Ang Pamilya Mahimong Mahangturon

• Ngano nga ang Langitnong Amahan mipadala kanato nganhi sa yuta isip mga sakop sa mga pamilya?

“Ang kaminyoon tali sa usa ka lalaki ug sa usa ka babaye gi-orden sa Dios. … Ang pamilya mahinungdanon ngadto sa laraw sa Tiglalang alang sa walay katapusan nga destinasyon sa Iyang mga anak” (“Ang Banay: Usa ka Pamahayag ngadto sa Kalibutan,” Ensign, Nob. 1995, 102).

Human nga ang Langitnong Amahan midala ni Adan ug ni Eva sa paghiusa diha sa kaminyoon, mimando Siya kanila sa pagbaton og mga anak (tan-awa sa Genesis 1:28). Mipadayag Siya nga usa sa mga katuyoan sa kaminyoon mao ang paghatag og mortal nga mga lawas alang sa Iyang espiritu nga mga anak. Ang mga ginikanan mga kaabag sa atong Langitnong Amahan. Buot Siya nga ang matag espiritu Niya nga mga anak makadawat og pisikal nga lawas ug makasinati og kinabuhi sa yuta. Kon ang usa ka lalaki ug usa ka babaye modala og mga anak nganhi sa kalibutan, sila nagtabang sa atong Langitnong Amahan sa pagpahinabo sa Iyang plano.

Matag bag-o nga bata kinahanglan nga dawaton ngadto sa pamilya uban sa kalipay. Ang matag usa anak sa Dios. Kinahanglan kita nga mogahin og panahon sa paglingaw-lingaw sa atong mga anak, sa pagdula uban kanila, ug sa pagtudlo kanila.

Si Presidente David O. McKay miingon, “Sa tibuok nakong kasingkasing ako nagtuo nga ang labing maayo nga dapit sa pag-andam alang… sa kinabuhing dayon mao ang panimalay” (“Blueprint for Family Living,” Improvement Era, Abr. 1963, 252). Sa panimalay, uban sa atong mga pamilya, kita makakat-on og pagpugong sa kaugalingon, sakripisyo, pagkamaunungon, ug bili sa trabaho. Makakat-on kita sa paghigugma, sa pagpakigbahin, ug sa pagserbisyo sa usag usa.

Ang amahan ug inahan mao ang responsable sa pagtudlo sa ilang mga anak mahitungod sa Langitnong Amahan. Kinahanglan sila nga mopakita pinaagi sa ehemplo nga sila nahigugma Kaniya tungod kay sila nagtuman sa Iyang mga kasugoan. Kinahanglan usab nga ang mga ginikanan motudlo sa ilang mga anak sa pag-ampo ug sa pagsunod sa mga kasugoan (tan-awa sa Mga Proverbio 22:6).

• Ngano nga ang panimalay mao man ang labing maayo nga dapit sa pag-andam alang sa kinabuhing dayon?

• Sa unsa nga paagi kita makatabang sa mga kabatan-onan sa Simbahan sa pagsabut sa ka sagrado sa pamilya ug sa pakigsaad sa kaminyoon?

Ang mga pamilya mahimong mag-uban sa kahangturan. Aron makatagamtam niini nga panalangin kinahanglan gayud kita nga magminyo diha sa templo. Kon ang mga tawo magminyo gawas sa templo, ang kaminyoon matapos kon ang usa sa pares mamatay. Kon kita naminyo sa templo pinaagi sa awtoridad sa Melchizedek Priesthood, kita naminyo alang sa karon ug sa kahangturan. Kon magtuman kita sa atong mga pakigsaad uban sa Ginoo, ang atong mga pamilya pagahiusahon sa kahangturan isip bana, asawa, ug mga anak. Ang kamatayon dili makabulag kanato.

• Sa unsa nga paagi kita makapalambo og mas dako nga kahusay sa atong mga panimalay

Ang mga bana ug mga asawa kinahanglan nga mahunahunaon ug mabination ngadto sa usag usa. Kinahanglan dili gayud sila mobuhat o mosulti og bisan unsa nga makapasakit sa mga pagbati sa usag usa. Kinahanglan usab sila nga maningkamot sa pagbuhat sa tanan kutob sa mahimo aron sa paghimo sa usag usa nga malipayon.

Samtang ang mga ginikanan makaila sa Dios ug maninguha nga mahisama Kaniya, sila motudlo sa mga anak sa paghigugma sa usag usa. Diha sa Basahon ni Mormon, si Hari Benjamin mipasabut:

“Kamo dili motugot sa inyong mga anak … [nga] manag-away o managbingkil sa usag usa.

“Apan kamo motudlo kanila sa paglakaw diha sa mga pamaagi sa kamatuoran ug sa kaligdong; kamo motudlo kanila sa paghigugma sa usag usa, ug sa pag-alagad sa usag usa” (Mosiah 4:14–15).

Isip mga sakop sa pamilya kita makatabang sa usag usa sa pagbati nga masaligon pinaagi sa paghatag og pagdasig ug kinasingkasing nga pagdayeg. Kinahanglan nga ang matag bata mobati nga importante. Ang mga ginikanan kinahanglan nga mopakita nga sila interesado sa unsay gibuhat sa ilang mga anak ug mopahayag og gugma ug pagpakabana alang sa ilang mga anak. Ang mga anak kinahanglan sa ingon usab mopakita sa ilang gugma alang sa ilang mga ginikanan. Sila kinahanglan nga magmasulundon ug maningkamot sa pagpuyo sa matang sa kinabuhi nga maghatag og pasidungog ngadto sa ilang mga ginikanan ug sa ilang apelyido.

