Ol Wok Blong Yumi Wanwan Long Saed Blong Givim Seves

Insaed long Jos blong Jisas Kraes blong Ol Lata-dei Sent, yumi gat janis mo kasem blesing blong givim seves. Long taem we mi stap olsem wan memba, mi givim seves long plante wei. Olsem Brata Yudin Falabela, papa blong Elda Enrike R. Falabela, i bin stap talem, “Hem we i givim seves long wan samting hem i gud long wan samting, hem we i no givim seves nating hem i gud blong nating nomo.” Hemia hem i ol toktok we yumi nid blong kipim insaed long ol maen mo hat blong yumi.

Taem mi stap lukaotem stret rod blong folem blong givim seves, mi faenem kamfot taem mi stap tingbaot se Sevya hem i lukluk moa long wanwan man mo famle. Lav mo gudfala kea blong Hem long wanwan man, i bin tijim mi se Hem i luksave bigfala valiu blong wanwan long ol pikinini blong Papa long Heven mo se yumi nidim blong mekemsua se wanwan man i kasem seves mo kam strong moa, tru long gospel blong Jisas Kraes

Insaed long skripja yumi ridim:

“Tingbaot se valiu blong ol sol i bigwan tumas long fes blong God …

“!Mo sapos yu mas wok evri dei long laef blong yu ... mo karem i kam, wan sol nomo i kam long mi, bae yu gat bigfala glad wetem hem insaed long kingdom blong Papa blong Mi!”¹

Evri sol hem i gat bigfala valiu tumas long God, from se yumi ol pikinini blong Hem mo yumi save kam olsem Hem.²

Lav blong Jisas Kraes i mas stap olsem gaed blong yumi sapos yumi wantem kam blong save ol nid blong olgeta we yumi save helpem long sam wei. Ol tijing blong Lod blong yumi, Jisas Kraes, i soem yumi rod ia. Mo hemia nao hem i hao ol wok blong yumi blong givim seves i stat: blong faenem aot ol nid, afta wok long ol nid ia. Olsem we Sista Linda K. Beton, Rilif Sosaeti jeneral presiden, i bin talem, “Fastaem yu lukluk gud, afta yu givim seves.”³

Presiden Tomas S. Monson hem i wan bigfala eksampol blong prinsipol ia. Long Jenuware 2005 hem i stap prisaed long wan prishud lidasip konfrens long Puerto Riko, taem hem i soemaot olsem wanem Sevya mo ol wokman blong Hem oli givim seves tru long ol wanwan wok blong olgeta. Long en blong gudfala miting ia, Presiden Monson i stat blong gritim ol prishud lida we oli stap long konfrens ia. I no longtaem, hem i luksave se wan long olgeta i stap stanap longwe, hemwan nomo, mo stap luk wanem we i stap hapen.

Presiden Monson i kamaot long grup, i go from brata ia, mo toktok long hem. Wetem wan strong filing i kam long hem, Jose R. Sayas i bin talem long hem se hem i wan merikel blong hem i kam luk hem, mo hemia hem i ansa long ol prea we hem wetem waef blong hem, Yolanda, i bin mekem bifo miting ia. Hem i talem long Presiden Monson se gel blong hem i sik tumas mo hem i gat wetem hem wan leta we waef blong hem i raetem mo i wantem blong hem i givim long Presiden Monson. Brata Sayas i bin talem long waef blong hem se bambae i had tumas blong mekem hemia from se Presiden Monson bae hem i bisi tumas. Presiden Monson i lisin long stori ia afta i askem leta ia, we hem i ridim kwaet nomo. Afta hem i putum leta ia long paket blong sut blong hem mo talem long Brata Sayas se bae hem i lukluk long rikwes blong olgeta.

Long wei ia, Lod blong yumi, Jisas Kraes, tru long wokman blong Hem, i bin tajem famle ia. Mi biliv se ol toktok blong Sevya insaed long parabol blong gudfala man Samaria hem i blong yumi: “Ale, yu go mo mekem olsem we hem i mekem.”⁴

Long 21 Septemba 1998, Hariken Joj i kilim Puerto Riko, mo i mekem plante damej. Sista Martines, faef pikinini blong mitufala, mo mi i traem bes blong stap laef insaed long hom blong mifala truaot long bigfala hariken ia mo ol strong wind blong hem. Be, mifala i no bin gat wota mo laet blong tu wik.

Taem we wota blong mifala i finis, i bin had tumas blong karem sam moa. Bae mi neva fogetem ol brata we oli givim seves long mifala taem we oli bin givim naesfala wota ia, mo bae mi no save fogetem olsem wanem ol sista oli bin givim seves long mifala; wetem lav.

Jeman Kolon i bin kam long haos blong mifala wetem wan bigfala plastic kontena blong wota insaed long wan trak. Hem i bin talem long mifala se hem i stap mekem olsem from se, long toktok blong hem, “Mi save se yu gat ol smol pikinini we oli nidim wota.” Sam dei afta, Brata Noel Munos mo Brata Heminio Gomes i fulumap tri bigfala wota tank long wan trak. Mifala i sek we oli kam long haos blong mifala mo fulumap evri botel blong mifala wetem wota blong dring, oli invaetem ol neiba blong mifala tu blong kam fulumap ol botel blong olgeta.

