Papa mo Mama: Stamba Gospel Tija blong Ol Pikinini blong Olgeta

Ben Karson i talem abaot hemwan se: “Mi las studen long ful klas faef blong mi.” Wan dei, Ben i mekem wan tes blong Matematik wetem 30 problem. Studen biaen long hem i korektem, mo i givimbak long hem. Tija, Misis Wiliamson, i stat blong singaotem nem blong wanwan studen mo studen i givim mak. Nao, hem i kasem Ben. Hem i sem, i talem mak slo nomo. Misis Wiliamson i ting se hem i talem “9”, mo talem se long Ben, blong hem i gat 9 aot long 30 i wan gudfala mak. Studen biaen long Ben i talem: “I no naen. Hem i no gat wan i raet.” Ben i talem se hem i wantem haedem hem daon long floa.

Long semfala taem ia, mama blong Ben, Sonia, i bin fesem ol jalenj blong hemwan. Hem i wan aot long 24 pikinini, i kasem klas 3 nomo, mo hem i no save rid. Hem i mared taem hem i kasem 13 yia, mo i divos, i gat tu boe, mo i stap lukaotem tufala long ol nogud ples long Ditroe. Be, hem i dipen long hemwan, mo i gat strong bilif se God bae i helpem hem mo ol boe blong hem sapos oli mekem pat blong tufala.

Wan dei, wan impoten taem i hapen long laef blong hem mo laef blong ol boe blong hem. Hem i luksave se ol pipol we oli gat sakses, we hem i stap haosgel blong olgeta, oli gat ol laebri—oli stap rid. Afta wok, hem i go hom, mo ofem televisen we Ben mo brata blong hem stap lukluk. Hem i talem se: “Ol boe. Yutufala i lukluk tumas televisen. Naoia i go, yutufala save lukluk 3 program long wan wik. Long fri taem bae yutufala i go long laebri—ridim tu buk long wan wik mo kambak talem long mi.”

Tufala boe i sek. Ben i talem se hem i neva ridim wan buk long laef blong hem, be nomo, sapos skul i talem. Tufala i no wantem, tufala i komplen, tufala i rao, be i nogat nao. Nao Ben i talem: “Hem i putum loa i stap. Mi no laekem rul, be strong tingting blong hem blong luk se mitufala i kam antap i jenisim rod blong laef blong mi.”

Mo i bin wan bigfala jenis. Long klas seven, Ben i kam faswan long klas blong hem. Hem i go kasem Yel Yunivesiti long wan skolasip, afta i go long Jons Hopkins medikol skul, mo long ples ia, taem hem i kasem 33 yia, i kam jif dokta blong ol sik blong pikinini, mo wan top dokta blong katem man. ?Olsem wanem nao samting ia i posibol? Bigwan nao from wan mama, we nating i no gat ol gud samting blong laef, i wok strong long koling blong hem olsem wan mama.¹

Skripja i tokbaot wok blong papa mo mama—se i diuti blong olgeta blong tijim ol pikinini blong olgeta long doktrin blong fasin blong sakem sin, fet long Kraes Pikinini blong God we i laef, mo baptaes mo presen we i Tabu Spirit (luk longD&C 68:25).

Olsem ol papa mo mama, yumi mas kam stamba gospel tija mo eksampol long ol pikinini blong yumi—i no bisop, Sandei Skul, Yang Woman o Yang Man, be ol papa mo mama. Olsem stamba gospel tija blong olgeta, yumi save tijim olgeta se Atonmen i gat paoa mo i ril—tij abaot aedentiti mo tabu fiuja blong olgeta—mo long wei ia, givim olgeta wan strong fandesen blong bildimap yumi long hem. Taem oli talem mo mekem evri samting, hom i stret ples blong tijim gospel blong Jisas Kraes.

Wan yia i pas, mi go mekem wan jos wok long Berut, Lebanon. Taem mi stap longwe, mi lanem abaot wan gel blong 12 yia, Sara. Papa mo mama blong hem mo brata mo sista blong hem oli konvet long Jos long Romania, be afta, oli mas gobak long homples blong olgeta taem Sara i gat 7 yia nomo. Long homples blong olgeta, i no gat Jos, i no gat yunit oli oganaesem, no gat Sandei Skul, o Yang Woman program. Afta faef yia, famle ia i lanem se i gat wan branj long Berut, mo jes bifo mi kam, oli sendem gel blong tufala, Sara mo bigfala brata mo sista blong oli go kasem baptaes. Taem mi stap longwe, mi givim wan divosen long saed blong plan blong fasin blong sevem man. Plante taem, Sara i leftemap han mo ansarem ol kwestin.

Afta long miting, mo from mi save se hem i no stap long ples we Jos i stap long hem, mi kam kolosap long hem mo askem: “Sara, ?Olsem wanem nao yu save ansa blong ol kwestin ia?” Wantaem nomo, hem i ansa: “Mama blong mi i tijim mi.” Oli no gat Jos long komuniti blong olgeta, be oli bin gat gospel long hom blong olgeta. Mama blong hem i bin stamba gospel tija.

Inos nao i bin talem: “Ol toktok we mi bin harem plante taem papa blong mi i toktok long saed blong laef we i no save finis, mo glad blong ol sent, i bin go daon dip long hat blong mi” (Inos 1:3). I no gat kwestin se huia i bin stamba gospel tija blong Inos.

