Mga Basahon ug mga Leksiyon
Kapitulo 2 Atong Langitnon nga Pamilya

Kapitulo 2

Atong Langitnon nga Pamilya

Imahe
Hubble image of the galaxy

Kita mga Anak sa Atong Langitnong Amahan

  • Unsa man ang gitudlo sa mga kasulatan ug sa mga propeta sa ulahing mga adlaw kabahin sa atong relasyon sa Dios?

Ang Dios dili lamang atong Magmamando ug Tiglalang; Siya usab ang atong Langitnong Amahan. Ang tanang mga lalaki ug mga babaye mga anak gayud sa Dios. “Ang tawo, isip espiritu, gipanamkon ug natawo sa langitnong mga ginikanan, ug gimatuto ngadto sa pagkahingkod diha sa walay katapusang mga mansyon sa Amahan, sa wala pa moanhi dinhi sa yuta sulod sa usa ka temporal [yutan-on] nga lawas” (Mga Pagtulun-an sa mga Presidente sa Simbahan: Joseph F. Smith [1998], 335).

Ang matag tawo nga matawo gayud sa yuta atong espiritung igsoon nga lalaki o babaye. Tungod kay kita espiritu nga mga anak sa Dios, atong napanunod ang potensyal aron mapalambo ang Iyang balaan nga mga kinaiya. Pinaagi sa Pag-ula ni Jesukristo, kita mamahimong sama sa atong Langitnong Amahan ug makadawat sa kahingpitan sa hingpit nga kalipay.

  • Sa unsang paagi ang imong kahibalo nga ikaw anak sa Dios nakaimpluwensya sa imong hunahuna, mga pulong, ug mga lihok?

Gipalambo Nato ang mga Gawi ug mga Talento Samtang Nagpuyo Kita sa Langit

  • Hunahunaa ang mga talento ug mga gasa nga gipanalangin kanimo.

Ang mga kasulatan nagtudlo kanato nga ang mga propeta miandam sa ilang mga kaugalingon nga mamahimong mga pangulo dinhi sa yuta samtang sila mga espiritu pa didto sa langit (tan-awa sa Alma 13:1–3). Sa wala pa sila matawo sa mortal nga mga lawas, sila giordinahan nang daan (gipili) sa Dios nga mamahimong mga pangulo dinhi sa yuta. Si Jesus, si Adan, ug si Abraham ang pipila niini nga mga pangulo. (Tan-awa sa Abraham 3:22–23.) Si Joseph Smith mitudlo nga “ang matag tawo nga adunay calling [buluhaton] sa pagpangalagad sa mga lumulupyo sa kalibutan gi-orden [nang daan] niana gayud nga katuyoan” (Mga Pagtulun-an sa mga Presidente sa Simbahan: Joseph Smith [2007], 619). Hinoon, ang matag usa dinhi sa yuta gawasnon sa pagdawat o pagsalikway sa bisan unsa nga oportunidad sa pagserbisyo.

Kitang tanan dili managsama didto sa langit. Nasayud kita, sama pananglit, nga kita mga anak nga lalaki ug mga anak nga babaye sa langitnong mga ginikanan—mga lalaki ug mga babaye (tan-awa sa “Ang Banay: Usa ka Pamahayag ngadto sa Kalibutan,” Ensign, Nob. 1995, 102). Kita adunay giangkon nga lain-laing mga talento ug mga abilidad, ug gitawag kita sa pagbuhat og lain-laing mga butang sa yuta. Makakat-on pa kita og daghan kabahin sa atong “mahangturong mga posibilidad” kon atong madawat ang atong patriyarkal nga mga panalangin (tan-awa sa Thomas S. Monson, sa Conference Report, Okt. 1986, 82; o sa Ensign, Nob. 1986, 66).

Usa ka tabil ang mitabon sa atong mga panumduman sa atong kinabuhi sa wala pa dinhi sa yuta, apan ang atong Amahan sa Langit nahibalo kon kinsa kita ug unsa ang atong gibuhat sa wala pa kita moanhi dinhi. Siya mipili sa panahon ug dapit alang sa matag usa kanato nga ipakatawo aron kita makakat-on sa mga leksyon nga personal natong gikinahanglan ug sa pagbuhat sa atong pinakamaayo uban sa tagsa-tagsa natong mga talento ug mga gawi.

  • Sa unsang paagi nga ang mga talento sa ubang tawo nakapanalangin kanimo? Sa unsang paagi nga ang imong mga talento ug mga gasa nakapanalangin sa uban?

Ang Atong Langitnong Amahan Mitanyag og usa ka Plano alang Kanato aron Mamahimong Sama Kaniya

  • Sa unsang paagi nga ang kinabuhi sa yuta nakatabang kanato nga maandam nga mamahimong sama sa atong Langitnong Amahan?

