Alofa Moni

• E faapefea ona e faamatalaina le alofa moni?

Sa faaali mai i le soifuaga o le Faaola Lona alofa mamā mo tagata uma. Sa Ia tuuina mai foi Lona soifua mo i tatou. O le alofa moni o le alofa mamā lea o loo i lo tatou Faaola o Iesu Keriso. Ua Ia poloai mai ia i tatou ia alofa atu le tasi i le isi e pei ona Ia alofa mai ia i tatou. Ua ta’u mai e tusitusiga paia, o le alofa moni, o se lagona e sau mai se loto ua mama (tagai i le 1 Timoteo 1:5). Ua ia i tatou le alofa mamā, pe a tatou faaali atu, mai o tatou loto, le popole ma le alofa faamaoni mo o tatou uso ma tuafafine uma.

Ua ta’u mai e le perofeta o Mamona ia i tatou, “O le mea lea, ia outou uumau ai le alofa, ua silisili i mea uma, aua e faaleaogaina mea uma—a o le alofa moni o le alofa mamā lea o Keriso, e tumau ia e faavavau” (Moronae 7:46–47; tagai foi i le 1 Korinito 13; 2 Nifae 26:30; Moronae 7:44–45, 48).

Ua tuuina mai e le Faaola ia i tatou le faataitaiga o Lona soifua tatou te mulimuli ai. O Ia o le Alo o le Atua. Sa atoatoa Lona alofa, ma sa Ia faaali mai ia i tatou le ala e tatau ona tatou alolofa atu ai i isi. O Lana faataitaiga, na Ia faaali mai ai ia i tatou, o mea faaleagaga ma mea faaletino e manaomia e o tatou uso a tagata, e taua lava foi e pei o tatou. Ao lei tuuina atu Lona soifua mo i tatou, sa Ia fetalai mai:

“O la’u poloaiga lenei, ia outou fealofani, e pei ona ou alofa atu ia te outou.

“E le sili lava le alofa o se tasi i lenei alofa, ia tuuina atu e se tasi lona ola e sui ai ana uo” (Ioane 15:12–13).

I le talanoa atu i le Alii, na faapea atu ai Moronae:

“Ua ou manatua na E fetalai mai ua E alofa i le lalolagi ua oo lava ina E foaiina mai Lou soifua mo le lalolagi. …

“O lenei foi, ua ou iloa o lenei alofa ua ia te Oe mo le fanauga a tagata, o le alofa moni lea; o lea, sei iloga ua i ai le alofa moni i tagata, e le mafai ai ona maua e i latou le mea ua e saunia i maota o Lou Tama” (Eteru 12:33–34).

Atonu o le a le manaomia ona tuuina atu o tatou ola e pei ona faia e le Faaola. Ae mafai ona tatou maua le alofa moni pe afai tatou faia o Ia ma autu o o tatou olaga, ma mulimuli i Ana faataitaiga ma Ana aoaoga. E pei o le Faaola, e mafai foi ona tatou faamanuiaina olaga o o tatou uso ma tuafafine i lenei lalolagi.

• Aisea ua sili ai ona maoae le alofa moni i isi uiga faaleatua uma?

E tele aoaoga taua na tuuina mai e le Faaola ia i tatou e ala i tala po o faataoto. Na Ia aoao mai ia i tatou i le faataoto i le Samaria Agalelei, e tatau ona tatou foai atu i e ua le tagolima, e tusa po o i latou o ni a tatou uo pe leai (tagai i le Luka 10:30–37; tagai foi i le James E. Talmage, Jesus the Christ, 3rd ed. [1916], 430–32). I le faataoto lenei, na fetalai mai le Faaola, e i ai se tagata sa malaga atu i se tasi aai. I luga o le ala, sa fasia o ia e tagata faomea. Sa latou fao ona ofu ma ana tupe ma fasi o ia, ona o lea ae tuu o ia toetoe ina a oti. Ona alu ane ai lea o se faitaulaga i le ala, ua vaai atu ia te ia, ona ui ane lea i le tasi itu, ma ua alu pea. Ua alu ane foi se tagata faigaluega i le malumalu, ua vaai ia te ia, ma ui ane i le tasi itu, ma alu foi. Ao le tagata Samaria, o e na inosia e tagata Iutaia, ina ua sau o ia, ma vaai atu i lenei tagata, sa ia alofa ia te ia (tagai i le ata o lo o i le mataupu lenei) . Sa tootuli ifo le Samaria i tafatafa o lenei tagata, ma fusifusi i ona manua, ma faatietie o ia i le asini, ma ave i se faletalimalo. Ona ia totogi lea o le tagata e ana le faletalimalo, na te tausia seia oo ina malosi.

Ua aoao mai Iesu, e tatau ona tatou avatu meaai i e fia aai, fale i e ua leai ni fale, ma lavalava i e matitiva. A tatou asiasi i e mama’i ma e o i falepuipui, o Ia lava lea ua tatou faia i ai ia mea. Ua Ia folafola mai ia i tatou, afai tatou te faia ia mea, o le a fai mo tatou tofi Lona malo. (Tagai i le Mataio 25:34–46.)

