Faamanuiaina e ala i lou Tuafafine Faatuatua

E toatolu ou tei mai le toavalu na auai i le Ekalesia i El Salvador i le taimi lava lena sa ou auai ai. O Thelma sa 14 tausaga le matua ma o lou tei aupito i matua ina ua matou papatiso. Sa 8 ou tausaga i lena taimi ma o le uii o le aiga, o lea sa avea ai o ia ma o matou taitai.

Sa faalauiloa i matou i le Ekalesia e lo matou tuaoi lea sa usuina ni pese ia na matou iloaina mulimuli ane o ni viiga. Sa faamatala mai e lo matou tuaoi e uiga i se nofoaga matagofie lenei e taua o le Peraimeri, lea e aoao ai tamaiti e usu le pese. Sa faafesootaia faifeautalai, ma sa amata ona la asiasi atu i lo matou fale e aoaoina i matou.

Peitai, sa i ai i lou tama ni lagona le lelei faasaga i le Ekalesia ma e uiga i lana fanau ua aoaoina e faifeautalai. I le avea ai ma se tama laitiiti, ou te lei malamalama lava i mea na oo i na alii faifeautalai e toalua e ala i le aumaia o le talalelei i o matou olaga. Sa tutuli i laua i fafo e lou tama pe afai na te maua mai i laua i lo matou fale, ma na te tapēina moli ma le iloaina pe afai e afe mai faifeau i le afiafi. E pei lava o lou tama sa faifai pea le taumafai e taofi faifeautalai mai le aoaoina o matou, sa faaluaina e Thelma se naunautaiga e aoao e uiga i le talalelei ma faitau le Tusi a Mamona. Sa le fiu lava Thelma ma faifeautalai, ma mo le mea lenei, ou te faafetai ai lava.

O le o i le lotu sa o se tauiviga ona sa taumafai Tama e taofi i matou e ala i le faaaogaina o metotia eseese, e pei o le manaomia ona matou faia o ni feau ae lei mafai ona matou tuua le fale mo le lotu.

Sa matua faigata lava se tasi taeao o le aso Sa. Sa le manao o ia ia tuu atu i matou e o, ae sa matou mumusu ia taofia. Sa ia kikiina se apa lapisi ma na masaa solo lapisi i le fola o le fale na faatoa uma ona matou faamamaina. Sa amata ona aoina filemu e Thelma le lapisi e aunoa ma se faitio. Ina ua uma ona ia toe faamamaina le fola, sa ia fesili atu pe afai ona matou o i le lotu. Ua uma ona matou faia uma feau ma isi foi, ae sa le manao pea o ia e tuu mai lana faatagaga. Mulimuli lava na ia fesili mai ai ma le malosi, “Aisea lava tou te naunau ai e o pea i lenei ekalesia?” Na tuuina atu e Thelma se molimau mamana i le moni o le talalelei ma le savali o le Toefuataiga o le talalelei. A o ia faaiuina, na talo mai le lima o lou tama ma tuuina mai lana faatagaga.

E lei toe taumafai lava Tama e taofi i matou ina ua mavae lenei mea na tupu ma mulimuli ane, e ui lava sa lē fiafia i ai, na tuuina mai lana maliega mo i matou e auai i le Ekalesia.

Sa leai sou faafitauli i le auai i le lotu i le aso Sa, ae ou te le i naunau e uiga i le auai i le Peraimeri ona sa faia i le taeao o le aso Toonai i le taimi lena. Ina ua 10 ou tausaga, na oo mai i le fale i se tasi aso Toonai Thelma ma tau atu i isi nai ou tei e uiga i se taaloga soka tele i le va o le tiakono ma le Peleisa (Sikauti e 11 tausaga le matutua). Sa ia faailoa mai le faaletonu tele ona sa ou misia le taaloga aua sa ou le auai i le Peraimeri. E le tau fai atu, sa ou alu i le aso Toonai na sosoo ai (faatasi ai ma ou seevae soka ua fai) ma e lei toe misia lava.

