O Le Faatuatua Ia Iesu Keriso

O le faatuatua i le Alii o Iesu Keriso o le mataupu faavae muamua lea o le talalelei. O se meaalofa faaleagaga, ma e tatau ai mo lo tatou olataga. Na tautino mai e le Tupu o Peniamina: “E le oo le olataga i se tasi … sei vagana ua ui atu i le salamo ma le faatuatua i le Alii o Iesu Keriso” (Mosaea 3:12).

O le faatuatua o le “faamoemoe i mea e le vaaia, a ua moni” (Alema 32:21; tagai foi i le Eperu 11:1). O le faatuatua o se mataupu faavae o le mana lea e uunaia a tatou gaoioiga e fai mai lea aso i lea aso

Pe tatou te suesue ma aoao ea pe a na tatou le talitonu e mafai ona tatou maua ai le poto ma le malamalama? Pe tatou te galulue ea i aso taitasi pe a na tatou le faamoemoe o lo tatou galulue e mafai ai ona tatou faataunuuina se mea? Pe toto ea e se faifaatoaga se faatoaga pe a na le faamoemoe o ia e selesele ai? O aso taitasi tatou te faia ai ni mea ua tatou faamoemoe ia tatou maua mai ai ni mea, e ui ina tatou le iloa lona taunuuga. O le faatuatua lena. (Tagai i le Eperu 11:3.)

E tele tala mai tusitusiga paia ua faamatala mai ai mea tetele na faia e ala i le faatuatua.

O le faatuatua na faia ai e Noa se vaa ma faaolaina ai lona aiga mai le lolo (tagai i le Eperu 11:7). Sa vaeluaina ai e Mose le Sami Ulaula (tagai i le Eperu 11:29). Sa valaauina ai e Elia le afi mai le lagi (tagai i le 1 Tupu 18:17–40). Sa valaauina ai e Nifae se oge ia oo mai (tagai i le Helamana 11:3–5). Sa ia aioi atu ai foi i le Alii ia faamutaina le oge (tagai i le Helamana 11:9–17). Sa faamaluina ai le sami, ma oo mai ai faaaliga, ma talia ai talosaga, o ia mea uma na faia i le mana o le faatuatua.

A tatou suesue lelei i tusitusiga paia, tatou te iloa ai o le faatuatua o le talitonuga malosi lea i totonu o o tatou agaga i upu moni, e uunaia ai i tatou e faia mea lelei. O lea mea e mafua ai ona tatou fesili: O ai e tatau ona tatou faatuatua i ai?

• Mafaufau i au gaoioiga e faia i aso uma. O a ni mea e te faia i ai ni faatinoga i aso taitasi e le mafai ona e iloa atu o latou taunuuga? E faapefea ona uunaia oe e le faatuatua e te faia se mea?

E tatau ona faaautu lo tatou faatuatua i le Alii o Iesu Keriso.

O le faatuatua ia Iesu Keriso o lona uiga ua tatou faalagolago ia te Ia ma usiusitai ia te Ia i soo se mea Na te poloai mai ai. Afai e tuu lo tatou faatuatua ia Iesu Keriso, i le avea ma Ona soo usiusitai, o le a faamagaloina a tatou agasala e lo tatou Tama Faalelagi ma saunia ai i tatou e foi atu ia te Ia.

Sa talai atu e le Aposetolo o Peteru e faapea “e leai lava se isi igoa i lalo o le lagi ua foaiina mai i tagata e mafai ona faaolaina ai i tatou” (Galuega 4:12; tagai foi i le Mosaea 3:17). Sa aoao atu e Iakopo e tatau i tagata ona “atoatoa lo latou faatuatua i le Paia e Toatasi o Isaraelu [Iesu Keriso], a leai, e le mafai ona faaolaina i latou i le malo o le Atua” (2 Nifae 9:23). O le faatuatua i le Faaola ma salamo, e mafai ai ona atoatoa ona aoga Lana Togiola i o tatou olaga. O le faatuatua e mafai ai foi ona tatou maua le malosi e tetee atu ai i tofotofoga (tagai i le Alema 37:33).

E le mafai ona tatou faatuatua ia Iesu Keriso e aunoa ma le faatuatua i lo tatou Tama Faalelagi. Afai tatou te faatuatua ia i Laua, tatou te faatuatua foi i le Agaga Paia, o Le na La auina mai, Na te aoao mai ia i tatou mea moni uma, ma faamafanafanaina i tatou.

