ថ្នាក់ដឹកនាំសាសនាចក្រធ្វើការងារបម្រើដល់ប្រជាជាតិជាច្រើន

ថ្នាក់ដឹកនាំសាសនាចក្របានបន្តការងារបម្រើទូទាំងពិភពលោករបស់ពួកលោកក្នុងរយៈពេលប្រាំមួយខែកន្លងទៅ ។ នេះគឺជាចំណុចសំខាន់ៗមួយចំនួនពីសកម្មភាពជាច្រើនរបស់ពួកលោក ចាប់តាំងពីសន្និសីទទូទៅចុងក្រោយ ។

ប្រធាន អូក បានគិតពិចារណាពីឥទ្ធិពលរបស់ស្ត្រី

នៅក្នុងវីដេអូរបស់សាសនាចក្រដែលបានចេញផ្សាយនៅខែ កញ្ញា ប្រធាន ដាល្លិន អេក អូក ទីប្រឹក្សាទីមួយក្នុងគណៈប្រធានទីមួយ បានមានប្រសាសន៍អំពីឥទ្ធិពលរបស់ម្ដាយ និងជីដូនរបស់លោកក្នុងការជួយលោកអភិវឌ្ឍទីបន្ទាល់ និងសេចក្ដីជំនឿលើព្រះអម្ចាស់ ។ ឥទ្ធិពលរបស់ស្ត្រីនៅក្នុងជីវិតរបស់លោកបានបន្តជាមួយនឹងភរិយារបស់លោកគឺ ស៊ីស្ទើរ ជូន អូក ហើយបន្ទាប់ពីគាត់ស្លាប់ទៅ បន្តជាមួយភរិយារបស់លោក ស៊ីស្ទើរ គ្រីស្ទីន អូក ។

ប្រធាន អូក បានមានប្រសាសន៍ថា « គ្រូបង្រៀនដ៏សំខាន់បំផុតដែលខ្ញុំមាននៅក្នុងផ្នែកនៃគោលលទ្ធិ និងការបម្រើរបស់សាសនាចក្រ និងទំនួលខុសត្រូវក្នុងគ្រួសារ—ដែលមានឥទ្ធិពលដូចគ្នានឹងប្រធាននៃសាសនាចក្រដែរនោះ—គឺស្ត្រី » ។

អែលឌើរ អុជដូហ្វ បានថ្លែងទៅកាន់ជនភៀសខ្លួន

អែលឌើរ ឌៀថើរ អេហ្វ អុជដូហ្វ ក្នុងកូរ៉ុមនៃពួកសាវកដប់ពីរនាក់បានអញ្ជើញទៅប្រទេស ប៉ូឡូញ នៅខែមេសា ។ លោកបានធ្វើជាអធិបតីក្នុងការប្រជុំធម្មនិដ្ឋានសម្រាប់ជនភៀសខ្លួនអ៊ុយក្រែន ដែលបានជ្រកកោនបណ្ដោះអាសន្ននៅទីនោះ ។

នៅដំណើរទស្សនកិច្ចនោះ អែលឌើរ អុជដូហ្វ ដែលធ្លាប់ជាជនភៀសខ្លួនម្នាក់តាំងពីក្មេង បានមានប្រសាសន៍ថា បេះដូងរបស់លោកពោរពេញដោយ « ទុក្ខសោកយ៉ាងខ្លាំងចំពោះទុក្ខលំបាក » នៃពួកបរិសុទ្ធថ្ងៃចុងក្រោយ និងអ្នកដទៃទៀតនៅប្រទេសដែលហែកហួរដោយសង្រ្គាម ប៉ុន្តែក៏មានអំណរគុណផងដែរ ។

លោកបានមានប្រសាសន៍ថា « បុគ្គល និងគ្រួសារទាំងនេះបានពង្រឹង និងលើកស្ទួយយើងដោយសេចក្ដីល្អ ទំនុកចិត្ត និងសេចក្ដីជំនឿរបស់ពួកគេនៅលើ និងសម្រាប់ព្រះអង្គសង្គ្រោះ និងគោលបំណងដ៏ទេវភាពរបស់ទ្រង់ » ។ « ហ៊ែរៀត និងខ្ញុំសង្ឃឹមថានឹងអាចពង្រឹង ហើយលួងលោមដល់ពួកគេ ប៉ុន្តែពួកគេបែរជានាំមកនូវពន្លឺនៃស្ថានសួគ៌ ក្តីសង្ឃឹម និងការលួងលោមដល់ដួងចិត្តរបស់យើងទៅវិញ » ។

