O Le Faaeaga

Ao tatou nonofo faatasi ma lo tatou Tama Faalelagi, sa Ia faamalamalama mai ia i tatou se fuafuaga mo lo tatou alualu i luma. E mafai ona avea i tatou e pei o Ia, o se tasi ua maua le faaeaga. E manaomia i lenei fuafuaga ona tatou o ese mai ia te Ia, ma o mai i lenei lalolagi. E tatau ona i ai lenei o ese mai ia te Ia, ina ia faamaonia ai pe tatou te usiusitai i poloaiga a lo tatou Tama e ui ina ua tatou nonofo ese mai Ona luma. Sa faia i le fuafuaga e faapea a iu le olaga faaletino, o le a faamasinoina i tatou ma tauia e tusa ma le tulaga o lo tatou faatuatua ma le usiusitai.

Ua tatou iloa mai tusitusiga paia e tolu malo o le mamalu i le lagi. Fai mai le Aposetolo o Paulo, sa ia iloa se tagata na “segia o ia i le lagi tuatolu” (2 Korinito 12:2). Ua ta’u mai e Paulo igoa o isi malo e lua i le lagi: o le selesitila ma le terasitila (tagai i le 1 Korinito 15:40–42). O le selesitila o le malo silisili lea ona maualuga, ao le terasitila o le malo lona lua. Ua tatou iloa mai faaaliga o aso e gata ai le igoa o le malo lona tolu, o le malo lea o le telesitila (tagai i le MFF 76:81). Ua tatou iloa foi ua i ai ni lagi po o ni tikeri se tolu, i totonu o le malo selesitila (tagai i le MFF 131:1).

• O le a le faaeaga?

O le faaeaga o le ola e faavavau, le ituaiga o soifuaga o loo soifua ai le Atua. O loo soifua o Ia i le mamalu silisili. Ua atoatoa o Ia. Ua ia te Ia le poto ma le atamai uma. O Ia o le Tama o fanau agaga. O Ia o le foafoa. E mafai ona avea i tatou e pei o lo tatou Tama Faalelagi. O le mea lena e ta’u o le faaeaga.

Afai e faamaonia lo tatou faatuatua i le Alii, o le a tatou nonofo i le tikeri silisili ona maualuga o le malo selesitila i le lagi. O le a faaeaina i tatou, e ola faatasi ma lo tatou Tama Faalelagi i aiga faavavau. O le faaeaga o le taui silisili lea ona maualuga e mafai e lo tatou Tama Faalelagi ona tuuina mai i Lana fanau (tagai i le MFF 14:7).

• O a nisi o faamanuiaga o le a tuuina atu ia i latou o e faaeaina?

E atoatoa lo tatou Tama Faalelagi, ma ua olioli o Ia i le mea moni o le a mafai e Lana fanau ona avea faapei o Ia. O Lana galuega ma Lona mamalu o le “faataunuu o le faaofuina o le tagata i le tino ola pea ma le ola e faavavau” (Mose 1:39).

O i latou o e maua le faaeaga i le malo selesitila, e ala i le faatuatua ia Iesu Keriso, o le a latou maua faamanuiaga faapitoa. Na folafola mai e le Alii, “O mea uma e a i latou ia” (MFF 76:59). O nisi nei o faamanuiaga faapitoa o le a tuuina atu i tagata ua faaeaina:

1. O le a latou nonofo e faavavau i le afioaga o le Tama Faalelagi ma Iesu Keriso (tagai i le MFF 76:62).

2. O le a avea i latou ma atua (tagai i le MFF 132:20–23).

3. O le a latou mau faatasi ma tagata amiotonu o o latou aiga, ma o le a mafai foi ona latou maua le alualu i luma e faavavau.

4. O le a latou maua le atoatoa o le olioli.

5. O le a latou maua mea uma ua i ai i lo tatou Tama Faalelagi ma Iesu Keriso—le mana uma, mamalu uma, puleaga uma, ma le malamalama uma (tagai i le MFF 132:19–20). Ua tusia e Peresitene Iosefa Filitia Samita: “Ua folafola mai e le Tama e ala i le Alo, o mea uma ua ia te Ia, o le a tuuina atu ia i latou o e usiusitai i Ana poloaiga. O le a faateleina i latou i le malamalama, poto, ma le mana, ma alualu i luma mai lea tomai i lea tomai, seia oo ina liligi ifo i o latou luga le atoatoaga o le aso atoatoa” (Doctrines of Salvation, tuufaatasia e Bruce R. McConkie, 3 voluma [1954–56], 2:36; faatusilima o loo i le uluai kopi).

O le taimi e faataunuu ai tulaga manaomia mo le faaeaga, o le taimi nei lava (tagai i le Alema 34:32–34). Na saunoa mai Peresitene Iosefa Filitia Samita, “Ina ia maua le faaeaga, e tatau ona tatou talia le talalelei ma ona feagaiga uma; ma ave i o tatou luga tiute ua tuuina mai e le Alii; ma savavali i le malamalama ma iloa le upu moni; ma ‘ola ai i upu uma e tulei mai le fofoga o le Atua’” (Doctrines of Salvation, 2:43).

Ina ia faaeaina, e ao ona tuuina atu muamua lo tatou faatuatua ia Iesu Keriso ona tumau ai lea i lena faatuatua seia oo i le iuga o o tatou olaga. O lo tatou faatuatua ia te Ia e ao ona tatou maua ai le salamo ia tatou agasala ma usiusitai i Ana poloaiga.

Na Ia poloaiina i tatou uma ina ia tatou maua ni sauniga patino:

1. E ao ina papatisoina i tatou.

2. E ao ina tatou maua le faaee mai o lima e faamauina ai i tatou o ni tagata o le Ekalesia a Iesu Keriso ma maua le meaalofa o le Agaga Paia.

