahkluo, fin acn Cebu Citi, tuh ahksahfyeyucklac ke 2010 ah. Ingena, yac 14 tohkoh, tempuhl 11 muhsahiyucklac, plwacniyucklac, kuh ahkoeyucklac nuh ke kihsaclah. Muhtwacwacack fin acn eir nuh epang: Laoag, Tuguegarao, Santiago, Urdaneta, Alabang, Naga, Tacloban City, Iloilo, Bacolod, Cagayan de Oro, ac Davao. Askuhlacna in liye wolacna ke orekma luhn God!
Raunweack fin facluh nohfohn, lohm sin Leum tuhkuh fototome nuh yohrohsr. Efuh in pacl lasr uh?
Lwen Sahflah
Leum El sensenkihn lah ke lwen sahflah, e oasr fohs ke muhtuhn facl,4 mwet uh fah “luhngse elos sifacna,”5 “ma nuhkewa [fah] mukwikwiyak,”6 fohsack fah yohkelihk,7 ac “insiacn mwet [fah] muhnahslah.”8 Kuht kuh in liye na pwacye lah insiacn mukul muhtwacn muhnahslah: mwe sruhf luhn facluh, ma is pacl ac puhsrwen ahkfohs, ac suhnuhnkuhyak ke mwe ahkkweye luhn nguhn, tohtohlah ke srihpen enenuh luhn mwet kuhlwacnsap.9 Sahp kom ahsor ke kom liye mwet sacohk se lom, oasr sie pacl elos fahkwack luhlahlfongi lalos kacl Jisus Kraist, mwet loh ke Puhk luhn Mormon, ac ahkkahlwemye kahsruh in muhsahi tohkohsrahi luhn God, sa in forlah, ingena pac, liki luhlahlfongi lalos ac fahsrwacng nuh lihkihn Alu uh. Mwe kahsruh luhk nuh sum uh pa in tiac fosrngah! Ma nuh kwewa wo! Tuh yurin God, wacngihn ma koflah.10
Ke palye fohs ac suhlahlahlfongi fin facluh, Leum El olwelah muh ac oasr mwet luhlahlfongi, mwet suc oaru in tuhpan fohlohkuh Lal, mwet suc tu ke acn muhtahl ac tiacna som liki acn selos.11 El sruhmuhn ke mwet suwohswohs suc lain mwe sruhf luhn devil, karihngihn luhlahlfongi lalos, motko ke celestial, ac luhlahlfongi na pwacye ke Mwet Lahngo Jisus Kraist.
Efuh kuh Leum el use ingena tempuhl siofok in an fototo nuh yohrohsr? Sie srihpac uh pa finne oasr fohsack ac mwe sruhf luhn facluh, El olwelah in ahkkweye ac ahkinsewowoye mwet olweacng luhlahlfongi Kacl, ac olwelah Lal ahkpwacyeiyucklac!
Olwelah tuhkuh Tempuhl Kirtland
Lohm muhtahl inge ahkfokokoye, ahkmihsye ac kahrihngihn kuht fuhkah? Kuht eis top se ke pruhe in nguhsr se lal Mwet Pahluh Joseph Smith ke el kihsackuhnlah Tempuhl Kirtland ah. Tempuhl se inge pa Mwet Luhlahlfongi ac on, “Kuht on lihksrweni, wi mwet mweun luhn Inkuhsrao.”12 Mwet Lahngo sifacna tuh sikyak, ac mwet pahluh mahtuh fohlohkyak, sang ki luhn pristut nuh ke wosasuc fohlohkyak.13
Ke pacl muhtahl se ke Tempuhl Kirtland, Mwet pahluh el tuh pruhe in Lohm Muhtahl sin Leum, Mwet luhlahlfongi ac fah kohsrkohsrlah ke kuh luhn God, lah inen Jisus Kraist fah an faclos, tuh lipufacn Lal fah kohlohlos, ac tuh elos fah kapkapwack in Leum ac “sesseslah ke Nguhn Muhtahl.”14 Pruhe fokoko inge orekma nuh ke moul lasr fin kuht alu ke suwohs in lohm sin Leum.