Mi tingbaot papa blong mi i ledaon long saed blong faea, i ridim ol skripja mo ol narafala gud buk, mo bae mi ledaon long saed blong hem. Mi tingbaot ol kad we hem i putum long paket blong sot blong hem wetem ol kwot blong ol skripja mo Sekspia, mo ol niufala toktok we bae hem i lanem baehat. Mi tingbaot ol gospel kwestin blong hem mo ol storian long tebol blong kakae. Mi tingbaot ol plante taem we papa i tekem mi go visitim ol olfala—bae mitufala i stop blong pem aeskrim blong wan, o tekem jikin sup long wan narawan, o las sekhan blong hem wetem sam mane insaed. Mi tingbaot gudfala filing mo filing blong wantem kam olsem hem.

Mi tingbaot mama blong mi, we i gat 90 yia olsem, we i kuk long olfala kijin blong hem, mo afta, i kamaot wetem wan trei kaekae. Mi askem se i stap go wea. Hem i ansa: “O mi tekem kaekae i go long ol olfala.” Mi tingting long miwan: “Mama, yu yu olfala.” Mi neva stop blong talem tangkyu from papa mo mama blong mi, we oli stamba gospel tija blong mi.

Wan samting we i gat moa mining we yumi save mekem olsem papa mo mama i blong tijim ol pikinini blong yumi long paoa blong prea, i no jes blong prea oltaem nomo. Taem mi gat 17 yia, mi stap nildaon long saed blong bed blong mi blong prea. Mi no save, mama blong mi i stanap i luk mi. Taem mi finis, hem i talem: “Tad, ?Yu stap askem Lod blong i helpem yu faenem wan gudfala waef?”

Kwestin blong mi i kasem mi wantaem. Hemia i longwe long tingting blong mi. Mi stap tingbaot basketbol, mo skul. Mo mi ansa: “no” mo hem i talem: “Ating i gud yu mekem boe. Hemia bae i moa impoten desisen we bae yu mekem.” Ol toktok ia oli draon long hat blong mi, mekem se blong ol nekis sikis yia, mi bin prea se God bae i helpem mi faenem wan gudfala waef. Mo, yes, Hem i ansarem prea ia.

Olsem ol mama mo papa, yumi save tijim ol pikinini blong yumi blong prea from ol samting we i blong taem we i no save finis—blong prea from paoa blong stap klin long saed blong seks long wan wol blong jalenj, blong stap obei, blong gat strong paoa long tingting blong stanap long wanem i raet.

I tru se plante long ol yut blong yumi oli mekem prea long naet, be ating plante long olgeta oli traehad blong mekem prea long moning. Olsem papa mo mama, olsem stamba gospel tija blong olgeta, yumi save stretem hemia. ?Wijwan papa long taem blong Buk blong Momon bae i letem boe blong olgeta i wokbaot long ples blong faet we i no gat wan aean i kavremap jes, mo i no gat naef blong faet blong protektem olgeta agensem ol atak blong enemi? Be ?hamas long yumi i stap livim ol pikinini oli wokbaot pasem doa evri moning i go long ples blong faet we i gat moa denja, blong fesem Setan mo ol hil blong temtesen, mo i no gat aean blong kavremap jes long spirit, mo i no gat naef blong faet we i kam wetem paoa blong prea we i protektem man? Lod i bin talem se yumi mas prea oltaem, blong yumi save winim Setan (luk long D&C 10:5). Olsem papa mo mama, yumi save help blong putum insaed long ol pikinini blong yumi, fasin mo paoa blong moning prea.

Yumi save tijim tu ol pikinini blong yumi blong yusum taem blong olgeta wetem waes. Wanwan taem, olsem Sonia Karson, bae yumi mas putum leg blong yumi i stap strong wetem lav, blong blokem taem blong ol pikinini long televisen, mo ol nara lektronik tul, we plante taem i tekem tumas taem blong laef blong olgeta. Be, maet yumi nid blong tanem olgeta blong spendem taem long ol samting we i lukluk moa long gospel. Maet bae oli strong long stat, sam oli komplen, be olsem Sonia Karson, yumi nid blong gat visen, mo tingting blong stanap strong long visen ia. Wan dei, ol pikinini blong yumi bae oli andastanem mo laekem wanem yumi bin mekem. Sapos yumi no mekem hemia, ?Hu bae i mekem?

Maet yumi askem yumiwan: “?Ol pikinini blong yufala oli kasem bes hadwok blong yumi long saed blong spirit, waes, mo krietem samting, o oli stap kakae haf taem mo talen afta we yumi givim evriwan long koling long Jos mo wok? Long laef we bae i kam, mi no save se ol taetol olsem bisop, o Rilif Sosaeti presiden bae oli laef yet i stap, be mi save ol taetol ia blong hasban mo waef, papa mo mama, bae oli gohed blong stap, i gogo kasem taem we i no gat en. Hemia wan risen hem i impoten tumas blong mekem ol responsabiliti blong yumi olsem papa mo mama long wol ia, blong yumi save rere from ol semmak responsabiliti ia we bae oli moa bigwan long laef we bae i kam.

Olsem ol papa mo mama, yumi save gohed wetem tras ia se God bae i neva livim yumi stap yumiwan. God i neva givim yumi wan responsabiliti sapos i no givim help we i kam long heven—long hemia mi save testifae long hem. Mi prea se bae long tabu wok blong yumi olsem papa mo mama, mo wetem God olsem patna, bae yumi kam ol stamba gospel tija mo eksampol long ol pikinini blong yumi, mi prea olsem, long nem blong Jisas Kraes, amen.