Kam Kolosap long Jea blong King ia we i God wetem Tras long Yuwan

Long wan skel blong wan kasem ten, ?wea nao bae yu save makem tras long yu wan, long saed blong spirit, we yu gat long God? ?Yu gat wan witnes blong yuwan se wanem we yu stap mekem naoia olsem wan Lata-dei Sent hem i inaf blong yu save kasem laef ya we i no save finis? ?Yu save talem long yuwan se Papa long Heven i glad long yu? ?Wanem nao bae i kam long tingting blong yu, sapos, long wan minit from naoia, bae yu gat wan intaviu wetem Sevya? ?Bambae ol sin, tu tingting, mo ol samting we i no stret i fulumap tingting blong yu, o bambae yu gat glad hop blong mitim Sevya? ?Bambae yu lukluk Hem long ae blong Hem o no? ?Bambae yu stanap long doa nomo o bae yu wokbaot i go long Hem?

Taem we enemi i no save pulum tingting blong ol Sent we oli no stret evriwan be stil oli stap trae had, olsem yu, blong no lego bilif blong yu long wan God we yu lavem, bambae hem i yusum ol rabis teknik blong seraotem yu long God. Enemi i save se fet long Kraes- kaen fet ia we i save mekem se lav mo sore mo iven ol bigbigfala merikel i stap wetem yu oltaem- i go tugeta wetem wan stret save long yuwan se yu yu stap traehad blong jusum raet. From risen ia bambae devel i lukaotem rod blong kasem hat blong yu mo giaman long yu—giaman ia, se Papa long Heven i no glad long yu, se Atonmen i no blong yu, se i no nid blong yu stap traehad, se evri nara man oli gud moa bitim yu, se yu yu no klin inaf, mo devel i gat taosen defren plan blong giaman long yu.

Sapos yu stap letem ol voes ia oli stap stikim kasem sol blong yu, bambae yu no save kam kolosap long jea blong King ia we i God wetem tras long yuwan. Wanem samting yu mekem, wanem samting yu prea from, wanem hop from wan merikel we yu gat, bambae oltaem bae yu gat tu tingting long yuwan we bae i stap daonem fet blong yu sloslo—i no fet blong yu long God nomo, be stret save mo tras long yuwan. !Blong stap laef folem gospel long wei ia i no wan gudfala samting, mo tu, hem i no helti! !Antap long hemia, hem i no nid nating! Desisen blong jenis hem i blong yuwan—mo yuwan nomo.

Mi laekem blong serem sikis tingting we yu save mekem, sapos yu folem, bambae hem i mekem voes blong devel i lego yu mo i putumbak kaen pis ia long tingting mo stret save long saed blong spirit we hem i blong yu sapos nomo yu wantem. I nomata long wanem mak yu givim long yuwan long skel ia blong 1 kasem 10, taem yu stap tekem Atonmen blong Jisas Kraes long laef blong yu bambae yu save stat blong leftemap tras blong yuwan long saed blong spirit tedei sapos yu wantem blong lisin mo mekem. Bambae mi toktok stret wetem hop blong leftemap yu be i no blong mekem yu harem nogud.

1. Tekem responsabiliti blong stap strong yuwan long saed blong spirit. Stop blong stap poenem fingga long ol nara man from situesen blong yu, stop blong stap mekem samting we i nogud i luk gud, stop blong stap mekem eskius long from wanem yu no stap traehad fulwan blong stap obei. Akseptem se yu yu “fri folem bodi blong mit mo bun” mo “fri blong jusum fridom mo laef we i no save finis” (2 Nifae 2:27). Lod i save gud wanem we i stap hapen long laef blong yu, be Hem i save gud tu taem yuwan yu stap jusum blong no laef folem gospel fulwan. Sapos hemia hem i stap hapen, yu mas ones blong talemaot, mo traehad blong kam stret fulwan insaed long ol situesen we i stap hapen insaed long laef blong yuwan. Tras long yuwan long saed blong spirit bambae i kam antap moa taem yuwan yu responsibol blong stap strong yuwan long saed blong spirit taem yu stap tekem Atonmen blong Jisas Kraes long laef blong yu evri dei.

2. Tekem responsabiliti blong stap strong yuwan long saed blong bodi. Bodi mo spirit blong yu i mekem sol blong yu luk long D&C 88:15. Blong stap fidim sol afta no lukaotgud long bodi, we hem i wan tempol, oltaem bae i lid i go long wan faet wetem saed blong spirit mo bae yu no save tingting gud long yuwan. !Sapos yu no fit long saed blong bodi, sapos yu no filim gud long bodi blong yu, mo yu save mekem wan samting blong harem gud, yu mas mekem! Elda Rasel M. Nelson i bin tijim se yumi sud “lukluk long ol bodi blong yumi olsem ol tempol blong yumi” mo yumi mas “kontrolem kaekae blong yumi mo mas stap eksasaes blong stap strong long saed blong bodi” (“We Are Children of God,” Ensign, Nov. 1998, 87 ; Liahona, Jen. 1999, 103).