Ina ua 16 tausaga o Thelma, sa valaauina o ia e avea ma peresitene o le Peraimeri. Sa taumafai lo matou epikopo e sue se tagata e taulimaina le tele o luitau sa feagai ma le faalapotopotoga a le Peraimeri. O le uarota e aofia ai se eria tele, ma sa faigata ma taugata mo le tele o aiga e i ai fanau laiti ona malaga mai i le pasi i le lotu i aso Toonai mo le Peraimeri ma i aso Sa. O le toatele o na tamaiti sa le auai i le Peraimeri, ma na lei maua se vaifofo. Na uunaia le epikopo e valaaulia Thelma ae na le mafai ona ia faia lea mea ona sa laitiiti tele o ia. Na faaauau pea le uunaiga, ma ina ua mavae le mauaina o se faatagaga mai le peresitene o le siteki, na tuuina mai loa e le epikopo le valaaulia i lou tuafafine.

O lenei mea na faamaonia o se faaiuga musuia, ma na faamanuiaina ai le toatele o fanau—e aofia ai au. Na faalauteleina e Thelma lona valaauga e ala i le mulimuli i musumusuga, le faaaogaina o le faautauta, ma le faatinoina o manatu fatufatuai e atiina ae ai polokalama faaleaoaoga e aumai ai le talalelei i fanau. Sa ia fesili atu i ona fesoasoani ma faiaoga ia faia fonotaga a le Peraimeri i ni nofoaga e latalata atu i o latou aiga, ma sa ia tuuina atu aoaoga faifai pea mo na faiaoga. O lenei fofo na faatagaina ai tagata o le ekalesia e faasao le taimi ma tupe ma na mafai ai e fanau o e na le mafai ona auai muamua i le Peraimeri ona maua faamanuiaga o lenei faalapotopotoga matagofie.

Ata

Thelma and Rafael

Na matou faaauau ma nai ou tei ona mulimuli i le taitaiga a Thelma a o faagasolo le taimi. Na matou faia afiafi faaleaiga ma auai atu i a matou sauniga Lotu uma lava. E lei leva ona faauuina au o se tiakono, ae liliu mai Thelma ia te au i se tasi o afiafi faaleaiga ma faalauiloaina au o le ua umia le perisitua i le aiga. Sa aoao mai e lenei mea na tupu ia te au se lesona taua e uiga i le faaaloalo mo le perisitua.

Sa ia faamautinoa foi ia ou maua e le aunoa le faamalosiauga talafeagai ma le faamalosiauga faaopoopo e auai i au fonotaga o le perisitua po o le faataunuuina o ou tiutetauave. Mo se faataitaiga, sa faaaoga e Thelma ala uma e pisapisao ma malosi ou te aluese ai mai le moega i taeao o aso Sa ina ia mafai ona ou auai i fonotaga a le perisitua. Sa ia aoaoina foi au e tulimatai atu i ou siitaga i le Perisitua Arona.

I le Mutuale ma le seminare ou te lei popole sa iloaina au i taimi uma faapea “O le tuagane o Thelma.” O nisi o au uo sa mauaina le lagolagosua a o latou matua i le Ekalesia, ae sa i ai lou epikopo, taitai o Alii Talavou, ma Thelma.

Sa faaauau pea e Thelma le avea ma se faataitaiga ia te au ao ia galue i le tele o valaauga seia oo ina alu atu mo lana misiona. Sa ia auauna atu ma le mamalu i le Misiona a Kuatemala Quetzaltenango, ma na aofia ai i fua o ana galuega le papatisoina o lo matou tina i le lua aso talu ona toe foi mai Thelma i le fale. Sa faatumuina i matou i le olioli ina ua ou, o se ositaulaga i le taimi lea, faatinoina lenei sauniga paia. I le mulimuli ai i le faataitaiga a Thelma, sa amata ona ou saunia ma le naunautai e auauna atu i se misiona.

