Pagpalambo sa Atong mga Talento

Kita adunay espesyal nga mga gasa, mga talento, ug mga abilidad nga gihatag ngari kanato sa atong Langitnong Amahan. Sa dihang kita natawo, gidala nato kini nga mga gasa, mga talento, ug mga abilidad uban kanato (tan-awa sa kapitulo 2 dinhi niini nga basahon).

Si propeta Moises usa ka gamhanan nga lider, apan nagkinahanglan siya ni Aaron, iyang igsoon nga lalaki, sa pagtabang isip usa ka tigpama-ba (tan-awa sa Exodo 4:14–16). Ang pipila kanato mga lider sama ni Moises o maayo nga mga mamumulong sama ni Aaron. Ang pipila kanato makakanta og maayo o matugtog og instrumento. Ang uban kanato mahimong maayo sa mga isport o makatrabaho og maayo uban sa atong mga kamot. Ang ubang mga talento nga mahimong anaa kanato mao ang pagsabut sa uban, pagpailub, pagkamalipayon, o ang abilidad sa pagtudlo sa uban.

• Sa unsa nga paagi nga ikaw nakadawat og kaayohan gikan sa mga talento sa uban?

• Sa unsa nga paagi nga kita makapalambo sa atong mga talento?

Kita adunay usa ka responsibilidad sa pagpalambo sa mga talento nga gihatag ngari kanato. Usahay kita maghunahuna nga kita walay daghan nga mga talento o nga ang uban nga mga tawo napanalanginan og labaw nga mga abilidad kay sa anaa kanato. Usahay kita dili mogamit sa atong mga talento tungod kay nahadlok kita nga tingali mapakyas kita o sawayon sa uban. Kinahanglan nga dili nato tagoan ang atong mga talento. Kinahanglan nga ato kining gamiton. Niana makita sa uban ang atong maayong mga buhat ug dayegon ang atong Langitnong Amahan (tan-awa sa Mateo 5:16).

Adunay piho nga mga butang nga kinahanglan gayud nga atong buhaton aron sa pagpalambo sa atong mga talento. Una, kinahanglan gayud nga atong sutaon ang atong mga talento. Kinahanglan nga atong timbang-timbangon ang atong mga kaugalingon aron mahibaloan ang atong mga kalig-on ug mga abilidad. Ang atong pamilya ug mga higala makatabang kanato sa pagbuhat niini. Kinahanglan usab nga mangayo kita sa atong Langitnong Amahan sa pagtabang kanato nga makahibalo mahitungod sa atong mga talento.

Ikaduha, kinahanglan gayud nga kita andam sa paggahin og panahon ug paningkamot sa pagpalambo sa talento nga atong gitinguha.

Ikatulo, kinahanglan nga kita adunay hugot nga pagtuo nga ang atong Langitnong Amahan motabang kanato, ug kinahanglan kita adunay pagsalig sa atong mga kaugalingon.

Ikaupat, kinahanglan gayud kitang makat-on sa mga kahanas nga gikinahanglan alang kanato sa pagpalambo sa atong mga talento. Mahimo nato kining buhaton pinaagi sa pagtambong og klase, paghangyo og usa ka higala sa pagtudlo kanato, o sa pagbasa og usa ka basahon.

Ikalima, kinahanglan nga atong praktison ang atong talento. Ang matag talento nagkinahanglan og paningkamot ug trabaho aron mapalambo. Ang pagpahanas og usa ka talento kinahanglan gayud nga paningkamotan.

Ikaunom, kinahanglan gayud kita nga makigbahin sa atong talento sa uban. Kini pinaagi sa atong paggamit sa atong mga talento nga kini motubo (tan-awa sa Mateo 25:29).

Kining tanan nga mga paagi mas masayon kon kita mag-ampo ug mangayo sa panabang sa Ginoo. Buot siya nga kita mopalambo sa atong mga talento, ug Siya motabang kanato.

• Sa unsa nga paagi kita makapalambo sa atong mga talento bisan pa sa atong mga kahuyang?

Tungod kay kita mga mortal ug napukan, kita adunay mga kahuyang. Uban sa panabang sa Ginoo, ang atong kahuyang ug napukan nga kinaiyahan mahimo nga mabuntog (tan-awa sa Ether 12:27, 37). Si Beethoven mihan-ay sa iyang labing nindot nga musika human sa iyang pagkabungol. Si Enoch mibuntog sa iyang ka dili maayong mosulti ngadto sa pagkahimo nga usa ka gamhanang magtutudlo (tan-awa sa Moises 6:26–47).

