2010–2019
Putum Faswan Fasin Ia blong Praktisim Fet
Oktoba 2014

Putum Faswan Fasin Ia blong Praktisim Fet

I Kam long Elda Rijad G. Skot

Blong Kworom blong Olgeta Twelef Aposol.

Pikja

Nomata long ol nogud jalenj we yumi gat long laef, yumi mas mekem taem blong oltaem, praktisim strong fet blong yumi.

Taem Adam mo Iv, tufala i bin stap long Garen blong Iden, evri samting we tufala i nidim blong evri dei, tufala i kasem fulwan. Tufala i no bin gat ol hadtaem, ol jalenj, o harem nogud. From tufala i neva bin fesem ol hadtaem, tufala i no bin save se tufala i save stap hapi. Tufala i neva filim ol samting i muvmuv olbaot, mekem se tufala i no bin save filim pis.

Afta, Adam mo Iv tufala i brekem komanmen ia blong no kakae frut blong tri blong save gud mo nogud. From se tufala i mekem hemia, tufala i nomo stap long wan ples we i klin mo gud. Tufala i stat blong eksperiensem ol prinsipol blong fasin blong go agens. Tufala i stat blong kasem sik we i mekem tufala i nomo helti mo nomo strong. Tufala i stat blong filim sore mo filim glad tu.

Tru long Adam mo Iv we tufala i bin tekem frut we i no blong kakae, save blong gud mo nogud i bin kam long wol. Joes blong tufala i mekem se wanwan long yumi i save kam long wol blong Lod i traem mo testem yumi.1 Lod i bin blesem yumi wetem fridom blong mekem joes we i givim raet ia blong yumi mekem ol desisen mo blong ansa long ol desisen blong yumi. Foldaon ia i mekem se yumi save gat tugeta filing ia blong filim hapi mo filim sore long ol laef blong yumi. Yumi save kam blong andastanem pis from yumi filim ol samting i muvmuv olbaot.2

Papa blong yumi long Heven i save se hemia bae i hapen long yumi. Evri samting ia, i pat long plan blong Hem we i stret gud evriwan. Hem i mekem rere wan wei tru long laef blong Pikinini blong Hem, Jisas Kraes, Sevya blong yumi, we i obei fulwan long hem, blong Atonmen blong Hem i winim evri hat taem we yumi save gotru long hem long laef long wol ia.

Yumi laef long ol taem blong oli traem yumi. Mi no nidim blong listim evri ples we ivel i kamaot long hem long wol. I no nid blong listim ol jalenj mo ol harem nogud we i no kam long ivel, be long wan Papa long Heven we i gat lav, we i stap blesem yumi taem Hem i givim long yumi janis blong kasem jalenj mo gro. Wanwan long yumi i save gud long ol hadtaem blong yumiwan wetem soa mo harem nogud.

Lod i bin tijim yumi long laef bifo laef long wol ia, se stamba tingting blong yumi blong kam long wol ia, i blong kasem tes, oli traem yumi, mo kasem jalenj.3 Yumi save se bae yumi fesem ol spia blong ivel. Samtaem yumi save moa long ol nogud samting blong wol ia bitim ol gud samting. Profet Lihae i tijim, “From i mas nid i stap, se i mas gat wan fasin blong go agens long evri samting.”4 Nomata long ol nogud jalenj we yumi gat long laef, yumi mas mekem taem blong oltaem, praktisim strong fet blong yumi. Kaen praktis ia, i invaetem ol gud samting we i fulap long fet mo paoa blong Atonmen blong Jisas Kraes i kam insaed long laef blong yumi.

Papa blong yumi long Heven i bin givim ol tul blong helpem yumi kam long Kraes mo praktisim fet long Atonmen blong Hem. Taem ol tul ia oli kam stamba fasin blong yumi, oli givim wan isi wei blong faenem pis long ol jalenj long laef long wol ia. Tete mi bin jusum blong tokbaot fo long olgeta tul ia. Taem mi stap toktok, tingting long olsem wanem, yu stap yusum wanwan long ol tul ia, mo afta lukaotem help long Lod blong luksave olsem wanem yu save yusum gud moa wanwan long olgeta.

