Na o Mea Lava Na Faatonuina e le Fomai
O le salamo o se pepa talavai, ae le o se faasalaga.
Ou te inoino e alu i le fomai. Ou te atu tele i le vevesi, le taimi e faatalitali ai, o tui, o faatonuga ia “faaeteete.” A o ou laitiiti lava, sa ou mafaufau o tausimai ma fomai o ni tagata saua o e mafaufau o au o se tamai faamalu e tatui ai pine, ae a o faasolo ina ou matua na ou faavasega faapea e le leaga i latou; sa latou fesoasoani. Ma e toetoe lava o taimi uma ou te lagonaina ai ua ou manuia pe a uma ona vaaia i latou. E tusa lava po o le a le le manaia o le potu faatalitali sa i ai, le tele o lou tagi pe a faia se tui, po o le le fiafia sa ou i ai pe a tau mai ia te au e le fomai e tatau ona ou le fealuai, i le iuga, e masani lava ona aoga.
O nisi taimi o le salamo e mafai ona lagonaina e pei o se malaga i le fomai.
O se Olioli po o se Tiga?
Nai lo le foliga fefe pe a e mafaufau e uiga i le le manaia o le tofo o vailaau po o nila maai, pe e te tau foliga fefe laitiiti pe a e faalogo i le fuaitau “puapuagatia i le mafatia e faavavau”, “mafatia ai i le tiga o seoli,” ma “o le au oona”? (tagai i le Alema 36:12–18). O le ala lena na faamatalaina ai e Alema le amataga o lona salamo, a ea?
Ina ua uma ona afio ifo le agelu ia Alema ma atalii o Mosaea, na manatuaina e Alema ana agasala uma ma na vaai i le ala na ia fouvale ai faasaga i le Atua. Sa faanoanoa tele o ia ma sa ia moomoo maimau pe ana mafai ona ia “tinei i le agaga ma le tino” (Alema 36:15). Auoia. O lena mea ua toetoe lava a avea ai tui a le fomai e foliga mai e pei o ni kisi mai se pepe. Aisea la e faaauau ai pea e Alema ona galue “e le taofia, ina ia mafai ona [ia] aumai o agaga i le salamo”? (Alema 36:24. Aisea o le a ia manao ai i isi tagata e oo i se mea na matua tiga tele mo ia?
Atonu ona o le mea na tupu na sosoo ai.
Sa ia manatuaina Lona Faaola, o Iesu Keriso.
“Sa ou tagi ifo i totonu o lo’u loto: E, Iesu e, oe le Alo o le Atua, ia e alofa mutimutivale mai ia te au.” …
Ma o lenei, faauta, ina ua ou mafaufauina lenei mea, sa ou le toe manatuaina ou tiga; ioe, sa ou le toe lagā atuatuvaleina au i le manatuaina o au agasala.
Ma oi, le olioli e, ma le malamalama ofoofogia tele na ou vaaia; ioe, sa faatumulia lou agaga i le olioli sa sili atu ona tele e pei o lou tiga!” (Alema 36:18–20; faaopoopo le faamamafa). Na iloa e Alema e pei o le faigata ma e oo lava i tiga e mafai ona feagai ai ma a tatou agasala, o le olioli tatou te oo i ai mulimuli ane e matua aoga lava. O le olioli sa ia lagonaina sa sili atu ona logolelei ma suamalie nai lo soo se mea na ia lagonaina muamua (tagai i le Alema 36:21).
Leai se Mea e Fefe ai
Afai o tagata e foliga fefe i le mafaufau i le salamo, atonu ona latou te taulai atu i le vaega tiga. E masani ona manaomia e le salamo le taimi ma o nisi taimi o le faia o se suiga e manaomia ai le tele o le lotomaualalo ma le galue malosi, ae e pei ona aoao mai Elder Richard G. Scott (1928–2015) o le Korama a Aposetolo e Toasefululua, “O le Salamo e le o se faasalaga. O le ala lea ua tumu i le faamoemoe e tau atu i se lumanai e sili ona mamalu.”1 Na taua e Peresitene Russell M. Nelson, le Peresitene o le Korama a Aposetolo e Toasefululua, “o fua o le salamo e suamalie.”2 I se isi faaupuga, e leai se mafuaaga e fefe ai po o le aloese mai soo se vaega o le salamo. E tusa lava po o le a le faigata e feagai ai ma faia ni suiga mo a tatou agasala, o le mana faamalolo o le Faaola e ala i Lana Togiola o le a i ai pea iina e taitaiina i tatou e ala mai ia, ma le olioli tatou te lagonaina o le a atoatoa ona faatoilaloina ma le faamalumalu mai i soo se lagona o le tiga, faalumaina, po o le faanoanoa matou atonu na i ai i luma.
Mo Lou Lava Lelei
E te iloa o le a le uiga o le fuaitau Primum ni nocere? Afai o oe o se fomai, masalo e te iloaina. Primum ni nocere o le faa-Latina mo le “muamua aua le faia se mea e afaina ai.” O se mataupu faavae taiala mo fomai uma, o se folafolaga o loo latou faia. E le faapea ua latou folafola mai e le mafai lava ona faia se mea tiga, ae nai lo lena, o mea uma ua latou faia o le a faia pea mo le manuia o la latou mai.
Pe e te manatu e faia e le Atua ma Iesu Keriso ni folafolaga faapea? E tatau ona e talitonu i ai! Sei vaai i le Isaia 1:18; Isaia 41:13; Roma 8:28; ma le 3 Nifae 13:14. (Mafaufau loloto, saili i ai. Ma na o se vaega laitiiti lea o i latou!) O le eseesega e, mafai ona faia i nisi taimi e tagata ni mea sese. Ae o Iesu Keriso ma le Tama Faalelagi e atoatoa, o lea e mafai ai ona e matuai mautinoa lava o mea uma Latou te fai mai ai e mo lo outou lava lelei. I taimi uma. Afai la e tusi mai e le Atua se vailaau o le salamo, ona Na te silafia o le a faamanuiaina ai lou olaga. O le salamo e le faatatau i le faasalaga. E faatatau i le faamalologa, manumalo i vaivaiga, tuu ese le tagata natura, ma le liliuese mai le agasala ina ia mafai ona liliu atu i le Atua.
“Ia talia le Togiola a Iesu Keriso ma le salamo o ni mea e ao ona talisapaia ma faaaoga i aso uma e tusa ai ma faatonuga a le Fomai Sili,” na saunoa ai Elder Jörg Klebingat o le Fitugafulu. Ia faatulaga se uiga o le salamo fiafia ma olioli faifai pea, fiafia, olioli e ala i le avea ma ituaiga o olaga ua e filifilia.3
Pe a tusia mai ia te oe e le Fomai Sili, o Iesu Keriso, se talavai mo le salamo, aua nei faatagaina lou fefe i le tiga po o le faalumaina e taofia ai oe. Faatuatuaina Ana folafolaga faapea e ui lava atonu e tiga mo sina taimi, ma le alofa mutimutivale tele o le a Ia faapotopoto mai outou (tagai 3 Nifae 22:7), ma e pei lava o Alema, o le a faatumuina oe i le olioli e sili atu ona tele e pei o lou tiga (see Alema 36:19–20).