Pipila sa inila nga mga magdudula sa isport mibuntog sa mga kakulian sa wala pa sila milampos sa pagpalambo sa ilang mga talento. Si Shelly Mann mao ang ingon nga ehemplo. “Sa edad nga singko siya dihay polio. … Gidala siya sa iyang mga ginikanan kada adlaw ngadto sa usa ka swimming pool diin ilang gilauman nga ang tubig motabang og pataas sa iyang mga bukton samtang siya naningkamot sa paggamit niini pag-usab. Sa diha nga siya makaalsa sa iyang bukton paggawas sa tubig pinaagi sa iyang kaugalingong paningkamot, mihilak siya sa tumang kalipay. Dayon ang iyang tumong mao ang paglangoy sa gilapdon sa pool, dayon ang gitas-on, dayon ang daghang mga gitas-on. Nagpadayon siya sa pagsulay, paglangoy, paglahutay, kada adlaw, hangtud siya midaug sa [Olympic] bulawang medalya alang sa butterfly stroke—usa sa labing lisud sa tanang mga linangoyan” (Marvin J. Ashton, sa Conference Report, Abr. 1975, 127; o Ensign, Mayo 1975, 86).

Si Heber J. Grant mibuntog sa daghan niyang mga kahuyang ug mihimo niini og mga talento. Siya aduna niini nga mga pulong isip usa ka motto: “Kanang atong pursigihan sa pagbuhat sa kadugayan mamahimong mas sayon natong buhaton—dili tungod kay ang kinaiya sa butang nausab, apan ang atong gahum sa pagbuhat miusbaw” (sa Mga Pagtulun-an sa mga Presidente sa Simbahan: Heber J. Grant [2002], 41).

Si Presidente Joseph F. Smith miingon, “Ang matag anak nga lalaki ug matag anak nga babaye sa Ginoo nakadawat og pipila ka talento, ug ang matag usa higpit nga manubag alang sa paggamit o sa sayop nga paggamit ngadto diin kini gibutang” ( Gospel Doctrine, 5th ed. [1939], 370). Ang talento maoy usa ka matang sa pagkatinugyanan (responsibilidad diha sa gingharian sa Dios). Ang sambingay sa mga talento nag-asoy kanato nga kon kita moserbisyo og maayo sa atong pagkatinugyanan, kita pagahatagan og mas dako nga mga responsibilidad. Kon kita dili moserbisyo og maayo, ang atong pagkatinugyanan sa kadugayan pagakuhaon gikan kanato. (Tan-awa sa Mateo 25:14–30.)

Gisultihan usab kita diha sa mga kasulatan nga kita pagahukman sumala sa atong mga binuhatan (tan-awa sa Mateo 16:27). Pinaagi sa pagpalambo ug sa paggamit sa atong mga talento alang sa ubang mga tawo, kita naghimo og maayo nga mga binuhatan.

Ang Ginoo mahimuot kon kita mogamit sa atong mga talento sa maalamon nga paagi. Mopanalangin siya kanato kon kita mogamit sa atong mga talento sa kaayohan sa ubang mga tawo ug sa pagtukod sa Iyang gingharian dinhi sa yuta. Ang pipila sa mga panalangin nga atong maangkon mao ang kalipay ug gugma gikan sa pagserbisyo sa atong mga kaigsoonan dinhi sa yuta. Makakat-on usab kita og pagpugong sa kaugalingon. Ang tanan niini nga mga butang mga kinahanglanon kon kita buot nga mahimong takus sa pagpuyo uban sa atong Langitnong Amahan pag-usab.

• Unsa ang pipila ka mga ehemplo sa mga tawo kansang mga talento gipalambo tungod kay gigamit nila kini sa maalamon nga paagi? (Hunahunaa ang mga tawo nga imong nailhan o mga tawo diha sa mga kasulatan o sa kasaysayan sa Simbahan.)

• Santiago 1:17 (mga gasa gikan sa Dios)

• D&P 46:8–11; 1 Timoteo 4:14 (pagtinguha ug pagpalambo sa mga gasa)

• 2 Mga Taga-Corinto 12:9 (huyang nga mga butang nahimong lig-on)

• Pinadayag 20:13; 1 Nephi 15:33; D&P 19:3 (hukman pinaagi sa atong mga binuhatan)

• Hebreohanon 13:21 (nagpakita og maayong mga binuhatan)