Prea

Fes tul i prea. Jusum blong toktok wetem Papa long Heven oltaem. Tekem taem evri dei blong serem ol tingting mo ol filing blong yu wetem Hem. Talem long Hem evri wari blong yu. Hem i intres long moa impotem samting, mo tu, ol samting we i stap hapen oltaem long laef blong yu. Serem wetem Hem evri kaen filing mo eksperiens blong yu.

From Hem i respektem fridom blong joes blong yu, Papa long Heven bae i neva fosem yu blong prea long Hem. Be taem yu praktisim fridom blong joes ia mo tekem Hem insaed long evri dei laef blong yu, hat blong yu bae i stat blong fulap wetem pis. Pis ia bae i helpem yu blong luk long ol traehad blong yu wetem wan lukluk long laef we i no save finis. Bae i helpem yu blong tekem ol jalenj ia wetem wan lukluk long laef we i no save finis.

Ol papa mo mama, help blong protektem ol pikinini blong yufala wetem paoa blong famle prea evri moning mo naet. Ol pikinini oli kasem evri dei, ol atak blong ivel blong hanggri from samting we i no blong olgeta, hae tingting, mo plante nara fasin blong sin. Protektem ol pikinini long ol nogud samting blong wol taem yumi mekem oli kam strong wetem bigfala blesing we i risal blong stap gat famle prea. Famle prea i mas stap olsem wan fas samting long evri dei laef blong yumi.

Stadi long Ol Skripja

Nambatu tul, i blong stadi long ol toktok blong God insaed long ol skripja mo ol toktok blong profet we i laef. Yumi toktok long God tru long prea. Hem, plante taem, Hem i toktok i kambak long yumi tru long toktok blong Hem we oli raetem. Blong save se voes blong Hem we I Tabu, i saon mo i filim olsem wanem, ridim ol toktok blong Hem, stadi long ol skripja mo tingting hevi long olgeta.5 Mekem i kam wan impotem pat blong evri dei laef blong yu. Sapos yu wantem ol pikinini blong yu oli luksave, andastanem, mo tekem aksen folem voes blong Spirit, yu mas stadi long olgeta skripja wetem olgeta.

Yu no mas mekem folem giaman blong Setan se yu no gat taem blong stadi long ol skripja. Jusum blong tekem taem blong stadi long olgeta. Kakae ol toktok blong God evri dei i moa impoten bitim silip, skul, wok, televisen, ol vidio gem, o sosol media. Ating bae yu nidim blong putum gud bakegen wanem yu nidim blong mekem fastaem, blong yu save givim taem blong stadi long toktok blong God. Sapos i olsem, !mekem!

I gat plante promes blong ol profet long saed blong ol blesing blong stadi long ol skripja evri dei.6

Mi ademap voes blong mi wetem promes ia: taem yu givim taem evri dei, blong yuwan mo wetem famle blong yu, blong stadi long toktok blong God, pis bae i stap long laef blong yu. Pis ia bae i no save kam long wol. Pis bae i kam long insaed long hom, insaed long famle, insaed long hat blong yuwan i go aot. Bae i wan presen blong Spirit. Bae i saenaot long yu, blong helpem ol narawan long wol raon long yu. Bae yu stap mekem samting we oli impoten blong ademap pis long wol.

Mi no stap talem se bae laef blong yu i stop blong gat ol jalenj. Tingbaot taem Adam mo Iv i bin stap long garen, oli bin fri long ol jalenj, yet oli no bin save wanem i hapines, glad mo pis.7 Ol jalenj oli impoten pat long laef long wol ia. Tru long evri dei skripja stadi, bae yu faenem pis long ol konfusen we i stap raon long yu mo gat paoa blong stanap agensem temtesen. Bae yu bildimap wan strong fet long fasin blong gladhat blong God mo save se tru long Atonmen blong Jisas Kraes evri man bae i kam stret folem taem blong God.