• Unsa ang mahimo sa mga ginikanan sa pagdasig sa ilang anak nga mga lalaki ug mga babaye nga mahimong maayong mga higala ngadto sa usag usa? Unsa ang mahimo sa managsoong mga lalaki ug mga babaye sa pag-amuma sa ilang panaghigalaay ngadto sa usag usa?

• Unsay mahimo sa mga bana ug mga asawa sa pagtabang sa usag usa nga magmalipayon?

• Unsa ang imong gibuhat sa pagtabang og lig-on sa imong pamilya ug paghimo niini nga malampuson?

Si Presidente Harold B. Lee mitudlo, “Ang labing importante nga buhat sa Ginoo nga imo gayud nga pagabuhaton mao ang anaa sa sulod sa mga bongbong sa imong kaugalingon nga panimalay” (Mga Pagtulun-an sa mga Presidente sa Simbahan: Harold B. Lee [2000], 134).

Nakahibalo si Satanas unsa ka importante ang mga pamilya ngadto sa plano sa atong Langitnong Amahan. Naninguha siya sa pagbungkag kanila pinaagi sa pagpugong kanato gikan sa pagpaduol ngadto sa Ginoo. Motintal siya kanato sa pagbuhat og mga butang nga mobungkag sa atong mga pamilya.

Ang Unang Kapangulohan ug ang Korum sa Napulog Duha ka mga Apostoles mipahayag, “Ang malampuson nga mga kaminyoon ug mga pamilya gitukod ug gipadayon diha sa mga baruganan sa hugot nga pagtuo, pag-ampo, paghinulsol, pagpasaylo, pagtahud, gugma, kalooy, trabaho, ug maayo nga mga kalihokan sa paglingaw-lingaw”. (Ensign, Nob. 1995, 102).

Ang tanan kanato buot nga makabaton og malipayon, malampuson nga mga pamilya. Ang mosunod nga mga butang motabang kanato sa pagkab-ot niini:

1. Paghimo og pag-ampo sa pamilya matag gabii ug buntag (tan-awa sa 3 Nephi 18:21). Hiusa nga mag-ampo isip bana ug asawa.

2. Itudlo sa mga bata ang ebanghelyo matag semana diha sa family home evening.

3. Tun-an ang mga kasulatan kanunay isip usa ka pamilya.

4. Mag-uban sa pagbuhat og mga butang isip usa ka pamilya, sama sa buhaton nga mga proyekto, pagsuroy-suroy, ug paghimo og mga desisyon.

5. Pagkat-on nga magmabination, mapailubon, mainantuson, ug manggiloy-on (tan-awa sa Moroni 7:45–48).

6. Tambong og mga miting sa Simbahan kanunay (tan-awa sa D&P 59:9–10).

7. Sunod sa tambag sa Ginoo diha sa D&P 88:119: “Han-aya ninyo ang inyong mga kaugalingon; andama ang matag butang nga kinahanglanon;ug pagtukod og usa ka balay, gani usa ka balay sa pag-ampo, usa ka balay sa pagpuasa, usa ka balay sa hugot nga pagtuo, usa ka balay sa pagkat-on, usa ka balay sa himaya, usa ka balay sa kahusay, usa ka balay sa Dios.”

8. Paghupot og usa ka family history, pagpahigayon og buhat sa templo nga magdungan, ug pagdawat sa mga ordinansa sa sealing sa templo.

Ang pamilya mao ang labing importante nga yunit sa Ang Simbahan ni Jesukristo sa mga Santos sa Ulahing mga Adlaw. Ang Simbahan gitukod aron sa pagtabang sa mga pamilya nga makaangkon og mahangturon nga mga panalangin ug kahimayaan. Ang mga organisasyon ug mga programa sulod sa Simbahan gidisenyo aron sa pagpalig-on kanato sa tinagsa-tagsa ug pagtabang kanato sa pagpuyo isip usa ka pamilya sa kahangturan.

• Unsa ang mabuhat sa mga pamilya sa pagsagubang sa mga panahon sa kalisud?

• Unsa nga mga ebidensya imong nakita nga ang mga paningkamot sama sa pag-ampo sa pamilya, pamilya nga pagtuon sa kasulatan, pakigtambag sa pamilya, panahon sa tingkaon sa pamilya, ug family home evening nakahimo og kalainan?

• Moises 2:27–28 (babaye ug lalaki gilalang ug gipanalanginan)

• Genesis 2:24 (lalaki mounong ngadto sa iyang asawa)

• D&P 49:15–16 (gi-orden sa Dios ang kaminyoon)

• Mga Taga-Efeso 6:4 (bansaya ang mga anak sa pagkamatarung)

• D&P 132:15–21 (mahangturon nga kaminyoon)

• D&P 88:119–26 (mga panudlo alang sa malampuson nga pamilya)

• D&P 93:40–50 (ang Ginoo nagmando sa mga ginikanan sa pag-amuma sa ilang mga anak diha sa kahayag ug kamatuoran)

• “Ang Banay: Usa ka Pamahayag ngadto sa Kalibutan” (anaa sa LDS.org ug diha sa daghan nga mga pamantala sa Simbahan, naglakip sa Ensign, Nob. 1995, pahina 102; Alang sa Kalig-on sa mga Kabatan-onan: Pagtuman sa Atong Katungdanan ngadto sa Dios [numero sa aytem 36550], pahina 44; ug Matinud-anon sa Pagtuo: Usa ka Pakisayran sa Ebanghelyo [numero sa aytem 36550], mga pahina 59–61)