Vaai atu i le Perofeta a le Atua
Saunia e Elder Kim B. Clark
O Le Fitugafulu
Ina ua 11 ou tausaga, sa ou fesoasoani i lau uarota e fausia se fale fou o le Ekalesia. O tagata lotu e fesoasoani e fausia fale lotu i na aso—tui fao, vali puipui, ma faia soo se mea lava.
Ina ua ou faalogo o le a faapaia e Peresitene Tavita O. Makei (1873–1970) le fale, sa ou manao lava e i ai iina. Na fai mai ou matua e mafai ona ou alu. Sa ou vave alu ma nofo i le laina pito i luma.
Ou te manatua le vaai atu ia Peresitene Makei o latalata mai. Sa ou vaai i le ala sa tu ai o ia, le ala na ia talanoa ai i tagata, le ala na ia taulimaina ai tagata. Sa susulu mai ona mata lanumoana ma lona lauao papae. Na foliga mai o ia o se perofeta. Ina ua ou faalogo ia te ia o saunoa mai ma faia le tatalo o le faapaiaga, sa ou iloa i lou loto o le perofeta lenei a le Atua.
Sa ou maua se uunaiga malosi faaleagaga mai le Tama Faalelagi: “O Lau perofeta lenei.” Na tau mai ia te au e le Tama Faalelagi e ala mai i le Agaga Paia e faapea o Peresitene Makei o Lana perofeta.
O le taimi lava na ou iloa ai o Peresitene Makei o le perofeta a le Atua, sa ou iloaina e moni le Ekalesia, ma o Iosefa Samita o se perofeta. Sa ou iloaina o le Tusi a Mamona ma le Toefuataiga o le talalelei e moni. Sa ou iloaina foi o perofeta uma lava, mai ia Iosefa Samita e oo atu ia Tavita O. Makei, o perofeta foi a le Atua.
O lenei la, o taimi uma lava e valaaulia ai se perofeta fou, ou te mauaina lena lava faamautinoaga e oo mai: “O Lau perofeta lenei.” Na amata mai lava a o ou tamaitiiti.