Family Haos Naet

Taem yu stap wok blong mekem famle blong yu i kam strong mo mekem pis i gro, tingbaot nambatri tul ia: famle haos naet evri wik. Lukaot blong no mekem famle haos naet blong yu i no wan las minit samting afta long wan bisi dei. Disaed se long Mandei naet, famle blong yu bae i stap tugeta long haos blong naet ia. No mas letem ol tingting blong wok, ol spot, ol nara aktiviti, homwok o eni nara samting i kam moa impoten bitim taem ia blong spendem tugeta long hom wetem famle blong yu.

Wanem we bae i hapen long naet blong yu i no impoten tumas bitim taem we yu stap spendem. Oli mas tijim gospel tru long wan stadi o tru long wan aktiviti. Mekem i wan eksperiens we i gat mining blong wanwan memba blong famle. Famle haos naet i wan impoten team blong serem testemoni; blong lanem ol tijing, planing mo ol skil blong oganaesem samting; blong mekem i kam strong ol famle rilesensip; bildimap ol tradisen blong famle; blong toktok long wanwan; mo moa impoten, !i blong gat gud taem tugeta!

Long las Epril Jeneral Konfrens, Sista Linda S. Rivs i talem strong: “Mi mas testifae long ol blesing blong stadi long skripja evri dei mo prea mo gat famle haos naet evri wik. Oli ol tru praktis we i tekemaot taed, givim daereksen long laef blong yumi, mo ademap proteksen long ol haos blong yumi.”8 Sista Rivs i wan waes woman. Mi talem strong long yu blong kasem testemoni blong yuwan long ol trifala impoten fasin ia blong stap mekem oltaem.

Go long Tempol

Nambafo tul i blong go long tempol. Yumi evriwan i save se i no gat wan ples we i gat moa pis long wol ia bitim ol tempol blong God. Sapos yu nogat wan tempol rekomen, mekem yuwan i rere blong kasem wan. Taem yu gat wan rekomen, yusum oltaem.9 Putum wan taem blong stap insaed long tempol. No letem eniwan o eni samting i stopem yu blong stap longwe.

Taem yu stap insaed long tempol, lisin long ol toktok blong ol odinens, tingting hevi long olgeta, prea abaot olgeta mo lukaotem blong andastanem mining blong olgeta. Tempol i wan long ol top ples blong kam blong andastanem paoa blong Atonmen blong Jisas Kraes. Lukaotem Hem long tempol. Tingbaot se plante moa blesing oli kam taem yu stap putum nem blong famle blong yumi insaed long tempol.

Olgeta fofala tul ia, oli ol stamba fasin blong sevem laef blong yu wetem paoa blong Atonmen blong Jisas Kraes. Tingbaot Sevya i Prins blong Pis. Pis long laef ia i kam long sakrifaes blong Hem we i pem praes from sin. Taem yu stap prea oltaem, moning mo naet, stadi long skripja blong yumi evri dei, gat famle haos naet evri wik, mo go long tempol oltaem, yumi stap ansa long invitesen blong Hem blong “kam long Hem.” Moa yumi developem olgeta fasin ia blong mekem oltaem, moa Setan i wantem blong mekem yumi harem nogud, be hem i no gat inaf paoa blong mekem. Taem yumi yusum olgeta tul ia, yumi praktisim fridom blong joes blong yumi blong akseptem ful presen blong sakrifaes blong Hem we i pem praes from sin.