• E mafai faapefea e le faatuatua ia Iesu Keriso ona uunaia i tatou i o tatou valaauga i le Ekalesia? i a tatou sootaga faaleaiga? i a tatou galuega? E mafai faapefea e le faatuatua ia Iesu Keriso ona uunaia lo tatou faamoemoe mo le olaga e faavavau?

Ona ua tatou iloa e tele faamanuiaga e maua pe afai tatou te faatuatua ia Iesu Keriso, o lea e tatau ai ona tatou taumafai e faateleina lo tatou faatuatua ia te Ia. Na fetalai mai le Faaola, “Afai e tusa lo outou faatuatua ma le fua o le sinapi,… e leai … se mea tou te le mafaia” (Mataio 17:20). O le fua o le sinapi o se fatu itiiti lava, ae tupu ae ma avea ma se laau tele.

E faapefea ona faateleina lo tatou faatuatua? I le ala lava e tasi tatou te faateleina ai soo se isi lava tomai. E faapefea ona tatou atiina ae le tomai i le vane faatagata, lalagaina o ie, tusi ata, kuka, gaosia o ipu i le ele, po o le taina o se laau fai musika? Tatou te suesue ma aoao ma galulue i ai. A o tatou galulue i ai, o le a atili ai ona tatou lelei. Ua faapena foi le faatuatua. Afai tatou te mananao e faateleina lo tatou faatuatua ia Iesu Keriso, e tatau ona tatou galulue i ai. Ua faatusa e le perofeta o Alema le afioga a le Atua i se fatu e tatau ona fafagaina i le faatuatua:

“Faauta, afai tou te ala mai ma fagua o outou mafaufau e oo i le tofotofo i a’u upu, ma faaaoga sina faatuatua itiiti lava; ioe, afai tou te le mafaia se mea e sili i le manao i le fia faatuatua, i na tuu ia lenei manao e galue i totonu ia te outou, seia lava lo outou faatuatua e tali ai nisi o a’u upu.

“O lenei, tatou te faatusaina le upu i le fatu. O lenei, afai tou te tuuina mai se mea e totoina ai se fatu i o outou loto, faauta, afai o le fatu moni ia, po o le fatu lelei, afai foi tou te le tiai ai ona o lo outou le talitonu, ina ia outou tetee atu i le Agaga o le Atua, faauta, e amata ona tupu ai i totonu o outou fatafata; pe a outou lagona foi le tupu o le fatu, ona amata ai lea ona outou faapea ifo—E moni, o le fatu lelei lenei, po o le upu lelei, aua ua amata ona faateleina ai lo’u loto; ioe, ua amata ona faamalamalamaina ai lo’u mafaufau. …

“O lenei, faauta, pe le faateleina ea lo outou faatuatua i lenei mea?” (Alema 32:27–29).

O lea, e mafai ona faateleina lo tatou faatuatua i le Atua i le faatinoina o lo tatou manao ia faatuatua ia te Ia.

E mafai foi ona tatou faatupuina lo tatou faatuatua i le tatalo i le Tama Faalelagi e uiga i o tatou faamoemoega, manaoga, ma mea tatou te manaomia (tagai i le Alema 34:17–26). Peitai e le tatau ona tatou manatu ona pau lava le mea tatou te faia o le ole atu. Ua ta’u mai ia i tatou i tusitusiga paia, o le “faatuatua, pe afai e leai ni galuega, e mate lava ia ina ua na o ia” (Iakopo 2:17). O le tala o lo o taua i lalo e uiga i se alii na faaalia lona faatuatua i ana galuega.

Sa manao lenei alii e suesue i tusitusiga paia, peitai sa le iloa e ia faitau tusi. Sa ia tatalo atu i le Tama Faalelagi e fesoasoani mai ia te ia ina ia iloa faitau. Na oo i se tasi aso, na sau se faiaoga i le nuu, ma sa ia alu atu ma talosaga i le faiaoga e fesoasoani mai ia te ia. Sa ia aoaoina le alafapeta (pi faitau). Sa ia aoaoina le faaleoga o mataitusi, ma tuufaatasi mataitusi e fai ai upu. Sa lei umi ae mafai ona ia faitauina upu faigofie. O le tele o lona aoao, o le tele foi lena o lona alualu i luma. Sa ia faafetai atu i le Alii mo le auina mai o se faiaoga ma lona fesoasoani mai ia te ia ia iloa faitau. Sa oo ina faamalosia le faatuatua, ma le lotomaulalo, ma le poto o lenei alii, sa oo ina avea o ia ma peresitene o se paranesi i le Ekalesia.