E le tatau ona tatou tau mafaufau pe ua matua tatau moni lava i se tasi la tatou fesoasoani pe leai (tagai i le Mosaea 4:16–24). Afai ua uma ona tatou faia o mea e manaomia e o tatou lava aiga, ona tatau lea ona tatou fesoasoani atu ia i latou uma o e manaomia la tatou fesoasoani. O le ala lena e avea ai i tatou e pei o lo tatou Tama Faalelagi, o Le Na te faatotō ifo le timu i luga o e amiotonu ma e ua amioletonu (tagai i le Mataio 5:44–45).

Ua faamanatu mai e Peresitene Thomas S. Monson ia i tatou o loo i ai i latou o e e sili atu mea latou te manaomia nai lo mea faalelalolagi:

“Sei o tatou fesili ifo ia i tatou lava: “Ua ou faia ea se lelei i le aso? Ua ou fesoasoani ea?’ [Viiga, numera 136]. E maoae lea fua faatatau mo le fiafia! E maoae lea fautuaga mo le faamalieina, mo le filemu o le agaga—o le maua o le agaga faafetai i se isi tagata soifua.

“O o tatou avanoa e tuuina atu ai i tatou lava, e matua leai lava se gataaga, ae e le tumau foi. O loo i ai loto e tatau ona faafiafiaina. O loo i ai upu agalelei e tatau ona ta’u atu. O loo i ai meaalofa e tatau ona tuuina atu. O loo i ai galuega e tatau ona faia. O loo i ai agaga e tatau ona faasaoina” (i le Conference Report, Oketopa 2001, 72; po o le Ensign, Novema. 2001, 60).

• I le faataoto i le Samaria agalelei, e faapefea ona e faamatalaina i latou o e na savavali ese mai le tagata ua manu’a? E faapefea ona e faamatalaina le Samaria? O a ni ala e mafai ona tatou faaaoga ai le savali o lenei faataoto i o tatou olaga?

• E faapefea ona tatou alolofa atu i tagata e ui ia latou agasala ma o latou faaletonu?

E tusa lava pe tatou te foai atu i e matitiva, ae sei vagana ua tatou lagona le alofa loloto mo i latou ua le ia i tatou le alofa moni (tagai i le 1 Ioane 3:16–17). Sa aoao mai le Aposetolo o Paulo, afai e ia i tatou le alofa moni, e faatumuina i tatou i lagona lelei mo tagata uma. Tatou te onosai ma agalelei. Tatou te le lotovii pe mimita, faamaualuga, manatu faapito, pe le migao. A ia i tatou le alofa moni, tatou te le manatua pe fiafia i mea leaga e faia e isi. Tatou te le faia foi mea lelei ina ia tatou maua ai se mea. Ae tatou te fiafia faatasi ma i latou o e ola i le upu moni. A ia i tatou le alofa moni, tatou te faamaoni, tatou te talitonu i le lelei o isi ma puipui i latou. Ua aoao mai i tatou e tusitusiga paia “e le uma le alofa [moni].” (Tagai i le 1 Korinito 13:4–8.)

O le Faaola o lo tatou faataitaiga lea o lagona ia tatou maua mo isi ma mea tatou te faia ia te i latou. Sa inoino o Ia i le amioleaga, ae sa alofa o Ia i e agasala e ui ia latou agasala. Sa alofa faamaoni o Ia i fanau laiti, tagata matutua, e matitiva, ma e le tagolima. Sa matua tele naua Lona alofa o lea sa Ia aioi atu ai i lo tatou Tama Faalelagi e faamagalo atu i fitafita ia sa tutuiina fao i Ona lima ma Ona vae (tagai i le Luka 23:34). Sa Ia aoao mai ia i tatou afai tatou te le faamagalo atu i isi, e le faamagaloina foi i tatou e lo tatou Tama Faalelagi (tagai i le Mataio 18:33–35). Sa Ia fetalai mai: “A ou te fai atu a’u ia te outou, Ia outou alolofa atu i e ua ita mai ia te outou, ia outou faamanuia atu i e ua fetuu mai ia te outou, ia outou agalelei atu i e ua inoino mai ia te outou, ia outou tatalo foi mo e ua tuuai fua mai ma faasaua mai ia te outou. … Aua afai tou te alolofa atu i e ua alolofa mai ia te outou, se a ea se taui tou te maua ai? (Mataio 5:44, 46). E tatau ona tatou aoao ia tatou manatu i isi e pei ona sa faia e Iesu.

• E mafai faapea ona faateleina lo tatou alofa moni?

O se tasi o ala e mafai ai ona avea i tatou ma tagata e alolofa moni o le suesue lea i le soifuaga o Iesu Keriso ma tausi i Ana poloaiga. E mafai ona tatou aoao i mea na Ia faia i ni tulaga patino, ma tatou faia na mea pe a tatou oo foi i ni tulaga faapena.