Mi no stap talem se evri traehad blong laef bae i lus taem yu stap mekem ol samting ia. Yumi kam long laef long wol ia blong gro taem yumi winim ol hadtaem mo ol tes.10 Ol jalenj oli helpem yumi kam moa olsem Papa long Heven, mo Atonmen blong Jisas Kraes i mekem i posibol blong stap strong tru long ol jalenj. Mi testifae se taem yumi kam long Hem, yumi save stanap strong kasem en blong evri temtesen, evri harem nogud, mo evri jalenj we yumi stap fesem, long nem blong Jisas Kraes, amen.

Ol Not

  1. Luk long Moses 5:11.

  2. Luk long Moses 4–5.

  3. Luk long Abraham 3:25.

  4. Seken Nifae 2:11.

  5. Luk long Doctrine and Covenants 18:36; luk tu long ol ves 34–35.

  6. Long samfala eksampol ia i gat:Presiden Tomas S. Monson i talem: “Taem yumi stap ridim mo tingting hevi long olgeta skripja, bae yumi eksperiensem ol kwaet toktok blong Spirit i go long sol blong yumi. Yumi save faenem ansa long ol kwestin blong yumi. Yumi lanem abaot ol blesing we oli kam tru long fasin blong obei long ol komanmen blong God. Yumi kasem wan strong testemoni long saed blong Papa long Heven mo Sevya blong yumi, Jisas Kraes, mo long saed blong lav we Tufala i gat long yumi. Taem yumi joenm skripja stadi wetem ol prea, bae yumi faenem stret se gospel blong Jisas Kraes i tru. … Taem yumi tingbaot blong prea mo tekem taem blong luklukgud long ol skripja, laef blong yumi bae i gat moa blesing mo hevi trabol blong yumi bae oli nomo hevi” (“We Never Walk Alone,” Ensign o Liahona, Nov 2013, 122).Presiden Godon Bil Hinkli i talem: “Mi no holemtaet mi, mo mi promesem yufala se wanwan long yufala bae i folem smol program ia, nomata hamas taem yufala i bin ridim Buk blong Momon, insaed long laef mo hom blong yufala, bae wan moa mak blong Spirit blong Lod i kam, wan moa strong tingting blong wokbaot long fasin blong obei long ol komanmen blong Hem i kam, mo wan moa strong testemoni se Pikinini blong God i stap laef bae i kam” (“A Testimony Vibrant and True,” Ensign o Liahona, Ogis 2005, 6).Presiden Howod W. Hanta i talem: “Ol famle oli gat bigfala blesing taem ol waes papa mo mama oli singaotem ol pikinini blong olgeta raon long olgeta, mo ridim ol pej we i kamaot long skripja laebri tugeta, mo afta, toktok raon long ol naes stori mo tingting folem hamas oli andastanem olgeta. Plante taem, ol yut mo ol smol pikinini oli gat gudfala lukluk mo laekem simpol riding long saed blong relijin” (“Reading the Scriptures,” Ensign, Nov 1979, 64).Presiden Esra Taf Benson i talem: “Plante taem yumi spendem plante taem blong traem mekem aktiviti long ol stek blong yumi oli kam plante. Yumi wok had blong leftemap namba blong olgeta pipol we oli stap kam long sakramen miting. Yumi wokhad blong gat moa namba blong ol yang man oli go long misin. Yumi traehad blong leftemap namba blong ol pipol we oli go mared long tempol. Evriwan long ol bigfala hadwok ia oli impoten blong kingdom i stap gro. Be taem wanwan memba mo famle oli draonem olgeta long ol skripja evri dei, mo oltaem, ol nara eria blong aktiviti ia bae oli kam nomo olsem. Ol testemoni bae oli kam antap. Komitmen bae i kam strong moa. Famle i kam strong moa. Revelesen we i go long wanwan man o woman bae i kam fulap” (“The Power of the Word,” Ensign, Mei 1986, 81).Presiden Spensa W Kimbol i talem: “Mi faenem se taem mi toktok wanwan taem nomo wetem Hae God, mo taem mi luk se i no gat sora blong heven i stap lisin, mo i no gat voes blong heven i toktok, hemia mi mi longwe we longwe. Sapos mi draonem mi long ol skripja, nao mi nomo stap longwe tumas, mo spirit i kambak. Mi faenem se mi lavem moa olgeta we mi mas lavem wetem ful hat, maen, mo paoa, mo taem mi lavem olgeta moa, nao mi faenem i isi blong obei long kaonsel blong olgeta” (Teachings of Presidents of the Church: Spencer W. Kimball [2006], 67).Presiden Marion G. Romni i talem: “Mi save stret se, sapos insaed long ol hom blong yumi, ol papa mo mama oli ridim Buk blong Momon wetem prea mo oltaem, oli ridim olgetawan mo wetem ol pikinini blong olgeta, bae spirit blong gudfala buk ia bae i protektem ol hom blong yumi mo evriwan we oli stap insaed long hem. Spirit blong respek bae i kam antap; respek long wanwan mo tingting long wanwan bae i kam antap. Spirit blong rao bae i go. Ol papa mo mama bae oli givim kaonsel wetem moa lav mo waes tingting. Ol pikinini bae oli lisin mo folem kaonsel blong papa mo mama blong olgeta. Stret mo gud fasin bae i kam antap. Fet, hop, mo jareti—stret lav blong Kraes—bae i fulap insaed long ol hom mo laef blong yumi, mo bae i tekem i kam, pis, glad, mo hapines” (“The Book of Mormon,” Ensign, Mei 1980, 67).Presiden Boed K. Peka i talem: “Tru doktrin, taem oli andastanem gud, i jenisim ol fasin mo wei blong mekem samting. Stadi blong ol doktrin blong gospel bae i jenisim ol fasin kwiktaem moa bitim we wan stadi long saed blong fasin bae i jenisim fasin” (“Do Not Fear,”Ensign o Liahona, Mei 2004, 79).Elda Deved A. Bedna i talem: “Evri famle prea, evri taem blong skripja stadi, mo evri famle haos naet i olsem taem yu pent wan taem long kaliko blong sol blong yu. Maet bae yu no tingbaot wan taem ia. Be semmak olsem yelo mo gol peint i kam komplitim tufala, mo mekem wan naesfala peinting, taem yumi mekem oltaem ol smol samting, i save lidim yumi long ol bigfala risal long saed blong spirit” (“More Diligent and Concerned at Home,”Ensign o Liahona, Nov 2009, 19–20).