3. E ao i alii ona maua le Perisitua Mekisateko ma faalauteleina o latou valaauga i le perisitua.

4. E ao ina tatou maua faaeega paia i le malumalu.

5. E ao ina tatou faaipoipoina mo le faavavau, pe i le olaga lenei po o le isi olaga.

E le gata i le mauaina o sauniga manaomia, ae ua poloaiina foi i tatou uma e le Alii ia:

1. Alolofa i le Atua ma o tatou tuaoi.

2. Tausi i poloaiga.

3. Salamo i o tatou sese.

4. Saili tagata o o tatou aiga ua maliliu, ma fai sauniga faaola o le talalelei mo i latou.

5. Toaaga e auai e le aunoa i sauniga o le Ekalesia e faafou ai a tatou feagaiga o le papatisoga e ala i le taumamafa i le faamanatuga.

6. Alolofa i tagata o o tatou aiga ma faamalolosia i latou i ala o le Alii.

7. Fai tatalo faaleaiga ma tatalo a le tagata lava ia i aso taitasi.

8. Aoao atu le talalelei i isi e ala i upu ma faataitaiga.

9. Suesue i tusitusiga paia.

10. Faalogo ma usiusitai i upu musuia a perofeta a le Alii.

O le mea mulimuli, e tatau ona maua e i tatou taitoatasi le Agaga Paia ma aoao e mulimuli i Ana taitaiga i o tatou olaga taitoatasi.

• E faapefea ona fesoasoani sauniga ma feagaiga e saunia ai i tatou mo le faaeaga?

• E faapefea ona fesoasoani ia i tatou le faatuatua ia Iesu Keriso e usitaia ai poloaiga?

• Aisea e tatau ai ona tatou iloa ona mulimuli i le taitaiga a le Agaga Paia ina ia faaeaina ai?

• O le a le mea e tupu pe a tatou tumau i le faamaoni e avea ma soo o Keriso seia oo i le iuga?

Na fetalai mai le Alii, “Afai e te tausi i a’u poloaiga ma tumau e oo i le iuga, o le a e maua le olaga e faavavau, o le meaalofa silisili lea o meaalofa uma a le Atua” (MFF 14:7). Na saunoa mai Peresitene Iosefa Filitia Samita, “Afai tatou te tumau pea i le Atua; o lona uiga, o le tausi o Ana poloaiga, tapuai atu ia te Ia ma ola i Ana upu moni, e oo mai le taimi o le a liligi ifo ai le atoatoa o le upumoni ia i tatou, o le a faapupulaina tele pea lava pea Lona malamalama, seia oo i le aso atoatoa” (Doctrines of Salvation, 2:36)

Sa aoao mai e le Perofeta o Iosefa Samita: “Afai e te ae i se apefai, e tatau ona e amata mai i lalo, ma alu ae i luga i laa taitasi, seia taunuu i le tumutumu; ua faapea foi i mataupu o le Talalelei—e tatau ona e amata i le [mataupu] muamua, ma faasolo atu ai seia oo ina e malamalama i mataupu uma o le faaeaga. Peitai o le a umi se taimi pe a mavae ona e sopo atu i le isi itu o le veli [maliu] ona faatoa mafai ai lea ona e malamalama i ia mataupu uma. O ia mataupu ua le faamoemoe tatou te malamalama uma i ai i le lalolagi lenei; o le a avea ma galuega tele lo tatou aoao i lo tatou olataga ma le faaeaga e oo lava i tala atu o le tuugamau (Aoaoga a Peresitene o le Ekalesia: Iosefa Samita [2007], 285).

Na aoao mai Iosefa Samita: “O le mataupu muamua lava o le Talalelei, o le iloa lea ma le mautinoa o le Uiga o le Atua. … Sa avea o Ia ma tagata e pei o i tatou i le amataga; … O Le Atua lava Ia, Le Tama o i tatou uma, sa nofo i se lalolagi, e pei ona faia e Iesu Keriso lava Ia” (Teachings of the Prophet Joseph Smith, filifilia e Iosefa Filitia Samita [1976], 345–46).

Ua silafia e lo tatou Tama Faalelagi o tatou puapuaga, o tatou vaivaiga, ma a tatou agasala. Ua tiga alofa ma alofa mutimutivale o Ia ia te i tatou. Ua finagalo o Ia, ia tatou manumalo e pei o Ia.

Faauta i le fiafia e maua e i tatou taitoatasi pe a tatou toe foi atu i lo tatou Tama Faalelagi ma mafai ona tatou faapea atu: “Le Tama e, ua ou faia le mea na E finagalo ia ou faia. Sa ou faamaoni ma sa ou tausia Au poloaiga uma. Ua ou fiafia ua ou toe foi mai i [lo tatou] aiga moni.” Ona tatou faalogo lea ua Ia faapea mai, “Le auauna lelei e, … ua e faamaoni i nai mea itiiti, ou te tofia oe e pule i mea e tele: i na ulufale mai ia i le fiafia o lou Alii” (Mataio 25:23).

• Iloilo le Mataio 25:23. Mafaufau pe faapefea ni ou lagona pe afai e te faalogoina le Alii o fetalai mai nei upu ia te oe.

• MFF 132:3–4, 16–26, 37 (faatatau i le faaeaga)

• MFF 131:1–4 (faaipoipoga e faavavau o le ki i le faaeaga)

• MFF 76:59–70 (ua faamatala mai ai faamanuiaga o le mamalu selesitila)

• MFF 84:20–21 (ua faaalia mai i sauniga o le perisitua le mana o le amioatua)