Ol prea blong mifala i bin ansa tru long ol seves blong ol wanwan man ia. Ol fes blong trifala brata ia i soemaot lav ia we Jisas Krae i gat long mifala, mo seves blong olgeta—long nara toktok, wok blong olgeta wanwan long saed blong givim seves—i karem plante moa samting i kam long laef blong mifala bitim wota blong dring nomo. Long evri pikinini boe o gel blong God, blong gat save ia se i gat ol man oli stap kea from ol nid blong olgeta, hem i impoten tumas.

Mi testifae long yu se Papa long Heven mo Lod blong yumi, Jisas Kraes, I save gud wanwan long yumi. From risen ia, Oli givim long yumi, wanem we yumi nidim blong bae yumi save gat janis ia blong save kasem mak ia blong kam olsem we heven i wantem yumi blong kam. Folem rod ia, Oli putum ol man we bae oli save helpem yumi. Afta, taem yumi kam olsem ol tul long han blong Olgeta, bambae yumi save givim seves mo helpem olgeta ia we oli i soem long yumi tru long revelesen.

Long wei ia, Lod Jisas Kraes bae i save helpem evri pikinini blong Papa Long Heven. Bae Gudfala Man blong Lukaotem Sipsip bae i karem tugeta evri sipsip blong hem. Bae Hem i mekem olsem long wanwan long olgeta taem oli yusum gud fridom blong jusum blong olgeta long wol ia—afta we oli bin harem voes blong wokman blong Hem mo kasem ol seves we oli bin givim long olgeta. Afta, bae olgeta i kam blong haremsave voes blong Lod, mo bae oli folem Hem. Ol wok olsem ia blong givim seves long wanwan man, i impoten tumas blong helpem yumi blong save kipim ol kavenan blong baptaes blong yumi.

Mo tu, blong stap olsem wan gudfala eksampol olsem wan disaepol blong Jisas Kraes, hem i olsem wan moa gud leta we talemaot yumiwan, long olgeta we yumi save serem gospel blong Hem wetem olgeta. Taem yumi openem maot blong yumi mo serem gospel ia blong Jisas Kraes, we i kambak, yumi kam olsem “Ol man we oli wok andanit long Hem blong lukaotem ol sipsip, wok blong yumi hem i blong fidim o lukaotem gud ol sipsip blong Hem” ⁵; yumi kam olsem “ol man we oli no gat paoa mo oli simpol” ⁶ “man blong pulum man.”⁷

Ol wanwan wok blong yumi blong givim seves i no blong wol ia nomo. Yumi save mekem wok blong olgeta we oli ded tu—blong olgeta we oli stap long spirit wol we, long taem we oli stap laef yet long wol ia, oli nogat janis ia blong kasem ol odinens blong sevem man blong gospel blong Jisas Kraes. Yumi save kipim wan jenol mo raetem daon ol famle histri blong tanem ol hat blong olgeta we oli laef i stap i go long olgeta we oli laef yet—mo tu blong tanem ol hat blong olgeta we oli laef yet i go long ol bubu blong bifo. Evri samting ia hem i blong yumi joenem tugeta famle blong yumi, jeneresen afta long jeneresen, joenem blong taem we i no save finis. Taem we yumi mekem olsem, yumi kam olsem “ol man blong sevem man … antap long hil ia Saeon.” ⁸

Yumi gat spesel janis ia blong stap ol tul long han blong Hem. Yumi save stap olsem ia tu, insaed long ol mared laef blong yumi, long ol famle blong yumi, wetem ol fren blong yumi, mo wetem ol brata mo sista blong yumi. Hemia hem i wok blong yumi wanwan blong givim seves olsem ol tru disaepol blong Jisas Kraes.

“Nao olgeta man bambae oli stanap long fes blong mi: mo mi bambae mi seraot olgeta, olsem we man blong lukaot sipsip i stap seraot ol sipsip blong hem long ol nani blong hem:

“Bambae mi putum ol sipsip oli stap long raet saed blong mi, mo ol nani oli stap long lef saed blong mi.

“Nao bambae mi talem long olgeta we oli stap long raet saed blong mi, Yufala i kam, Papa blong mi i mekem i gud tumas long yufala. Taem we hem i no mekem wol ia yet be hem i makemaot ol ples blong yufala finis long niufala wol we naoia bambae i kam:

“From we taem we mi mi hanggri, yufala i givim kakae long mi, mo taem we mi mi tosta, yufala i givim wota long mi: Taem we mi mi strenja, yufala i tekem mi mi go long haos blong yufala:

“Mo taem we mi mi neked, yufala i givim klos long mi: Taem we mi mi sik, yufala i lukaot gud long mi: Taem we mi mi stap long kalabus, yufala i kam luk mi.

“Nao bae ol stret man ia bae oli talem long mi se, ‘?Masta, mifala i luk yu wataem we yu yu hanggri nao mifala i givim kakae long yu? ?No yu yu tosta nao mifala i givim wota long yu?

“Mifala i luk yu wataem we yu yu strenja afta mifala i tekem yu kam long haos blong mifala, no yu yu neked afta mifala i givim klos long yu?

“?Mifala i luk yu wataem we yu yu sik o stap long kalabus nao mifala i kam luk yu?

“Nao Mi bambae mi talem long olgeta se, ‘Tru mi talem long yufala, taem we yufala i mekem olsem long wan brata blong mi, we i daon moa long ol narafala brata blong mi, be hemia i olsem we yufala i mekem long mi nomo.”⁹

Blong yumi mekem olsem, hem i prea blong mi long nem blong Jisas Kraes, amen.