  7. Luk long Seken Nifae 2:13.

  8. Linda S. Reeves, “Protection from Pornography—a Christ-Focused Home,” Ensign o Liahona, Mei 2014, 16–17.

  9. Presiden Howod W. Hanta: “Wetem spirit ia, mi invaetem ol Lata-dei Sent blong luk long tempol blong Lod olsem bigfala saen blong membasip blong yumi. Hem i bigfala tingting blong hat blong mi blong evri memba we i klin inaf i go insaed long tempol. Bae i mekem Lod i glad sapos evri adalt memba bae i klin inaf—mo stap holem—wan tempol rekomen we i laef i stap. Ol samting we yumi mas mekem, mo no mas mekem blong stap klin inaf blong kasem wan tempol rekomen, oli ol stret samting we i mekem se bae yumi hapi olsem wan man o woman, mo olsem ol famle. Bae yumi ol pipol we i stap go long tempol. Go long tempol plante taem olsem we yu save mekem. Putum wan pikja blong tempol insaed long hom blong yufala blong mekem se ol pikinini oli stap luk. Tijim olgeta long saed blong ol stamba tingting blong haos blong Lod. Mekem olgeta oli mekem plan taem oli yangfala blong go long ples ia, mo stap klin inaf long blesing ia.” (“Exceeding Great and Precious Promises,” Ensign, Nov 1994, 8).

  10. Luk long Seken Nifae 2:2.