Ang atong Langitnong Amahan nasayud nga dili kita mouswag lapas pa sa usa ka piho nga kinutuban gawas kon kita mobiya Kaniya sulod sa usa ka panahon. Gusto nila nga atong mapalambo ang diosnong mga kinaiya nga Iyang nabatonan. Sa paghimo niini, kita kinahanglan nga mobiya sa atong panimalay sa wala pa sa yuta aron masulayan ug makaangkon og kasinatian. Ang atong mga espiritu nagkinahanglan nga masul-uban og yutan-ong mga lawas. Kita kinahanglan gayud nga mobiya sa atong yutan-on nga mga lawas sa panahon sa kamatayon ug mahiusa niini pag-usab panahon sa Pagkabanhaw. Dayon atong madawat ang imortal nga mga lawas nga sama nianang sa atong Langitnong Amahan. Kon kita molampus sa atong mga pagsulay, madawat nato ang kahingpitan sa hingpit nga kalipay nga nadawat sa atong Langitnong Amahan. (Tan-awa sa D&P 93:30–34.)

Ang atong Langitnong Amahan mipatawag og usa ka Dakong Konseho aron ipahibalo ang Iyang plano alang sa atong pag-uswag (tan-awa sa Mga Pagtulun-an sa mga Presidente sa Simbahan: Joseph Smith, [209], 619). Atong nahibaloan nga kon mosunod kita sa Iyang plano, mamahimo kitang sama Kaniya. Mabanhaw kita; kita makabaton sa tanan nga gahum sa langit ug sa yuta; kita mamahimo nga langitnong mga ginikanan ug makabaton og espiritu nga mga anak sama sa Iyang nahimo (tan-awa sa D&P 132:19–20).

Atong nahibaloan nga mohatag Siya og usa ka yuta alang kanato diin atong mapamatud-an ang atong mga kaugalingon (tan-awa sa Abraham 3:24–26). Usa ka tabil motabon sa atong mga panumduman, ug kita makalimot sa atong langitnon nga panimalay. Gikinahanglan kini aron magamit nato ang atong kabubut-on sa pagpili sa maayo o sa dautan nga dili maimpluwensyahan sa panumduman sa atong pagpuyo kauban sa atong Langitnong Amahan. Niana kita makasunod Kaniya tungod sa atong hugot nga pagtuo Kaniya, dili tungod sa atong kahibalo o panumduman Kaniya. Siya motabang kanato sa pag-ila sa kamatuoran sa higayon nga kita makadungog niini pag-usab dinhi sa yuta (tan-awa sa Juan 18:37).

Didto sa Dakong Konseho kita usab nahibalo sa katuyoan alang sa atong pag-uswag: aron makabaton og kahingpitan sa hingpit nga kalipay. Hinoon, nakat-unan usab nato nga ang uban malingla, mosubay sa lain nga mga dalan, ug mawala sa ilang agianan. Atong nahibaloan nga ang tanan kanato adunay mga pagsulay sa atong mga kinabuhi: sakit, kasagmuyo, kasakit, kasubo, ug kamatayon. Apan atong nasabtan nga kini ihatag kanato alang sa kaugalingon natong kasinatian ug sa atong kaayohan (tan-awa sa D&P 122:7). Kon tugutan nato kini, kini nga mga pagsulay molimpyo kanato kay sa mopildi kanato. Kini motudlo kanato nga makabaton og paglahutay, pagpailub, ug gugma nga putli (tan-awa sa Mga Pagtulun-an sa mga Presidente sa Simbahan: Spencer W. Kimball [2006], 17–20).

Niini nga konseho nahibaloan usab nato nga tungod sa atong kahuyang, kitang tanan gawas sa gagmayng mga bata makasala (tan-awa sa D&P 29:46–47). Nahibaloan nato nga usa ka Manluluwas ang ipadala alang kanato aron kita makabuntog sa atong mga sala ug mabuntog ang kamatayon pinaagi sa pagkabanhaw. Nahibaloan nato nga kon atong ibutang ang atong hugot nga pagtuo Kaniya, magtuman sa Iyang pulong ug mosunod sa Iyang ehemplo, kita mahimaya ug mamahimong sama sa atong Langitnong Amahan. Atong madawat ang kahingpitan sa hingpit nga kalipay.

  • Ilista ang pipila sa mga kinaiya sa Langitnong Amahan. Sa unsang paagi nga ang plano sa kaluwasan makatabang kanato sa pagpalambo niini nga mga kinaiya?

Dugang nga mga Kasulatan