Ina ua maea lana misiona, na siitia atu Thelma i le Iunaite Setete e aoga i le Iunivesite o Polika Iaga, e ui lava i lo matou tulaga utiuti faaletamaoaiga. Sa faatumauina pea lana faatosinaga malosi ia te au e ui lava i le vavamamao.

Ina ua ou toe foi mai i le auauna atu i le Misiona a Kuatemala Aai o Kuatemala, sa ou malaga foi i Provo, Iuta, e aoga i le BYU. Sa ou faafetai mo le agalelei ma le lagolago o le toatele naua o tagata na fesoasoani ia te au ia i ai iina. Ae peitai, na utiuti pea le tulaga tautupe.

E lei leva ona ou taunuu i Provo, ae ma iloiloina ma Thelma lo matou tulaga tautupe. Na ma faaiuina uma e faapea e ui lava i lou galue faavaitaimi, sa le lava se tupe e totogi ai lou fale mautotogi ma lona fale foi mo le tausaga aoga atoa. E ui i lea, e lei masalosalo lava Thelma i lo ma sao mai i lena tofotofoga. Sa ia faatuatuaina o le a saunia e le Alii se ala. E itiiti ifo ma se vaiaso mulimuli ane, na maua ai e Thelma se tusi mai le matagaluega o le Faasipaniolo a le BYU. A o ia tatalaina, sa ia liliu mai ia te au, ma alaga atu, “O lea! O le ala lea o le a ta totogi ai lou fale mautotogi!” Sa tau mai e le tusi ia te ia ua talia o ia o se fesoasoani a se faiaoga, o lea o le a siitia ai lona totogi.

A o mavae atu tausaga, sa faaauau pea ona avea Thelma o se punavai o musumusuga. Na te taulimaina faigata e sili atu nai lo se isi lava ou te iloaina. Na te tausia lelei lana tama tama aulelei e le atoatoa le malosi, lo matou tina ua matua, ma se tane o loo i ai se tulaga matuia faalesoifua maloloina. Ma le isi foi, afai e le o lava na mea, e i ai ona lava faafitauli faalesoifua maloloina.

I ni nai tausaga ua mavae, sa faia ai se taotoga o Thelma o le faiai e aveesea ai le tiga mai i se fula i le faiai. Ona o manaoga o e pele ia te ia, o le tulai mai o ni faafitauli na taufaamatau. Sa ia tatalo mo se fesoasoani ma le musumusuga ma asiasi atu i le malumalu. I nei mea uma lava, sa lei faavaivai ai lona faatuatua, ae sa i ai lona popolega e uiga i le tuuina atu o lona ola i lima o le fomai o le a faia le taotoga maaleale. Sa talanoa atu Thelma i se uo pele i le taimi lea ma sa tau atu i ai ona popolega e uiga i le taotoga. Na fesili atu le uo a Thelma mo le igoa o le fomai ma i lona iloaina o le igoa, sa fai atu le uo a Thelma o le fomai o se tagata o lana uarota. Sa ia tau atu ia Thelma o le fomai o se tagata faamaoni o le Ekalesia ma o se tagata agavaa o loo umia le perisitua. Sa masani ona ia taina ni viiga o le Ekalesia ao ia faatinoina ni taotoga. E ui lava o se vaega o faamatalaga faatauvaa, o se tali faamomoiloto lenei i tatalo a Thelma. O le olaga ma aafiaga faaleagaga o Thelma o se punavai o le malosi faifai pea ma le molimau i lou lava olaga.

Ou te mafaufau i tama talavou o e atonu o loo feagai ma se olaga e tutusa lava ma au. Ou te mafaufau ia i latou o e e leai se tane e fai ma faataitaiga i le fale, o e faatoa mafai ona mauaina le sulufaiga i le Lotu, ma i latou o e tuputupu ae i ni atunuu faigata. Ia i latou na ou te faapea atu: Aua le fiu; ia tumau ona latalata i le Alii ma Ana auauna. Ou te faafetai na saunia e le Alii le lagolagosua na ou manaomia e uunaia ai au e ausia au sini ma avea ma tagata ua ou i ai nei.