Na faamatala mai e Peresitene Spencer W. Kimball, “E tatau ona o faatasi galuega ma le faatuatua. Ua le tonu le ole atu i le Alii e tuu mai ia i tatou le poto, ae ua lelei le ole atu i le Alii e fesoasoani mai ia tatou maua le poto, ma suesue lelei, ma mafaufau lelei, ma taofimau mea ua tatou aoaoina” (Faith Precedes the Miracle [1972], 205; faatusilima o loo i le uluai kopi).

O le faatuatua o le faia lea o mea uma e mafai ona tatou faia e faataunuu ai mea tatou te faamoemoeina ma ole atu ai. Na saunoa mai Peresitene Kimball: “Tatou te toto le fatu i le faatuatua, ma e le umi ae tatou vaai i le vavega o le fua mai. Peitai ua le malamalama tagata, ma ua latou fesuiai lenei ala.” Sa ia faamalamalama atili mai e faapea, o le toatele o i tatou, tatou te fia maua le soifua maloloina ma le tino malosi, ae ua tatou le tausia tulafono o le soifua maloloina. Tatou te fia maua le manuia e aunoa ma le totogiina o a tatou sefuluai. Tatou te fia latalata atu i le Alii, ae ua tatou le fia anapogi ma tatalo. Tatou te fia maua le timu i taimi tatau ai ma le filemu i le laueleele, e aunoa ma le tausia o le Sapati o se aso paia, ma ua tatou le tausia foi isi poloaiga a le Alii. (Tagai i le Aoaoga a Peresitene o le Ekalesia: Spencer W. Kimball [2006], 161.)

O se auala taua e faateleina ai lo tatou faatuatua, o le faalogologo lea ma le suesue i afioga a le Alii. Tatou te faalogo i afioga a le Alii i a tatou sauniga Lotu. E mafai ona tatou suesue i Ana afioga i tusitusiga paia. “Ona ua le maua foi e outou uma le faatuatua, ia outou saili ma le filiga ma aoao le tasi i le isi i upu o le poto; ioe, ina saili atu ia outou i upu o le poto mai tusi e sili ona lelei; ia saili i le aoao, e faapea foi i le suesue ma le faatuatua.”MFF 88:118

• O le a le fesootaiga o loo e iloa i le va o lo tatou faatuatua ma a tatou galuega?

O le meaalofa o le faatuatua e fai ai vavega, e oo mai ai agelu, e tuuina mai ai isi meaalofa a le Agaga, e tali ai tatalo, ma avea ai tagata o atalii o le Atua (tagai i le Moronae 7:25–26, 36–37).

“A oo mai le faatuatua, na te aumai … aposetolo, perofeta, o e folafola le talalelei, leoleo, aoao, meaalofa, atamai, poto, vavega, faamalologa, gagana, faaliliuga o gagana, ma isi mea faapena. E oo mai nei mea uma pe a oo mai le faatuatua i le lalolagi, ma e mou atu foi nei mea uma pe a le maua le faatuatua i le lalolagi; aua o aafiaga na o le faatuatua. … Ma o le e i ai le faatuatua, na te mauaina le poto ma le atamai atoa e tatau ai, seia oo ina ia iloa le Atua, ma le Alii o Iesu Keriso, o Le na Ia auina mai—ona ia iloa ai lea, o le ola faavavau lena” (Lectures on Faith [1985], 83).

• O a nisi o tala mai tusitusiga paia o loo i ai ni tagata ua faateleina lo latou malosi ona o lo latou faatuatua ia Iesu Keriso? O faapefea ona e vaaia o tupu lenei tulaga i lou lava olaga?

• Eperu 11; Alema 32 (o le uiga o le faatuatua)

• Esoto 14:19–22 (vaeluaina o le Sami Ulaula)

• Kenese 6–8 (Noa ma le lolo)

• Mataio 8:5–33 (faamaloloina o mai, faamaluina o le sami, vavega o le faatuatua)

• Mareko 5:25–34 (faamaloloina i le faatuatua)

• Roma 10:17 (e oo mai le faatuatua e ala i le faalogo i le afioga a le Atua)