Lua, pe a oo mai ia i tatou ni lagona e le moni le alofa, e mafai ona tatou tatalo ia faatele atu o tatou lagona alofa moni. Ua aioi mai Mamona ia i tatou, “Ia outou tatalo atu i le Tama ma le malosi uma o le loto, ina ia faatumuina outou i lenei alofa [alofa moni] ua foaiina mai ia te i latou uma o e ua fai ma soo faamaoni o Lona Alo o Iesu Keriso” (Moronae 7:48).

Tolu, e mafai ona tatou aoao ia tatou alolofa ia i tatou lava, o lona uiga ua tatou malamalama i lo tatou taua moni i le avea ai o i tatou ma fanau a lo tatou Tama Faalelagi. Ua aoao mai le Faaola e ao ina tatou alolofa atu i isi e pei ona tatou alolofa ia i tatou lava (tagai i le Mataio 22:39). Ina ia tatou alolofa ia i tatou lava, e ao ona tatou faaaloalo ma talitonuina i tatou lava. O lona uiga e ao ina tatou usiusitai i mataupu faavae o le talalelei. E ao ina tatou salamo i soo se mea sese tatou te faia. E ao ina tatou faamagaloina i tatou lava pe a uma ona tatou salamo. O le a tatou lagonaina le alofa ia i tatou lava pe a tatou maua le lagona mafanafana loloto o le mautinoa e alofa moni le Faaola ia i tatou.

Fa, e mafai ona tatou aloese mai le manatu e sili atu lo tatou lelei nai lo isi tagata. E mafai ona tatou onosai i o latou sese. Na saunoa mai Iosefa Samita, “O le tele ona tatou latalata atu i lo tatou Tama Faalelagi, o le tele foi lea ona tatou vaai ma le alofa i agaga a fano; e oo ia i tatou le manao tatou te ave i latou i o tatou luga, ae lafo a latou agasala i o tatou tua” ( Aoaoga a Peresitene o le Ekalesia: Iosefa Samita [2007], 457–29).

I le Tusi a Mamona, ua tatou faitau ai e uiga ia Enosa, o se alii talavou sa fia iloa pe ua faamagaloina ana agasala. Ua ia faamatala mai ia i tatou:

“Sa matelaina lo’u agaga; ona ou tootuli ai lea i luma o Le Na Faia a’u, ma ua ou tagi atu ia te ia i le tatalo faatauanau ma le aioi atu ma lo’u lava agaga, na ou tagi atu ia te Ia i le aso atoa ioe, ina ua po lava le aso ua ou alaga atu pea i le lagi.

“Ua tulei mai ia te a’u le siufofoga, ua faapea mai: Enosa e, ua faamagaloina au agasala, e faamanuiaina foi oe” (Enosa 1:4–5).

Sa faamatala mai e le Alii ia Enosa, ona o lona faatuatua ia Keriso, ua faamagaloina ai ana agasala. Ina ua faalogo Enosa i ia upu, sa ia le toe popole ia te ia lava. Sa ia iloa ua alofa le Alii ia te ia, ma o le a ia faamanuia mai ia te ia. Sa amata loa ona ia lagona le popole mo le manuia o ana uo ma tagata o lona aiga, le au Sa Nifae. Sa oo ina ia sasaa atu lona agaga atoa i le Atua mo i latou. Sa oo ina tali mai le Alii ma fetalai mai o le a faamanuiaina i latou e tusa ma lo latou faamaoni i le tausiga o poloaiga ua tuuina mai ia i latou. Sa oo ina faateleina le alofa o Enosa ina ua mavae ia afioga mai le Atua, ma sa ia tatalo faatauanau atu mo le tele o itula, mo tagata sa Lamana, o e sa fai ma fili o tagata Sa Nifae. Sa oo ina talia e le Alii lona manao, ma sa faapea ona ia faaaoga ai le vaega na totoe o lona ola, e taumafai ai e laveai agaga o tagata Sa Nifae ma sa Lamana. (Tagai i le Enosa 1:6–26.)

Sa faafetai tele Enosa mo le alofa ma le faamagaloina o ia e le Alii, sa ia loto malie ai e faaaoga le vaega na totoe o lona ola, e fesoasoani atu ai i isi ia latou mauaina lenei meaalofa. Sa oo ina avea Enosa ma tagata e alofa moni. E mafai foi ona tatou mauaina. O le mea moni, e ao ina tatou mauaina le nuu o le tofi ua saunia mo i tatou i le malo o lo tatou Tama.

• Kolose 3:12–14 (o le alofa moni o le fusi o le atoatoa)

• Alema 34:28–29 (e le aoga a tatou tatalo pe a tatou le alolofa moni)

• 1 Korinito 12:29–13:3 (o le uiga o le alofa moni)

• MFF 121:45–46 (ia tumu i tatou i le alofa moni mo tagata uma)