អែលឌើរ បែដណា បានមានប្រសាសន៍ទៅកាន់ក្លឹបសារព័ត៌មានជាតិនៅវ៉ាស៊ីនតោន ឌី.ស៊ី. ។

អែលឌើរ ដេវីឌ អេ បែដណា ក្នុងកូរ៉ុមនៃពួកសាវកដប់ពីរនាក់បានថ្លែងទៅកាន់ក្លឹបសារព័ត៌មានជាតិ នៅខែឧសភា ដោយរៀបរាប់លម្អិតអំពីអ្វី និងមូលហេតុនៃគំនិតផ្តួចផ្តើមផ្នែកមនុស្សធម៌ សុខុមាលភាព ការអប់រំ ព្រះវិហារបរិសុទ្ធ និងពង្សវលីរបស់សាសនាចក្រនៃព្រះយេស៊ូវគ្រីស្ទ ។

អែលឌើរ បែដណា « គោលបំណងមូលដ្ឋាននៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ គឺដើម្បីជួយមនុស្សឲ្យរៀនអំពីនិស្ស័យ និងលក្ខណៈរបស់ព្រះ ឲ្យស្រឡាញ់ព្រះ ឲ្យធ្វើជាសិស្សរបស់ព្រះរាជបុត្រារបស់ទ្រង់ គឺព្រះយេស៊ូវគ្រីស្ទ និងដើម្បីស្រឡាញ់ និងបម្រើបងប្អូនប្រុសស្រីរបស់យើង » ។

ប្រធានសមាគមសង្គ្រោះ និងអង្គការបឋមសិក្សាបានធ្វើទស្សនកិច្ចនៅទ្វីបអាមេរិកខាងត្បូង

ប្រធាន ខាំមៀល អិន ចនសុន ជាប្រធានសមាគមសង្រ្គោះទូទៅ និងប្រធានស៊ូសាន អេច ផតធ័រ ជាប្រធានអង្គការបឋមសិក្សាទូទៅ បាន ជួបជាមួយមេដឹកនាំស៊ីវិល និងសមាជិកសាសនាចក្រនៅអាហ្សង់ទីន ស៊ីលី អ៊ុយរូហ្គាយ និងប៉ារ៉ាហ្គាយនៅអំឡុងធ្វើការងារបម្រើក្នុងរយៈពេល ១០ ថ្ងៃ និងទស្សនកិច្ចដែលផ្តល់ជាជំនួយ ។

ពួកលោកបានជួបជាមួយអង្គការរដ្ឋាភិបាលដែលជួយដល់ស្ត្រីដែលប្រឈមមុខនឹងស្ថានភាពងាយរងគ្រោះនៅប្រទេសប៉ារ៉ាហ្គាយ និងប្រទេសអាហ្សង់ទីន ។

ប្រធាន ចនសុន បានមានប្រសាសន៍ថា ៖ « សាសនាចក្ររបស់យើងទន្ទឹងរង់ចាំធ្វើការជាមួយអ្នក ដើម្បីកែលម្អឱកាសសម្រាប់ការអប់រំ និងភាពខ្លួន ទីពឹងខ្លួនសម្រាប់ស្រ្តី » ។

បន្ថែមពីលើជំនួយរបស់រដ្ឋាភិបាល ប្រធាន ចនសុន និង ផតធ័រ ក៏បានធ្វើការងារបម្រើដល់សមាជិកសាសនាចក្រផងដែរ ។ ពួកលោកបានធ្វើការប្រជុំសម្រាប់ឪពុកម្តាយវ័យក្មេង ការប្រជុំធម្មនិដ្ឋានសម្រាប់ស្ត្រីនៅលីវ ការប្រជុំអន្តរកម្មសម្រាប់ក្រុមគ្រួសារដែលមានកូន និងការបណ្តុះបណ្តាលដល់ថ្នាក់ដឹកនាំក្នុងក្រុមជំនុំផងដែរ ។