Nuklac ke Suwohswohs
Lin Lohm Sel, ma na pwacye kuht eis kuh luhn kuhsrao.15 Luhlahlfongi lasr kacl Jisus Kraist ac luhngse lasr nuh Sel ahkkweyucklac ac ahkfokokoyeyuck. Nguhn ahkkahlwemye kahlwem pwacye ke atacsr na pwacye ac srihpen moul se.16 Ke kuht ahkostwen, kuht fah ahkinsewowoyeyuck ke kuh in lain mwe sruhf ac ma eis pacl. Kuht puhla luhngse Luhn Mwet Lahngo ke El eslah liki kuht ma upac ac ahsor. Kuht nuknukyang ke kuh luhn God.
Inel an Facsr
Lin lohm muhtahl Sel, kuht eis Inel fohnlah insifacsr. Ke kuht pacptaislac, kuht fahkwack luhlahlfongi lasr nuh Sel ac ahkolah in ahkos masap Lal. Lin tempuhl, kuht oraclah olwelah muhtahl, ke wuhlweacng lasr, in Ukwacl ma pahtpaht.
Mwet fuhsr ke Alu uh sun na pwacye. Ke sie facluh upac, elos eis nuh faclos inen Kraist. Ke Heber City, Utah, puhplihk miting se tuh oreklac in sramsramkihn plwacn in muhsah luhn tempuhl. Mwet fuhsr tolfoko tuh nwacklah park sac in fahkwack insese lalos nuh ke tempuhl se motkweyuck inge. Mukul fuhsr se, sramsram nuh sin mwet kol ke kafucrmacn ke sie acn mwesahs in sramsram ac puhlaik in ahkuhtweyac, “Nga finsrak ngan muh macruhtlac lin tempuhl se inge. [Tempuhl uh fah kahsreyuc] in nwacsnwacs ac wo.” Sie pac ahkuhtweyac lah tempuhl uh pa sie akucl ke kahlwem ac finsrak. Mukul ac muhtwacn fuhsr ke Alu uh fin facluh nohfohn sruokyac kuh inen Jisus Kraist.17
Lipufacn Inmahsrlosr
Lin Tempuhl Kirtland, Mwet Pahluh Joseph el tuh pruhe tuh “lupufacn [fah] karihngihn [Mwet Luhlahlfongi Lal].”18 Orekma pacl nuhkwewa ke akwuck luhn mwet somlah tari lin tempuhl use ahkpwacye na fokoko se lah moul uh tuhtahflah lihkihn lihsrlihsr uh.
Finne puhs ma kuht puhla lin lohm sin Leum ma arulacna muhtahllac kuht in akacsruhi nuh inwalihl, kuhtuh seltahl kuht kuh in akacsruhi kac. Yac anngaul somlah, ke kuht muhta Florida, Nga ac Kathy fuhfahsryucsr nuh ke tempuhl fin acn Atlanta, Georgia. Ke fong in Weniste, Mei 9, 1984, ke kuht ahksahfyelah toeni se lin tempuhl, mwet orekma se ke akwuck el fahsruh nuh yuruk ac siyuck lah oasr pacl luhk ngan oraclah na initiatory preparatory ordinance se. Inen mwet se nga tuh kahsruh ah nga tiac etuh kac. Inel pa Eleazer Cercy.
Lwen tok ah, tempuhl ah nwacnwaclah ke Mwet Luhlahlfongi. Ke nga ahkoeyuc in ahkfahsrye mwe sang ahkluo luhk ke lwen sac, Nga eis inen mwet se nga fah kahsruh ah. Lut, ine sac pa inen mwet se pacna nga kahsruh ke fong met ah, Eleazer Cercy. Nga puhla Nguhn luhn Leum ke mwe sang muhtahl sac sahflah ah. Ke tahfuhn lwen tok, ke kuht srwackna oasr lin tempuhl ah, Kathy el liyacack muhtwacn mahtuh kawuck se lasr ah, Sister Dolly Fernandez, suc muhta Atlanta ingena. Wacngihn mukul weluhl, el siyuck lah nga kuh in kahsrel oruh akwuck ke sil, luhn pahpah tuhmwacl nuh sin pahpah ac ninac kiacl tuhmwacl ah. Nga arulacna srui kaksak kac.