Presiden Boed K. Peka i bin tijim “se spirit blong yumi mo bodi blong yumi i kam tugeta long wan wei we bodi blong yumi hem i kam wan tul blong maen blong yumi mo fandesen blong hu ia yu (“The Instrument of Your Mind and the Foundation of Your Character,” [Church Educational System fireside, Feb.2, 2003], 2; speeches.byu.edu). From hemia, plis mekem gudfala jajmen long hamas yu kakae mo oltaem givim bodi blong yu eksasaes we hem i nidim mo mas gat. Sapos bodi blong yu i save mekem, disaed tedei blong stap olsem masta blong haos blong yuwan mo statem wan eksasaes program we bae yu folem oltaem mo blong wan long taem, we bae i stret blong yu save mekem, tugeta wetem wan fasin blong kakae we i moa helti. Tras long yuwan long saed blong spirit i kam antap moa taem spirit blong yu, wetem help blong Sevya, hem i tekem kontrol long nomol fasin blong mit mo bun blong yu.

3. Hang strong long fasin blong stap helpem yuwan blong stap obei wetem wan ful hat olsem pat blong laef blong yu. Luksave se yu no save lavem God be no lavem ol komanmen blong hem tu. Standet blong Sevya i klia mo simpol: “Sapos yu lavem Mi, kipim ol komanmen blong Mi” (Jon 14:15). Sapos yu stap obei long samfala komanmen nomo bambae yu kasem samfala blesing nomo, sapos yu stap jusum wan samting we i nogud be i no wan samting we i nogud moa, yu stil stap jusum rong. Yu no save stap wajem wan rabis muvi afta harem gud long hem from se yu no wajem wan we i moa nogud. Sapos yu stap fetful blong folem samfala komanmen nomo i no minim se i oraet nomo blong no folem ol narawan. Ebraham Lincon i talem tru: “Taem we mi mekem samting we i gud mi filim gud taem we mi mekem samting we i nogud mi filim nogud” (insaed long William  H. Herndon and Jesse William Weik, Herndon’s Lincoln: The True Story of a Great Life, 3 vols. [1889], 3:439).

Mo tu, mekem ol raet samting from ol raet risen. Lod we i nidim wan hat mo wan strong maen (luk long D&C 64:34) mo Hem i we i save talemaot ol tingting mo ol wantem we i stap long ol hat (luk long D&C 33:1) I save from wanem yu go long jos—sapos yu go blong mekem atendens nomo o yu tru long wosip blong yu. Yu no save singsing long Sandei “O Babilon, O Babilon, [Mi] talem tata long yu” afta lukaotem hem bakegen sam minit afta (“Ye Elders of Israel,” Hymns, no. 319). Tingbaot se blong slak long saed blong spirit bae i neva gat hapines. Mekem jos mo gospel we i kambak fulwan long laef blong yu; bae i no wan smol pat nomo blong sosol laef blong yu. Jusumaot naoia huia bae yu mekem wosip long hem, hem i toktok blong maot nomo—kasem taem we yu stap laef folem (luk long Josua 25:15). Tras long yuwan long saed blong spirit i kam antap moa taem yu tru blong traehad, from ol raet risen, blong laef long wan tabu laef nomata yu no stret fulwan

4. Kam gud bigwan long fasin blong stap sakem sin oltaem mo kwik taem. From se Atonmen blong Jisas Kraes hem i stap blong helpem yu, yu sud stap tekem long laef blong yu oltaem, from hem i neva ran sot. Hang strong long Atonmen blong Jisas Kraes mo fasin blong sakem sin olsem wan samting we yu mas welkamem mo tekem evri dei folem oda blong Bigfala Dokta. Statem wan fasin blong sakem sin oltaem wetem glad hat. Taem yu stap mekem olsem, lukaot long trik blong devel blong pulum taem, mo no ting se bae wol i singaot long yu blong muv. Kipim ae blong yu long Sevya, kea moa long wanem Hem i tingting long yu, mo luk wanem bae i happen. Tras long yuwan long saed blong spirit bae i kam antap moa taem yuwan yu wantem mo gat wan glad hat blong sakem ol sin kwik taem, tugeta big sin wetem smol sin, taem yu tekem Atonmen blong Jisas Kraes long laef blong yu .