Ke nga sikuck muhtuhnte ke nien mwe loang in oruh akwuck se inge, Nga sifil pac lohng ine se ma sihmlac insifuck, pahpah tuhmwacl, Eleazer Cercy. Ke insiyuck nohfohn, Nga luhlahlfongi lah tukun moul tok uh, nga fah ohsun ac sruokyac mukul se etweyuck ke moul se inge suc pa Eleazer Cercy.
Puhsiyacn ma kuht puhla lun lohm sin Leum uh use engan mislac ac fahkyuck mihs yohk liki mwe ahkfohs. Tuhsruhk kom in etuh na pwacye: lupufacn elos karihngihn kuht!
Nwacnwaclah ke Nguhn Muhtahl
Mwe sang luhn Nguhn Muhtahl tuhkuh nuh sesr ke kuht ahkkweyeyucklac mempucr ke Alu uh. Kais sie wik ke kuht nwacsnwacs fal in eis kuhfa luhn Leum, in esam mwet Lahngo lasr, kuht eis nuh facsr olwelah ke Nguhn Lal in wi kuht pacl nuhkwewa.19 Ke kuht fahsr nuh lohm sin Leum, ke inse pwacye, acn muhtahl emet fwin facluh, kuht mahtuhlah in Leum ac kuh in “eis nofohn Nguhn Mutahl.”20 Ke kuh luhn Nguhn Muhtahl, kuht nwacnwaclah ke mihs ac engan ac finsrak tiac kuh in sruhmuhnyuck.21 Kuht eis kuh sac in srwackna mwet tuhma lutlut Lal finne kuht konwekuhtyak muhta lihkihn acn muhtahl.
Prestuhn Russell M. Nelson el tuh fahkwack: “Mwet Lahngo ac mwet in Molelah, Jisus Kraist, fah oruh kuhtuh sin orekma yohk emet inmahsrlon ingelac ac ke El sulpac tuhkuh. Kuht fah liye akucl usrnguck lah God Pahpah ac … Jisus Kraist … mwet kol ke Alu se inge ke kuh ac wal.”22 Nwacklah facluh nohfohn ke lohm sin Leum el orekma fokoko se ac akucl usrnguck.23
Kawuck sacohk luhk, kuht fin kuh ac sonna ahkyohkye muhtweng lasr in fahsri tempuhl uh, lelah kuht in konwacack pacl mwesahs in puhs in som alu lin lohm sin Leum. Lwelah kuht in pruhe ke tempuhl ma tuhfahna ahkkahlwemyeyuck nuh fin facluh nohfohn, lah kuh in moliyucklac acn ingacn, lah kafucrmacn fah ahkkweyelah plwacn ingacn, mwet orekma oasr talan la fah liye mwe sang lalos yohkwelihk, ac kihsackuhnlah muhtahl fah use insese luhn kuhsrao ac muhtwacta luhn lipufacn.
Olwelah
Tempuhl el pwacyena lohm sin Leum. Nga olwelah nuh suwos lah ke kowos tuhkuh nwacsnwacs ac inse pruhe nuh ke lohm muhtahl Sel, kom ac nuknukyang ke kuh Lal, Inel fah on fom, lipufacn Lal fah karihngihn komyang, ac kom fah kapkapwack ke mwe insewowo luhn Nguhn Muhtahl.
Leum El olwelah, “Moul nuhkwewa ma fahsr liki ma koluk lal ac tuhkuh nuh yuruk, ac pahngon inek, ac ahkos puhsrwek, ac karihngihn masap luhk, fah liye muhtuhk ac etuh tuh nga Inge.”24 Oasr kain in inkacnek puhs kuht kuh in liye muhtuhn Kraist, ac wacngihn sie pac acn wo oacna in lohm muhtahl Sel.25
In lwen inge ke fohsack ac mukwikwiyak, Nga fahkwack lah tempuhl el lohm muhtahl Sel ac kuh in kahsruh molikuhtlac,kahrihngihn kuht, ac ahkoekuhtlac nuh ke lwen wolacna sac, wi lipufacn muhtahl nuhkwewa Lal, Mwet Lahngo lasr fohlohk ke wal, kuh ac wolacna luhlahp. Ke inen Jisus Kraist, amen.