5. Kam gud bigwan long saed blong fogivim nara man. Lod i talem se Hem bae Hem i fogivim huia Hem i wantem fogivim, be long yumi, yumi mas fogivim evri man luk long D&C 64:10. Fogivim evri man, evri samting, oltaem, o traehad blong mekem olsem, taem olsem yu stap letem fogivnes i kam insaed long laef blong yuwan. No holemtaet ol rabis tingting o filing, no harem nogud kwiktaem, fogiv mo fogetem kwiktaem, mo yu nogat tingting ia se komanmen ia hem i no blong yu. Tras long yuwan long saed blong spirit i kam antap moa taem Lod i save se yu nogat wan rabis filing long wan nara sol.

6. Akseptem ol had taem, ol samting we i pulum taem, mo ol “sapraes” olsem pat blong eksperiens blong yu long wol ia. Lod i talem blong tingbaot se yumi stap long ples ia blong pruvum mo pas long tes, blong luk sapos bae [yumi] mekem evri samting, wanem samting we Lod [blong yumi] bambae i komandem [yumi] (luk long Abraham 3:25)—mo bae mi ademap, “nomata long wanem samting bae yu fesem.” ?Milian long ol brata mo sista blong yu oli bin o oli stap pas long tes, from wanem nao bae yu yu no pas tru long tes? Sam had taem oli kam from se yu yu wan yu no stap obei o yu slak. Ol nara hadtaem oli kam from se ol narawan oli slak o from nomo se wol ia i fulap long ol nogud fasin. Taem ol hadtaem ia oli kam, ol man blong devel oli stat blong talemaot se yu mekem wan samting i rong mo hemia i wan panismen, wan saen se Papa long Heven i no lavem yu. !No tingbaot hemia! Be, traem blong fosem yuwan blong smael mo lukluk i go long heven mo talem, “Mi andastan Lod. Mi save wanem ia hemia. ? Wan taem blong mi pruvum mi wan? Afta, wok tugeta wetem Hem blong stanap strong kasem en. Tras long yuwan long saed blong spirit bambae i kam antap moa taem yu akseptem moa se “ol hadtaem oli letem i kam insaed long [laef blong yu] from olgeta samting we [yu] stap mekem i raet” (Glenn L. Pace, “Crying with the Saints” [Brigham Young University devotional, Dec. 13, 1987], 2 emphasis added; speeches.byu.edu).

Taem mi stap prisaed long Yukren Kyiv Misin, wantaem mi bin askem wan long ol fetful sista blong mi from wanem hem i stap tingting daon long hemwan oltaem, from wanem hem i no save glad long hemwan long ol smol smol samting. Ansa blong hem i wan nomol eksampol blong wan man we i stap lisin long rong voes taem hem i ansa, “Olsem ia bae nogat man i filim harem nogud blong mi .”

Ol brata mo sista, kaonsel blong mi long sista misinari ia hem i kaonsel blong yu”: luksave mo fesem ol wiknes blong yu, be no letem olgeta i stopem yu, form se sam long olgeta bae oli kompanion blong yu kasem taem we yu livim laef long wol ia. I nomata wanem yu stap long hem naoia, long taem we yu jusum yuwan wan fasin blong sakem sin we i ones, fulap wetem glad mo mekem evri dei taem yu stap trae had blong mekem mo stap gud oltaem, Atonmen blong Sevya, olsem we i stap, bae i fulumap yu mo folem yu evri ples yu go. Taem yu stap laef olsem, yu save tru “oltaem blong holem taet fasin blong kam klin aot long ol sin blong yufala” (luk long Mosaea 4:12) evri aoa long dei, evri seken long evri minit, mo olsem stap klin fulwan mo God bae i akseptem yu oltaem.

Hem i janis blong yu, sapos yu wantem, blong kam blong save yuwan, tedei o i no long taem, se yu stap mekem God i hapi nomata long ol samting we yu stap foldaon long hem. Mi testifae long wan Sevya we i gat lav we I wantem yumi blong laef folem ol komanmen. Mi testifae long wan Sevya we i gat lav we I wantem tumas blong givim lav ia long yumi. Mi testifae long wan Sevya we i gat lav we i glad tumas taem yumi tekem wetem yumi oltaem Atonmen blong Hem wetem wan gud mo glad tingting se yumi stap folem stret rod. Mi testifae long wan Sevya we i gat lav we I wantem oltaem [blong] yu gat strong bilif blong stanap strong long fes blong God luk long D&C 121:45. Long nem blong Jisas Kraes, amen.